ಮೈಸೂರಿನಿಂದ ಮದ್ರಾಸ್ಗೆ: ಎರಡೂ ರಾಜ್ಯಗಳಲ್ಲಿದ್ದಾರೆ ಜಯಾ ಅಭಿಮಾನಿಗಳು
ಮೈಸೂರು, ಡಿ.6: ತಮಿಳುನಾಡು ಮುಖ್ಯಮಂತ್ರಿ ಜಯಲಲಿತಾ ತವರು ರಾಜ್ಯ ಕರ್ನಾಟಕ ಹಾಗೂ ತಮಿಳುನಾಡಿನಲ್ಲಿ ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ.
ಅರಮನೆ ನಗರಿ ಮೈಸೂರಿನಲ್ಲಿ ಬಾಲ್ಯವನ್ನು ಕಳೆದಿದ್ದ ಜಯಲಲಿತಾರ ತಂದೆ ಜಯರಾಮ್ ಮೈಸೂರು ರಾಜ ಜಯಚಾಮರಾಜ ಒಡೆಯರ್ಗೆ ವೈದ್ಯರಾಗಿದ್ದರು.
ಜಯಲಲಿತಾರ ತಂದೆ ಜಯರಾಮ್ ನಿಧನರಾದ ಬಳಿಕ ಜಯಲಲಿತಾರ ತಾಯಿ ಸಂಧ್ಯಾ ಬೆಂಗಳೂರಿಗೆ ವಾಸ್ತವ್ಯ ಬದಲಾಯಿಸಿದರು. ತಮಿಳು ಚಿತ್ರೋದ್ಯಮಿದಲ್ಲಿ ಹೆಸರು ಮಾಡಿದ್ದ ಸಂಧ್ಯಾರ ಸಹೋದರಿ ವಿದ್ಯಾ ಅವರು ಸಂಧ್ಯಾರನ್ನು ಚೆನ್ನೈಗೆ ಕರೆಸಿಕೊಂಡರು.
ಮೈಸೂರಿನ ಲಕ್ಷ್ಮೀಪುರಂನಲ್ಲಿದ್ದ ಲಲಿತಾ ವಿಲಾಸ್, ರಾಮ ವಿಲಾಸ್ ಹಾಗೂ ಸರಸ್ವತಿಪುರಂನಲ್ಲಿದ್ದ ಮೂರನೆ ಮನೆಯನ್ನು ಮಾರಾಟ ಮಾಡಿದ್ದ ಸಂಧ್ಯಾ ಅವರು ತಮ್ಮ ಮಕ್ಕಳೊಂದಿಗೆ ಚೆನ್ನೈಗೆ ತೆರಳಿದರು. ವಿದ್ಯಾರ ಬೆಂಬಲದಿಂದ ಸಂಧ್ಯಾ ಚಿತ್ರರಂಗದಲ್ಲಿ ಬೆಳೆದರು. ಮಗಳು ಜಯಲಲಿತಾರನ್ನು ಶಾಲೆ ಹಾಗೂ ಭರತನಾಟ್ಯ ತರಗತಿಗಳಿಗೆ ಸೇರಿಸಿದರು.
14ರ ಹರೆಯದಲ್ಲಿ ಜಯಲಲಿತಾ ಮೊದಲ ಬಾರಿ ವೇದಿಕೆ ಏರಿ ಪ್ರದರ್ಶನ ನೀಡಿದ್ದರು. ಜಯಲಲಿತಾರ ಪ್ರದರ್ಶನವನ್ನು ಮಾಜಿ ನಟ ಶಿವಾಜಿ ಗಣೇಶನ್ ಹಾಗೂ ಭಾರತದ ಮಾಜಿ ಉಪ ರಾಷ್ಟ್ರಪತಿ ಬಿ.ಡಿ ಜತ್ತಿ ಅವರು ವೀಕ್ಷಿಸಿದ್ದರು. ಖ್ಯಾತ ನಿರ್ದೇಶಕ ಬಿಆರ್ ಪಂತುಲು ಬಳಿ ತನ್ನ ಮಗಳಿಗೆ ಅವಕಾಶ ನೀಡುವಂತೆ ಸಂಧ್ಯಾ ಅವರು ಕೇಳಿಕೊಂಡರು. ಆ ನಂತರ ಹಲವು ಯಶಸ್ವಿ ತಮಿಳು ಚಿತ್ರಗಳಲ್ಲಿ ನಟಿಸಿದ್ದ ಜಯಲಲಿತಾ ಅಭಿಮಾನಿಗಳ ಮನ ಗೆದ್ದರು.
2011ರಲ್ಲಿ ಜಯಲಲಿತಾ 63ನೆ ವರ್ಷಕ್ಕೆ ಕಾಲಿಟ್ಟಿದ್ದಾಗ ಮೈಸೂರಿನ ಚಾಮುಂಡೇಶ್ವರಿ ದೇವಸ್ಥಾನಕ್ಕೆ ಭೇಟಿ ನೀಡಿದ್ದರು. ಅಕ್ಟೋಬರ್ನಲ್ಲಿ ಜಯಲಲಿತಾ ಅನಾರೋಗ್ಯದಿಂದ ಆಸ್ಪತ್ರೆಗೆ ದಾಖಲಾಗಿದ್ದಾಗ ಅವರು ಅಭಿಮಾನಿಗಳಿಗೆ ದೇವಸ್ಥಾನಕ್ಕೆ ತೆರಳಿ ಹರಕೆ ಹೊತ್ತಿದ್ದರು.
