ಮುಂಬೈನಲ್ಲಿ ಹೆಲಿಕಾಪ್ಟರ್ ಪತನ: ಓರ್ವನ ಸಾವು

ಮುಂಬೈ,ಡಿ.11: ಉಪನಗರ ಗೋರೆಗಾಂವ್‌ನ ಆರೇ ಕಾಲನಿಯಲ್ಲಿ ಇಂದು ಹೆಲಿಕಾಪ್ಟರ್‌ವೊಂದು ಪತನಗೊಂಡು  ಓರ್ವ ಸಾವನ್ನಪ್ಪಿದ್ದು,  ಇತರ ಮೂವರಿಗೆ ತೀವ್ರ ಸುಟ್ಟಗಾಯಗಳಾಗಿವೆ. ಅವರನ್ನು ಸಮೀಪದ ಸೆವೆನ್ ಹಿಲ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಗಾಯಾಳುಗಳ ಪೈಕಿ ಓರ್ವನ ಸ್ಥಿತಿ ಚಿಂತಾಜನಕವಾಗಿದೆ. ಹೆಲಿಕಾಪ್ಟರ್ ಸಂಪೂರ್ಣವಾಗಿ ಸುಟ್ಟುಹೋಗಿದೆ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದರು. ಮಧ್ಯಾಹ್ನ 12ಗಂಟೆಯ ಸುಮಾರಿಗೆ ಈ ದುರಂತ ಸಂಭವಿಸಿದ್ದು, ಮೂರು ಅಗ್ನಿಶಾಮಕ ಯಂತ್ರಗಳು ಬೆಂಕಿಯನ್ನು ನಂದಿಸುವಲ್ಲಿ ಯಶಸ್ವಿಯಾಗಿವೆ.

ಪತನಗೊಂಡ ರಾಬಿನ್‌ಸನ್ ಆರ್44 ಆ್ಯಸ್ಟ್ರೋ ಹೆಲಿಕಾಪ್ಟರ್ ನಗರದಲ್ಲಿ ಹೆಲಿಕಾಪ್ಟರ್ ವಿಹಾರ ಹಾರಾಟಗಳನ್ನು ನಡೆಸುವ ಅಮನ್ ಏವಿಯೇಷನ್ ಸಂಸ್ಥೆಗೆ ಸೇರಿತ್ತು. ಇಂದು ರವಿವಾರವಾಧ್ದರಿಂದ ಜನರು ಹೆಲಿಕಾಪ್ಟರ್ ಹಾರಾಟದ ಮೋಜನ್ನನುಭವಿಸಲು ಬಂದಿದ್ದರು.