ಸಮರ್ಪಕ ಮರಳು ವಿತರಣೆಗೆ ಕ್ರಮ ಕೈಗೊಳ್ಳಿ: ಅಧಿಕಾರಿಗಳಿಗೆ ಜಿಲ್ಲಾಧಿಕಾರಿ ಸೂಚನೆ

ಶಿವಮೊಗ್ಗ, ನ.28: ಜಿಲ್ಲೆಯಲ್ಲಿ ನಡೆಯುತ್ತಿರುವ ಸರಕಾರಿ ಮತ್ತು ಖಾಸಗಿ ಕಟ್ಟಡಗಳ ನಿರ್ಮಾಣ ಕಾಮಗಾರಿಗಳಿಗೆ ಮರಳಿನ ಅಗತ್ಯವಿದ್ದು, ಯಾವುದೇ ಅಡಚಣೆಯಾಗದಂತೆ ಮರಳನ್ನು ಸಮರ್ಪಕವಾಗಿ ವಿತರಿಸಲು ಲೋಕೋಪಯೋಗಿ ಇಲಾಖಾ ಅಧಿಕಾರಿಗಳು ಕ್ರಮ ಕೈಗೊಳ್ಳುವಂತೆ ಜಿಲ್ಲಾಧಿಕಾರಿ ಡಾ.ಎಂ.ಲೋಕೇಶ್ ಅವರು ಸೂಚಿಸಿದರು.
ತಮ್ಮ ಕಚೇರಿ ಸಭಾಂಗಣದಲ್ಲಿ ಮರಳು ಸಮರ್ಪಕ ಸರಬರಾಜು ಮಾಡುವ ಸಂಬಂಧ ಏರ್ಪಡಿಸಲಾಗಿದ್ದ ಜಿಲ್ಲಾ ಮರಳು ಗಣಿಗಾರಿಕೆ ಉಸ್ತುವಾರಿ ಸಮಿತಿ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡುತ್ತಿದ್ದರು. ನೂತನ ಮರಳು ನೀತಿ ಅನುಷ್ಠಾನಕ್ಕೆ ಬರುವವರೆಗೆ ಲೋಕೋಪಯೋಗಿ ಇಲಾಖಾಧಿಕಾರಿಗಳು ವ್ಯವಸ್ಥಿತ ಮರಳು ವಿತರಣೆಗೆ ಮುಂದಾಗಬೇಕು ಈಗಾಗಲೇ ಟೆಂಡರ್ ಪಡೆದು ಅವಧಿ ಪೂರ್ಣಗೊಳ್ಳದ ಮರಳು ಕ್ವಾರಿಗಳನ್ನು ಅವಧಿ ಪೂರ್ಣಗೊಳ್ಳುವವರೆಗೆ ಮುಂದುವರಿಸುವಂತೆ ಅವರು ಅಧಿಕಾರಿಗಳಿಗೆ ಸೂಚಿಸಿದರು.

ಹೊಸ ಮರಳು ನೀತಿ ಜಾರಿಗೆ ಸಂಬಂಧಿಸಿದಂತೆ ಜಿಲ್ಲೆಯ ವಿವಿಧ ತಾಲೂಕುಗಳ ವಿವಿಧ ಬ್ಲಾಕ್‌ಗಳಲ್ಲಿ ಮರಳು ಸರಬರಾಜಿಗೆ ಇನ್ನೊಂದು ವಾರದಲ್ಲಿ ಟೆ ಂಡರ್ ಮಾರ್ಗಸೂಚಿಗಳನ್ನು ಸಿದ್ಧಪಡಿಸಿಕೊಂಡು ಜಿಲ್ಲಾಧಿಕಾರಿಗಳ ಅನುಮತಿ ಪಡೆದು ಟೆಂಡರ್ ಕರೆದು ತ್ವರಿತವಾಗಿ ಮರಳು ವಿತರಣೆಗೆ ಮುಂದಾಗುವಂತೆ ಪ್ರಭಾರ ಭೂವಿಜ್ಞಾನಿ ವಿಂದ್ಯಾ ಅವರಿಗೆ ಸೂಚಿಸಿದರು.

ಜಿಲ್ಲೆಯಲ್ಲಿನ ಒಟ್ಟು 45ಮರಳು ಬ್ಲಾಕ್‌ಗಳಲ್ಲಿ 10ಬ್ಲಾಕ್‌ಗಳನ್ನು ಹೊರತುಪಡಿಸಿ ಉಳಿದ ಬ್ಲಾಕ್‌ಗಳಲ್ಲಿ ಸಾಧಾರಣದಿಂದ ಭಾರೀ ಪ್ರಮಾಣದ ನೀರು ನಿಂತಿದೆ. ಇದರಿಂದಾಗಿ ಮರಳು ಸರಬರಾಜು ಮಾಡಲು ಇನ್ನೂ ಕೆಲವು ತಿಂಗಳುಗಳ ಕಾಲಾವಕಾಶ ಬೇಕಾಗಬಹುದು. ಪ್ರಸ್ತುತ ಲಭ್ಯವಾಗುವ 10ಬ್ಲಾಕ್‌ಗಳಲ್ಲಿ ಶಿವಮೊಗ್ಗ ತಾಲೂಕಿನಲ್ಲಿ 2ಬ್ಲಾಕ್‌ಗಳಿದ್ದು, ಅವುಗಳಲ್ಲಿ ಹಾಡೋನಹಳ್ಳಿಯ ಬ್ಲಾಕ್‌ನಲ್ಲಿ ದೊರೆಯುವ ಮರಳನ್ನು ಸರಕಾರದ ವಿವಿಧ ಕಾಮಗಾರಿಗಳಿಗೆ ಕಾಯ್ದಿರಿಸಲಾಗಿದೆ. ಉಳಿದ ಒಂದನ್ನು ಸಾರ್ವಜನಿಕ ವಿತರಣೆಗೆ ನೀಡಲಾಗುವುದು ಎಂದು ಜಿಲ್ಲಾಧಿಕಾರಿ ತಿಳಿಸಿದರು.
ಉಳಿದಂತೆ ತೀರ್ಥಹಳ್ಳಿ ತಾಲೂಕಿನ 4 ಬ್ಲಾಕ್‌ಗಳಲ್ಲಿ ಬಗ್ಗೋಡಿಗೆ(ಎಸ್.ಸಿ.,), ನಂಬಳ(ಎಸ್.ಟಿ.), ತೂದೂರು-3(ಅಂಗವಿಕಲ) ಹಾಗೂ ತೂದೂರು-1(ಇತರ) ವರ್ಗಗಳಿಗೆ ಕಾಯ್ದಿರಿಸಲಾಗಿದೆ. ಹೊಸನಗರ ತಾಲೂಕಿನ ನಂಜವಳ್ಳಿ-2(ಎಸ್.ಸಿ.,), ಸುತ್ತ-2(ಎಸ್.ಟಿ.), ನಂಜವಳ್ಳಿ-1(ಅಂಗವಿಕಲ) ಹಾಗೂ ಸೋನಲೆ ಬ್ಲಾಕ್‌ನ್ನು ಇತರ ವರ್ಗಕ್ಕೆ ನೀಡುವಂತೆ ಜಿಲ್ಲಾಧಿಕಾರಿಯವರ ಉಪಸ್ಥಿತಿಯಲ್ಲಿ ಲಾಟರಿ ಎತ್ತುವ ಮೂಲಕ ನಿಗದಿಪಡಿಸಲಾಯಿತು.
ಜಿಲ್ಲೆಯ ವಿವಿಧ ತಾಲೂಕಿನ ಮರಳು ಕ್ವಾರಿಗಳ ವಾಸ್ತವ ಸ್ಥಿತಿಯನ್ನು ಅರಿಯಲು ಉಪವಿಭಾಗಾಧಿಕಾರಿಗಳು ಖುದ್ದಾಗಿ ಸ್ಥಳಕ್ಕೆ ಭೇಟಿ ನೀಡಿ ವರದಿ ನೀಡುವಂತೆ ಜಿಲ್ಲಾಧಿಕಾರಿಗಳು ಸೂಚಿಸಿದರು. ಈಗಾಗಲೇ ವಿವಿಧ ಸ್ಥಳಗಳಲ್ಲಿ ಹಿಡಿದಿಡಲಾದ ಅಕ್ರಮ ಮರಳನ್ನು ಸರಕಾರದ ಕಾಮಗಾರಿಗಳಿಗೆ ಕಾರ್ಯಾದೇಶ ಪರಿಶೀಲಿಸಿ ನೀಡುವಂತೆ ಲೋಕೋಪಯೋಗಿ ಇಲಾಖೆ ಅಭಿಯಂತರರಿಗೆ ಸೂಚಿಸಿದರು.
ಹೊಸದಾಗಿ ಮರಳು ವಿತರಣೆಗೆ ಸಂಬಂಧಿಸಿ ದಂತೆ ನೂತನ ಮರಳು ನೀತಿಯನ್ವಯ ದರನಿಗದಿಪಡಿಸಬೇಕು. ಅದಕ್ಕಾಗಿ ನಿಗದಿಪಡಿಸಿದ ಸ್ಥಳ ಮತ್ತು ನಿಗದಿಪಡಿಸಬಹುದಾದ ದರಗಳ ಬಗ್ಗೆ ಸಂಬಂಧಿಸಿದ ಇಲಾಖೆ ಅಧಿಕಾರಿಗಳು ಸಮನ್ವಯತೆ ಸಾಧಿಸಿಕೊಂಡು ದರನಿಗದಿ ಮಾಡಲು ಮುಂದಿನ ಸಭೆಗೆ ಹಾಜರುಪಡಿಸುವಂತೆ ಹಿರಿಯ ಭೂ ವಿಜ್ಞ್ಞಾನಿಗಳಿಗೆ ಸೂಚಿಸಿದರು.

ಸಭೆಯಲ್ಲಿ ಜಿಪಂ ಮುಖ್ಯಕಾರ್ಯನಿರ್ವಾಹಕ ಅಧಿಕಾರಿ ಡಾ.ಕೆ.ರಾಕೇಶ್‌ಕುಮಾರ್, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಭಿನವ್‌ಖರೆ, ಅಪರ ಜಿಲ್ಲಾಧಿಕಾರಿ ಚನ್ನಬಸಪ್ಪ, ಉಪವಿಭಾಗಾಧಿಕಾರಿ ಕೃಷ್ಣಮೂರ್ತಿ ಹಾಗೂ ಸತೀಶ್‌ಕುಮಾರ್, ಹಿರಿಯ ಭೂ ವಿಜ್ಞಾನಿ ವಿಂದ್ಯಾ ಸೇರಿದಂತೆ ಅರಣ್ಯ, ಕಂದಾಯ, ಹಾಗೂ ಸಾರಿಗೆ ಇಲಾಖಾ ಅಧಿಕಾರಿಗಳು ಉಪಸ್ಥಿತರಿದ್ದರು