ಲೋಕಸಭೆಯಲ್ಲಿ ಮುಂದುವರಿದ ಬಿಕ್ಕಟ್ಟು: ಕ್ಷಮೆ ಕೇಳುವಂತೆ ಪ್ರತಿಪಕ್ಷಕ್ಕೆ ಸರಕಾರದ ಆಗ್ರಹ

ಹೊಸದಿಲ್ಲಿ,ಡಿ.9: ಪ್ರತಿಭಟನೆಯಲ್ಲಿ ನಿರತ ಪ್ರತಿಪಕ್ಷಗಳಿಗೆ ಶುಕ್ರವಾರ ತಿರುಗೇಟು ನೀಡಿದ ಸರಕಾರವು ಸಂಸತ್ತಿನ ಕಲಾಪಗಳಿಗೆ ವ್ಯತ್ಯಯವನ್ನುಂಟು ಮಾಡಿದ್ದಕ್ಕೆ ಕ್ಷಮೆ ಯಾಚಿಸುವಂತೆ ಅವುಗಳನ್ನು ಆಗ್ರಹಿಸಿತು. ಇದರೊಂದಿಗೆ ನೋಟು ನಿಷೇಧ ಕುರಿತಂತೆ ಕಳೆದ 16 ದಿನಗಳಿಂದ ಕಾಡುತ್ತಿರುವ ಬಿಕ್ಕಟ್ಟು ಇಂದು ಇನ್ನಷ್ಟು ತೀವ್ರಗೊಂಡಿದ್ದು, ಪ್ರತಿಪಕ್ಷಗಳಿಂದ ಇನ್ನೊಂದು ಸುತ್ತಿನ ಪ್ರತಿಭಟನೆಗಳಿಗೆ ಕಾರಣವಾಗಿದೆ.

ಬೆಳಿಗ್ಗೆ ಸದನವು ಸಮಾವೇಶಗೊಂಡ ಬಳಿಕ ಕಾಂಗ್ರೆಸ್ ನಾಯಕ ಮಲ್ಲಿಕಾರ್ಜುನ ಖರ್ಗೆ ಅವರು ಕೆಲವು ವಿಷಯಗಳನ್ನು ಮಂಡಿಸಲು ಎದ್ದುನಿಂತರು. ಈ ವೇಳೆ ಪ್ರತಿಪಕ್ಷವನ್ನು ಗುರಿಯಾಗಿಸಿಕೊಂಡು ದಾಳಿಗೆ ಮುಂದಾದ ಬಿಜೆಪಿ ಸದಸ್ಯರು ರಾಷ್ಟ್ರಪತಿ ಪ್ರಣವ್ ಮುಖರ್ಜಿಯವರು ನಿನ್ನೆ ವ್ಯಕ್ತಪಡಿಸಿದ ಅಭಿಪ್ರಯವನ್ನು ನೆನಪಿಸಿದರು.

ಇದರೊಂದಿಗೆ ಆಡಳಿತ ಮತ್ತು ಪ್ರತಿಪಕ್ಷ ಸದಸ್ಯರ ನಡುವೆ ವಾಗ್ಯುದ್ಧ ನಡೆದು ಕೋಲಾಹಲ ಸೃಷ್ಟಿಯಾದಾಗ ಸ್ಪೀಕರ್ ಸದನವನ್ನು ಪೂರ್ವಾಹ್ನ 11:30ರವರೆಗೆ ಮುಂದೂಡಿದರು.

 ಸದನವು ಮರುಸಮಾವೇಶಗೊಂಡಾಗ ನೋಟು ನಿಷೇಧ ಕುರಿತು ಚರ್ಚೆಗೆ ಪ್ರತಿಪಕ್ಷ ಸಿದ್ಧವಿದೆ ಮತ್ತು ಅದಕ್ಕಾಗಿ ನಿರಂತರವಾಗಿ ಮನವಿ ಮಾಡಿಕೊಳ್ಳುತ್ತಲೇ ಇದೆ ಎಂದು ಖರ್ಗೆ ಹೇಳಿದರು.

ಇದಕ್ಕೆ ತಕ್ಷಣವೇ ಉತ್ತರಿಸಿದ ಸಂಸದೀಯ ವ್ಯವಹಾರಗಳ ಸಚಿವ ಅನಂತ ಕುಮಾರ್ ಅವರು, ಪ್ರತಿಪಕ್ಷವು ಕಳೆದ 16 ದಿನಗಳಿಂದಲೂ ಕಲಾಪವನ್ನು ವ್ಯತ್ಯಯಗೊಳಿ ಸುತ್ತ,ಸದನವನ್ನು ಒತ್ತೆಯಾಳಾಗಿರಿಸಿಕೊಂಡಿದೆ. ಹೆಚ್ಚಿನ ಪಕ್ಷಗಳು ಚರ್ಚೆಯನ್ನು ಬಯಸಿವೆ. ಆದರೆ ಕಾಂಗ್ರೆಸ್,ಟಿಎಂಸಿ ಮತ್ತು ಎಡಪಕ್ಷಗಳ ಸದಸ್ಯರು ಸದನವು ಕಾರ್ಯ ನಿರ್ವಹಿಸಲು ಅವಕಾಶ ನೀಡುತ್ತಿಲ್ಲ. ಸ್ವತಃ ರಾಷ್ಟ್ರಪತಿಗಳೇ ಕಲಾಪ ವ್ಯತ್ಯಯದ ವಿರುದ್ಧ ಮಾತನಾಡುವ ಸ್ಥಿತಿಯೇರ್ಪಟ್ಟಿದೆ. ಇದಕ್ಕಾಗಿ ಪ್ರತಿಪಕ್ಷಗಳು ದೇಶದ ಜನತೆಯ ಕ್ಷಮೆಯನ್ನು ಯಾಚಿಸಲೇಬೇಕು ಎಂದು ಹೇಳಿದರು.

ರಾಷ್ಟ್ರಪತಿಗಳು ಸೂಚಿಸಿರುವಂತೆ ಪ್ರತಿಭಟನೆಗಳು ಮತ್ತು ಧರಣಿಗಳನ್ನು ನಡೆಸಲು ಜಂತರ್ ಮಂತರ್ ಅತ್ಯುತ್ತಮ ಸ್ಥಳವಾಗಿದೆಯೇ ಹೊರತು ಸಂಸತ್ತಿನಲ್ಲಿ ಅವು ನಡೆಯಬಾರದು. ಆದ್ದರಿಂದ ಪ್ರತಿಪಕ್ಷಗಳು ಕ್ಷಮೆ ಯಾಚಿಸಬೇಕು ಎಂದು ಬಿಜೆಪಿ ಸಂಸದೆ ಮೀನಾಕ್ಷಿ ಲೇಖಿ ಹೇಳಿದರು.

ಸದನದಲ್ಲಿ ನಿರಂತರವಾಗಿ ಮುಂದುವರಿದಿರುವ ಬಿಕ್ಕಟಿನ ಬಗ್ಗೆ ಬುಧವಾರ ತನ್ನ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದ ಹಿರಿಯ ಬಿಜೆಪಿ ನಾಯಕ ಎಲ್.ಕೆ.ಆಡ್ವಾಣಿ ಅವರು ಒಂದು ಹಂತದಲ್ಲಿ ಕುಪಿತ ಆಡಳಿತ ಪಕ್ಷದ ಸದಸ್ಯರನ್ನು ಸಮಾಧಾನಿಸುತ್ತಿದ್ದುದು ಕಂಡು ಬಂದಿತು.

 ಕೋಲಾಹಲ ಮುಂದುವರಿದಾಗ ಸ್ಪೀಕರ್ ಸದನವನ್ನು ಮಧ್ಯಾಹ್ನ 12 ಗಂಟೆಯವರೆಗೆ ಮುಂದೂಡಿದರು.

  ಸದನವು ಮರುಸಮಾವೇಶಗೊಂಡಾಗಲೂ ಕೋಲಾಹಲ ಮುಂದುವರಿದಿದ್ದು, ಅದರ ನಡುವೆಯೇ ಸ್ಪೀಕರ್ ಸದನವನ್ನು ದಿನದ ಮಟ್ಟಿಗೆ ಮುಂದೂಡುವ ಮುನ್ನ ಮಾನವ ಸಂಪನ್ಮೂಲ ಸಚಿವ ಪ್ರಕಾಶ ಜಾವಡೇಕರ್ ಅವರು ಮಸೂದೆಯೊಂದನ್ನು ಮಂಡಿಸಿದರು. ಶನಿವಾರದಿಂದ ನಾಲ್ಕು ದಿನಗಳ ರಜೆಯಿದ್ದು, ಸದನವು ಬುಧವಾರ ಮತ್ತೆ ಸಮಾವೇಶಗೊಳ್ಳಲಿದೆ.

 ಡಿ.13ಕ್ಕೆ ರಜೆಯಿರುವ ಹಿನ್ನೆಲೆಯಲ್ಲಿ ಬೆಳಿಗ್ಗೆ ಸದನವು 2001ರ ಸಂಸತ್ ದಾಳಿಯನ್ನು ಮತ್ತು ಎಂಟು ದಿಲ್ಲಿ ಪೊಲೀಸ್,ಸಿಆರ್‌ಪಿಎಫ್ ಮತ್ತು ಸಂಸತ್ ಭದ್ರತಾ ಸಿಬ್ಬಂದಿಗಳ ಬಲಿದಾನವನ್ನು ನೆನಪಿಸಿಕೊಂಡಿತು.