ಆಂಧ್ರ ಸಿಎಂ 18 ತಿಂಗಳ ಮೊಮ್ಮಗನ ಬಳಿ ಇರುವ ಸೊತ್ತು ಎಷ್ಟು ಗೊತ್ತೇ ?

ಹೈದರಾಬಾದ್,ಅ.20: ಆಂಧ್ರಪ್ರದೇಶದ ಮುಖ್ಯಮಂತ್ರಿ ನಾರಾ ಚಂದ್ರಬಾಬು ನಾಯ್ಡು ಅವರ ಮೊಮ್ಮಗ ದೇವಾಂಶ್ ತನ್ನ ಅಜ್ಜನಿಗಿಂತಲೂ ಹೆಚ್ಚಿನ ಆಸ್ತಿಗಳ ಮಾಲಿಕನಾಗಿದ್ದಾನೆ !

ಈಗಷ್ಟೇ 18 ತಿಂಗಳು ತುಂಬಿರುವ ದೇವಾಂಶ್ ಬಳಿಯಿರುವ ಒಟ್ಟೂ ಆಸ್ತಿಗಳ ಮೌಲ್ಯ 11.57 ಕೋ.ರೂ.ಗಳಾಗಿದ್ದರೆ, ಹಳೆಯ ಅಂಬಾಸಿಡರ್ ಕಾರು ಸೇರಿದಂತೆ ನಾಯ್ಡು ಹೊಂದಿರುವ ಆಸ್ತಿಗಳ ಮೌಲ್ಯ ಹೇಗೆ ಲೆಕ್ಕ ಹಾಕಿದರೂ 3.73 ಕೋ.ರೂ. ದಾಟುವುದಿಲ್ಲ.
ದೇವಾಂಶ್‌ನ ತಂದೆ ಹಾಗೂ ನಾರಾ ಸಾಮ್ರಾಜ್ಯದ ಉತ್ತರಾಧಿಕಾರಿ ಲೋಕೇಶ್ ಅವರೇ ಸ್ವತಃ ಈ ವಿಷಯವನ್ನು ಬಹಿರಂಗಗೊಳಿಸಿದ್ದಾರೆ.
ಅಜ್ಜಿ ಭುವನೇಶ್ವರಿ 9.17 ಕೋ.ರೂ.ಗಳ ಆಸ್ತಿಯನ್ನು ದೇವಾಂಶ್ ಹೆಸರಿಗೆ ವರ್ಗಾಯಿಸಿದ್ದರೆ, ತಾಯಿಯ ತಂದೆ ಹಾಗೂ ಚಿತ್ರನಟ ಬಾಲಕೃಷ್ಣ ಉಡುಗೊರೆಯಾಗಿ ಆತನ ಹೆಸರಿನಲ್ಲಿ 2.4 ಕೋ.ರೂ.ಗಳ ನಿರಖು ಠೇವಣಿಯನ್ನಿರಿಸಿದ್ದಾರೆ.

ಬ್ಯಾಂಕ ಸಾಲದ ಬಡ್ಡಿಯಿಂದಾಗಿ ತನ್ನ ತಂದೆಯ ಸಂಪತ್ತು ಸ್ವಲ್ಪ ಕರಗಿದೆ ಎನ್ನುವುದು ಲೋಕೇಶ್ ಅಭಿಪ್ರಾಯ. ನಾಯ್ಡು ಜ್ಯುಬಿಲಿ ಹಿಲ್‌ನಲ್ಲಿ 3.68 ಕೋ.ರೂ.ಮೌಲ್ಯದ ಮನೆಯೊಂದನ್ನು ಹೊಂದಿದ್ದಾರೆ, ಆದರೆ ಅವರು ಬ್ಯಾಂಕ್ ಆಫ್ ಬರೋಡಾದಿಂದ 3.68 ಕೋ.ರೂ.ಗಳ ಸಾಲವನ್ನು ಪಡೆದಿದ್ದಾರೆ. ಹೀಗಾಗಿ ಅವರ ನಿವ್ವಳ ಮೌಲ್ಯ 67 ಲ.ರೂ.ಆಗಿದೆ. ಕಳೆದ ವರ್ಷ ಅವರ ನಿವ್ವಳ ಸಂಪತ್ತು 42 ಲ.ರೂ.ಆಗಿತ್ತು.

ಲೋಕೇಶ್ 14.50 ಕೋ.ರೂ.ಆಸ್ತಿ ಮತ್ತು 6.35 ಕೋ.ರೂ.ಸಾಲ ಹೊಂದಿದ್ದಾರೆ. ಹೀಗಾಗಿ ಅವರ ನಿವ್ವಳ ಸಂಪತ್ತು 8.15 ಕೋ.ರೂ.ಗಳಾಗಿವೆ. ಅವರ ಪತ್ನಿ ಬ್ರಹ್ಮಿಣಿ ಭೂಮಿ ಮತ್ತು ಚಿನ್ನಾಭರಣಗಳು ಸೇರಿದಂತೆ 5.38 ಕೋ.ರೂ.ಗಳ ಸಂಪತ್ತಿನ ಒಡತಿಯಾಗಿದ್ದಾರೆ.

ಶೇರು ಪೇಟೆಯಲ್ಲಿ ಲಿಸ್ಟೆಡ್ ಕಂಪನಿ ಹೆರಿಟೇಜ್ ಫುಡ್ಸ್ ಲಿ.ಅನ್ನು ನಿಭಾಯಿಸುತ್ತಿರುವ ನಾಯ್ಡು ಅವರ ಪತ್ನಿ ಭುವನೇಶ್ವರಿ 38.66 ಕೋ.ರೂ.ಮೌಲ್ಯದ ಆಸ್ತಿಯನ್ನು ಹೊಂದಿದ್ದಾರೆ. ಆದರೆ ಅವರು 13 ಕೋ.ರೂ.ಸಾಲವನ್ನೂ ಹೊಂದಿರುವುದರಿಂದ ಅವರ ನಿವ್ವಳ ಸಂಪತ್ತು 24.84 ಕೋ.ರೂ.ಆಗಿದೆ.

ಕುತೂಹಲದ ವಿಷಯವೆಂದರೆ ನಾಯ್ಡು ತನ್ನ ಹಳೆಯ ಆಸ್ತಿಯಾಗಿರುವ 1.52 ಲ.ರೂ.ಮೌಲ್ಯದ 1993ನೇ ಮಾಡೆಲ್‌ನ ಹಳೆಯ ಅಂಬಾಸಿಡರ್ ಕಾರಿನ ಬಳಕೆಯನ್ನೇ ಮುಂದುವರಿಸಿದ್ದಾರೆ. ಭುವನೇಶ್ವರಿ 2008ರ ಮಾಡೆಲ್‌ನ,91 ಲ.ರೂ.ಮೌಲ್ಯದ ಕಾರಿನಲ್ಲಿ ತಿರುಗಾಡುತ್ತಾರೆ.