ಉಡುಪಿ ಸರಕಾರಿ ಆಸ್ಪತ್ರೆಯ ಖಾಸಗೀಕರಣ ವಿರೋಧಿಸಿ ಧರಣಿ
![ಉಡುಪಿ ಸರಕಾರಿ ಆಸ್ಪತ್ರೆಯ ಖಾಸಗೀಕರಣ ವಿರೋಧಿಸಿ ಧರಣಿ ಉಡುಪಿ ಸರಕಾರಿ ಆಸ್ಪತ್ರೆಯ ಖಾಸಗೀಕರಣ ವಿರೋಧಿಸಿ ಧರಣಿ](https://www.varthabharati.in/sites/default/files/images/articles/2016/10/28/Protest-(4).jpg)
ಉಡುಪಿ, ಅ.28: ಉಡುಪಿ ಜಿಲ್ಲಾ ಸರಕಾರಿ ಮಹಿಳೆಯರ ಮತ್ತು ಮಕ್ಕಳ ಆಸ್ಪತ್ರೆಯನ್ನು ಖಾಸಗಿಯವರಿಗೆ ಹಸ್ತಾಂತರಿಸುವ ಕ್ರಮವನ್ನು ವಿರೋಧಿಸಿ ಸರಕಾರಿ ಮಕ್ಕಳ ಹಾಗೂ ಮಹಿಳಾ ಹೆರಿಗೆ ಆಸ್ಪತ್ರೆ ರಕ್ಷಣಾ ನಾಗರಿಕ ಒಕ್ಕೂಟದ ನೇತೃತ್ವದಲ್ಲಿ ಇಂದು ಉಡುಪಿಯಲ್ಲಿ ವೌನ ಮೆರವಣಿಗೆ ಹಾಗೂ ಪ್ರತಿಭಟನೆಯನ್ನು ಹಮ್ಮಿಕೊಳ್ಳಲಾಗಿತ್ತು.
ಜೋಡುಕಟ್ಟೆಯಲ್ಲಿ ವೌನ ಮೆರವಣಿಗೆಗೆ ಚಾಲನೆ ನೀಡಿದ ಸಾಹಿತಿ ವೈದೇಹಿ ಮಾತನಾಡಿ, ಹಾಜಿ ಅಬ್ದುಲ್ಲಾ ದಾನ ಮಾಡಿದ ಜಾಗವನ್ನು ಸರಕಾರ, ಖಾಸಗಿಯವರಿಗೆ ನೀಡುತ್ತಿರುವುದು ಜನತೆಗೆ ಮಾಡಿದ ಅವಮಾನ ಹಾಗೂ ನಮ್ಮ ದುರ್ಬಲರನ್ನಾಗಿಸುತ್ತಿದೆ. ಆಸ್ಪತ್ರೆ ದುಸ್ಥಿತಿಯಲ್ಲಿದೆ ಎಂಬ ಕಾರಣ ನೀಡಿ ಖಾಸಗೀಕರಣ ಮಾಡುತ್ತಿರುವುದು ರಾಜ್ಯ ಸರಕಾರದ ದೌರ್ಬಲ್ಯವನ್ನು ತೋರಿಸುತ್ತದೆ ಎಂದು ಕಟುವಾಗಿ ಟೀಕಿಸಿದರು.
ಇದು ಖಾಸಗಿಯವರ ಆಸ್ತಿ ಅಲ್ಲ. ಇದು ಈಗ ಜನರ ಆಸ್ತಿ. ಬಡವರ ಆಸ್ಪತ್ರೆಯನ್ನು ಶ್ರೀಮಂತರಿಗೆ ಕೊಡಬೇಡಿ. ಉತ್ತಮವಾಗಿ ಕೆಲಸ ಮಾಡುತ್ತಿ ರುವ ಆಸ್ಪತ್ರೆಯನ್ನು ಖಾಸಗಿಯವರಿಗೆ ನೀಡುವ ಮೂಲಕ ಸರಕಾರ ಜನರಿಗೆ ದ್ರೋಹ ಮಾಡುತ್ತಿದೆ. ಆಸ್ಪತ್ರೆಯ ಹೆಸರನ್ನು ಬದಲಾಯಿಸುವ ಹಕ್ಕು ಯಾರಿಗೂ ಇಲ್ಲ. ದಾನಪತ್ರ ನಾಪತ್ತೆಯಾಗಿದೆ ಎಂದು ಹೇಳುತ್ತಿದ್ದಾರೆ. ಇದಕ್ಕೆ ದಾನಪತ್ರದ ಅಗತ್ಯವೇ ಇಲ್ಲ. ಪೀಳಿಗೆಯಿಂದ ಪೀಳಿಗೆಗೆ ಜನರ ಬಾಯಿ ಯಿಂದಲೇ ಇದು ಹರಿದುಬಂದಿದೆ ಎಂದರು.
ನಂತರ ಪ್ರತಿಭಟನಕಾರರು ಬಾಯಿಗೆ ಕಪ್ಪು ಪಟ್ಟಿ ಕಟ್ಟಿ ಜೋಡುಕಟ್ಟೆಯಿಂದ ಕೆ.ಎಂ.ಮಾರ್ಗವಾಗಿ ಸರ್ವಿಸ್ ಬಸ್ ನಿಲ್ದಾಣದ ಕ್ಲಾಕ್ ಟವರ್ವರೆಗೆ ವೌನ ಮೆರವಣಿಗೆ ನಡೆಸಿದರು. ಮೆರವಣಿಗೆಯಲ್ಲಿ ನಿತ್ಯಾನಂದ ಒಳಕಾಡು ಅವರ ಹೆರಿಗೆಗಾಗಿ ಆಸ್ಪತ್ರೆಗೆ ದಾಖಲಾದ ಬಡ ಮಹಿಳೆಯ ಪರಿಸ್ಥಿತಿಯನ್ನು ಬಿಂಬಿಸುವ ಅಣುಕು ಪ್ರದರ್ಶನ ಗಮನಸೆಳೆಯಿತು. ಈ ಮಧ್ಯೆ ಕೆ.ಎಂ. ಮಾರ್ಗದಲ್ಲಿರುವ ಸರಕಾರಿ ಆಸ್ಪತ್ರೆಯ ಎದುರು ವೌನಾಚಾರಣೆ ನಡೆಸಲಾಯಿತು.
ಕ್ಲಾಕ್ ಟವರ್ ಎದುರು ನಡೆದ ಪ್ರತಿಭಟನಾ ಸಭೆಯನ್ನುದ್ದೇಶಿಸಿ ಮಾತನಾಡಿದ ಒಕ್ಕೂಟದ ಸಂಚಾಲಕ ಡಾ.ಪಿ.ವಿ.ಭಂಡಾರಿ, ಆಸ್ಪತ್ರೆಯ ಖಾಸಗೀ ಕರಣದಿಂದ ಸರಕಾರಕ್ಕೆ ಯಾವುದೇ ನಷ್ಟ ಇಲ್ಲ. ನಷ್ಟ ಎಲ್ಲವೂ ಜನರಿಗೆ. ಯಾವುದೇ ಕಾರಣಕ್ಕೂ ಇದನ್ನು ಖಾಸಗಿಯವರಿಗೆ ಒಪ್ಪಿಸಲು ಅವಕಾಶ ನೀಡುವುದಿಲ್ಲ. ಇದರ ವಿರುದ್ಧ ಕಾನೂನು ಸೇರಿದಂತೆ ಎಲ್ಲ ರೀತಿಯಲ್ಲಿ ಹೋರಾಟ ನಡೆಸಲಾಗುವುದು ಎಂದು ತಿಳಿಸಿದರು.
ಈ ಆಸ್ಪತ್ರೆಯನ್ನು ಅಭಿವೃದ್ಧಿ ಪಡಿಸಲು ಸರಕಾರಕ್ಕೆ ಸಾಧ್ಯವಾಗದಿದ್ದರೆ ಒಂದು ವರ್ಷ ಈ ನಿರ್ಧಾರವನ್ನು ಮುಂದೂಡಲಿ. ನಾವೇ ಜನರಿಂದ ಚಂದಾ ಸಂಗ್ರಹಿಸಿ ಈ ಆಸ್ಪತ್ರೆಯನ್ನು 100-150 ಬೆಡ್ಗಳನ್ನಾಗಿ ಅಭಿವೃದ್ಧಿ ಪಡಿಸುತ್ತೇವೆ. ಈ ಜಾಗಕ್ಕೂ ಜನರಿಗೂ ಭಾವನಾತ್ಮಕ ಸಂಬಂಧವಿದೆ. ಆದು ದರಿಂದ ಖಾಸಗಿಯವರಿಗೆ ಈ ಜಾಗವನ್ನು ನೀಡಬಾರದು ಎಂದರು.
ಈ ಸಂದರ್ಭದಲ್ಲಿ ದಲಿತ ದಮನಿತರ ಸ್ವಾಭಿಮಾನಿ ಸಂಘರ್ಷ ಸಮಿತಿಯ ಅಧ್ಯಕ್ಷ ಸುಂದರ್ ಮಾಸ್ಟರ್, ಕರ್ನಾಟಕ ಕೋಮು ಸೌಹಾರ್ದ ವೇದಿಕೆಯ ಜಿಲ್ಲಾಧ್ಯಕ್ಷ ಜಿ.ರಾಜಶೇಖರ್, ಹಾಜಿ ಅಬ್ದುಲ್ಲಾರ ಸಂಬಂಧಿ ಖುರ್ಷಿದ್, ಮೀನಾಕ್ಷಿ ಭಂಡಾರಿ, ಜಮಾಅತೆ ಇಸ್ಲಾಮಿ ಹಿಂದ್ನ ಅಕ್ಬರ್ ಅಲಿ, ಸಹಮತ ಸಂಘಟನೆಯ ಶಶಿಧರ ಹೆಮ್ಮಾಡಿ, ಕರ್ನಾಟಕ ಜನಾರೋಗ್ಯ ಚಳವಳಿಯ ಟೀನಾ ಮಾತನಾಡಿದರು.
ಪ್ರತಿಭಟನೆಯಲ್ಲಿ ಮಾಜಿ ಶಾಸಕರಾದ ಯು.ಆರ್.ಸಭಾಪತಿ, ರಘುಪತಿ ಭಟ್, ಲೇಖಕಿ ಜ್ಯೋತಿ ಗುರುಪ್ರಸಾದ್, ವಿವಿಧ ಸಂಘಟನೆ ಪದಾಧಿಕಾರಿ ಗಳಾದ ಬಾಲಕೃಷ್ಣ ಶೆಟ್ಟಿ, ಹುಸೇನ್ ಕೋಡಿಬೆಂಗ್ರೆ, ಯೋಗೀಶ್ ಶೇಟ್, ಅಬ್ದುರ್ರಹ್ಮಾನ್ ಮಲ್ಪೆ, ಕವಿರಾಜ್, ರವಿರಾಜ್ ಎಚ್.ಪಿ., ಡಾ.ವಿರೂಪಾಕ್ಷ ದೇವರಮನೆ, ಪ್ರೊ.ಫಣಿರಾಜ್, ಪ್ರಸನ್ನ ಕುಮಾರ್ ಶೆಟ್ಟಿ, ಅನ್ಸಾರ್ ಅಹ್ಮದ್, ಪರಮೇಶ್ವರ ಉಪ್ಪೂರು, ಯಾಹ್ಯ ನಕ್ವಾ, ಎಸ್.ಎಸ್.ಪ್ರಸಾದ್, ಕರಮ್ಮತ್ ಅಲಿ, ಪ್ರೊ.ಸಿರಿಲ್ ಮಥಾಯಸ್ ಮೊದಲಾದವರು ಉಪಸ್ಥಿತರಿದ್ದರು.
ಆಸ್ಪತ್ರೆಗೆ ದೇಣಿಗೆ ಘೋಷಣೆ ಈ ಬಡವರ ಆಸ್ಪತ್ರೆ ಎಂದಿಗೂ ಹಾಜಿ ಅಬ್ದುಲ್ಲಾರ ಹೆಸರಿನಲ್ಲಿಯೇ ಉಳಿಯಬೇಕು. ಇದನ್ನು ಜನರಿಂದ ಹಣ ಸಂಗ್ರಹಿಸಿ ಅಭಿವೃದ್ಧಿಪಡಿಸುವುದಾದರೆ ನನ್ನ 10ಸಾವಿರ ರೂ. ದೇಣಿ ನೀಡುತ್ತೇನೆ ಎಂದು ಡಾ.ಪಿ.ವಿ. ಭಂಡಾರಿ ತಾಯಿ ಮೀನಾಕ್ಷಿ ಭಂಡಾರಿ ಸಭೆಯಲ್ಲಿ ಘೋಷಿಸಿದರು. ಇದೇ ವೇಳೆ ಉದ್ಯಮಿ ವಿಶ್ವನಾಥ ಶೆಣೈ ಎರಡು ಲಕ್ಷ ರೂ. ದೇಣಿಗೆ ನೀಡುವುದಾಗಿ ಘೋಷಿಸಿದರು.
ಸರಕಾರಿ ಆಸ್ಪತ್ರೆಯಾಗಿದ್ದರೆ ನಮ್ಮ ಆರೋಗ್ಯದ ಹಕ್ಕನ್ನು ಕೇಳಬಹುದು. ಅದು ಖಾಸಗೀಕರಣವಾದರೆ ಅವರು ನೀಡುವ ಆರೋಗ್ಯದ ಭಿಕ್ಷೆಯನ್ನು ನಾವು ಪಡೆದುಕೊಳ್ಳಬೇಕಾಗುತ್ತದೆ.
-ಟೀನಾ, ಕರ್ನಾಟಕ ಜನಾರೋಗ್ಯ ಚಳವಳಿ
ಆಸ್ಪತ್ರೆಯ ಖಾಸಗೀಕರಣಕ್ಕಾಗಿ ನಡೆಸುತ್ತಿರುವ ಶಿಲಾನ್ಯಾಸವು ಬಡವರಿಗೆ ಕಟ್ಟುತ್ತಿರುವ ಘೋರಿಯಾಗಿದೆ. ಅನಿವಾಸಿ ಉದ್ಯಮಿಯಿಂದ ಬಡವರನ್ನು ದಫನ ಮಾಡಲು ಸರಕಾರ ಹೊರಟಿದೆ. ಬಡವರ ಕೈಯಲ್ಲಿದ್ದ ಆಸ್ಪತ್ರೆಯನ್ನು ಕಿತ್ತುಕೊಂಡು ಶ್ರೀಮಂತರ ಕೈಗೆ ಕೊಡುತ್ತಿರುವುದು ಬಡವರಿಗಾಗಿ ಸಾಕಷ್ಟು ಕಾರ್ಯಕ್ರಮ ಹಮ್ಮಿಕೊಳ್ಳುವ ಮೂಲಕ ಅಹಿಂದ ಮುಖ್ಯಮಂತ್ರಿ ಎನಿಸಿ ಕೊಂಡ ಸಿದ್ಧರಾಮಯ್ಯ ಅವರ ವ್ಯಕ್ತಿತ್ವಕ್ಕೆ ಮಾಡುವ ಕಳಂಕ. ಆದುದರಿಂದ ಸರಕಾರ ಈ ನಿರ್ಧಾರವನ್ನು ಕೈಬಿಡಬೇಕು.
-ಯಾಸೀನ್ ಮಲ್ಪೆ, ಅಧ್ಯಕ್ಷರು, ಉಡುಪಿ ಜಿಲ್ಲಾ ಮುಸ್ಲಿಮ್ ಒಕ್ಕೂಟ