‘ಜಾಲಿ ಎಲ್‌ಎಲ್‌ಬಿ 2’

‘ಜಾಲಿ ಎಲ್‌ಎಲ್‌ಬಿ’ ಬಾಲಿವುಡ್ ಚಿತ್ರ ನೋಡಿದವರಿಗೆ, ಅರ್ಶದ್ ವಾರ್ಸಿಯ ಅಭಿನಯವನ್ನು ಖಂಡಿತವಾಗಿಯೂ ಮರೆಯಲು ಸಾಧ್ಯವಿಲ್ಲ. ತನ್ನ ಬಡಪಾಯಿ ಕಕ್ಷಿದಾರನಿಗೆ ನ್ಯಾಯ ಒದಗಿಸಲು ಹೋರಾಡುವ ವಕೀಲನ ಪಾತ್ರದಲ್ಲಿ ವಾರ್ಸಿ ಮನೋಜ್ಞವಾಗಿ ನಟಿಸಿದ್ದರು. ಈ ಚಿತ್ರದ ಮುಂದಿನ ಸರಣಿಯನ್ನು ನಿರ್ಮಾಪಕರು ಘೋಷಿಸಿದಾಗ ಅದರಲ್ಲೂ ವಾರ್ಸಿಯೇ ನಾಯಕನಾಗಲಿರುವರೆಂದು ಹೆಚ್ಚಿನ ಚಿತ್ರಪ್ರೇಮಿಗಳು ನಿರೀಕ್ಷಿಸಿದ್ದರು. ಆದರೆ ಆ ಚಿತ್ರವು ಅರ್ಶದ್ ವಾರ್ಸಿಯ ಕೈತಪ್ಪಿತ್ತು. ಈ ಬಗ್ಗೆ ಸ್ವತಃ ಅವರೇ ಬಹಿರಂಗವಾಗಿ ಬೇಸರ ತೋಡಿಕೊಂಡಿದ್ದರು. ಆದರೆ ಇದಕ್ಕಾಗಿ ವಾರ್ಸಿಗೆ ನಿರ್ಮಾಪಕರ ಮೇಲೆ ಸ್ವಲ್ಪವೂ ಅಸಮಾಧಾನವಿಲ್ಲವಂತೆ.

‘ಜಾಲಿ ಎಲ್‌ಎಲ್‌ಬಿ 2’ನಲ್ಲಿ ಅಕ್ಷಯ್ ಕುಮಾರ್ ನಾಯಕನಾಗಿ ನಟಿಸಿದ್ದಾರೆ. ಇತ್ತೀಚೆಗೆ ಚಿತ್ರದ ಟ್ರೈಲರ್ ಕೂಡಾ ಬಿಡುಗಡೆಯಾಗಿದೆ. ಟ್ರೈಲರ್‌ನಲ್ಲಿ ಅಕ್ಷಯ್ ಅಭಿನಯದ ಝಲಕ್‌ಗಳನ್ನು ಕಂಡು ತಾನು ಖುಷಿಪಟ್ಟಿದ್ದೇನೆಂದು ವಾರ್ಸಿ ಟ್ವೀಟಿಸಿದ್ದಾರೆ. ಜೊತೆಗೆ ಚಿತ್ರಕ್ಕೆ ತಪ್ಪದೆ ಶುಭ ಹಾರೈಸಿದ್ದಾರೆ.

‘ಜಾಲಿ ಎಲ್‌ಎಲ್‌ಬಿ 2’ನಲ್ಲಿ ಅಕ್ಷಯ್‌ಗೆ ನಾಯಕಿಯಾಗಿ ಹುಮಾ ಖುರೇಷಿ ಅಭಿನಯಿಸಿದ್ದಾರೆ. ಮೊದಲ ಭಾಗದಲ್ಲಿ ನ್ಯಾಯಾಧೀಶನ ಪಾತ್ರಕ್ಕಾಗಿ ಫಿಲ್ಮ್‌ಫೇರ್ ಪೋಷಕ ಪ್ರಶಸ್ತಿ ಪುರಸ್ಕೃತ ಸೌರಭ್‌ಶುಕ್ಲಾ ಈ ಚಿತ್ರದಲ್ಲಿ ಪುನಾರಾಗಮಿಸಿದ್ದಾರೆ. ಇತ್ತ ಅಕ್ಷಯ್‌ಗೆ, ತನ್ನ ಚಿತ್ರಬದುಕಿನಲ್ಲಿ ಪ್ರಥಮ ಬಾರಿಗೆ ವಕೀಲನ ಪಾತ್ರದಲ್ಲಿ ನಟಿಸಿರುವುದು ಸಂತಸ ತಂದಿದೆಯಂತೆ. ಎಲ್ಲವೂ ಅಂದುಕೊಂಡಂತೆ ನಡೆದಲ್ಲಿ ‘ಜಾಲಿ ಎಲ್‌ಎಲ್‌ಬಿ 2’ 2017ರ ಫೆಬ್ರವರಿಯಲ್ಲಿ ತೆರೆಕಾಣಲಿದೆ.