ಪುಟಿನ್ ಚುನಾವಣೆಯಲ್ಲಿ ಟ್ರಂಪ್ಗೆ ಸಹಾಯ ಮಾಡಿದ್ದರು : ಅಮೆರಿಕ ಗುಪ್ತಚರ ವರದಿ
ವಾಶಿಂಗ್ಟನ್, ಜ. 7: ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಡೆಮಾಕ್ರಟಿಕ್ ಪಕ್ಷದ ಅಭ್ಯರ್ಥಿ ಹಿಲರಿ ಕ್ಲಿಂಟನ್ರನ್ನು ಸೋಲಿಸುವುದನ್ನು ಹಾಗೂ ರಿಪಬ್ಲಿಕನ್ ಅಭ್ಯರ್ಥಿ ಡೊನಾಲ್ಡ್ ಟ್ರಂಪ್ರನ್ನು ಗೆಲ್ಲಿಸುವುದನ್ನು ಗುರಿಯಾಗಿಸಿ ಕಂಪ್ಯೂಟರ್ಗಳಿಗೆ ಕನ್ನ ಹಾಕುವಂತೆ ಹಾಗೂ ಮಾಧ್ಯಮಗಳಲ್ಲಿ ಪ್ರಚಾರ ನಡೆಸುವಂತೆ ರಶ್ಯದ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಆದೇಶ ನೀಡಿದ್ದರು ಎಂದು ಅಮೆರಿಕದ ಗುಪ್ತಚರ ಇಲಾಖೆ ಶುಕ್ರವಾರ ಬಿಡುಗಡೆ ಮಾಡಿದ ವರದಿಯೊಂದರಲ್ಲಿ ತಿಳಿಸಿದೆ.
ಆರಂಭದಲ್ಲಿ ಇದರ ಉದ್ದೇಶ ಹಿಲರಿಯ ಅಧ್ಯಕ್ಷೀಯ ಅಭಿಯಾನಕ್ಕೆ ಧಕ್ಕೆಯುಂಟುಮಾಡುವುದಾಗಿತ್ತು ಹಾಗೂ ಬಳಿಕ ರಿಪಬ್ಲಿಕನ್ ಅಭ್ಯರ್ಥಿ ಗೆಲ್ಲುವ ಸಾಧ್ಯತೆ ಗೋಚರಿಸಿದಾಗ ಅವರನ್ನು ಬೆಂಬಲಿಸುವುದಾಗಿತ್ತು ಎಂದು ರಾಷ್ಟ್ರೀಯ ಗುಪ್ತಚರ ನಿರ್ದೇಶಕರ ವರದಿ ಹೇಳಿದೆ.
‘‘2016ರಲ್ಲಿ ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯನ್ನು ಗುರಿಯಾಗಿಸಿ ವಶೀಲಿಬಾಜಿ ಅಭಿಯಾನವೊಂದನ್ನು ನಡೆಸುವಂತೆ ರಶ್ಯದ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಆದೇಶ ನೀಡಿದ್ದರು ಎಂದು ತಿಳಿದುಬಂದಿದೆ. ಅಮೆರಿಕದ ಪ್ರಜಾಸತ್ತಾತ್ಮಕ ಪ್ರಕ್ರಿಯೆಯಲ್ಲಿ ಸಾರ್ವಜನಿಕರ ವಿಶ್ವಾಸವನ್ನು ತಗ್ಗಿಸುವುದು, ಹಿಲರಿ ಕ್ಲಿಂಟನ್ರನ್ನು ಕಡೆಗಣಿಸುವುದು ಮತ್ತು ಅವರು ಆಯ್ಕೆಯಾಗುವ ಹಾಗೂ ಅಧ್ಯಕ್ಷೆಯಾಗುವ ಸಾಧ್ಯತೆಗಳನ್ನು ಕಡಿಮೆಗೊಳಿಸುವುದು ರಶ್ಯದ ಉದ್ದೇಶಗಳಾಗಿದ್ದವು’’ ಎಂದು ತಿಳಿಸಿದೆ.
ಹೀಗೆ ಮಾಡಲು ರಶ್ಯದ ಅಧ್ಯಕ್ಷರಿಗೆ ಹಲವು ಕಾರಣಗಳಿದ್ದವು. ವಿದೇಶದ ಬ್ಯಾಂಕ್ಗಳಲ್ಲಿ ರಹಸ್ಯ ಖಾತೆಗಳನ್ನು ಹೊಂದಿರುವುದಾಗಿ ಪನಾಮ ದಾಖಲೆಗಳಲ್ಲಿ ತನ್ನ ಹೆಸರು ಬಂದಿರುವುದಕ್ಕಾಗಿ ಹಾಗೂ ಒಲಿಂಪಿಕ್ ಉದ್ದೀಪನ ದ್ರವ್ಯ ಸೇವನೆ ವಿಷಯದಲ್ಲಿ ರಶ್ಯದ ಆ್ಯತ್ಲೀಟ್ಗಳ ವಿರುದ್ಧ ಕ್ರಮ ತೆಗೆದುಕೊಂಡಿರುವುದಕ್ಕಾಗಿ ಅಮೆರಿಕದ ವಿರುದ್ಧ ಪ್ರತೀಕಾರ ಸಾಧಿಸಲು ರಶ್ಯ ಮುಂದಾಗಿತ್ತು. ಅದೂ ಅಲ್ಲದೆ, 2011-12ರಲ್ಲಿ ತನ್ನ ಸರಕಾರದ ವಿರುದ್ಧ ಪ್ರತಿಭಟನೆ ನಡೆಸಲು ಜನರನ್ನು ಹಿಲರಿ ಉತ್ತೇಜಿಸಿದ್ದರು ಎಂಬ ಆಕ್ರೋಶವನ್ನೂ ಹಿಲರಿ ಹೊಂದಿದ್ದಾರೆ.
ಚುನಾವಣೆ ಮೇಲೆ ಸೈಬರ್ ದಾಳಿ ಪರಿಣಾಮ ಬೀರಿಲ್ಲ: ಟ್ರಂಪ್
ವಾಶಿಂಗ್ಟನ್, ಜ. 7: ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯ ಮೇಲೆ ರಶ್ಯ ಮಾತ್ರ ಸೈಬರ್ ದಾಳಿ ನಡೆಸಿದೆ ಎಂಬುದನ್ನು ಒಪ್ಪಲು ನಿಯೋಜಿತ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶುಕ್ರವಾರ ನಿರಾಕರಿಸಿದ್ದಾರೆ.
ರಶ್ಯದ ಸೈಬರ್ ದಾಳಿಯ ಬಗ್ಗೆ ಗುಪ್ತಚರ ಇಲಾಖೆಯ ಉನ್ನತ ಅಧಿಕಾರಿಗಳಿಂದ ಮಾಹಿತಿ ಪಡೆದುಕೊಂಡ ಬಳಿಕ ಅವರು ಈ ಪ್ರತಿಕ್ರಿಯೆ ನೀಡಿದ್ದಾರೆ.ಅದೇ ವೇಳೆ, ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯ ಫಲಿತಾಂಶವು ಸೈಬರ್ ದಾಳಿಯಿಂದ ಪ್ರಭಾವಿತವಾಗಿಲ್ಲ ಎಂಬುದಾಗಿಯೂ ಹೇಳಿದರು.
ರಶ್ಯ, ಚೀನಾ ಮತ್ತು ಇತರ ದೇಶಗಳು ನಡೆಸುತ್ತಿರುವ ಸೈಬರ್ ದಾಳಿಗಳಿಂದ ಅಮೆರಿಕದ ಸಂಸ್ಥೆಗಳು, ರಾಜಕೀಯ ಪಕ್ಷಗಳು ಮತ್ತು ಉದ್ದಿಮೆಗಳು ನಲುಗುತ್ತಿವೆ ಎಂದು ಗುಪ್ತಚರ ಇಲಾಖೆಯ ನಾಲ್ವರು ಮುಖ್ಯಸ್ಥರನ್ನು ಭೇಟಿಯಾದ ಬಳಿಕ ನೀಡಿದ ಹೇಳಿಕೆಯೊಂದರಲ್ಲಿ ತಿಳಿಸಿದರು.
