ಭಾರತದಲ್ಲಿ ಹೃದಯ ಕಾಯಿಲೆ ಹೆಚ್ಚಳ ಆತಂಕಕಾರಿ ಬೆಳವಣಿಗೆ : ತಜ್ಞರ ಅಭಿಮತ

ಕೊಚ್ಚಿ, ಡಿ.10: ವಿಶ್ವದಾದ್ಯಂತ ಹೃದ್ರೋಗಿಗಳ ಸಂಖ್ಯೆಯಲ್ಲಿ ಹೆಚ್ಚಳವಾಗಿದ್ದರೂ ಭಾರತದಲ್ಲಿ ಪರಿಸ್ಥಿತಿ ಆತಂಕಕಾರಿಯಾಗಿದೆ ಎಂದು ಹೃದಯರೋಗ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಇಲ್ಲಿ ನಡೆದ ಕಾರ್ಡಿಯೊಲಜಿಕಲ್ ಸೊಸೈಟಿ ಆಫ್ ಇಂಡಿಯಾ(ಸಿಎಸ್‌ಐ)ದ 68ನೇ ವಾರ್ಷಿಕ ಸಮ್ಮೇಳನದಲ್ಲಿ ಪಾಲ್ಗೊಂಡ ವಿಶ್ವದ ಐದು ಪ್ರಮುಖ ಹೃದಯರೋಗ ತಜ್ಞರ ಸಂಘದ ಅಧ್ಯಕ್ಷರು , ಭಾರತದಲ್ಲಿ ಹೃದಯರೋಗ ಚಿಕಿತ್ಸಾ ವಿಭಾಗವು ಹಲವಾರು ಸಮಸ್ಯೆಗಳನ್ನು ಎದುರಿಸುತ್ತಿದೆ ಎಂದು ಹೇಳಿದ್ದಾರೆ. ಅಮೆರಿಕದ ಹೃದಯ ಸಂಘದ ಅಧ್ಯಕ್ಷ ಪ್ರೊ. ಮಾರ್ಕ್ ಕ್ರೀಗರ್ ಹೇಳುವಂತೆ ಮಧುಮೇಹ ಸಮಸ್ಯೆಯ ಹೆಚ್ಚಳವು ಹೃದ್ರೋಗದ ಹೆಚ್ಚಳಕ್ಕೆ ಪ್ರಮುಖ ಕಾರಣವಾಗಿದೆ. ಮಧುಮೇಹ ಮತ್ತು ಅಧಿಕ ರಕ್ತದೊತ್ತಡ ಮತ್ತು ಕೊಲೆಸ್ಟರಾಲ್ ಪ್ರಮಾಣ ಹೆಚ್ಚಿರುವ  ರೋಗಿಗಳು ಹೃದಯಕ್ಕೆ ಸಂಬಂಧಿಸಿದ ಕಾಯಿಲೆಗೆ ತುತ್ತಾಗುವ ಸಾಧ್ಯತೆ ಹೆಚ್ಚಿದೆ ಎಂದಿರುವ ಕ್ರೀಗರ್, ಮಧುಮೇಹ ಕಾಯಿಲೆಯಿಂದ ಬಳಲುತ್ತಿರುವವರು ಸಕ್ಕರೆಯ ಸೇವನೆಯನ್ನು ನಿಯಂತ್ರಿಸದಿದ್ದರೆ ಹೃದಯ ರೋಗಕ್ಕೆ ತುತ್ತಾಗುತ್ತಾರೆ ಎಂದಿದ್ದಾರೆ.

    ಭಾರತದಲ್ಲಿ ಸಾವಿನ ಪ್ರಮಾಣ ಹೆಚ್ಚಲು ಹೃದಯ ಖಾಯಿಲೆ ಪ್ರಮುಖ ಕಾರಣವಾಗಿದೆ ಎಂದು ವಿಶ್ವ ಹೃದಯ ಪ್ರತಿಷ್ಠಾನದ ಮಾಜಿ ಅಧ್ಯಕ್ಷ ಡಾ. ಸಲೀಂ ಯೂಸುಫ್ ತಿಳಿಸಿದ್ದಾರೆ.ರಾಷ್ಟ್ರದ ಸರಾಸರಿಗಿಂತ ಮೂರುಪಟ್ಟು ಹೆಚ್ಚಿನ ಹೃದಯರೋಗಿಗಳು ಕೇರಳದಲ್ಲಿ ಇದ್ದಾರೆ . ಕೇರಳದವರ ಜೀವನಶೈಲಿ ಇದಕ್ಕೆ ಕಾರಣ ಎಂದು ಅವರು ತಿಳಿಸಿದ್ದಾರೆ. ಅಂಗಾರ (ಹೈಡ್ರೋಜನ್ ಮತ್ತು ಆಮ್ಲಜನಕದ ಸಂಯುಕ್ತ)ದ ಸೇವನೆ ಕಡಿಮೆಗೊಳಿಸಿ ಹಣ್ಣುಗನ್ನು ಹೆಚ್ಚಾಗಿ ಸೇವಿಸುವ ಮೂಲಕ ಹೃದಯದ ಆರೋಗ್ಯ ಕಾಪಾಡಿಕೊಳ್ಳಲು ಸಾಧ್ಯ ಎಂದ ಅವರು, ದೈನಂದಿನ ವ್ಯಾಯಾಮದ ಪ್ರಾಮುಖ್ಯತೆಯನ್ನು ತಿಳಿಸಿದರು.

  ಹೃದಯರೋಗದ ಲಕ್ಷಣಗಳು ಬದಲಾಗುತ್ತಿರುವಂತೆಯೇ ಹೃದಯನಾಳ ರಚನೆಯ ತಂತ್ರಜ್ಞಾನ ಒಳಗೊಂಡ ವಿನೂತನ ಚಿಕಿತ್ಸಾ ಪದ್ದತಿಯನ್ನು ಅನುಷ್ಠಾನಗೊಳಿಸಲಾಗಿದ್ದು ಇದು ರೋಗಿಗಳಲ್ಲಿ ಹೆಚ್ಚಿನ ಆಶಾಭಾವನೆ ಮೂಡಿಸಿದೆ ಎಂದು ಯುರೋಪಿಯನ್ ಹೃದಯತಜ್ಞರ ಸಂಘಟನೆಯ ನಿಯೋಜಿತ ಅಧ್ಯಕ್ಷ ಜೇಮ್ಸ್ ಬ್ಲಾಂಕೆನ್‌ಷಿಪ್ ಹೇಳಿದರು. ಹೃದಯ ರೋಗವನ್ನು ಪತ್ತೆಹಚ್ಚಲು ಹೊಸ ತಂತ್ರಜ್ಞಾನವನ್ನು ಅಭಿವೃದ್ಧಿಗೊಳಿಸಲಾಗಿದೆ. ಆದರೆ ಜನರು ಇದರ ಬಗ್ಗೆ ತಿಳಿದುಕೊಳ್ಳಬೇಕಾಗಿದೆ ಎಂದು ಯುರೋಪಿಯನ್ ಹೃದಯತಜ್ಞರ ಸಂಘಟನೆಯ ಅಧ್ಯಕ್ಷ ಜೆರೋನ್ ಬಕ್ಸ್ ತಿಳಿಸಿದ್ದಾರೆ.

 ಹೃದಯವು ರಕ್ತವನ್ನು ‘ಪಂಪ್’ ಮಾಡಲು ಅಸಮರ್ಥವಾದಾಗ ಹೃದಯಾಘಾತ ಸಂಭವಿಸುತ್ತದೆ. ಈ ಸಂದರ್ಭದಲ್ಲಿ ಕೃತಕ ವಿಧಾನಗಳ ಮೂಲಕ ಹೃದಯದ ಕಾರ್ಯವನ್ನು ಮುಂದುವರಿಸಲು ಮತ್ತು ಆ ಮೂಲಕ ರೋಗಿಗೆ ಜೀವದಾನ ಮಾಡಲು ಸಾಧ್ಯ ಎಂದು ಅಮೆರಿಕನ್ ಹೃದಯಶಾಸ್ತ್ರ ಕಾಲೇಜಿನ ಅಧ್ಯಕ್ಷೆ ಮೇರಿ ನೊರಿನ್ ತಿಳಿಸಿದ್ದಾರೆ. ಈ ಕುರಿತು ಜನರಲ್ಲಿ ಇರುವ ಸಂದೇಹಗಳನ್ನು ನಿವಾರಿಸಿ, ಈ ಚಿಕಿತ್ಸಾ ಕ್ರಮವನ್ನು ಅಳವಡಿಸಿಕೊಂಡಾಗ ಹೃದಯರೋಗಕ್ಕೆ ಸಂಬಂಧಿಸಿ ಉಂಟಾಗುವ ಸಾವಿನ ಸಂಖ್ಯೆ ಕಡಿಮೆಯಾಗಲು ಸಾಧ್ಯವಿದೆ ಎಂದವರು ಅಭಿಪ್ರಾಯಪಟ್ಟರು.