ಅಧಿವೇಶನದ ವೇಳೆ ಗದ್ದಲ ತಪ್ಪಿಸಲು ನಿಯಮಾವಳಿಗಳು ಸಿದ್ಧ

ಬೆಳಗಾವಿ(ಸುವರ್ಣ ವಿಧಾನಸೌಧ) ನ.21: ಗದ್ದಲ-ಕೋಲಾಹಲ ತಪ್ಪಿಸಿ, ಸುಗಮ ಕಲಾಪದ ದೃಷ್ಟಿಯಿಂದ ವಿಧಾನಸಭೆ ನಿಯಮಾವಳಿಗಳಿಗೆ ತಿದ್ದುಪಡಿ ತರಲು ವಿಧಾನ ಮಂಡಲ ಜಂಟಿ ನಿಯಮಾವಳಿ ಸಮಿತಿ ಶಿಫಾರಸು ಮಾಡಿದೆ.

ಸೋಮವಾರ ವಿಧಾನಸಭೆ ಕಲಾಪದಲ್ಲಿ ಮಾಜಿ ಸಚಿವ ಕಿಮ್ಮನೆ ರತ್ನಾಕರ್ ಜಂಟಿ ನಿಯಮಾವಳಿಗಳ ಸಮಿತಿ ವರದಿ ಮಂಡಿಸಿದರು. ಕಲಾಪದಲ್ಲಿ ಮಧ್ಯಾಹ್ನದ ನಂತರ ನಿಲುವಳಿ ಸೂಚನೆ ಮಂಡಿಸಬೇಕು, ದಿನದ ಕಲಾಪವನ್ನು ವ್ಯವಸ್ಥಿತವಾಗಿ ಎರಡು ಅವಧಿಗೆ ವಿಂಗಡಿಸಬೇಕು. ಶೂನ್ಯವೇಳೆಗೆ ಅಧಿಕೃತ ಮಾನ್ಯತೆ ನೀಡಬೇಕೆಂದು ಶಿಫಾರಸು ಮಾಡಲಾಗಿದೆ.

ವಿಧಾನಸಭೆಲ್ಲಿ ಮಂಡಿಸಲಾದ ಸಮಿತಿ ವರದಿಯನ್ನು ಕಲಾಪ ಸಲಹಾ ಸಮಿತಿ ಸಭೆಯಲ್ಲಿ ಚರ್ಚಿಸಲಾಯಿತು. ಸ್ಪೀಕರ್ ಕೆ.ಬಿ.ಕೋಳಿವಾಡ್ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ, ವಿಪಕ್ಷ ನಾಯಕ ಜಗದೀಶ್ ಶೆಟ್ಟರ್, ಜೆಡಿಎಸ್ ಉಪ ನಾಯಕ ವೈ.ಎಸ್.ವಿ.ದತ್ತ, ಕಾನೂನು ಸಚಿವ ಟಿ.ಬಿ.ಜಯಚಂದ್ರ ಸಭೆಯಲ್ಲಿ ಪಾಲ್ಗೊಂಡಿದ್ದರು.

ನ.25ರಂದು ಮತ್ತೊಮ್ಮೆ ಕಲಾಪ ಸಲಹಾ ಸಮಿತಿ ಸಭೆಯಲ್ಲಿ ಚರ್ಚೆ ನಡೆಸಿ ನಂತರ ಅಧಿವೇಶನದಲ್ಲಿ ಚರ್ಚಿಸಲಾಗುವುದು. ಅಲ್ಲಿ ಅಂಗೀಕಾರವಾದರೆ ಹೊಸ ನಿಯಮಾವಳಿಗಳಂತೆ ಸದನ ನಡೆಸಲು ಸಲಹಾ ಸಮಿತಿ ಸಭೆಯಲ್ಲಿ ತೀರ್ಮಾನಿಸಲಾಗಿದೆ. ಅಲ್ಲಿಯವರೆಗೂ ಹಳೆಯ ನಿಯಮಾವಳಿಗಳಂತೆ ಕಲಾಪ ನಡೆಯಲಿದೆ ಎಂದು ತಿಳಿದು ಬಂದಿದೆ.

ಶಿಫಾರಸುಗಳು: ಬೆಂಗಳೂರಿನ ವಿಧಾನಸೌಧ ಮತ್ತು ಬೆಳಗಾವಿ ಸುವರ್ಣ ವಿಧಾನಸೌಧದಲ್ಲಿರುವ ಸಭಾಮಂದಿರ, ಲಾಬಿಗಳು, ಗ್ಯಾಲರಿಗಳನ್ನು ಸಭಾಧ್ಯಕ್ಷರ ಅಧೀನಕ್ಕೆ ಒಳಪಡುವ ವಿಧಾನಸಭೆಯ ಆವರಣ ಎಂದು ಪರಿಗಣಿಸಬೇಕು.

ಕೋರಂ (ಸದಸ್ಯರ ಹಾಜರಾತಿ) ಎಂಬುದಕ್ಕೆ ಈವರೆಗೂ ಸ್ಪಷ್ಟವಾದ ಅರ್ಥವಿವರಣೆ ಇರಲಿಲ್ಲ, ಕೋರಂ ಎಂದರೆ ಸಭೆಯಲ್ಲಿರುವ ಒಟ್ಟು ಸದಸ್ಯರ ಸಂಖ್ಯೆಯ ಹತ್ತನೆಯ ಒಂದರಷ್ಟು ಸಂಖ್ಯೆಯ ಸದಸ್ಯರು ಎಂದು ಪರಿಗಣಿಸತಕ್ಕದ್ದು ಎಂದು ಸಮಿತಿ ಶಿಫಾರಸು ಮಾಡಿದೆ.

ನಿಲುವಳಿಗೆ ಮಾನ್ಯತೆ: ವಿಧಾನಮಂಡಲದ ಕಲಾಪದಲ್ಲಿ ಈವರೆಗೂ ಅನೌಪಚಾರಿಕವಾಗಿ ಜಾರಿಯಲ್ಲಿರುವ ಶೂನ್ಯವೇಳೆಗೆ ಈವರೆಗೂ ಸ್ಪಷ್ಟವಾದ ಅರ್ಥ ವಿವರಣೆ ಇಲ್ಲ. ಅದಕ್ಕೆ ಅಧಿಕೃತ ಮಾನ್ಯತೆ ನೀಡಬೇಕೆಂದು ಜಂಟಿ ನಿಯಮಾವಳಿ ಸಮಿತಿ ಶಿಫಾರಸು ಮಾಡಿದೆ.

ಪ್ರಶ್ನೋತ್ತರ ವೇಳೆ, ಕಾರ್ಯದರ್ಶಿ ವರದಿ, ಸದನದ ಮುಂದೆ ಮಂಡಿಸಬೇಕಾದ ಕಾಗದ ಪತ್ರಗಳು, ಸಮಿತಿ ವರದಿಗಳ ಮಂಡನೆ ತರುವಾಯ, ಯಾವುದಾದರೂ ಇದ್ದಲ್ಲಿ ಹಾಗೂ ಕಾರ್ಯ ಕಲಾಪಗಳ ಪಟ್ಟಿಯನ್ನು ಪ್ರಾರಂಭಿಸುವ ಮೊದಲಿನ ಅವಧಿಯನ್ನು ಶೂನ್ಯವೇಳೆ ಎಂದು ಕರೆಯಲು ಸಲಹೆ ಮಾಡಿದ್ದು, ಶೂನ್ಯವೇಳೆಗೆ ಅಧಿಕೃತ ಮಾನ್ಯತೆ ದೊರಕಿಸುವ ಪ್ರಯತ್ನಗಳು ನಡೆದಿವೆ.

ಈವರೆಗೂ ಪ್ರಶ್ನೋತ್ತರ ಅವಧಿಯ ನಂತರ ಶೂನ್ಯವೇಳೆಯನ್ನು ಕೈಗೆತ್ತಿಕೊಳ್ಳಲಾಗುತ್ತಿತ್ತು. ಈಗ ನಿಯಮ 59ಕ್ಕೆ ತಿದ್ದುಪಡಿ ತಂದು ಎ, ಬಿ, ಸಿ, ಡಿ ಕಲಂಗಳನ್ನು ಸೇರಿಸಲಾಗಿದೆ. ಇದರ ಅನ್ವಯ ಪ್ರಶ್ನೋತ್ತರ ಮತ್ತು ಕಾಗದ ಪತ್ರಗಳ ಮಂಡನೆ ತರುವಾಯ ಸ್ಪೀಕರ್ ಪೂರ್ವಾನುಮತಿ ಪಡೆದು ಇತ್ತೀಚಿನ ಪ್ರಮುಖ ಘಟನೆಗಳನ್ನು ಶೂನ್ಯವೇಳೆಯಲ್ಲಿ ಪ್ರಸ್ತಾಪಿಸಲು ಆವಕಾಶ ಕಲ್ಪಿಸಲಾಗಿದೆ.

ಶೂನ್ಯವೇಳೆಗೆ ನೀಡುವ ಸೂಚನಾ ಪತ್ರ 150 ಪದಗಳನ್ನು ಮೀರಬಾರದು, ಪ್ರತಿದಿನ 10 ಸೂಚನೆಗಳನ್ನು ಕೈಗೆತ್ತಿಕೊಳ್ಳಬಹುದು, ಆದ್ಯತೆ ಮೇರೆಗೆ ಇನ್ನೂ ಉಳಿದ 5 ಸೂಚನೆಗಳನ್ನು ಸ್ಪೀಕರ್ ವಿವೇಚನೆ ಮೇರೆಗೆ ಕೈಗೆತ್ತಿಕೊಳ್ಳುವುದು, ಪ್ರತಿಯೊಬ್ಬ ಶಾಸಕರು ದಿನಕ್ಕೆ ಒಂದೆ ಸೂಚನೆಯನ್ನು ಮಂಡಿಸಬೇಕು, ಕಲಾಪ ಆರಂಭವಾಗುವ ಮುನ್ನಾ ಒಂದು ಗಂಟೆ ಮುನ್ನಾ ಸ್ಪೀಕರ್ ಅವರಿಗೆ ಸೂಚನಾ ಪತ್ರ ತಲುಪಿಸಬೇಕು. ಶಾಸಕರು ಮೂರು ನಿಮಿಷಕ್ಕೆ ಮೀರದಂತೆ ಕಾಲಮಿತಿಯ ಒಳಗೆ ಶೂನ್ಯವೇಳೆಯಲ್ಲಿ ಪ್ರಸ್ತಾಪಿತ ವಿಷಯದ ಮೇಲೆ ಕಲಾಪದಲ್ಲಿ ಸ್ಥೂಲ ವಿವರಣೆ ನೀಡಬೇಕು. ಪ್ರಸ್ತಾಪಿತ ವಿಷಯಗಳಿಗೆ ಸರಕಾರ ತಕ್ಷಣ ಅಥವಾ ಗರಿಷ್ಠ ಮೂರು ದಿನಗಳ ಒಳಗೆ ಉತ್ತರ ನೀಡಬೇಕು ಎಂದು ಶಿಫಾರಸ್ಸಿನಲ್ಲಿ ತಿಳಿಸಲಾಗಿದೆ.

ನಿಲುವಳಿಗೆ ಕಡಿವಾಣ: ಪ್ರತಿದಿನ ಸದನ ಸಮಾವೇಶಗೊಂಡ ತಕ್ಷಣವೇ ಸ್ಪೀಕರ್ ಅವರಿಗೆ ಎದುರಾಗುವುದು ನಿಲುವಳಿ ಸೂಚನೆಯ ಪ್ರಸ್ತಾಪ, ಇದರ ಚರ್ಚೆಗೆ ಅವಕಾಶ ನೀಡಬೇಕೋ ಬೇಡವೋ ಎಂಬ ಕುರಿತೆ ಬಹಳಷ್ಟು ಚರ್ಚೆಗಳು ನಡೆಯುತ್ತವೆ. ಇದರಿಂದ ಬಹಳಷ್ಟು ಕಾಲಹರಣ ಆಗಿ ಪ್ರಮುಖ ಕಾಯ್ದೆಗಳು ಚರ್ಚೆಯಾಗದೇ ಕೊನೆಯ ಕ್ಷಣದಲ್ಲಿ ಅಂಗೀಕಾರಗೊಳ್ಳುತ್ತಿವೆ. ನಿಲುವಳಿ ಸೂಚನೆ ಚರ್ಚೆಯೂ ಗಂಭೀರವಾಗಿ ನಡೆಯುತ್ತಿಲ್ಲ ಎಂಬುದನ್ನು ಮನಗಂಡಿರುವ ಸಮಿತಿ ನಿಯಮ 60, 64 ಮತ್ತು 65ಕ್ಕೆ ತಿದ್ದುಪಡಿ ತರಲು ಶಿಫಾರಸು ಮಾಡಿದೆ

ಬೆಳಗ್ಗೆ 10.30 ರಿಂದ 2 ಗಂಟೆವರೆಗೂ ಬೆಳಗಿನ ಉಪವೇಶನ(ಕಲಾಪ) ಎಂದು, ಮಧ್ಯಾಹ್ನ 3 ಗಂಟೆಯಿಂದ 6 ಗಂಟೆಯವರೆಗೂ ಮಧ್ಯಾಹ್ನದ ಉಪವೇಶವ(ಕಲಾಪ) ಎಂದು ಕರೆಯಲು ನಿಯಮಾವಳಿಗೆ ತಿದ್ದುಪಡಿ ತರಲು ಸಮಿತಿ ಶಿಫಾರಸು ಮಾಡಲಾಗಿದೆ. ಉಪವೇಶನ ಎಂದರೆ ಸದನ ಪ್ರಾರಂಭವಾದಾಗಿನಿಂದ ಸದನವನ್ನು ಮುಂದೂಡುವವರೆಗೂ ಯಾವುದೇ ದಿನದಂದು ಸದನದ ಕಾರ್ಯಕಲಾಪಗಳನ್ನು ನಡೆಸಲು ಸದನದ ಸದಸ್ಯರು ಉಪವೇಶನ ನಡೆಸುವುದು ಎಂದು ಭಾವಿಸಬೇಕು