ನ.10ರಿಂದ ಗಾಂಧಿ ಸರಣಿಯಲ್ಲಿ ಹೊಸ ಕರೆನ್ಸಿ ನೋಟು

ಹೊಸದಿಲ್ಲಿ, ನ.8: ದೇಶದಲ್ಲಿ ನ.10ರಿಂದ ಮಹಾತ್ಮಾ ಗಾಂಧಿ ಸರಣಿಯಲ್ಲಿ ಹೊಸ ಕರೆನ್ಸಿ ನೋಟುಗಳನ್ನು ಚಲಾವಣೆಗೆ ತರಲಾಗುವುದು ಎಂದು ವಿತ್ತ ಸಚಿವಾಲಯದ ಆರ್ಥಿಕ ವ್ಯವಹಾರಗಳ ಕಾರ್ಯದರ್ಶಿ ಶಕ್ತಿಕಾಂತ ದಾಸ್ ತಿಳಿಸಿದ್ದಾರೆ.
ಈ ಮಧ್ಯೆ, ದೇಶದಲ್ಲಿ 500 ಮತ್ತು 1000 ಮುಖಬೆಲೆಯ ಕರೆನ್ಸಿ ನೋಟುಗಳನ್ನು ಅಮಾನ್ಯಗೊಳಿಸುವ ನಿರ್ಧಾರವನ್ನು ದಿಟ್ಟ ಮತ್ತು ನಿರ್ಣಾಯಕ ಎಂದು ವರ್ಣಿಸಿರುವ ರಾಷ್ಟ್ರದ ಅರ್ಥವ್ಯವಸ್ಥೆಯ ವ್ಯವಸ್ಥಾಪಕರು ಎನಿಸಿರುವ ರಿಸರ್ವ್ ಬ್ಯಾಂಕ್ ಗವರ್ನರ್ ಮತ್ತು ವಿತ್ತ ಸಚಿವಾಲಯದ ಕಾರ್ಯದರ್ಶಿ, ಈ ಬಗ್ಗೆ ಹೆಚ್ಚಿನ ವಿವರ ನೀಡಿದ್ದಾರೆ.
   ಅಧಿಕ ಮುಖಬೆಲೆಯ ಕರೆನ್ಸಿ ನೋಟುಗಳನ್ನು ದುರುಪಯೋಗಿಸಿಕೊಳ್ಳಲಾಗುತ್ತಿದೆ. ಭಯೋತ್ಪಾಕರಿಗೆ ಹಣಕಾಸಿನ ನೆರವು ಒದಗಿಸಲು ನಕಲಿ ನೋಟುಗಳನ್ನು ಬಳಸಿಕೊಳ್ಳಲಾಗುತ್ತಿದೆ ಎಂದು ರಿಸರ್ವ್ ಬ್ಯಾಂಕ್‌ನ ಗವರ್ನರ್ ಉದಿತ್ ಪಟೇಲ್ ತಿಳಿಸಿದ್ದಾರೆ. ಇಲ್ಲಿ ಕರೆನ್ಸಿ ನೋಟುಗಳ ಭದ್ರತಾ ವೈಶಿಷ್ಟಗಳನ್ನು ಉಲ್ಲಂಘಿಸಲಾಗುತ್ತಿಲ್ಲ. ಆದರೆ ಸಾಮಾನ್ಯ ಜನತೆಗೆ ಇವೆರಡರ ವ್ಯತ್ಯಾಸ ಅರಿಯಲು ಸಾಧ್ಯವಾಗುತ್ತಿಲ್ಲ. ಈ ಕಾರಣದಿಂದ ಕೇಂದ್ರ ಸರಕಾರ 500, 1000 ಮುಖಬೆಲೆಯ ನೋಟುಗಳನ್ನು ಅಮಾನ್ಯಗೊಳಿಸಿದೆ ಎಂದವರು ವಿವರಿಸಿದ್ದಾರೆ.
 ವಿತ್ತ ಸಚಿವಾಲಯದ ಆರ್ಥಿಕ ವ್ಯವಹಾರಗಳ ಕಾರ್ಯದರ್ಶಿ ಶಕ್ತಿಕಾಂತ ದಾಸ್ , ಕಪ್ಪು ಹಣದ ಪೀಡೆಯನ್ನು ಮಟ್ಟಹಾಕಲು ಕಳೆದ ಹಲವು ವರ್ಷಗಳಿಂದ ಸರಕಾರವು ಸತತವಾಗಿ ಕ್ರಮಗಳನ್ನು ಕೈಗೊಳ್ಳುತ್ತಾ ಬಂದಿದೆ. ಈ ನಿಟ್ಟಿನಲ್ಲಿ ಇಂದು ಸರಕಾರ ಕೈಗೊಂಡ ನಿರ್ಧಾರ ಕೂಡಾ ಸೇರಿದೆ ಎಂದರು. 2011-16ರ ಅವಧಿಯಲ್ಲಿ ಎಲ್ಲಾ ಮುಖಬೆಲೆಯ ನೋಟುಗಳ ಚಲಾವಣೆಯಲ್ಲಿ ಶೇ.40ರಷ್ಟು , 500 ರೂ.ಗಳ ನೋಟಿನ ಚಲಾವಣೆ ಶೇ.76ರಷ್ಟು ಮತ್ತು 1000 ರೂ.ಮುಖಬೆಲೆಯ ನೋಟುಗಳ ಚಲಾವಣೆ ಶೇ.30ರಷ್ಟು ಹೆಚ್ಚಳವಾಗಿದೆ. ಇದು ಅಧಿಕ ಮುಖಬೆಲೆಯ ನೋಟುಗಳ ಚಲಾವಣೆಯಲ್ಲಿ ಆಗಿರುವ ಅಸಾಮಾನ್ಯ ಹೆಚ್ಚಳದ ನಿದರ್ಶನವಾಗಿದೆ ಎಂದರು. ರಿಸರ್ವ್ ಬ್ಯಾಂಕ್ ನವೆಂಬರ್ 10ರಿಂದ ಮಹಾತ್ಮಾ ಗಾಂಧಿ ಸರಣಿಯಲ್ಲಿ ಹೊಸ ಕರೆನ್ಸಿ ನೋಟುಗಳನ್ನು ಚಲಾವಣೆಗೆ ತರಲಿದೆ ಎಂದು ತಿಳಿಸಿದರು.
 ಮುಂಬೈಯ ಆರ್‌ಬಿಐ ಕಚೇರಿಯಲ್ಲಿ ಮತ್ತು ಹೊಸದಿಲ್ಲಿಯ ವಿತ್ತ ಸಚಿವಾಲಯದಲ್ಲಿ ದೂರವಾಣಿ ಹೆಲ್ಪ್‌ಲೈನ್ ಆರಂಭಿಸಲಾಗಿದ್ದು ಮುಂಬೈಯ ನಂಬರ್: 022-22602201 ಆಗಿದ್ದರೆ, ಹೊಸದಿಲ್ಲಿಯ ನಂಬರ್: 011-23093230 ಆಗಿದೆ. ಈ ಬಗ್ಗೆ ರಾಜ್ಯ ಸರಕಾರಗಳಿಗೆ ಸೂಕ್ತ ನಿರ್ದೇಶನ ನೀಡಲಾಗಿದೆ ಎಂದವರು ತಿಳಿಸಿದ್ದಾರೆ.