ಭಾರತಕ್ಕೆ ಇಂಗ್ಲೆಂಡ್ ವಿರುದ್ಧ ಸರಣಿ ಗೆಲುವಿನ ಗುರಿ

 ಕಟಕ್, ಜ.18: ಕಳೆದ ವರ್ಷ ಐದು ಟೆಸ್ಟ್‌ಗಳ ಸರಣಿಯಲ್ಲಿ ಇಂಗ್ಲೆಂಡ್ 537, 400 ಮತ್ತು 477 ರನ್ ಗಳಿಸಿದರೂ, ಭಾರತವನ್ನು ಸೋಲಿಸಲು ಸಾಧ್ಯವಾಗಲಿಲ್ಲ. ಪುಣೆಯಲ್ಲಿ ರವಿವಾರ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ 350 ರನ್ ಗಳಿಸಿತು. ಆದರೆ ನಾಯಕ ವಿರಾಟ್ ಕೊಹ್ಲಿ ಮತ್ತು ಕೇದಾರ್ ಜಾಧವ್ ದ್ವಿಶತಕದ ಜೊತೆಯಾಟದ ಮುಂದೆ ಇಂಗ್ಲೆಂಡ್‌ನ ಗೆಲುವಿನ ಕನಸು ಈಡೇರಲಿಲ್ಲ. 63ಕ್ಕೆ 4 ವಿಕೆಟ್‌ಗಳನ್ನು ಕಳೆದುಕೊಂಡು ಸೋಲಿನ ದವಡೆಗೆ ಸಿಲುಕಿದ್ದ ಭಾರತ ವನ್ನು ಕೊಹ್ಲಿ ಮತ್ತು ಜಾಧವ್ ಆಕರ್ಷಕ ಬ್ಯಾಟಿಂಗ್ ಮೂಲಕ ಗೆಲುವಿನ ದಡ ಸೇರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

 ಗುರುವಾರ ಕಟಕ್‌ನ ಬಾರಾಬತಿ ಸ್ಟೇಡಿಯಂನಲ್ಲಿ ಎರಡನೆ ಏಕದಿನ ಪಂದ್ಯ ನಡೆಯಲಿದ್ದು, ಭಾರತ ಈ ಪಂದ್ಯದಲ್ಲಿ ಜಯಿಸಿ ಮೂರು ಏಕದಿನ ಪಂದ್ಯಗಳ ಸರಣಿಯನ್ನು ಇನ್ನೂ ಒಂದು ಏಕದಿನ ಪಂದ್ಯ ಬಾಕಿ ಇರುವಾಗಲೇ 2-0 ಅಂತರದಲ್ಲಿ ಗೆಲ್ಲುವ ಸಂಕಲ್ಪ ಮಾಡಿದೆ.

ಮೊದಲ ಏಕದಿನ ಪಂದ್ಯ ಮುಗಿದರೂ ಉಭಯ ತಂಡಗಳು ಪುಣೆಯಲ್ಲೇ ಉಳಿದುಕೊಂಡು ಅಭ್ಯಾಸ ನಡೆಸಿವೆ. ಕಟಕ್‌ನಲ್ಲಿ ಎಲ್ಲ ಹೊಟೇಲ್‌ಗಳು ಭರ್ತಿಯಾಗಿರುವ ಹಿನ್ನೆಲೆಯಲ್ಲಿ ತಡವಾಗಿ ಕಟಕ್‌ಗೆ ಆಗಮಿಸಿದೆ. ಕಟಕ್‌ನಲ್ಲಿ 2014ರಲ್ಲಿ ನಡೆದ ಪಂದ್ಯದಲ್ಲಿ ಭಾರತ 5 ವಿಕೆಟ್ ನಷ್ಟದಲ್ಲಿ 363 ರನ್ ಗಳಿಸಿತ್ತು. ಶ್ರೀಲಂಕಾ ವಿರುದ್ಧ 169 ರನ್‌ಗಳ ಜಯ ಗಳಿಸಿತ್ತು. ಆ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಭಾರತ ತಂಡದ ನಾಯಕರಾಗಿದ್ದರು.ಮೊದಲ ಗೆಲುವಿನೊಂದಿಗೆ ಭಾರತ ಬಳಿಕ ನಾಲ್ಕು ಪಂದ್ಯಗಳಲ್ಲೂ ಜಯ ಗಳಿಸಿ ಸರಣಿಯನ್ನು 5-0 ಅಂತರದಲ್ಲಿ ಕ್ಲೀನ್ ಸ್ವೀಪ್ ಸಾಧಿಸಿತ್ತು.

ತಂಡದ ಸಮಾಚಾರ

ಶಿಖರ್ ಧವನ್ ಮೊದಲ ಏಕದಿನ ಪಂದ್ಯದಲ್ಲಿ ಆರಂಭಿಕ ದಾಂಡಿಗನಾಗಿ ಕಣಕ್ಕಿಳಿದು ಕಳಪೆ ಪ್ರದರ್ಶನ ನೀಡಿದ್ದರು. 10 ಎಸೆತಗಳಲ್ಲಿ 1 ರನ್ ಗಳಿಸಿದ್ದರು. ಈ ಕಾರಣದಿಂದಾಗಿ ಅವರು ಜಾಗ ತೆರವುಗೊಳಿಸಬೇಕಾದ ಪರಿಸ್ಥಿತಿ ಎದುರಾಗಿದೆ. ಇವರ ಬದಲಿಗೆ ಅಜಿಂಕ್ಯ ರಹಾನೆ ಅಂತಿಮ ಹನ್ನೊಂದರಲ್ಲಿ ಸ್ಥಾನ ಪಡೆಯುವ ನಿರೀಕ್ಷೆ ಇದೆ.

ಇಂಗ್ಲೆಂಡ್ ವಿರುದ್ಧದ ಎರಡನೆ ಅಭ್ಯಾಸ ಪಂದ್ಯದಲ್ಲಿ ಭಾರತ ‘ಎ’ ತಂಡದ ನಾಯಕರಾಗಿದ್ದ ರಹಾನೆ ಆಕರ್ಷಕ 91 ರನ್ ಗಳಿಸಿ ತಂಡದ ಗೆಲುವಿಗೆ ನೆರವಾಗಿದ್ದರು. ಮೂರು ವರ್ಷಗಳ ಬಳಿಕ ಟೀಮ್ ಇಂಡಿಯಾದಲ್ಲಿ ಆಡಿದ್ದ ಯುವರಾಜ್ ಸಿಂಗ್ ಅವರು 15 ರನ್‌ಗಳ ಕಾಣಿಕೆ ನೀಡಿದ್ದರು. ಅವರು ಎರಡು ಬೌಂಡರಿ ಮತ್ತು 1 ಸಿಕ್ಸರ್ ಸಿಡಿಸಿದ್ದರು.

ಉಮೇಶ್ ಯಾದವ್ 8 ಓವರ್‌ಗಳಲ್ಲಿ 63 ರನ್ ನೀಡಿದ್ದರು. ಈ ಕಾರಣದಿಂದಾಗಿ ಅವರು ಭುವನೇಶ್ವರ ಕುಮಾರ್‌ಗೆ ಸ್ಥಾನ ತೆರವುಗೊಳಿಸಬೇಕಾಗುತ್ತದೆ.

  ಇಂಗ್ಲೆಂಡ್ ತಂಡದ ಆದಿಲ್ ರಶೀದ್ 5 ಓವರ್‌ಗಳಲ್ಲಿ 50 ರನ್ ನೀಡಿದ್ದರು. ಇದು ಇಂಗ್ಲೆಂಡ್‌ನ ಪಾಲಿಗೆ ದುಬಾರಿಯಾಗಿ ಪರಿಣಮಿಸಿತ್ತು.ಇವರು ಎರಡನೆ ಪಂದ್ಯದಲ್ಲಿ ಸ್ಥಾನ ಕಳೆದುಕೊಳ್ಳುವ ಸಾಧ್ಯತೆ ಇದೆ. ಇಂಗ್ಲೆಂಡ್‌ನ ದಾಂಡಿಗರ ಪೈಕಿ ಅಲೆಕ್ಸ್ ಹೇಲ್ಸ್ (18 ಎಸೆತಗಳಲ್ಲಿ 9 ರನ್) ಇವರನ್ನು ಹೊರತುಪಡಿಸಿ ತಂಡದ ಎಲ್ಲ ಬ್ಯಾಟ್ಸ್‌ಮನ್‌ಗಳು ಚೆನ್ನಾಗಿ ಆಡಿ 350 ರನ್‌ಗಳ ಕಠಿಣ ಸವಾಲು ವಿಧಿಸಲು ನೆರವಾಗಿದ್ದರು.

ಸಂಭಾವ್ಯ ತಂಡ

ಭಾರತ: ವಿರಾಟ್ ಕೊಹ್ಲಿ(ನಾಯಕ), ಅಜಿಂಕ್ಯ ರಹಾನೆ/ಶಿಖರ್ ಧವನ್, ಕೆ.ಎಲ್.ರಾಹುಲ್, ಯುವರಾಜ್ ಸಿಂಗ್, ಎಂಎಸ್.ಧೋನಿ (ವಿಕೆಟ್ ಕೀಪರ್), ಕೇದಾರ್ ಜಾಧವ್, ಹಾರ್ದಿಕ್ ಪಾಂಡ್ಯ, ರವೀಂದ್ರ ಜಡೇಜ, ಆರ್.ಅಶ್ವಿನ್, ಉಮೇಶ್ ಯಾದವ್/ಭುವನೇಶ್ವರ ಕುಮಾರ್, ಜಸ್‌ಪ್ರೀತ್ ಬುಮ್ರಾ.

ಇಂಗ್ಲೆಂಡ್: ಇಯಾನ್ ಮೊರ್ಗನ್(ನಾಯಕ), ಜೇಸನ್ ರಾಯ್, ಅಲೆಕ್ಸ್ ಹೇಲ್ಸ್, ಜೋ ರೂಟ್, ಜೋಶ್ ಬಟ್ಲರ್(ವಿಕೆಟ್ ಕೀಪರ್), ಬೆನ್ ಸ್ಟೋಕ್ಸ್, ಮೊಯಿನ್ ಅಲಿ, ಕ್ರಿಸ್ ವೋಕ್ಸ್, ಆದಿಲ್ ರಶೀದ್/ಲಿಯಾಮ್ ಡಾವ್ಸನ್, ಡೇವಿಡ್ ವಿಲ್ಲಿ, ಜಾಕ್ ಬಾಲ್.

 ‘‘ ಪ್ರತಿಯೊಂದು ಪಂದ್ಯದಲ್ಲೂಇದು ನನ್ನ ಕೊನೆಯ ಪಂದ್ಯವಾಗಿರಬಹುದೆಂದು ಭಾವಿಸಿ ಆಡುತ್ತೇನೆ. ನಾನು ತಂಡದ ಹಿತಕ್ಕಾಗಿ ಹೆಚ್ಚಿನ ಶ್ರಮ ವಹಿಸಿ ಆಡಲು ಶ್ರಮಿಸುವೆ ’’

-ಕೇದಾರ್ ಜಾಧವ್, ಭಾರತ

‘‘ ಕೊಹ್ಲಿ ಬ್ಯಾಟಿಂಗ್‌ನ್ನು ಊಹಿಸಲು ಅಸಾಧ್ಯ. ಟೆಸ್ಟ್‌ನಲ್ಲಿ ಅವರ ಬ್ಯಾಟಿಂಗ್‌ನ್ನು ನೋಡಿದ್ದೇವೆ. ಏಕದಿನ ಕ್ರಿಕೆಟ್‌ನಲ್ಲೂ ಚೆನ್ನಾಗಿ ಆಡುತ್ತಾರೆ. ಅವರ ಬ್ಯಾಟಿಂಗನ್ನು ನಿಯಂತ್ರಿಸಲು ತಂತ್ರ ರೂಪಿಸಲಾಗಿದೆ.

-ಜಾಕ್ ಬಾಲ್, ಇಂಗ್ಲೆಂಡ್

ಪಂದ್ಯದ ಸಮಯ: ಮಧ್ಯಾಹ್ನ 1:30ಕ್ಕೆ ಆರಂಭ.

-ಹೈಲೈಟ್ಸ್

*ರವೀಂದ್ರ ಜಡೇಜ ಇನ್ನು ಎರಡು ವಿಕೆಟ್ ಪಡೆದರೆ 150 ವಿಕೆಟ್ ಸಂಪಾದಿಸಿದ ಭಾರತದ ಮೊದಲ ಎಡಗೈ ಸ್ಪಿನ್ನರ್ ಎನಿಸಿಕೊಳ್ಳಲಿದ್ದಾರೆ.

 *ಭಾರತ ಎರಡನೆ ಏಕದಿನ ಪಂದ್ಯ ಜಯಿಸಿದರೆ ದ್ವಿಪಕ್ಷೀಯ ಸರಣಿಯಲ್ಲಿ ಇಂಗ್ಲೆಂಡ್ ವಿರುದ್ಧ ಐದನೆ ಏಕದಿನ ಸರಣಿಯನ್ನು ಜಯಿಸಿದ ದಾಖಲೆ ಬರೆಯಲಿದೆ.ಇಂಗ್ಲೆಂಡ್ ಭಾರತದ ವಿರುದ್ಧ ಆಡಿದ ಕಳೆದ 24 ಏಕದಿನ ಪಂದ್ಯಗಳಲ್ಲಿ 20 ಪಂದ್ಯಗಳಲ್ಲಿ ಸೋಲಿನ ದಾಖಲೆ ನಿರ್ಮಿಸಲಿದೆ.

*ಭಾರತಕ್ಕೆ ಕಟಕ್‌ನಲ್ಲಿ ಯಶಸ್ಸು 5-2. ಇಂಗ್ಲೆಂಡ್ ವಿರುದ್ಧ 2-1 ಗೆಲುವಿನ ದಾಖಲೆ ಹೊಂದಿದೆ. .

*ಟೀಮ್ ಇಂಡಿಯಾದ ನಾಯಕರಾಗಿ ವಿರಾಟ್ ಕೊಹ್ಲಿಗೆ 1,000 ರನ್ ಪೂರ್ಣಗೊಳಿಸಲು ಇನ್ನು 28 ರನ್ ಗಳಿಸಬೇಕಾಗಿದೆ. *ಕಟಕ್‌ನಲ್ಲಿ ಭಾರತ ವಿವಿಧ ತಂಡಗಳೊಂದಿಗೆ 17 ಏಕದಿನ ಪಂದ್ಯಗಳನ್ನು ಆಡಿದೆ. ಈ ಪೈಕಿ 11 ಪಂದ್ಯಗಳಲ್ಲಿ ಜಯ ಗಳಿಸಿದೆ.

*ಹದಿಮೂರು ವರ್ಷಗಳ ಹಿಂದೆ ಅಂದರೆ 2003 ನವೆಂಬರ್‌ನಲ್ಲಿ ಭಾರತ ಕೊನೆಯ ಬಾರಿ ನ್ಯೂಝಿಲೆಂಡ್ ವಿರುದ್ಧ ಕಟಕ್‌ನಲ್ಲಿ ಸೋಲು ಅನುಭವಿಸಿತ್ತು.

*ಭಾರತ 2014ರಲ್ಲಿ ಶ್ರೀಲಂಕಾ ವಿರುದ್ಧ 5 ವಿಕೆಟ್ ನಷ್ಟದಲ್ಲಿ 363 ರನ್ ಗಳಿಸಿರುವುದು ಕಟಕ್‌ನಲ್ಲಿ ಭಾರತದ ಗರಿಷ್ಠ ಸ್ಕೋರ್ ಆಗಿದೆ.

*ಭಾರತ ಕಟಕ್‌ನಲ್ಲಿ ಎರಡು ಬಾರಿ 300ಕ್ಕೂ ಅಧಿಕ ರನ್ ದಾಖಲಿಸಿತ್ತು. 1998ರಲ್ಲಿ ಝಿಂಬಾಬ್ವೆ ವಿರುದ್ಧ 3 ವಿಕೆಟ್ ನಷ್ಟದಲ್ಲಿ 301 ರನ್ ಗಳಿಸಿತ್ತು.

 *ಕಟಕ್‌ನಲ್ಲಿ ಭಾರತದ ಮುಹಮ್ಮದ್ ಅಝರುದ್ದೀನ್(ಔಟಾಗದೆ 153) ಮತ್ತು ಅಜಯ್ ಜಡೇಜ(ಔಟಾಗದೆ 116) ಅವರು ನಾಲ್ಕನೆ ವಿಕೆಟ್‌ಗೆ 275 ರನ್‌ಗಳ ಮುರಿಯದ ಜೊತೆಯಾಟ ನೀಡಿದ್ದರು. ಇದು ಕಟಕ್‌ನಲ್ಲಿ ದಾಖಲಾದ ಗರಿಷ್ಠ ರನ್‌ಗಳ ಜೊತೆಯಾಟವಾಗಿದೆ.

*ಇಂಗ್ಲೆಂಡ್ ವಿರುದ್ಧ ಕೊಹ್ಲಿಗೆ 1,000 ರನ್ ಪೂರ್ಣಗೊಳಿಸಲು 142 ರನ್ ಗಳಿಸಬೇಕಾಗಿದೆ.