ನಾಲ್ವರು ಗಂಡಂದಿರಿಗೆ ಮೋಸ ಮಾಡಿರುವ ಮಹಿಳೆ ಪೊಲೀಸರ ಅತಿಥಿ

ನೊಯ್ಡ, ಡಿ.18: ಗಂಡಸರು ಹಲವು ಮದುವೆಯಾಗಿ ಮೋಸ ಮಾಡುವುದು ನಾವೆಲ್ಲಾ ಕೇಳಿದ್ದೇವೆ, ನೋಡಿದ್ದೇವೆ. ಆದರೆ, ಇಲ್ಲೊಬ್ಬ ಸುಂದರ ಮಹಿಳೆ ಬಾಲಿವುಡ್ ಸಿನೆಮಾ ‘ಡೋಲಿ ಕಿ ಡೊಲಿ’ ಚಿತ್ರದಲ್ಲಿನ ಸೋನಂ ಕಪೂರ್ ರೀತಿ ನಿಜಜೀವನದಲ್ಲಿ ನಾಲ್ವರು ಗಂಡಂದರಿಗೆ ಮೋಸ ಮಾಡಿ ಕೊನೆಗೂ ಪೊಲೀಸರ ಅತಿಥಿಯಾಗಿದ್ದಾರೆ.

ನಾಲ್ವರು ಗಂಡಸರನ್ನು ಮದುವೆಯಾಗಿ ಕೈಕೊಟ್ಟು, ಇತರ 11 ಜನರಿಗೆ ಮೋಸ ಮಾಡಿರುವ 28ರ ಪ್ರಾಯದ ಮೋಸಗಾತಿ ಮಹಿಳೆ ಮೇಘಾ ಭಾರ್ಗವ್ ಎಂಬಾಕೆಯನ್ನು ನೊಯ್ಡಾ ಹಾಗೂ ಕೇರಳದ ಪೊಲೀಸರು ಜಂಟಿ ಕಾರ್ಯಾಚರಣೆ ನಡೆಸಿ ಸೆರೆ ಹಿಡಿದಿದ್ದಾರೆ.

ಘಟನೆ ಬೆಳಕಿಗೆ ಬಂದಿದ್ದು ಹೀಗೆ...

ಅಕ್ಟೋಬರ್‌ನಲ್ಲಿ ಕೇರಳದ ಲಾರೆನ್ ಜಸ್ಟಿನ್ ಎಂಬುವವರು ತನ್ನ ಪತ್ನಿ ಮೇಘಾ ಮದುವೆಯಾದ ಕೆಲವೇ ಸಮಯದ ಬಳಿಕ 15 ಲಕ್ಷ ರೂ. ಒಡವೆಗಳೊಂದಿಗೆ ನಾಪತ್ತೆಯಾಗಿದ್ದಾರೆ ಎಂದು ಕೇರಳದ ಕೊಚ್ಚಿಯಲ್ಲಿ ದೂರು ದಾಖಲಿಸಿದ ಬಳಿಕ ಪ್ರಕರಣ ಬೆಳಕಿಗೆ ಬಂದಿದೆ.

 ಕೇರಳ ಪೊಲೀಸ್ ತಂಡ ನೊಯ್ಡ ಪೊಲೀಸರ ಜೊತೆಗೂಡಿ ಎರಡು ತಿಂಗಳ ತನಿಖೆಯ ಬಳಿಕ ಆರೋಪಿ ಮೇಘಾ ಭಾರ್ಗವ್, ಆಕೆಯ ಸಹೋದರಿ ಪ್ರಾಚಿ ಹಾಗೂ ಆಕೆಯ ಭಾವ ದೇವೇಂದ್ರ ಶರ್ಮರನ್ನು ಅಮರಪಾಲಿ ರೊಡಿಯಕ್ ಸೊಸೈಟಿಯ ಸೆಕ್ಟರ್ 20 ರಲ್ಲಿ ಬಂಧಿಸಿದ್ದರು.

  ಜಸ್ಟಿನ್ ಅವರು ಮೇಘಾಗೆ ಮೋಸ ಹೋದ ಕೇರಳದ ನಾಲ್ಕನೆ ವ್ಯಕ್ತಿ ಎಂದು ಕೇರಳದ ಪೊಲೀಸರು ಬಹಿರಂಗಪಡಿಸಿದ್ದಾರೆ. ಮೇಘಾ ಈ ಹಿಂದೆ ಮೂವರು ವ್ಯಕ್ತಿಗಳನ್ನು ಮದುವೆಯಾಗಿ ಮೋಸ ಮಾಡಿದ್ದಾಳೆ. ಜಸ್ಟಿನ್ ಪೊಲೀಸರಿಗೆ ದೂರು ನೀಡಿದ ಕಾರಣ ಮೇಘಾಳ ಮೋಸದಾಟ ಬೆಳಕಿಗೆ ಬಂದಿದೆ.

ಶ್ರೀಮಂತ ಕುಟುಂಬದಿಂದ ಬಂದಿರುವ, ನೋಡಲು ಸುಂದರವಾಗಿರುವ ಆರೋಪಿ ಮೇಘಾ ಭಾರ್ಗವಿಯು ವಿಚ್ಛೇದಿತ ಗಂಡಸರು, ವಿಕಲಚೇತನರು ಹಾಗೂ ಕಪ್ಪು ಬಣ್ಣದ ಶ್ರೀಮಂತ ಗಂಡಸರನ್ನೇ ಟಾರ್ಗೆಟ್ ಮಾಡುತ್ತಿದ್ದಳು. ಮದುವೆಯ ಬಳಿಕ ಸ್ವಲ್ಪ ಸಮಯ ಗಂಡನ ಜೊತೆ ಇರುವ ಈಕೆ ಒಂದು ದಿನ ಸಮಯಸಾಧಿಸಿ ಬೆಲೆಬಾಳುವ ವಸ್ತುಗಳೊಂದಿಗೆ ಪರಾರಿಯಾಗುತ್ತಿದ್ದಳು. ಈಕೆಯ ಕೃತ್ಯಕ್ಕೆ ಆಕೆಯ ಭಾವ ಸಾಥ್ ನೀಡುತ್ತಿದ್ದ. ಮೇಘಾ ಭಾರ್ಗವಿ ನೋಡಲು ಸುಂದರವಾಗಿದ್ದ ಕಾರಣ ಗಂಡಸರು ಆಕೆ ಬೀಸಿದ ಬಲೆಗೆ ಸುಲಭವಾಗಿ ಬೀಳುತ್ತಿದ್ದರು ಎಂದು ಕೇರಳ ಪೊಲೀಸ್ ಇನ್‌ಸ್ಪೆಕ್ಟರ್ ಮಹೇಂದ್ರ ತಿಳಿಸಿದ್ದಾರೆ.

ಮೇಘಾಳ ಬಂಧನದ ಆಕೆ ಇಂದೋರ್‌ನ ನಿವಾಸಿ, ಜಸ್ಟಿನ್ ಸಹಿತ ನಾಲ್ವರು ವ್ಯಕ್ತಿಗಳನ್ನು ಮದುವೆಯಾಗಿ, 11 ಮಂದಿಗೆ ಮೋಸ ಮಾಡಿರುವುದು ಕಂಡು ಬಂದಿದೆ. ಮೇಘಾಳನ್ನು ವರ್ಗಾವಣೆ ರಿಮಾಂಡ್‌ನ ಮೇಲೆ ಕೊಚ್ಚಿಗೆ ಕರೆತರಲಾಗಿದ್ದು, ಅಲ್ಲಿ ಆಕೆಯ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.