ಪ್ರಥಮ ಟೆಸ್ಟ್: ಇಂಗ್ಲೆಂಡ್ಗೆ ರೋಚಕ ಗೆಲುವು ತಂದುಕೊಟ್ಟ ಸ್ಟೋಕ್ಸ್
ಚಿತ್ತಗಾಂಗ್, ಅ.24: ಕೇವಲ ಮೂರೇ ಎಸೆತಗಳಲ್ಲಿ ಬಾಂಗ್ಲಾದೇಶದ ಕೊನೆಯ ಎರಡು ವಿಕೆಟ್ಗಳನ್ನು ಉರುಳಿಸಿದ ಬೆನ್ ಸ್ಟೋಕ್ಸ್ ಇಂಗ್ಲೆಂಡ್ಗೆ ಮೊದಲ ಟೆಸ್ಟ್ ಪಂದ್ಯದಲ್ಲಿ 22 ರನ್ಗಳ ರೋಚಕ ಗೆಲುವು ತಂದುಕೊಟ್ಟಿದ್ದಾರೆ.
ಸೋಮವಾರ 8 ವಿಕೆಟ್ಗಳ ನಷ್ಟಕ್ಕೆ 253 ರನ್ನಿಂದ ಬ್ಯಾಟಿಂಗ್ ಆರಂಭಿಸಿದ ಬಾಂಗ್ಲಾದೇಶಕ್ಕೆ ಪಂದ್ಯವನ್ನು ಗೆಲ್ಲಲು ಅಂತಿಮ ಎರಡು ವಿಕೆಟ್ ನೆರವಿನಿಂದ 33 ರನ್ ಗಳಿಸಬೇಕಾಗಿತ್ತು. ಬೆಳಗ್ಗೆ ಮೊದಲ 3 ಓವರ್ಗಳಲ್ಲಿ 10 ರನ್ ಗಳಿಸಿದ ಬಾಂಗ್ಲಾದೇಶ ಗೆಲುವಿನ ಸನಿಹ ತಲುಪಿತ್ತು.
ನಾಲ್ಕನೆ ಓವರ್ನ ಮೊದಲ ಎಸೆತದಲ್ಲಿ ತೈಜುಲ್ ಇಸ್ಲಾಮ್ರನ್ನು ಎಲ್ಬಿಡಬ್ಲು ಬಲೆಗೆ ಬೀಳಿಸಿದ ಸ್ಟೋಕ್ಸ್ ಇಂಗ್ಲೆಂಡ್ಗೆ ಮೇಲುಗೈ ಒದಗಿಸಿದರು. ಕೊನೆಯ ಬ್ಯಾಟ್ಸ್ಮನ್ ಶಫಿವುಲ್ ಇಸ್ಲಾಮ್ ಕೇವಲ 2 ಎಸೆತಗಳನ್ನು ಎದುರಿಸಿ ಸ್ಟೋಕ್ಸ್ಗೆ ವಿಕೆಟ್ ಒಪ್ಪಿಸಿದಾಗ 263 ರನ್ಗೆ ಬಾಂಗ್ಲಾದೇಶ ಗಂಟುಮೂಟೆ ಕಟ್ಟಿತು. ಏಕಾಂಗಿ ಹೋರಾಟ ನೀಡಿದ ಶಬ್ಬೀರ್ರಹ್ಮಾನ್(ಔಟಾಗದೆ 64) ನಿರಾಸೆಯಿಂದ ಪೆವಿಲಿಯನ್ ಹಾದಿ ಹಿಡಿದರು.
ಇಂಗ್ಲೆಂಡ್ನ ಎರಡನೆ ಇನಿಂಗ್ಸ್ನಲ್ಲಿ ನಿರ್ಣಾಯಕ 85 ರನ್ ಗಳಿಸಿದ್ದ ಸ್ಟೋಕ್ಸ್ ಬಾಂಗ್ಲಾದೇಶಕ್ಕೆ ಕಠಿಣ ಸವಾಲು ನೀಡಲು ಕಾರಣರಾದರು. ಬೌಲಿಂಗ್ನಲ್ಲೂ ಮಿಂಚುವ ಮೂಲಕ ಬಾಂಗ್ಲಾಕ್ಕೆ ಗೆಲುವನ್ನು ನಿರಾಕರಿಸಿದರು.
‘‘30 ರನ್ ಹಾಗೂ ಎರಡು ವಿಕೆಟ್ಗಳ ನಡುವೆ ಭಾರೀ ಅಂತರವಿದೆ. ಆದಾಗ್ಯೂ ನಾವು ಗೆಲುವಿನ ಸನಿಹದಲ್ಲಿ ಎಡವಿದೆವು. ನಾವು ಈ ಪಂದ್ಯವನ್ನು ಗೆಲ್ಲುತ್ತಿದ್ದರೆ, ಅದೊಂದು ಅದ್ಭುತ ಟೆಸ್ಟ್ ಪಂದ್ಯವಾಗುತ್ತಿತ್ತು’’ ಎಂದು ಬಾಂಗ್ಲಾದೇಶದ ನಾಯಕ ಮುಶ್ಫಿಕುರ್ರಹೀಂ ತಿಳಿಸಿದ್ದಾರೆ.
ಇಂಗ್ಲೆಂಡ್ ತಂಡ ಮೊದಲ ಇನಿಂಗ್ಸ್ನಲ್ಲಿ 293 ರನ್ ಗಳಿಸಿತ್ತು. ಬಾಂಗ್ಲಾದೇಶವನ್ನು ಮೊದಲ ಇನಿಂಗ್ಸ್ನಲ್ಲಿ 248 ರನ್ಗೆ ಆಲೌಟ್ ಮಾಡಿ 45 ರನ್ ಮುನ್ನಡೆ ಸಂಪಾದಿಸಿತ್ತು.
ಎಕ್ಸ್ಟ್ರಾ ಇನಿಂಗ್ಸ್
1: ಬಾಂಗ್ಲಾದೇಶ ಇದೇ ಮೊದಲ ಬಾರಿ ಕೇವಲ 22 ರನ್ ಅಂತರದಿಂದ ಟೆಸ್ಟ್ ಪಂದ್ಯವನ್ನು ಸೋತಿದೆ. 2012-13ರಲ್ಲಿ ಢಾಕಾದಲ್ಲಿ ವೆಸ್ಟ್ಇಂಡೀಸ್ ವಿರುದ್ಧ 77 ರನ್ಗಳ ಅಂತರದಿಂದ ಸೋತಿತ್ತು. 9: ಇಂಗ್ಲೆಂಡ್ ಟೆಸ್ಟ್ ಕ್ರಿಕೆಟ್ನಲ್ಲಿ 9ನೆ ಬಾರಿ ಅತ್ಯಂತ ಕಡಿಮೆ ಅಂತರದ ಜಯ ಸಾಧಿಸಿದೆ. ಆಸ್ಟ್ರೇಲಿಯ ವಿರುದ್ಧ ಹೆಚ್ಚಿನ ಬಾರಿ ಕಡಿಮೆ ಅಂತರದ ಜಯ ಸಾಧಿಸಿರುವ ಇಂಗ್ಲೆಂಡ್ ಈ ಹಿಂದೆ 1998ರಲ್ಲಿ ದಕ್ಷಿಣ ಆಫ್ರಿಕದ ವಿರುದ್ಧ 23 ರನ್ಗಳ ಜಯ ಸಾಧಿಸಿತ್ತು.
1980: ಏಷ್ಯಾದಲ್ಲಿ 1979-80ರಲ್ಲಿ ಇಂಗ್ಲೆಂಡ್ನ ಆಟಗಾರನೊಬ್ಬ ಟೆಸ್ಟ್ ಪಂದ್ಯದಲ್ಲಿ 100ಕ್ಕೂ ಅಧಿಕ ರನ್ ಹಾಗೂ 5ಕ್ಕೂ ಅಧಿಕ ವಿಕೆಟ್ ಪಡೆದಿದ್ದರು. ಇದೀಗ ಬೆನ್ ಸ್ಟೋಕ್ಸ್ ಆ ಸಾಧನೆಯನ್ನು ಪುನರಾವರ್ತಿಸಿದ್ದಾರೆ. ಸ್ಟೋಕ್ಸ್ ಬ್ಯಾಟಿಂಗ್ನಲ್ಲಿ 18 ಹಾಗೂ 85 ರನ್ ಗಳಿಸಿದ್ದರು. ಬೌಲಿಂಗ್ನಲ್ಲಿ 26 ರನ್ಗೆ 4 ಹಾಗೂ 20 ರನ್ಗೆ 2 ವಿಕೆಟ್ಗಳನ್ನು ಉರುಳಿಸಿದ್ದಾರೆ.
3: ಬೆನ್ ಸ್ಟೋಕ್ಸ್ ಟೆಸ್ಟ್ನಲ್ಲಿ ಮೂರನೆ ಬಾರಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದಿದ್ದಾರೆ. 2015ರ ಋತುವಿನ ಬಳಿಕ ಎಲ್ಲ ಮೂರು ಪ್ರಶಸ್ತಿಗಳನ್ನು ಗೆದ್ದುಕೊಂಡಿದ್ದಾರೆ.
1: ಬಾಂಗ್ಲಾದೇಶ ಇದೇ ಮೊದಲ ಬಾರಿ ಇಂಗ್ಲೆಂಡ್ ವಿರುದ್ಧ ಟೆಸ್ಟ್ನಲ್ಲಿ ಎಲ್ಲ 20 ವಿಕೆಟ್ಗಳನ್ನು ಉರುಳಿಸಿದೆ. ಈ ಹಿಂದೆ ಝಿಂಬಾಬ್ವೆ ಹಾಗೂ ವೆಸ್ಟ್ಇಂಡೀಸ್ ವಿರುದ್ಧ ಮಾತ್ರ ಈ ಸಾಧನೆ ಮಾಡಿತ್ತು.
1: ಶಬ್ಬೀರ್ರಹ್ಮಾನ್ ಚೊಚ್ಚಲ ಪಂದ್ಯದಲ್ಲಿ ಅರ್ಧಶತಕ ಶತಕ ಬಾರಿಸಿದ ಬಾಂಗ್ಲಾದೇಶದ ಮೊದಲ ಬ್ಯಾಟ್ಸ್ಮನ್. ಶಬ್ಬೀರ್ರಹ್ಮಾನ್ 7ನೆ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಿ ಔಟಾಗದೆ 64 ರನ್ ಗಳಿಸಿದ ವಿಶ್ವದ 9ನೆ ಬ್ಯಾಟ್ಸ್ಮನ್.
ಸಂಕ್ಷಿಪ್ತ ಸ್ಕೋರ್
ಇಂಗ್ಲೆಂಡ್ ಪ್ರಥಮ ಇನಿಂಗ್ಸ್: 293
ಇಂಗ್ಲೆಂಡ್ ದ್ವಿತೀಯ ಇನಿಂಗ್ಸ್: 240
ಬಾಂಗ್ಲಾದೇಶ ಪ್ರಥಮ ಇನಿಂಗ್ಸ್: 248
ಬಾಂಗ್ಲಾದೇಶ ಎರಡನೆ ಇನಿಂಗ್ಸ್: 263
(ಶಬ್ಬೀರ್ರಹ್ಮಾನ್ ಅಜೇಯ 64, ಇಮ್ರಾನ್ ಕಯೆಸ್ 43, ಬ್ಯಾಟಿ 3-65, ಅಲಿ 2-60, ಬ್ರಾಡ್ 2-31, ಸ್ಟೋಕ್ಸ್ 2-20)
