ಕೇಂದ್ರ ಸರಕಾರದ ಯೋಜನೆಗಳನ್ನು ಮತದಾರರಿಗೆ ತಲುಪಿಸುವ ಕೆಲಸವಾಗಲಿ: ಯಡಿಯೂರಪ್ಪ

ಕಡಬ, ಜ.23. ಕೇಂದ್ರ ಹಾಗೂ ರಾಜ್ಯದಲ್ಲಿ ಈ ಹಿಂದೆ ಆಡಳಿತ ನಡೆಸಿದ ಬಿಜೆಪಿ ಸರಕಾರದ ಜನಪರ ಯೋಜನೆಗಳನ್ನು ಪ್ರತಿಯೊಬ್ಬ ಮತದಾರರಿಗೆ ತಲುಪಿಸುವ ಕೆಲಸ ತಳಮಟ್ಟದ ಕಾರ್ಯಕರ್ತರಿಂದಾಗಬೇಕು. ಮುಂದಿನ ಒಂದು ವರ್ಷಗಳ ಕಾಲ ಕಾರ್ಯಕರ್ತರು ನಿರಂತರ ಪಕ್ಷ ಸಂಘಟನೆಯಲ್ಲಿ ತೊಡಗಿಸಿಕೊಂಡು ಮುಂಬರುವ ವಿಧಾನ ಸಭಾ ಚುನಾವಣೆಯಲ್ಲಿ ಬಿಜೆಪಿ ಪಕ್ಷವನ್ನು ಅಧಿಕಾರಕ್ಕೆ ತರಬೇಕು ಎಂದು ಬಿಜೆಪಿ ರಾಜ್ಯಧ್ಯಕ್ಷ ಬಿ.ಎಸ್. ಯಡಿಯೂರಪ್ಪ ಕರೆನೀಡಿದರು.

   ಅವರು ಸೋಮವಾರದಂದು ಭಾರತೀಯ ಜನತಾ ಪಾರ್ಟಿ ಸುಳ್ಯ ಮಂಡಲ ಸಮಿತಿ ಆಶ್ರಯದಲ್ಲಿ ಕಡಬ ಶಕ್ತಿಕೇಂದ್ರದ ನೇತೃತ್ವದಲ್ಲಿ ಸುಳ್ಯ ಮಂಡಲ ಬೂತ್ ಮಟ್ಟದ ಕಾರ್ಯಕರ್ತರ ಸಮಾವೇಶ ’ಪಾಂಚಜನ್ಯ - 2017’ ರ ಅಂಗವಾಗಿ ಕಡಬ ಶ್ರೀ ದುರ್ಗಾಂಬಿಕಾ ಅಮ್ಮನವರ ದೇವಸ್ಥಾನದ ವಠಾರದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡಿದರು.

    ರಾಜ್ಯ ಕಾಂಗ್ರೆಸ್ ಸರಕಾರದ ವೈಫಲ್ಯ, ಕೇಂದ್ರ ಸರಕಾರಗಳ ಜನಪರ ಯೋಜನೆಗಳ ಬಗ್ಗೆ ಪ್ರಚಾರ ಸೇರಿದಂತೆ ತಳಮಟ್ಟದಿಂದ ಪಕ್ಷ ಸಂಘನೆಯ ಅಜೆಂಡದೊಂದಿಗೆ ಬೂತ್ ಮಟ್ಟದ ಕಾರ್ಯಕರ್ತರ ಸಭೆಯನ್ನು ರಾಜ್ಯಾದಾದ್ಯಂತ ನಡೆಸಲಾಗುತ್ತಿದೆ. ಪ್ರಥಮ ಸಭೆ ಕಡಬದಲ್ಲಿ ನಡೆಸಲಾಗುತ್ತಿದೆ. ಪ್ರತಿಯೊಬ್ಬ ಬೂತ್ ಮಟ್ಟದ ಕಾರ್ಯಕರ್ತರು ಕನಿಷ್ಟ 25 ಮತದಾರರನ್ನು ಮತದಾರರ ಪಟ್ಟಿಗೆ ಸೇರ್ಪಡೆಗೊಳಿಸಿ, ಮನವೊಳಿಸಿ ಪಕ್ಷದ ಕಾರ್ಯಕರ್ತರನ್ನಾಗಿಸುವ ಕೆಲಸ ಮುಂದಿನ ತಿಂಗಳೊಳಗೆ ನಡೆಯಬೇಕು. ರಾಜ್ಯದಲ್ಲಿ ದರಿದ್ರ ಸರಕಾರ ಆಡಳಿತದಲ್ಲಿದೆ.

ಹಿಂದೆ ಬಿಜೆಪಿ ಆಡಳಿದಲ್ಲಿದ್ದ ಯೋಜನೆಗಳನ್ನು ಮುಂದುವರಿಸುತ್ತಿದೆ. ಜನತೆಯ ಭಾವನೆಯನ್ನು ಅರಿಯದ ಸರಕಾರವನ್ನು ಮುಂದಿನ ಚುನಾವಣೆಯಲ್ಲಿ ಕಿತ್ತೊಗೆಯುವ ಕೆಲಸವನ್ನು ಪ್ರಜ್ಞಾವಂತ ದ.ಕ ಜಿಲ್ಲೆಯ ಜನ ಮಾಡುತ್ತಾರೆ ಎನ್ನುವ ವಿಶ್ವಾಸವಿದೆ. ಜಿಲ್ಲೆಯಲ್ಲಿ ಪಕ್ಷದ ಕಾರ್ಯಕರ್ತರ ಮೇಲೆ ನಿರಂತರ ಹಲ್ಲೆ ನಡೆಯುತ್ತಿದೆ. ಕೊಲೆಯೂ ಆಗುತ್ತಿರುವುದು ಸರಕಾರದ ಕಾನೂನು ಸುವ್ಯಸ್ಥೆಯ ವೈಪಲ್ಯದಿಂದಾಗಿದೆ. ಅಂಬೇಡ್ಕರ್ ಅವರು ಮರಣವಪ್ಪಿದಾಗ ಶವ ಸಂಸ್ಕಾರಕ್ಕೆ ದೆಹಲಿಯಲ್ಲಿನ ಅನುವು ಮಾಡಿಕೊಡದ ಅಂದಿನ ಕಾಂಗ್ರೆಸ್ ಬಳಿಕ ಮುಂಬೈನ ದಾದರ್ ನಲ್ಲಿ ಸಂಸ್ಕಾರ ಮಾಡಬೇಕಾಯಿತು.

ಅಂತಹ ದೀಮಂತ ನಾಯಕನಿಗೆ ಅಪಮಾನ ಮಾಡಲಾಗಿತ್ತು. ಹೀಗಾಗಿ ಡಾ. ಅಂಬೇಡ್ಕರ ಅವರ ಹೆಸರನ್ನು ಹೇಳುವ ನೈತಿಕತೆ ಕಾಂಗೆಸ್ಸಿಗರಿಲ್ಲ. ಜಾತಿಯಲ್ಲಿ ಕಂದಕವನ್ನು ಏರ್ಪಡಿಸಿ ಅಧಿಕಾರ ನಡೆಸುವ ರಾಜ್ಯ ಸರಕಾರವನ್ನು ಕಿತ್ತೊಗಯಬೇಕು ಎಂದರು. ಕೇಂದ್ರ ಸರಕಾರದ ಆರ್ಥಿಕ ನೀತಿಯನ್ನು ದೇಶ ಭಕ್ತರು ಒಪ್ಪಿಕೊಂಡಿದ್ದಾರೆ. ಯಾವೂದೋ ಚಿಲ್ಲರೆಗಳು ಮಾತ್ರ ತೆಗಳುತ್ತಾರೆ. ಇದರಿಂದ ಸರಕಾರಕ್ಕೆ ಯಾವೂದೆ ದಕ್ಕೆಯಾಗುವುದಿಲ್ಲ ಇನ್ನೆರಡು ವರ್ಷದಲ್ಲಿ ದೇಶದ ಚಿತ್ರಣ ಬದಲಾಗಲಿದೆ ಎಂದರು.  ರಾಜ್ಯದಲ್ಲಿ ಬಿಜೆಪಿ ಆಡಳಿತಲ್ಲಿದ್ದಾಗ ರೈತರಿಗೆ ಕುಮ್ಕಿ ಹಕ್ಕನ್ನು ನೀಡುವ ಯೋಜನೆ ರೂಪಿಸಿತ್ತು. ಆದರೆ ಅಂದಿನ ರಾಜ್ಯಪಾಲರು ಅಂಕಿತ ಹಾಕದೆ ಹಿಂದೇಟಾಯಿತು. ಮುಂದಿನಚುನಾವಣೆಯಲ್ಲಿ ಪಕ್ಷ ಅಧಿಕಾರ ಬಂದ 24 ಗಂಟೆಯೊಳಗೆ ರೈತರಿಗೆ ಕುಮ್ಕಿ ಹಕ್ಕು ನೀಡಲಾಗುವುದು ಅಲ್ಲದೆ ಕಡಬವನ್ನು ತಾಲೂಕು ಮಾಡಲಾಗುವುದು ಎಂದರು. ಜಾನಪದ ಕ್ರೀಡೆ ಕಂಬಳವನ್ನು ಉಳಿಸಲು ನನ್ನ ಸಹಮತವಿದೆ ಎಂದರು.

      ಉಡುಪಿ ಸಂಸದೆ ಶೋಭಾ ಕರಂದ್ಲಾಜೆ ಮಾತನಾಡಿ, ಅಂದಿನ ಬಿಜೆಪಿ ಸರಕಾರದ ಮುಂದೆ ಎತ್ತಿನ ಹೊಳೆ ಯೋಜನೆ ಪ್ರಸ್ತಾಪ ಬಂದಾಗ ಸಾಧಕ ಬಾಧಕ ವೈಜ್ಞಾನಿಕ ಸಮೀಕ್ಷೆಗಾಗಿ ಹಣ ಮೀಸಲಿಟ್ಟಿತ್ತು. ಆದರೆ ಇಂದಿನ ಕಾಂಗ್ರೆಸ್ಸು ಸರಕಾರ ಸಮೀಕ್ಷೆ ನಡೆಸದೆ 4000 ಕೋಟಿ ಹಣ ಬಿಡುಗಡೆ ಮಾಡಿದೆ. ಯೋಜನೆಯನ್ನು ಜಾರಿಗೆ ತಂದು ಕಾಂಗ್ರೆಸ್ ಹಣ ಲೂಟಿ ಮಾಡುತ್ತಿದೆ .ಯೋಜನೆಯ ಬಗ್ಗೆ ಜನರ ಪ್ರಶ್ನೆಗೆಳಿಗೆ ಉತ್ತರ ಕೊಡುವ ತಾಕತ್ತು ರಾಜ್ಯ ಸರಕಾರಕ್ಕಿಲ್ಲ. ಆದರೆ ಬಿಜೆಪಿ ಸರಕಾರದತ್ತ ಬೊಟ್ಟು ಮಾಡುತ್ತಿದೆ.

ಜನರಿಗೆ ಸತ್ಯ ಯಾವೂದೆಂದು ತಿಳಿದಿದೆ. ಕೇಂದ್ರದ ಯೋಜನೆಗಳನ್ನು ರಾಜ್ಯ ಸರಕಾರ ಜಾರಿಗೆ ತರಲು ಹಿಂದೇಟು ಹಾಕುತ್ತಿದೆ. ಅಡಿಕೆಗೆ ಬೆಂಬಲ ಬೆಲೆ ನಿಗದಿ ಪಡಿಸಿದರೂ ರಾಜ್ಯ ಸರಕಾರ ಖರೀದಿ ಕೇಂದ್ರಗಳನ್ನು ಮಾಡದೆ ರೈತರಿಗೆ ಮೋಸ ಮಾಡುತ್ತಿದೆ. ಕೇಂದ್ರ ಸರಕಾರ ಆಮದು ಶುಲ್ಕವನ್ನು ಏರಿಕೆ ಮಾಡಿದ ಪರಿಣಾಮ ಅಡಿಕೆ ಬೆಲೆಯೇರಿಕೆಯಾಗಿದೆ ಎಂದರು. ಎಂಡೋ ಸಲ್ಫಾನ್ ಸಂತ್ರಸ್ಥರಿಗೆ ಸಮರ್ಪಕ ಅನುಕೂಲ ನೀಡುವಲ್ಲಿ ಸರಕಾರ ವಿಫಲವಾಗಿದೆ. ಪಕ್ಷದ ಕಾರ್ಯಕರ್ತರು ಅಹರ್ನಿಶಿ ದುಡಿದು ಮತ್ತೊಮ್ಮೆ ಅಧಿಕಾರಕ್ಕೆ ತರಬೇಕು ಎಂದರು.

  ದ.ಕ ಜಿಲ್ಲಾ ಸಂಸದ ನಳಿನ್ ಕುಮಾರ್ ಕಟೀಲು ಮಾತನಾಡಿ, ತಮಿಳುನಾಡು ಸರಕಾರ ಜಲ್ಲಿಕಟ್ಟುವನ್ನು ಉಳಿಸಲು ಅನುಸರಿದ ನೀತಿಯನ್ನು ರಾಜ್ಯ ಸರಕಾರ ಜಾನಪದ ಕ್ರೀಡೆ ಕಂಬಳವನ್ನು ಉಳಿಸಲು ಅನುಸರಿಸಬೇಕು. ಕಂಬಳವನ್ನು ಉಳಿಸಲು ಕೇಂದ್ರಕ್ಕೆ ರಾಜ್ಯ ಸರಕಾರ ಮನವಿ ಮಾಡಿಕೊಳ್ಳಬೇಕು. ಕಂಬಳದ ಉಳಿವಿಗೆ ಸಂಸದರೆಲ್ಲರೂ ಶ್ರಮಿಸುತ್ತೇವೆ ಎಂದರು.

    ಜಿಲ್ಲಾ ಪಂಚಾಯಿತಿ ಅಧ್ಯಕ್ಷೆ ಮೀನಾಕ್ಷಿ ಶಾಂತಿಗೋಡು, ಪುತ್ತೂರು ಎಪಿಎಂಸಿ ಅಧ್ಯಕ್ಷ ಕೃಷ್ಣ ಶೆಟ್ಟಿ ಕಡಬ, ಕಡಬ ಬಿಜೆಪಿ ಹಿರಿಯ ಕಾರ್ಯಕರ್ತ ಸೀತಾರಾಮ ಕೋಡಿಂಬಾಳ, ಪುತೂರು ಎಲ್.ಡಿ. ಬ್ಯಾಂಕ್ ಅಧ್ಯಕ್ಷ ಮನೋಹರ ರೈ, ಪಕ್ಷದ ಜಿಲ್ಲಾ ಪ್ರಭಾರಿ ಉದಯ ಕುಮಾರ್ ಶೆಟ್ಟಿ, ಜಿಲ್ಲಾ ಸಮಿತಿ ಕಾರ್ಯದರ್ಶಿ ಸುದರ್ಶನ, ಪ್ರಧಾನ ಕಾರ್ಯದರ್ಶಿಗಳಾದ ಬ್ರಿಜೇಶ್ ಚೌಟ, ಉಮನಾಥ ಕೋಟ್ಯಾನ್ ರವೀಂದ್ರ ಶೆಟ್ಟಿ ಮೊದಲಾದವರು ಇದ್ದರು.

  ಸುಳ್ಯ ಶಾಸಕ ಎಸ್ ಅಂಗಾರ ಪ್ರಸ್ತಾವಣೆಗೈದರು. ವೆಂಕಟ್ ವಳಲಂಬೆ ಸ್ವಾಗತಿಸಿದರು. ಬಿಜೆಪಿ ಕಡಬ ಶಕ್ತಿ ಕೆಂದ್ರದ ಅಧ್ಯಕ್ಷ ವಾಡ್ಯಪ್ಪ ಗೌಡ ಎರ್ಮಾಯಿಲ್ ವಂದಿಸಿದರು. ಸೀತರಾಮ ಗೌಡ ಪೊಸವಳಿಕೆ ನಿರೂಪಿಸಿದರು.