ಹೆಚ್ಚಾಗುತ್ತಿರುವ ನಗದು ಕೊರತೆ ಬಿಕ್ಕಟ್ಟು

ಗ್ರಾಹಕರ ಕೈಸೇರುತ್ತಿಲ್ಲ ನಿಗದಿತ ಮೊತ್ತ
 ಶಿವಮೊಗ್ಗ, ಡಿ. 2: ಕೇಂದ್ರ ಸರಕಾರ 500 ಹಾಗೂ 1000 ರೂ. ಮುಖಬೆಲೆಯ ಹಳೆಯ ನೋಟು ರದ್ದುಗೊಳಿಸಿದ ನಂತರ ಬ್ಯಾಂಕ್‌ಗಳಲ್ಲಿ ಹಣ ತೆಗೆಯುವುದಕ್ಕೆ ಸಂಬಂಧಿಸಿದಂತೆ ಹತ್ತು ಹಲವು ನಿಬಂಧನೆಗಳನ್ನು ಜಾರಿಗೊಳಿಸಿದೆ. ದಿನ ಕಳೆದಂತೆ ಹೊಸ ಹೊಸ ನಿಯಾಮಾವಳಿಗಳನ್ನು ಅನುಷ್ಠಾನಗೊಳಿಸುತ್ತಲೇ ಇದೆ.

ಇದು ನಾಗರಿಕರಿಗೆ ತಲೆನೋವಾಗಿ ಪರಿಣಮಿಸುತ್ತಿದೆ. ಪ್ರಸ್ತುತ ಬ್ಯಾಂಕ್‌ಗಳಲ್ಲಿ ಒಬ್ಬ ಗ್ರಾಹಕ ಪ್ರತೀ ವಾರ 24 ಸಾವಿರ ರೂಪಾಯಿ ಡ್ರಾ ಮಾಡಲು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಅವಕಾಶ ಕಲ್ಪಿಸಿದೆ. ಆದರೆ ಬ್ಯಾಂಕ್‌ಗಳಲ್ಲಿ ಆರ್‌ಬಿಐ. ನಿಗದಿಪಡಿಸಿರುವ ಹಣ ಗ್ರಾಹಕರ ಕೈಗೆ ಸೇರದಿರುವ ಆರೋಪಗಳು ಸಾರ್ವಜನಿಕರ ವಲಯದಿಂದ ಕೇಳಿಬರುತ್ತಿದೆ. ಕೆಲವೆಡೆ ಮಾತ್ರವಲ್ಲ ಮುಕ್ಕಾಲುಪಾಲು ಬ್ಯಾಂಕ್‌ಗಳಲ್ಲಿ ಗ್ರಾಹಕರಿಗೆ 24 ಸಾವಿರ ರೂ. ಡ್ರಾ ಮಾಡಲು ಅವಕಾಶ ಕಲ್ಪಿಸುತ್ತಿಲ್ಲವಾಗಿದೆ.

ಕೆಲವೆಡೆ 5 ಸಾವಿರ ರೂ., ಮತ್ತೆ ಕೆಲವೆಡೆ 10 ಸಾವಿರ ರೂ. ಮಾತ್ರ ನೀಡಲಾಗುತ್ತಿದೆ. ಹಣದ ಕೊರತೆಯಿರುವುದಾಗಿ ಬ್ಯಾಂಕ್‌ನವರು ಹೇಳುತ್ತಿದ್ದಾರೆ. ಇದರಿಂದ ತುರ್ತು ಹಣದ ಅಗತ್ಯವಿರುವ ಗ್ರಾಹಕರ ಸ್ಥಿತಿಯಂತೂ ಹೇಳತೀರದಾಗಿದೆ. ಗ್ರಾಹಕರು ತಮ್ಮ ಖಾತೆಯಿ ರುವ ಬ್ಯಾಂಕ್‌ಗಳಲ್ಲಿ ಪ್ರತೀ ವಾರ 24 ಸಾವಿರ ರೂ. ಡ್ರಾ ಮಾಡಲು ಆರ್‌ಬಿಐ. ಅವಕಾಶ ಕಲ್ಪಿಸಿದೆ.

ಆದರೆ ಬ್ಯಾಂಕ್‌ಗಳಲ್ಲಿ 24 ಸಾವಿರ ರೂ. ಪಡೆಯಲು ಆಗುತ್ತಿಲ್ಲ. ತಮಗೆ 24 ಸಾವಿರ ರೂ. ಬೇಕೆಂದು ಚಲನ್ ಬರೆದುಕೊಟ್ಟರೆ ಕೇವಲ 10 ಸಾವಿರ ರೂ. ಮಾತ್ರ ನೀಡಿದರು. ಕಾರಣ  ಕೇಳಿದರೆ ಹಣದ ಕೊರತೆಯಿರುವುದಾಗಿ ಬ್ಯಾಂಕ್‌ನವರು ಸಮಜಾಯಿಷಿ ನೀಡುತ್ತಿದ್ದಾರೆ. ಪ್ರಸ್ತುತ ಕೇಂದ್ರ ಸರಕಾರ ಸೂಚಿಸಿದ ಸ್ಥಳಗಳಲ್ಲಿಯೂ ರದ್ದುಗೊಳಿಸಲಾಗಿರುವ ನೋಟುಗಳ ಚಲಾವಣೆಗೆ ಹಿಂದೇಟು ಹಾಕಲಾಗುತ್ತಿದೆ. ಬೇರೆಡೆಯಂತೂ ಈ ನೋಟುಗಳನ್ನು ಪಡೆಯುತ್ತಿಲ್ಲ. ತಮ್ಮ ಬಳಿಯಿದ್ದ ರದ್ದುಗೊಳಿಸಲಾಗಿರುವ ನೋಟುಗಳನ್ನು ಬ್ಯಾಂಕ್‌ಗೆ ಜಮಾ ಮಾಡಿ ಇತರ ನೋಟು ಪಡೆಯಲು ಆಗದಂತಾಗಿದೆ. ಇದರಿಂದ ಸಾಕಷ್ಟು ಸಮಸ್ಯೆಯಾಗಿದೆ ಎಂದು ಹೆಸರು ಬಹಿರಂಗಪಡಿಸಲಿಚ್ಛಿಸದ ಉದ್ಯಮಿಯೊಬ್ಬರು ತಮ್ಮ ಅಳಲು ತೋಡಿಕೊಳ್ಳುತ್ತಾರೆ.

ಎಟಿಎಂಗಳು ಖಾಲಿ: ತಿಂಗಳ ಪ್ರಾರಂಭ ದಲ್ಲಿ ಸರಕಾರಿ ಹಾಗೂ ಖಾಸಗಿ ವಲಯದ ನೌಕರರಿಗೆ ಸಂಬಳ ಬಿಡುಗಡೆಯಾಗುತ್ತಿದ್ದು, ನೇರವಾಗಿ ಅವರ ಖಾತೆಗಳಿಗೆ ಹಣ ಜಮಾವಣೆಯಾಗುತ್ತದೆ. ಖಾತೆಯಿಂದ ಹಣ ಬಿಡುಗಡೆಗೆ ನೌಕರರು ಬ್ಯಾಂಕ್ ಹಾಗೂ ಎಟಿಎಂಗಳಿಗೆ ದೌಡಾಯಿಸಲಾರಂಭಿಸಿದ್ದಾರೆ. ಇದರಿಂದ ಬ್ಯಾಂಕ್‌ಗಳಲ್ಲಿ ಮತ್ತೆ ಹಣದ ಮುಗ್ಗಟ್ಟು ಉಂಟಾಗುವ ಲಕ್ಷಣಗಳು ಗೋಚರವಾಗುತ್ತಿವೆ. ಮತ್ತೊಂದೆಡೆ ನಗರದ ಹಲವು ಎಟಿಎಂಗಳಲ್ಲಿ ಹಣವಿಲ್ಲದೆ ಬರಿದಾಗಿರುವುದು ಕಂಡುಬರುತ್ತಿದ್ದು, ಇಂತಹ ಎಟಿಎಂಗಳ ಬಾಗಿಲನ್ನು ಅರ್ಧಕ್ಕೆ ಮುಚ್ಚುವ ಅಥವಾ ಹಣವಿಲ್ಲವೆಂಬ ಚೀಟಿ ಅಂಟಿಸಿರುವುದು ಕಂಡುಬರುತ್ತಿದೆ. ಇದರಿಂದ ಹಣ ಬಿಡುಗಡೆ ಮಾಡಿಕೊಳ್ಳಲು ನಾಗರಿಕರು ಎಟಿಎಂಗಳಿಗೆ ಅಲೆದಾಡುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ನೋಟು ಕಡಿಮೆ: ಮತ್ತೆ ಕೆಲ ಎಟಿಎಂಗಳಲ್ಲಿ ಕೇವಲ 2000 ರೂ. ಮೊತ್ತದ ನೋಟು ಮಾತ್ರ ಲಭ್ಯವಾಗುತ್ತಿದೆ. 100 ಮತ್ತು 50, 500ರೂ. ಮುಖಬೆಲೆಯ ನೋಟುಗಳು ಲಭ್ಯವಾಗುತ್ತಿಲ್ಲವೆಂಬ ಆರೋಪ ಸಾರ್ವಜನಿಕರ ವಲಯದಿಂದ ಕೇಳಿಬಂದಿದೆ. ಕೆಲ ಎಟಿಎಂಗಳಲ್ಲಿ 2000 ಮೊತ್ತದ ನೋಟು ಮಾತ್ರ ಲಭ್ಯವಾಗುತ್ತಿದೆ. ಈ ನೋಟಿಗೆ ಚಿಲ್ಲರೆ ಸಂಪಾದಿಸುವುದೇ ದೊಡ್ಡ ತಲೆನೋವಾಗಿದೆ.

ಜೇಬಲ್ಲಿ 2000 ನೋಟು ಇದ್ದರೂ ವ್ಯವಹರಿಸಲು ಸಾಧ್ಯವಾಗದಂತಹ ಪರಿಸ್ಥಿತಿಯಿದೆ. ಎಲ್ಲಿಯೇ ಹೋದರೂ ಈ ನೋಟಿಗೆ ಚಿಲ್ಲರೆ ಸಿಗುತ್ತಿಲ್ಲವಾಗಿದೆ. ಬ್ಯಾಂಕ್‌ಗಳು 100, 50 ಹಾಗೂ 500 ರೂ.ನೋಟುಗಳನ್ನು ಎಟಿಎಂಗಳಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ಜಮೆ ಮಾಡಬೇಕಾಗಿದೆ ಎಂದು ಗ್ರಾಹಕರೊಬ್ಬರು ಆಗ್ರಹಿಸುತ್ತಾರೆ. ಒಟ್ಟಾರೆ ಹಳೆಯ 500 ಹಾಗೂ 1000 ರೂ. ಮುಖಬೆಲೆಯ ನೋಟು ರದ್ದುಗೊಳಿಸಿದ ಆದೇಶದ ನಂತರ ಹಣಕಾಸಿನ ವ್ಯವಹಾರಕ್ಕೆ ಸಂಬಂಧಿಸಿದಂತೆ ಗ್ರಾಹಕರ ವಲಯದಲ್ಲಿ ಮನೆ ಮಾಡಿರುವ ಗೊಂದಲಗಳಿಗೆ ಪೂರ್ಣ ಪ್ರಮಾಣದಲ್ಲಿ ವಿರಾಮ ಬೀಳುವುದು ಯಾವಾಗ ಎಂಬುವುದು ಮಾತ್ರ ತಿಳಿಯದಾಗಿದೆ. ರಾಜ್ಯ ಮಟ್ಟದ ಚಿತ್ರಕಲಾ ಸ್ಪರ್ಧೆಯಲ್ಲಿ ಗಗನ್‌ಗೆ ಪ್ರಶಸ್ತಿ
ತರೀಕೆರೆ ಡಿ, 2: ತಾಲೂಕಿನ ಗೋಪಾಲ ಕಾಲನಿಯ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಏಳನೆ ತರಗತಿ ವಿದ್ಯಾರ್ಥಿ ಆರ್.ಎಸ್.ಗಗನ್ ಬೆಂಗಳೂರಿನ ಸೆಂಟ್ರಲ್ ಗ್ರೌಂಡ್ ವಾಟರ್ ಬೋರ್ಡ್ ವತಿಯಿಂದ ಇತ್ತೀಚೆಗೆ ಏರ್ಪಡಿಸಲಾಗಿದ್ದ ರಾಜ್ಯ ಮಟ್ಟದ ಚಿತ್ರಕಲಾ ಸ್ಪರ್ಧೆಯಲ್ಲಿ ಭಾಗವಹಿಸಿ ತೃತೀಯ ಸ್ಥಾನ ಪಡೆದಿದ್ದಾನೆ.
ಚಿತ್ರಕಲಾ ಸ್ಪರ್ಧೆಯಲ್ಲಿ ತೃತೀಯ ಸ್ಥಾನ ಪಡೆದ ಆರ್.ಎಸ್.ಗಗನ್‌ಗೆ ಬೆಂಗಳೂರಿನ ಕಬ್ಬನ್ ಪಾರ್ಕ್ ಬಳಿ ಇರುವ ಸೆಕ್ರೇಟರಿ ಕ್ಲಬ್ ಸಭಾಂಗಣದಲ್ಲಿ ಸೆಂಟ್ರಲ್ ಗ್ರೌಂಡ್ ವಾಟರ್ ಬೋರ್ಡ್ ಪ್ರಶಸ್ತಿ ನೀಡಿ ಗೌರವಿಸಿದೆ.

ಈತ ಗೋಪಾಲ ಕಾಲನಿಯ ನಿವಾಸಿ ಎಂ. ಶೈಲೇಶ್‌ಕುಮಾರ್ ಮತ್ತು ಕೆ.ಪಿ. ವಿದ್ಯಾ ದಂಪತಿಯ ಪುತ್ರನಾಗಿದ್ದು, ಶಾಲೆಗೆ ಕೀರ್ತಿ ತಂದ ಈತನ ಈ ಸಾಧನೆಗೆ ಶಿಕ್ಷಕರು ಮತ್ತು ಗ್ರಾಮಸ್ಥರು ಅಭಿನಂದಿಸಿದ್ದಾರೆ.