ನೋಟು ರದ್ದತಿಯಿಂದ ಸಂಭವಿಸಿದ 100 ಸಾವುಗಳ ಬಗ್ಗೆ ಸರಕಾರಕ್ಕೆ ಶೋಕವಿಲ್ಲ:ವಿಪಕ್ಷ

ಹೊಸದಿಲ್ಲಿ.ಡಿ.8: ನೋಟು ರದ್ದತಿಯ ಪರಿಣಾಮವಾಗಿ ಸಂಕಷ್ಟಗಳಿಗೆ ಸಿಲುಕಿ 100ಕ್ಕೂ ಅಧಿಕ ಜನರ ಸಾವುಗಳಿಗೆ ಶೋಕವನ್ನು ವ್ಯಕ್ತಪಡಿಸಲು ನಿರಾಕರಿಸಿರುವುದು ಸರಕಾರದ ‘‘ನಿರ್ಲಜ್ಜ ವರ್ತನೆ ’’ಯಾಗಿದೆ ಎಂದು ಪ್ರತಿಪಕ್ಷವಿಂದು ಆರೋಪಿಸಿದೆ. ನೋಟು ನಿಷೇಧ ಕುರಿತು ಬಿಕ್ಕಟ್ಟು ಇಂದೂ ಮುಂದುವರಿದಿದ್ದು, ಆಡಳಿತ ಮತ್ತು ಪ್ರತಿಪಕ್ಷ ಸದಸ್ಯರ ನಡುವಿನ ಜಟಾಪಟಿಯಿಂದಾಗಿ ಮುಂದೂಡಿಕೆಗೆ ರಾಜ್ಯಸಭೆಯು ಸಾಕ್ಷಿಯಾಯಿತು.

ಬೆಳಿಗ್ಗೆ ಸದನವು ಸಮಾವೇಶಗೊಂಡಾಗ ಪ್ರತಿಪಕ್ಷ ನಾಯಕ ಗುಲಾಂ ನಬಿ ಆಝಾದ್ ಅವರು ಮಾತನಾಡಲು ಎದ್ದು ನಿಂತಾಗ ನೋಟು ರದ್ದತಿ ಕುರಿತು ಚರ್ಚೆಯ ಪುನರಾರಂಭಕ್ಕೆ ಆಗ್ರಹಿಸಿ ಬಿಜೆಪಿ ಸದಸ್ಯರು ಘೋಷಣೆಗಳನ್ನು ಕೂಗತೊಡಗಿದರು. ಆಝಾದ್‌ಗೆ ಉತ್ತರವನ್ನು ನೀಡಲು ಸದನ ನಾಯಕ ಹಾಗೂ ವಿತ್ತಸಚಿವ ಅರುಣ್ ಜೇಟ್ಲಿಯವರು ಮುಂದಾದಾಗ ಪ್ರತಿಪಕ್ಷ ಸದಸ್ಯರು ಘೋಷಣೆಗಳನ್ನು ಕೂಗಿದರು.

ಸದನದಲ್ಲಿ ಶಾಂತಿ ಮೂಡಿಸುವ ಸಭಾಪತಿ ಹಾಮಿದ್ ಅನ್ಸಾರಿಯವರ ಪ್ರಯತ್ನ ವಿಫಲಗೊಂಡಾಗ ಮಧ್ಯಾಹ್ನ 12 ಗಂಟೆಯವರೆಗೆ ಸದನವನ್ನು ಮುಂದೂಡಲಾಯಿತು.

ಬೆಳಿಗ್ಗೆ ದಿನದ ಕಲಾಪಗಳ ಪಟ್ಟಿಯ ಮಂಡನೆಯ ಬೆನ್ನಿಗೇ ಸುಖೇಂದು ಶೇಖರ ರಾಯ್(ಟಿಎಂಸಿ) ಅವರು, ಪ್ರಧಾನಿ ನರೇಂದ್ರ ಮೋದಿಯವರು ನೋಟು ಅಮಾನ್ಯವನ್ನು ಪ್ರಕಟಿಸಿದ ಒಂದು ತಿಂಗಳಲ್ಲಿ 115 ಜನರು ಜೀವ ಕಳೆದುಕೊಂಡಿದ್ದಾರೆ. ಸದನವು ಅವರ ಸಾವಿನ ಬಗ್ಗೆ ಶೋಕ ವ್ಯಕ್ತಪಡಿಸಬೇಕು ಎಂದು ಹೇಳಿದರು.

ಅವರು ತನ್ನ ಮಾತು ಮುಗಿಸುವ ಮುನ್ನವೇ ಮಧ್ಯ ಪ್ರವೇಶಿಸಿದ ವಾರ್ತಾ ಮತ್ತು ಪ್ರಸಾರ ಸಚಿವ ಎಂ.ವೆಂಕಯ್ಯ ನಾಯ್ಡು ಅವರು, ಇದು ರಾಜಕೀಯವಾಗಿದೆ. ನೋಟು ಅಮಾನ್ಯ ಕುರಿತು ಚರ್ಚೆ ನಡೆಯಲಿ. ನೋಟು ಅಮಾನ್ಯವನ್ನು ಪ್ರಕಟಿಸಿದ ನ.8 ಐತಿಹಾಸಿಕ ದಿನವಾಗಿದೆ ಎಂದರು.

ನಿಯಂತ್ರಣ ಮೀರಿರುವ ಪ್ರತಿಪಕ್ಷವು ಪ್ರತಿದಿನ ಕಲಾಪಗಳಿಗೆ ವ್ಯತ್ಯಯವನ್ನುಂಟು ಮಾಡುತ್ತಿದೆ ಎಂದು ಅವರು ಹೇಳಿದರು.

ಆಝಾದ್ ಮಾತನಾಡುವ ಇಚ್ಛೆಯನ್ನು ವ್ಯಕ್ತಪಡಿಸಿದಾಗ ಆಡಳಿತ ಪಕ್ಷದ ಸದಸ್ಯರು ಆಕ್ಷೇಪ ವ್ಯಕ್ತಪಡಿಸಿದರು.

ಸದನ ನಾಯಕ ಮತ್ತು ವಿಪಕ್ಷ ನಾಯಕ ಮಾತನಾಡಲು ಬಯಸಿದಾಗ ಅವರಿಗೆ ಅವಕಾಶ ನೀಡುವುದು ಮೊದಲಿನಿಂದಲೂ ನಡೆದುಕೊಂಡು ಬಂದಿರುವ ಪರಿಪಾಠವಾಗಿದೆ ಎಂದ ಅನ್ಸಾರಿ, ಆಝಾದ್ ಅವರಿಗೆ ಮಾತನಾಡಲು ಅನುಮತಿ ನೀಡಿದರು.

ಪ್ರತಿಪಕ್ಷ ನಾಯಕರ ಬಗ್ಗೆ ವೈಯಕ್ತಿಕವಾಗಿ ಮತ್ತು ಸಾಂಸ್ಥಿಕವಾಗಿ ತನಗೆ ತುಂಬ ಗೌರವವಿದೆ. ಆದರೆ ಪ್ರತಿಪಕ್ಷ ಸದಸ್ಯರು ತಮ್ಮ ಕಡೆಯವರ ಮಾತು ಮುಗಿದ ಬಳಿಕ ಸಚಿವರ ಮಾತುಗಳಿಗೆ ಅವಕಾಶ ನೀಡದೇ ಸದನದ ಅಂಗಳದಲ್ಲಿ ನುಗ್ಗುವುದಕ್ಕೆ ತನ್ನ ಆಕ್ಷೇಪವಿದೆ. ತನ್ಮೂಲಕ ಸರಕಾರದ ಪ್ರತಿಕ್ರಿಯೆಗೂ ಅವರು ಅಡ್ಡಿಯನ್ನುಂಟು ಮಾಡುತ್ತಿದ್ದಾರೆ ಎಂದು ನಾಯ್ಡು ಹೇಳಿದರು.

ಸರಕಾರದ ತಪ್ಪುನೀತಿಗಳಿಂದಾಗಿ ಉಂಟಾದ ಸಂಕಷ್ಟಗಳ ಪರಿಣಾಮ ಕಳೆದೊಂದು ತಿಂಗಳಲ್ಲಿ 100ಕ್ಕೂ ಅಧಿಕ ಜನರು ಸಾವನ್ನಪ್ಪಿದ್ದಾರೆ. ಈ ಸದನವು ಅವರ ಸಾವುಗಳಿಗೆ ಶೋಕ ವ್ಯಕ್ತಪಡಿಸಬೇಕು ಎಂದು ನಾವು ಬಯಸಿದ್ದೇವೆ. ಆದರೆ ಸರಕಾರವು ನಿರಾಕರಿಸಿದೆ ಎಂದ ಆಝಾದ್, ಪ್ರತಿಪಕ್ಷವು ಬೇರೆ ಯಾವುದೇ ಮಾರ್ಗವಿಲ್ಲದೆ ಸಂಸತ್ ಭವನ ಸಂಕೀರ್ಣದಲ್ಲಿ ಗಾಂಧಿ ಪ್ರತಿಮೆಯ ಎದುರು ‘ಕರಾಳ ದಿನ’ವನ್ನು ಆಚರಿಸಿದೆ ಎಂದರು. ಘೋಷಣೆಗಳ ನಡುವೆಯೇ ಆಝಾದ್, ಸಾವುಗಳ ಬಗ್ಗೆ ಶೋಕ ವ್ಯಕ್ತಪಡಿಸುವ ಬದಲು ಗಾಯಕ್ಕೆ ಉಪ್ಪು ಸವರುತ್ತಿರುವ ಸರಕಾರದ ಕೃತ್ಯವು ನಾಚಿಕೆಗೇಡಿನದ್ದಾಗಿದೆ ಎಂದರು.