ದೇಶದಲ್ಲಿ ಪ್ರಜಾಪ್ರಭುತ್ವ ಹಾನಿಗೊಳಗಾಗುತ್ತಿದೆ: ಜಮಾಅತೆ ಇಸ್ಲಾಮೀ ಹಿಂದ್
ಚೆನ್ನೈ , ಜ.20 : ಜನವರಿ 14-17ರ ವರೆಗೆ ನಾಲ್ಕು ದಿನಗಳ ಕಾಲ ಚೆನ್ನೈಯಲ್ಲಿ ಜಮಾಅತೆ ಇಸ್ಲಾಮೀ ಹಿಂದ್ ಕೇಂದ್ರ ಸಲಹಾ ಸಮಿತಿ ಸಭೆ ನಡೆಯಿತು.
ಜ.ಇ. ಹಿಂದ್ ರಾಷ್ಟ್ರಾಧ್ಯಕ್ಷರಾದ ಮೌಲಾನ ಜಲಾಲುದ್ದೀನ್ ಉಮರಿಯವರ ನೇತೃತ್ವದಲ್ಲಿ ನಡೆದ ಈ ಸಭೆಯಲ್ಲಿ ಕೇಂದ್ರ ಸಲಹಾ ಸಮಿತಿಯ 18 ಸದಸ್ಯರು ಭಾಗವಹಿಸಿದ್ದರು.
ದೇಶದಲ್ಲಿ ಹಾನಿಗೊಳಗಾಗಿರುವ ಪ್ರಜಾಪ್ರಭುತ್ವ, ಮಾನವ ಹಕ್ಕುಗಳ ಉಲ್ಲಂಘನೆಯ ಘಟನೆಗಳು, ಪ್ರಜಾಸತ್ತಾತ್ಮಕ ಸಂಸ್ಥೆಗಳ ಸ್ವಾಯತ್ತತೆಯ ಅಭಾವ, ರಾಷ್ಟ್ರದ ಆರ್ಥಿಕತೆಯ ಮೇಲೆ ಕಾರ್ಪೋರೇಟ್ಗಳ ಅಕ್ರಮ ಪ್ರಾಬಲ್ಯ ಮತ್ತು ನವ ಉದಾರವಾದಿ ಮಾರುಕಟ್ಟೆ ಶಕ್ತಿಗಳ ನಡುವಿನ ಸಂಬಂಧವು ಆತಂಕಕಾರಿಯಾಗಿದೆ ಹಾಗೂ ಕೋಮುವಾದವು ದಬ್ಬಾಳಿಕೆ ಹಾಗೂ ನಿರಂಕುಶ ಪರಿಸ್ಥಿತಿಯೆಡೆಗೆ ರಾಷ್ಟ್ರವನ್ನು ನೂಕುತ್ತಿದೆ ಎಂದು ಸಲಹಾ ಸಮಿತಿ ಸದಸ್ಯರು ಆತಂಕ ವ್ಯಕ್ತಪಡಿಸಿದರು.
"ದೇಶದ ಸಂವಿಧಾನದಲ್ಲಿರುವ ಮೂಲಭೂತ ಮೌಲ್ಯಗಳನ್ನು ವ್ಯವಸ್ಥಿತವಾಗಿ ಹಾಳುಗೆಡವಲಾಗುತ್ತಿದೆ. ಸಂಸ್ಥೆಗಳ ಅಂತರ್ಗತ ಹಿತಾಸಕ್ತಿಗಳನ್ನು ಸರಿ ಹೊಂದಿಸಲು ದೇಶದ ಆರ್ಥಿಕ ನೀತಿಯಲ್ಲಿ ಅನಾರೋಗ್ಯಕರ ಬದಲಾವಣೆಗಳನ್ನು ಮಾಡಲಾಗುತ್ತಿದೆ. ಸರಕಾರವು ಮಸೂದೆಗಳ ಪ್ರವೃತ್ತಿಯನ್ನು ಆಶ್ರಯಿಸಿದೆ ಹಾಗೂ ಕೇವಲ 30 ತಿಂಗಳಿನಲ್ಲಿ 23 ಮಸೂದೆಗಳನ್ನು ಜಾರಿಗೊಳಿಸಿದೆ ಎಂದು ಸಮಿತಿಯ ಸದಸ್ಯರು ಅಭಿಪ್ರಾಯಪಟ್ಟರು.
ಸಂವಿಧಾನದಲ್ಲಿ ಉಲ್ಲೇಖಿಸಿದಂತೆ ಮಾನವ ಹಕ್ಕುಗಳನ್ನು ಗೌರವಿಸುವುದು ಹಾಗೂ ಸಂರಕ್ಷಿಸುವುದು ಸರಕಾರದ ಮೂಲಭೂತ ಹಾಗೂ ಸಾಂವಿಧಾನಿಕ ಜವಾಬ್ದಾರಿಯಾಗಿದೆ. ಭಾರತವು ಕಲ್ಯಾಣ ರಾಷ್ಟ್ರವಾಗಿದೆ. ಶಾಸಕಾಂಗ, ನ್ಯಾಯಾಂಗ, ಆಡಳಿತಶಾಹಿಯ ಜೊತೆಗೆ ಎಲ್ಲಾ ಸಾಂವಿಧಾನಿಕ ಸಂಸ್ಥೆಗಳು ಸರಿಯಾದ ಹಾಗೂ ಪರಿಣಾಮಕಾರಿಯಾದ ಕಾರ್ಯ ನಿರ್ವಹಣೆಯ ಮೇಲೆ ಕಲ್ಯಾಣ ರಾಷ್ಟ್ರವು ಅವಲಂಬಿತವಾಗಿದೆ ಎಂದು ಜಮಾಅತ್ ಇಸ್ಲಾಮಿ ಹಿಂದ್ ಸರಕಾರಕ್ಕೆ ನೆನಪಿಸಿದೆ.
ಅನಾಣ್ಯೀಕರಣದ ಪರಿಣಾಮವನ್ನು ಚರ್ಚಿಸಲಾಯಿತು. ಕಪ್ಪು ಹಣ, ತೆರಿಗೆ ವಂಚನಾ ತೆರಿಗೆ , ಆರ್ಥಿಕ ಅನೀತಿ ಹಾಗೂ ರಾಷ್ಟ್ರದಲ್ಲಾಗುತ್ತಿರುವ ವಂಚನೆಯನ್ನು ತೊಡೆದು ಹಾಕುವ ಅಗತ್ಯವಿದೆ. ಕೇಂದ್ರ ಸರಕಾರದ ಆರ್ಥಿಕ ಅನಾಣ್ಯೀಕರಣವು ತಮ್ಮ ಸ್ವಯಂ ಘೋಷಿತ ಉದ್ದೇಶಗಳನ್ನು ಸಾಕಾರಗೊಳಿಸುವಲ್ಲಿ ವಿಫಲಗೊಂಡಿದ್ದಲ್ಲದೇ, ದೇಶದ ಆರ್ಥಿಕತೆಯು ತುಂಬಲಾರದ ನಷ್ಟ ಅನುಭವಿಸಬೇಕಾಯಿತು. ಜೊತೆಗೆ ಮಿಲಿಯನ್ ಗಟ್ಟಲೆ ಜನರು ಸಂಕಷ್ಟಕ್ಕೆ ಸಿಲುಕಿಕೊಂಡರು ಎಂದು ಸಮಿತಿ ಅಭಿಪ್ರಾಯ ಪಟ್ಟಿದೆ.
ಈ ನಡೆಯಲ್ಲಿ ಆರ್ಬಿಐ ಸ್ವಾಯತ್ತತೆಯ ಮಧ್ಯ ಪ್ರವೇಶಿಸಿದ್ದು ಖಂಡನೀಯ. ದೇಶವನ್ನು ನಗದು ಆರ್ಥಿಕತೆಯಿಂದ, ನಗದು ರಹಿತ ಆರ್ಥಿಕತೆಯನ್ನಾಗಿ ಮಾಡಲು ನಿರ್ಧರಿಸುವ ತನ್ನ ಈ ನಿಲುವನ್ನು ಸರಕಾರವು ಕೈಬಿಡಬೇಕು ಹಾಗೂ ಹೊಸ ನೋಟು ಬಿಡುಗಡೆ ಪ್ರಕ್ರಿಯೆಯನ್ನು ತ್ವರಿತಗೊಳಿಸಿ ರಾಷ್ಟ್ರವನ್ನು ಯಥಾ ಸ್ಥಿತಿಗೆ ತರಬೇಕು ಎಂದು ಸಮಿತಿಯು ಸರಕಾರಕ್ಕೆ ಮನವಿ ಮಾಡಿತು.
ಸಿರಿಯಾದಲ್ಲಾಗುತ್ತಿರುವ ಮಾನವ ಹಕ್ಕುಗಳ ಉಲ್ಲಂಘನೆ ಹಾಗೂ ಅಂತರ್ಯುದ್ಧವು ಹೃದಯವಿದ್ರಾವಕವಾಗಿದೆ. ಈ ಯುದ್ಧದ ಹಿಂದಿರುವ ನೈಜ ಉದ್ದೇಶವು ಆ ಪ್ರದೇಶದಲ್ಲಿರುವ ಹೇರಳವಾದ ನೈಸರ್ಗಿಕ ಸಂಪನ್ಮೂಲಗಳನ್ನು ವಶಪಡಿಸಿಕೊಳ್ಳುವುದಾಗಿದೆ. ಆ ಭಾಗದಲ್ಲಿರುವ ಮುಸ್ಲಿಮ್ ರಾಷ್ಟ್ರಗಳು ಸಿರಿಯಾದ ಜೊತೆಗೆ ಸಂಬಂಧವನ್ನು ಬಲಪಡಿಸಬೇಕು. ಶಾಂತಿ ಹಾಗೂ ವಿಶ್ವ ಭ್ರಾತೃತ್ವಕ್ಕಾಗಿ ಶ್ರಮಿಸಬೇಕು. ತತ್ಕ್ಷಣ ವಿದೇಶಿ ಸೈನ್ಯಗಳನ್ನು ಸಿರಿಯದಿಂದ ಹಿಂಪಡೆಯಬೇಕು. ವಿವಿಧ ದೇಶಗಳಲ್ಲಿ ನೆಲೆಸಿರುವ ಸಿರಿಯಾದ ನಿರಾಶ್ರಿತರನ್ನು ಅವರ ನಾಡಿಗೆ ಹಿಂತಿರುಗಿಸಬೇಕು. ಸಿರಿಯದಲ್ಲಿ ಪ್ರಜಾಪ್ರಭುತ್ವದ ಪ್ರಶಾಂತ ವಾತಾವರಣವನ್ನು ಸೃಷ್ಟಿಸಲು ಶ್ರಮಿಸಬೇಕು ಎಂದು ಜಮಾಅತೆ ಇಸ್ಲಾಮೀ ಹಿಂದ್ ಕೇಂದ್ರ ಸಲಹಾ ಸಮಿತಿ ಆಗ್ರಹಿಸಿದೆ.
