ಸರಕಾರಿ ಸಿಟಿ ಬಸ್ ಡಿಪೋ ಜಾಗ ವಿವಾದ

 ಜನಪರ ಯೋಜನೆಯ ಅನುಷ್ಠಾನಕ್ಕೆ ಬೀಳಲಿದೆಯೇ ಕೊಡಲಿಯೇಟು?
ಬಿ. ರೇಣುಕೇಶ್
ಶಿವಮೊಗ್ಗ, ಡಿ. 25: ಶಿವಮೊಗ್ಗ ನಗರದಲ್ಲಿ ಕೇಂದ್ರ ಸರಕಾರದ ನರ್ಮ್ ಯೋಜನೆಯಡಿ ಸರಕಾರಿ ಸಿಟಿ ಬಸ್ ಸಂಚಾರಕ್ಕೆ ಅನುಮತಿ ಸಿಕ್ಕಿ, ಅನುದಾನ ಬಿಡುಗಡೆಯಾಗಿ ಎರಡು ವರ್ಷವಾದರೂ ಸರಕಾರಿ ಸಿಟಿ ಬಸ್‌ಗಳ ಸಂಚಾರ ಆರಂಭವಾಗಿರಲಿಲ್ಲ. ಜನಪ್ರತಿನಿಧಿಗಳು ಸೇರಿದಂತೆ ಸಂಬಂಧಿಸಿದ ಇಲಾಖೆಯ ಅಧಿಕಾರಿಗಳು ಯೋಜನೆ ಅನುಷ್ಠಾನಕ್ಕೆ ನಿರ್ಲಕ್ಷ್ಯವಹಿಸಿದ್ದರು. ಇದರಿಂದ ನಗರದಲ್ಲಿ ಸರಕಾರಿ ಸಿಟಿ ಬಸ್‌ಗಳ ಸಂಚಾರ ನನೆಗುದಿಗೆ ಬೀಳುವಂತಾಗಿತ್ತು.

ಈ ನಡುವೆ ಸರಕಾರಿ ಸಿಟಿ ಬಸ್ ಓಡಾಟ ಆರಂಭವಾಗದಂತೆ ಕಾಣದ ಕೈ’ಗಳು, ಮಾಫಿಯಾ’ಗಳು ಲಾಬಿ ನಡೆಸುತ್ತಿರುವ ಆರೋಪಗಳು ಜನಮಾನಸದಲ್ಲಿ ಕೇಳಿಬಂದಿದ್ದವು. ಇದೆಲ್ಲದರ ನಡುವೆ ವಿವಿಧ ಸಂಘಟನೆಗಳು, ನಾಗರಿಕರು ಸರಕಾರಿ ಸಿಟಿ ಬಸ್ ಸಂಚಾರಕ್ಕೆ ಆಗ್ರಹಿಸಿ ಬೀದಿಗಿಳಿದು ಪ್ರತಿಭಟನೆ ನಡೆಸಿದ್ದವು. ಯೋಜನೆ ಅನುಷ್ಠಾನದಲ್ಲಿ ವಿಳಂಬ ಧೋರಣೆ ಅನುಸರಿಸುತ್ತಿರುವ ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತವಾಗಿತ್ತು.

ನಾಗರಿಕರ ಒತ್ತಡಕ್ಕೆ ಮಣಿದ ಆಡಳಿತ ವ್ಯವಸ್ಥೆ ಕೊನೆಗೂ ಶಿವಮೊಗ್ಗ ನಗರದಲ್ಲಿ ಸರಕಾರಿ ಸಿಟಿ ಬಸ್ ಸಂಚಾರಕ್ಕೆ ಕ್ರಮಕೈಗೊಂಡಿತ್ತು. ಪ್ರಸ್ತುತ ಮಂಜೂರಾಗಿರುವ 65 ಬಸ್‌ಗಳಲ್ಲಿ 10 ಬಸ್‌ಗಳ ಓಡಾಟಕ್ಕೆ ಹಸಿರು ನಿಶಾನೆ ತೋರಿಸಲಾಗಿತ್ತು. ಹಂತಹಂತವಾಗಿ ಉಳಿದ ಬಸ್‌ಗಳನ್ನು ಓಡಿಸಲು ಕ್ರಮಕೈಗೊಳ್ಳುವುದಾಗಿ ಹೇಳಲಾಗಿತ್ತು. ಆದರೆ ಇಲ್ಲಿಯವರೆಗೂ ಉಳಿದ ಬಸ್‌ಗಳ ಸಂಚಾರ ಆರಂಭವಾಗಿಲ್ಲ. ಈ ನಡುವೆ ಸರಕಾರಿ ಸಿಟಿ ಬಸ್ ಡಿಪೋಗೆ ನಗರದ ಹೊರವಲಯ ಸಂತೆಕಡೂರು ಬಳಿ ಜಿಲ್ಲಾಡಳಿತ ಗುರುತಿಸಿರುವ 8 ಎಕರೆ ಸರಕಾರಿ ಜಾಗವನ್ನು ರದ್ದುಪಡಿಸಿ, ಬೇರೆ ಕಡೆ ನೀಡುವಂತೆ ಲೋಕಸಭಾ ಸದಸ್ಯ ಬಿ.ಎಸ್.ಯಡಿಯೂರಪ್ಪಜಿಲ್ಲಾಡಳಿತಕ್ಕೆ ಸೂಚನೆ ನೀಡಿದ್ದಾರೆ. ಒಂದು ವೇಳೆ ಈ ಆದೇಶ ಕಾರ್ಯಗತಗೊಂಡರೆ ಭವಿಷ್ಯದಲ್ಲಿ ಸರಕಾರಿ ಸಿಟಿ ಬಸ್‌ನ ಪ್ರತ್ಯೇಕ ಡಿಪೋ ನಿರ್ಮಾಣವಾಗುವುದಿರಲಿ, ಪ್ರಸ್ತುತ ಓಡುತ್ತಿರುವ ಬಸ್‌ಗಳು ಸ್ಥಗಿತಗೊಳ್ಳುವ ಅನುಮಾನಗಳು ನಾಗರಿಕರದ್ದಾಗಿದೆ. ಸಂತೆಕಡೂರು ಗ್ರಾಮದಲ್ಲಿ ಡಿಪೋ ನಿರ್ಮಾಣಕ್ಕೆ ಮೀಸಲಿರಿಸಿರುವ ಜಾಗದ ಸಮೀಪದಲ್ಲಿಯೇ ಕೇಂದ್ರೀಯ ಶಿಕ್ಷಣ ಮಹಾವಿದ್ಯಾಲಯದ ಕಟ್ಟಡ ನಿರ್ಮಾಣ ಮಾಡಲಾಗುತ್ತಿದೆ.

ಇಲ್ಲಿ ಡಿಪೋ ನಿರ್ಮಾಣ ಮಾಡಿದರೆ ಭವಿಷ್ಯದಲ್ಲಿ ತೊಂದರೆಯಾಗಬಹುದು ಎಂಬುದು ಬಿ.ಎಸ್.ಯಡಿಯೂರಪ್ಪರವರ ವಾದವಾಗಿದೆ. ಈ ಹಿನ್ನೆಲೆಯಲ್ಲಿ ಡಿಪೋ ಜಾಗವನ್ನು ಶಿಕ್ಷಣ ಉದ್ದೇಶಕ್ಕೆ ಮೀಸಲಿಟ್ಟು, ನಗರದ ಬೇರೆಡೆ ಜಾಗ ಗುರುತಿಸುವಂತೆ ಸಂಸದರು ಜಿಲ್ಲಾಡಳಿತಕ್ಕೆ ಸೂಚಿಸಿದ್ದಾರೆ. ಇದೀಗ ಸಂಸದ ಬಿ.ಎಸ್.ಯಡಿಯೂರಪ್ಪರವರು ಸಂತೆಕಡೂರು ಗ್ರಾಮದಲ್ಲಿ ಸಿಟಿ ಬಸ್ ಡಿಪೋಗೆ ಮಂಜೂರಾಗಿರುವ ಜಾಗ ರದ್ದುಪಡಿಸುವಂತೆ ಆದೇಶಿಸಿರುವುದರಿಂದ ಪೂರ್ಣ ಪ್ರಮಾಣದಲ್ಲಿ ಈ ಯೋಜನೆಯ ಅನುಷ್ಠಾನಕ್ಕೆ ಕೊಡಲಿಪೆಟ್ಟು ಬೀಳುವ ಆತಂಕ ಜನಮಾನಸದಲ್ಲಿ ಎದುರಾಗಿದೆ. ಈ ನಿಟ್ಟಿನಲ್ಲಿ ಜಿಲ್ಲಾಡಳಿತ ಯಾವ ನಿಟ್ಟಿನಲ್ಲಿ ಕ್ರಮಕೈಗೊಳ್ಳಲಿದೆ ಎಂಬುದನ್ನು ಕಾದು ನೋಡಬೇಕಾಗಿದೆ.

ಮಂಜೂರಾಗಿರುವ ಜಾಗ ಕೂಡ ಕೆಎಸ್ಸಾರ್ಟಿಸಿ ತನ್ನ ಸುಪರ್ದಿಗೆ ಪಡೆಯುವ ಕೆಲಸ ಆರಂಭವಾಗಿಲ್ಲ. ಇದಕ್ಕೆ ಸ್ಥಳೀಯ ಜನಪ್ರತಿನಿಧಿಗಳು ಹಾಗೂ ಜಿಲ್ಲಾಡಳಿತದ ನಿರ್ಲಕ್ಷ್ಯವೇ ಮುಖ್ಯ ಕಾರಣವಾಗಿದೆ ಎಂಬುದು ನಾಗರಿಕರು ಆಕ್ರೋಶ ವ್ಯಕ್ತಪಡಿಸುತ್ತಾರೆ.

ಶಿವಮೊಗ್ಗ ಸುತ್ತಮುತ್ತ ಸರಕಾರ ಜಾಗ ಸಿಗೋದು ಕಷ್ಟ
ಪ್ರಸ್ತುತ ಶಿವಮೊಗ್ಗ ನಗರದ 10 ಕಿ.ಮೀ. ಸುತ್ತಮುತ್ತ ಸರಕಾರಿ ಜಾಗ ಸಿಗುವುದು ಅತ್ಯಂತ ಕಷ್ಟದ ಸಂಗತಿಯಾಗಿದೆ. ಈಗಾಗಲೇ ಸರಕಾರಿ ಜಾಗಗಳನ್ನು ವಿವಿಧ ರೀತಿಯ ಅಭಿವೃದ್ಧಿ ಕೆಲಸಗಳಿಗೆ ಮಂಜೂರು ಮಾಡಲಾಗಿದೆ. ಮತ್ತೊಂದೆಡೆ ಸರಕಾರಿ ಯೋಜನೆಗಳ ಅನುಷ್ಠಾನಕ್ಕೆ ನಗರ ವ್ಯಾಪ್ತಿಯಲ್ಲಿ ಖಾಸಗಿ ಜಾಗ ಖರೀದಿ ಮಾಡುವುದು ಕಷ್ಟಕರವಾಗಿದೆ. ಎಕರೆಗೆ ಕೋಟಿ ರೂ. ಮೇಲ್ಪಟ್ಟು ವೌಲ್ಯವಿದ್ದು, ಇಷ್ಟೆಲ್ಲ ಸಂಗತಿಗಳನ್ನು ಅರಿತ್ತಿದ್ದ ಈ ಹಿಂದಿನ ಜಿಲ್ಲಾಧಿಕಾರಿ ವಿಪುಲ್ ಬನ್ಸಲ್‌ರವರು ನಗರಕ್ಕೆ ಸಮೀಪದ ಸಂತೆಕಡೂರು ಗ್ರಾಮದಲ್ಲಿದ್ದ 8 ಎಕರೆ ಸರಕಾರಿ ಭೂಮಿಯನ್ನು ಸರಕಾರಿ ಸಿಟಿ ಬಸ್ ಡಿಪೋ ನಿರ್ಮಾಣಕ್ಕೆ ಮೀಸಲಿರಿಸುವ ನಿರ್ಧಾರ ಕೈಗೊಂಡಿದ್ದರು.

 ಈ ಮೂಲಕ ಲಕ್ಷಾಂತರ ನಾಗರಿಕರಿಗೆ ಅನುಕೂಲಕರವಾಗುವ ಜನಪರ ಯೋಜನೆಯ ಅನುಷ್ಠಾನಕ್ಕೆ ಒತ್ತು ನೀಡಿದ್ದರು. ಆದರೆ ಇದೀಗ ಈ ಜಾಗಕ್ಕೂ ಕುತ್ತು ತರುವ ಕೆಲಸಗಳು ನಡೆಯಲಾರಂಭಿಸಿರುವುದು ನಿಜಕ್ಕೂ ವಿಷಾದಕರ ಸಂಗತಿಯಾಗಿದೆ ಎಂದು ನಗರದ ಪ್ರಜ್ಞಾ ವಂತ ನಾಗರಿಕರು ಅಸಮಾಧಾನ ವ್ಯಕ್ತಪಡಿಸಲಾರಂಭಿಸಿದ್ದಾರೆ.