ಇಂದು ವಿಕಲಚೇತನರ ದಿನಾಚರಣೆ: ಶೇ.40ರಷ್ಟು ವಿಕಲಚೇತನರಿಗೆ ಗುರುತಿನ ಚೀಟಿಯಿಲ್ಲ

ಬೆಂಗಳೂರು, ಡಿ.2: ಸಮಾಜದ ಅಲಕ್ಷಕ್ಕೆ ಒಳಗಾದ ಸಮುದಾಯಗಳಲ್ಲಿ ವಿಕಲಚೇತನರೇ ಮೊದಲಿಗರಾಗಿದ್ದಾರೆ. ಮನೆಯವರಿಂದಲೇ ನಿರ್ಲಕ್ಷ, ಉದಾಸೀನತೆ, ಅವಮಾನಕ್ಕೆ ಒಳಗಾದ ಅನೇಕ ವಿಕಲಚೇತನರು ಇಂದಿಗೂ ಸಂಘ, ಸಂಸ್ಥೆಗಳ ಆಶ್ರಯದಲ್ಲೇ ಬದುಕನ್ನು ಕಟ್ಟಿಕೊಂಡಿದ್ದಾರೆ.
ನಮ್ಮ ರಾಜ್ಯವೊಂದರಲ್ಲಿಯೇ ಸುಮಾರು 13.24ಲಕ್ಷ ವಿಕಲಚೇತನರಿದ್ದು, ಶೇ.40ರಷ್ಟು ನಗರ ಪ್ರದೇಶದಲ್ಲಿ, ಶೇ.60ರಷ್ಟು ಗ್ರಾಮಾಂತರ ಪ್ರದೇಶದಲ್ಲಿ ನೆಲೆಸಿದ್ದಾರೆ. ಇದರಲ್ಲಿ ಶೇ.65ರಷ್ಟು ಮಂದಿ ಮಾತ್ರ ವಿಕಲಚೇತನರ ಗುರುತಿನ ಚೀಟಿ ಹೊಂದಿದ್ದಾರೆ. ಆದರೆ, ಶೇ.40ರಷ್ಟು ಮಂದಿಗೆ ಮಾಹಿತಿ ಕೊರತೆ, ಸಂಬಂಧಿಸಿದ ಅಧಿಕಾರಿಗಳ ಉದಾಸೀನತೆಯಿಂದಾಗಿ ಸರಕಾರದ ನ್ಯಾಯಯುತ ಸೌಲಭ್ಯಗಳು ಸಿಗುತ್ತಿಲ್ಲ.
 ವಿಕಲಚೇತನರ ಸಬಲಿಕರಣಕ್ಕೆ ಸರಕಾರಗಳು ಹತ್ತಾರು ಯೋಜನೆಗಳನ್ನು ರೂಪಿಸಿದೆ. ಅದರಲ್ಲಿ ಮುಖ್ಯವಾಗಿ ‘ಮಾಸಿಕ ಭತ್ತೆ’ ಪ್ರಮುಖ ಯೋಜನೆಯಾಗಿದೆ. ಆದರೆ, ಮಾಹಿತಿಯ ಕೊರತೆಯಿಂದಾಗಿ 13ಲಕ್ಷಕ್ಕಿಂತಲೂ ಹೆಚ್ಚಿರುವ ವಿಕಲಚೇತನರಲ್ಲಿ ಕೇವಲ 7ಲಕ್ಷ ಮಂದಿ ಮಾಸಿಕ ಭತ್ತೆ ಪಡೆಯುತ್ತಿದ್ದಾರೆ. ಈ ಸೌಲಭ್ಯವು ಪ್ರತಿಯೊಬ್ಬ ವಿಕಲಚೇತನರಿಗೂ ತಲುಪಿಸುವ ಕೆಲಸವಾಗಬೇಕಿದೆ.
ಪೋಲಿಯೋ ಹಾಗೂ ಕುಷ್ಟ ರೋಗ ನಿವಾರಣೆಯಲ್ಲಿ ರಾಜ್ಯ ಸರಕಾರ ಯಶಸ್ವಿಯಾಗಿದೆ. ಬೇರೆ ರಾಜ್ಯಗಳಿಗೆ ಹೋಲಿಸಿದರೆ ಕರ್ನಾಟಕದಲ್ಲಿ ಸಾಕಷ್ಟು ಬೆಳವಣಿಗೆಯಾಗಿದ್ದು, ಪ್ರತ್ಯೇಕವಾದ ಕಾರ್ಯನೀತಿಯನ್ನು ಹೊಂದಿದ್ದು, ಸುಮಾರು 1000ಕೋಟಿ ರೂ.ಗೂ ಹೆಚ್ಚು ಹಣವನ್ನು ವಿಕಲಚೇತನರಿಗೆ ಮೀಸಲಿಟ್ಟಿದೆ.

13ಲಕ್ಷ ಜನಸಂಖ್ಯೆಯಿರುವ ಅಂಗವಿಕಲರ ಸಮಸ್ಯೆಗಳು ವಿವಿಧ ಬಗೆಯವು. ಅಂಗವಿಕಲತೆ ಸಮಸ್ಯೆಗಳಿಗೆ ಸ್ಪಂದಿಸುವ ಪ್ರತ್ಯೇಕ ತರಬೇತಿ ಹೊಂದಿದ ಪರಿಣಿತರ ಅಗತ್ಯವಿದೆ. ಅಂಗವಿಕಲತೆಯನ್ನು ಆರಂಭದಲ್ಲೇ ಪತ್ತೆ ಹಚ್ಚುವವರು ಹಾಗೂ ಸರಕಾರಿ ಸೌಲಭ್ಯಗಳ ಮಾಹಿತಿ ತಲುಪಿಸಲು ಸಾಮಾಜಿಕ ಕಾರ್ಯಕರ್ತರ ಅವಶ್ಯಕತೆಯಿದೆ. ರಾಜ್ಯದಲ್ಲಿ ಅಂಗವಿಕಲ ಕ್ಷೇತ್ರವನ್ನು ಗಮನಿಸಿದಾಗ ಸುಮಾರು 300-350 ಸ್ವಯಂ ಸೇವಾ ಸಂಸ್ಥೆಗಳು ಕಾರ್ಯನಿರ್ವಹಿಸುತ್ತಿವೆ. ಇದು ಹದಿಮೂರು ಲಕ್ಷವಿರುವ ವಿಕಲಚೇತನರನ್ನು ತಲುಪಲು ಸಾಧ್ಯವಾಗುತ್ತಿಲ್ಲ. ಈ ನಿಟ್ಟಿನಲ್ಲಿ ಆರೋಗ್ಯ ಇಲಾಖೆ ಬಹಳಷ್ಟು ಪ್ರಯತ್ನ ಪಡುತ್ತಿದ್ದರೂ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿಯೇ ಸಂಪೂರ್ಣವಾಗಿ ವೈದ್ಯರನ್ನು ನೇಮಿಸಲು ಸಾಧ್ಯವಾಗುತ್ತಿಲ್ಲ. ಇನ್ನು ತೀವ್ರತರ ಆರೋಗ್ಯದ ಸಮಸ್ಯೆಗಳಾದ ಮೆದುಳುವಾತ, ಬುದ್ಧಿಮಾಂದ್ಯತೆ, ಬಹುವಿಧ ಮತ್ತು ಆಟಿಸಂ ಹೊಂದಿರುವ ಅಂಗವಿಕಲರಿಗೆ ನ್ಯಾಷನಲ್ ಟ್ರಸ್ಟ್ ಆಕ್ಟ್ ಮೂಲಕ ನಿರಮಯ ಆರೋಗ್ಯವಿಮೆ ಪಡೆಯಲು ಸಂಘ, ಸಂಸ್ಥೆಗಳ ಮೊರೆ ಹೋಗಬೇಕಾದ ಅನಿವಾರ್ಯತೆಯಿದೆ. ರಾಜ್ಯದಲ್ಲಿ ಸುಮಾರು 3.60ಲಕ್ಷ ಅಂಗವಿಕಲರು ತೀವ್ರತರ ಆರೋಗ್ಯದ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಅಂಗವಿಕಲರು ಸ್ವಾಭಿಮಾನಿ ಬದುಕನ್ನು ಕಟ್ಟಿಕೊಳ್ಳಲು ಆರ್ಥಿಕವಾಗಿ ಸ್ವಾವಲಂಬಿಗಳಾಗುವುದು ಅಗತ್ಯ. ಆದರೆ, ಔದ್ಯೋಗಿಕ ಕ್ಷೇತ್ರದಲ್ಲಿ ಅಂಗವಿಕಲರ ಪರಿವಾಗಿರುವಂತಹ ಬದಲಾವಣೆಗಳು ಆಗಿಲ್ಲ. ಸಂಸತ್‌ನಲ್ಲಿ ಮಂಡಿಸಲಾದ ಮಾಹಿತಿಯ ಪ್ರಕಾರ ನಮ್ಮ ದೇಶದಲ್ಲಿ ಶೇ.34ವಿಕಲಚೇತನರು ಮಾತ್ರ ಕೆಲಸ ಮಾಡುತ್ತಿದ್ದಾರೆ. ಉಳಿದ ಶೇ.66ರಷ್ಟು ಮಂದಿ ನಿರುದ್ಯೋಗಿಗಳಾಗಿದ್ದಾರೆ. ಇತ್ತೀಚೆಗೆ ಕೆಲವು ಸಂಸ್ಥೆಗಳು ನಿರುದ್ಯೋಗಿ ಅಂಗವಿಕಲರಿಗೆ ವೃತ್ತಿ ತರಬೇತಿ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡು ಸ್ವಾಭಿಮಾನಿಗಳನ್ನಾಗಿ ರೂಪಿಸುತ್ತಿರುವುದು ಆಶಾದಾಯಕ ಬೆಳವಣಿಗೆಯಾಗಿದೆ.

ಕರ್ನಾಟಕ ಅಂಗವಿಕಲರ ಸಂಖ್ಯೆ
ದೃಷ್ಟಿನ್ಯೂನತೆ-264170, ವಾಕ್-ಶ್ರವಣ ನ್ಯೂನತೆ-326432, ದೈಹಿಕ-271982, ಬುದ್ಧಿ ಮಾಂದ್ಯರು-93974, ಮಾನಸಿಕ ಅಸ್ವಸ್ಥತೆ-20913, ಇತರೆ-246721, ಬಹುವಿಧ-100013 ವಿಕಲಚೇತನರು ಹೊಂದಿದ್ದಾರೆ.