ಟ್ರಂಪ್ ವಿರುದ್ಧ ಅಮೆರಿಕದಲ್ಲಿ ಕಾವೇರಿದ ಪ್ರತಿಭಟನೆ

ವಾಶಿಂಗ್ಟನ್,ಜ.22: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ವಿಭಜನವಾದಿ ನೀತಿಗಳು ಹಾಗೂ ಮಹಿಳಾ ವಿರೋಧಿ ನಿಲುವುಗಳನ್ನು ಖಂಡಿಸಿ ಅಮೆರಿಕಾದ್ಯಂತ ಶನಿವಾರ ಲಕ್ಷಾಂತರ ಮಂದಿ ಅಮೆರಿಕನ್ನರು ಬೀದಿಗಿಳಿದು ಪ್ರತಿಭಟನೆ ನಡೆಸಿದರು.

ವಾಶಿಂಗ್ಟನ್‌ನಲ್ಲಿ ಟ್ರಂಪ್ ವಿರುದ್ಧ ನಡೆದ ಮಹಿಳಾ ಪ್ರತಿಭಟನಾ ರ್ಯಾಲಿ ಸಮಾರೋಪಗೊಂಡ ಬಳಿಕ ಸಂಘಟಕರು ಸುದ್ದಿಗಾರರ ಜೊತೆ ಮಾತನಾಡುತ್ತಾ, ‘‘ ಪ್ರತಿಕೂಲ ಸನ್ನಿವೇಶದ ನಡುವೆಯೂ ಮಾನವಹಕ್ಕುಗಳನ್ನು ರಕ್ಷಿಸುವ, ಸಮರ್ಥಿಸುವ ಹಾಗೂ ಅವನ್ನು ಮುನ್ನಡೆಸುವ ಚಳವಳಿಯ ಆರಂಭ ಇದಾಗಿದೆ ’’ ಎಂದು ಘೋಷಿಸಿದರು.

ವಾಶಿಂಗ್ಟನ್ ರ್ಯಾಲಿಯಲ್ಲಿ, ಅಮೆರಿಕ ಕಾಂಗ್ರೆಸ್‌ಗೆ ಚುನಾಯಿತರಾಗಿರುವ ಐವರು ಭಾರತೀಯ ಮೂಲದ ಅಮೆರಿಕನ್ ಸಂಸದರೂ ಪಾಲ್ಗೊಂಡರು. ರ್ಯಾಲಿಯಲ್ಲಿ ಪಾಲ್ಗೊಂಡವರ ಸಂಖ್ಯೆ 5 ಲಕ್ಷವನ್ನೂ ದಾಟಿತ್ತೆಂದು ಸಂಘಟಕರು ತಿಳಿಸಿದ್ದಾರೆ. ಇದೇ ವೇಳೆ ಲಾಸ್‌ಏಂಜಲೀಸ್‌ನಲ್ಲಿ ನಡೆದ ಟ್ರಂಪ್ ವಿರೋಧಿ ಪ್ರತಿಭಟನೆಯಲ್ಲಿ ಇದಕ್ಕಿಂತಲೂ ಹೆಚ್ಚಿನ ಸಂಖ್ಯೆಯಲ್ಲಿ ನಾಗರಿಕರು ಭಾಗವಹಿಸಿದ್ದರೆಂದು ವರದಿಯಾಗಿದೆ.

ವಾಶಿಂಗ್ಟನ್‌ನಲ್ಲಿ ಪೆನ್ಸಿಲ್ವೇನಿಯಾ ಮೈದಾನದಲ್ಲಿ ಮುಂಜಾನೆಯಿಂದಲೇ ಜಮಾಯಿಸತೊಡಗಿದ ಪ್ರತಿಭಟನಕಾರರು, ಸಂಜೆಯ ವೇಳೆಗೆ ಶ್ವೇತಭವನದೆಡೆಗೆ ರ್ಯಾಲಿ ನಡೆಸಿದರು.

ಖ್ಯಾತ ಚಿತ್ರ ನಿರ್ದೇಶಕ ಮೈಕೆಲ್ ಮೂರ್, ಸ್ತ್ರೀವಾದಿ ನಾಯಕಿ ಗ್ಲೋರಿಯಾ ಸ್ಟೈನೆಮ್, ಸಂಗೀತ ನಿರ್ದೇಶಕಿ ಅಲಿಸಿಯಾ ಕೀಸ್ ಮತ್ತಿತರರು ಮಾತನಾಡಿ, ವಲಸಿಗರ ವಿರುದ್ಧ ಟ್ರಂಪ್ ಅವರ ಅವಹೇಳನಕಾರಿ ಹೇಳಿಕೆಗಳನ್ನು ತೀವ್ರವಾಗಿ ಖಂಡಿಸಿದರು. ಖ್ಯಾತ ಪಾಪ್‌ಗಾಯಕಿ ಮಡೋನ್ನಾ ಕೂಡಾ ವೇದಿಕೆಗೆ ಆಗಮಿಸಿದ ರ್ಯಾಲಿಗೆ ತನ್ನ ಬೆಂಬಲ ವ್ಯಕ್ತಪಡಿಸಿದರು.

‘‘ ನಮ್ಮ ಬಡಿದೆಬ್ಬಿಸಲು ಈ ಭಯಾನಕ ಕ್ಷಣವೇ ಬೇಕಾಯಿತು ಎಂದು ಟ್ರಂಪ್ ಆಡಳಿತದ ಆರಂಭವನ್ನು ಪ್ರಸ್ತಾಪಿಸಿದ ಮಡೋನ್ನಾ, ಅಂತ್ಯದಲ್ಲಿ ನ್ಯಾಯ ದೊರೆಯಲಿದೆ ಹಾಗೂ ಒಳ್ಳೆಯದಕ್ಕೆ ಗೆಲುವು ಲಭಿಸಲಿದೆ ಎಂಬ ಹುಸಿಭ್ರಮೆಯಲ್ಲಿ ನಾವಿದ್ದೇವೆ. ಆದರೆ ಹೋರಾಡದೆ ಹಾಗಾಗದು ಸಾಧ್ಯವಿಲ್ಲವೆಂದು ಮಡೋನ್ನಾ ಘೋಷಿಸಿದರು.

ನ್ಯೂಯಾರ್ಕ್ ನಗರದಲ್ಲಿ 10 ಸಾವಿರಕ್ಕೂ ಅಧಿಕ ಪ್ರತಿಭಟನಕಾರರು, ಅಮೆರಿಕ ಅಧ್ಯಕ್ಷರ ಖಾಸಗಿ ನಿವಾಸವಾದ ಟ್ರಂಪ್ ಟವರ್ ಕಟ್ಟಡೆದೆಡೆಗೆ ರ್ಯಾಲಿ ನಡೆಸಿದರಾದರೂ, ಅವರನ್ನು ದಾರಿ ಮಧ್ಯೆ ಪೊಲೀಸರು ತಡೆದರು.

ಚಿಕಾಗೋದಲ್ಲಿ ನಡೆದ ಟ್ರಂಪ್ ವಿರೋಧಿ ರ್ಯಾಲಿಯಲ್ಲಿ 1.50 ಲಕ್ಷ ಜನರು ಭಾಗವಹಿಸಿದ್ದರು. ಬಾಸ್ಟನ್ ನಗರದಲ್ಲಿ ನಡೆದ ಬೃಹತ್ ಪ್ರತಿಭಟನಾಸಭೆಯನ್ನುದ್ದೇಶಿಸಿ ಸೆನೆಟರ್ ಎಲಿಝಬೆತ್ ವಾರನ್ ಭಾಷಣ ಮಾಡಿದರು. ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಟ್ರಂಪ್ ವಿರುದ್ಧ ಸ್ಪರ್ಧಿಸಿದ್ದ ಡೆಮಾಕ್ರಾಟಿಕ್ ಅಭ್ಯರ್ಥಿ ಹಿಲರಿ ಕ್ಲಿಂಟನ್ ಕೂಡಾ ವಾಶಿಂಗ್ಟನ್ ರ್ಯಾಲಿಗೆ ಬೆಂಬಲ ವ್ಯಕ್ತಪಡಿಸಿದ್ದರು.

ನಮ್ಮ ಪಾಲಿಗೆ ಟ್ರಂಪ್ ಆಡಳಿತವು ಅಳಿವು ಉಳಿವಿನ ಹೋರಾಟವಾಗಿದೆ. ನಮ್ಮ ಮಾನವಹಕ್ಕುಗಳ ವಿರುದ್ಧ ನಡೆಯುವ ಪ್ರಹಾರದ ವಿರುದ್ಧ ನಾವು ಹೋರಾಡಬೇಕಿದೆ.

ಮೋನಿಕಾ
ಮಹಿಳಾ ಪ್ರತಿಭಟನಾ ರ್ಯಾಲಿಯಲ್ಲಿ ಭಾಗವಹಿಸಿದ ಸಾಕ್ಷಚಿತ್ರ ನಿರ್ದೇಶಕಿ.