ಹಲೋ, ಮೈ ನರೇಂದ್ರ ಮೋದಿ ಬೋಲ್ ರಹಾ ಹ್ಞೂ...

ವಾರಣಾಸಿ, ಅ.22: ನವಜಾತ ಹೆಣ್ಣುಮಗುವಿಗೆ ಪ್ರಧಾನಿ ನರೇಂದ್ರ ಮೋದಿಯೇ ನಾಮಕರಣ ಮಾಡಬೇಕು ಎಂಬ ಮೀರ್‌ಪುರ ದಂಪತಿಯ ಬಯಕೆಯನ್ನು ಮೋದಿ ಈಡೇರಿಸಿದ್ದಾರೆ. ಶಿಶುವಿನ ತಾಯಿ, ಪ್ರಧಾನಿಗೆ ಪತ್ರ ಬರೆದು ಈ ಅಭಿಲಾಷೆ ವ್ಯಕ್ತಪಡಿಸಿದ್ದರು. ಇದರ ಅನ್ವಯ "ಮೋದಿ ಸ್ವತಃ ಕರೆ ಮಾಡಿ, ನಮಗೆ ಅಭಿನಂದನೆ ಹೇಳಿದ್ದಾರೆ. ಈ ಶಿಶು ಮುಂದೆ ಶಕ್ತಿಯಾಗಿ ಮಾರ್ಪಡುತ್ತದೆ ಎಂದು ಪ್ರಧಾನಿ ಹಾರೈಸಿದ್ದಾರೆ" ಎಂದು ಹೆಣ್ಣುಮಗುವಿನ ತಂದೆ ಭರತ್ ಸಿಂಗ್ ಹೇಳಿದ್ದಾರೆ.

"ಹಲೋ ಮೈ ನರೇಂದ್ರ ಮೋದಿ ಬೋಲ್ ರಹಾ ಹ್ಞೂ.. ಆಪ್‌ಕಿ ಪತ್ನಿ ವಿಭಾ ಸಿಂಗ್ ಕಾ ಪತ್ರ್ ಮಿಲಾ, ಆಪ್ಕೊ ಬದಾಯಿ, ಆಪ್ಕೆ ಘರ್ ಬೇಟಿ ಆಯಿ ಹೈ, ಇಸ್ ಬಚ್ಚಿ ಕಾ ನಾಮಕರಣ್ ವೈಭವಿ ಕರೀನ್, ಇಸ್ಮೆ ಮಾತಾ ಏವಂ ಪಿತಾ ದೋನೊ ಕಾ ನಾಮ್ ಹೈ (ಹಲೋ, ನಾನು ನರೇಂದ್ರ ಮೋದಿ. ನಿಮ್ಮ ಪತ್ನಿ ವಿಭಾಸಿಂಗ್ ಬರೆದ ಪತ್ರ ಸಿಕ್ಕಿದೆ. ಅಭಿನಂದನೆಗಳು. ನಿಮಗೆ ಹೆಣ್ಣುಮಗುವಾಗಿದೆ. ನಿಮ್ಮ ತಂದೆ ಹಾಗೂ ತಾಯಿಯ ಹೆಸರನ್ನು ಒಳಗೊಂಡ ವೈಭವಿ ಎಂಬ ಹೆಸರಿಡಿ" ಎಂದು ಮೋದಿ, ದೂರವಾಣಿ ಸಂಭಾಷಣೆ ವೇಳೆ ತಿಳಿಸಿದರು.

 "ಪ್ರಧಾನಿಯಿಂದ ಕರೆಬಂದದ್ದು ಒಂದು ಕ್ಷಣ ನನ್ನನ್ನು ನಿಬ್ಬೆರಗಾಗಿಸಿತು" ಎಂದು ನಯಾಪುರ ಹಸಿಪುರ ಗ್ರಾಮದ ಭರತ್ ಹೇಳಿದರು. ಪ್ರಧಾನಮಂತ್ರಿ ನಾಮಕರಣ ಮಾಡಿರುವುದು ನನ್ನ ಮಗಳ ಅದೃಷ್ಟ ಎಂದರು. ಮೋದಿ ಅವರ ಅನುಯಾಯಿಗಳಾಗಿರುವ ಈ ದಂಪತಿ, ತಮ್ಮ ಮಗುವಿಗೆ ಮೋದಿಯೇ ನಾಮಕರಣ ಮಾಡಬೇಕು ಎಂದು ಬಯಸಿದ್ದರು. ಆಗಸ್ಟ್ 13ರಂದು ಮಗು ಹುಟ್ಟಿದ್ದು, ತಾಯಿ ಬರೆದ ಪತ್ರ ಆಗಸ್ಟ್ 22ರಂದು ಪ್ರಧಾನಿ ಕಚೇರಿ ತಲುಪಿತ್ತು. 30ರಂದು ಮೋದಿ ಕರೆ ಮಾಡಿದ್ದರು.