ರಾಜ್ಯಮಟ್ಟದ ಆದಿವಾಸಿ ಗಿರಿಜನೋತ್ಸವ

ಮೂಡಿಗೆರೆ, ಜ.25: ಆದಿವಾಸಿಗಳು ಮತ್ತು ಪರಿಶಿಷ್ಟರಿಗೆ ಈ ಹಿಂದೆ ಜಮೀನಿಗಾಗಿ ಅರ್ಜಿ ಸಲ್ಲಿಸಲು ಅವಕಾಶ ನೀಡಿದಾಗ ಮಾಹಿತಿ ಕೊರತೆಯಿಂದ ಸಾಧ್ಯವಾಗಿರಲಿಲ್ಲ. ಅಲ್ಲದೆ, ಸರಕಾರದಿಂದ ಮಂಜೂರಾಗಿರುವ ಮನೆಗಳನ್ನು ಕಟ್ಟಿಕೊಳ್ಳಲು ಜಾಗದ ಕೊರತೆಯಿದ್ದು, ಈ ಸಂಬಂಧ ಸರಕಾರ ಶೀಘ್ರ ಕ್ರಮ ಕೈಗೊಳ್ಳಲಿದೆ ಎಂದು ಗೃಹ ಸಚಿವ ಡಾ. ಜಿ.ಪರಮೇಶ್ವರ್ ಹೇಳಿದ್ದಾರೆ.

  ಪಟ್ಟಣದ ಅಡ್ಯಂತಾಯ ರಂಗಮಂದಿರದಲ್ಲಿ ಕರ್ನಾಟಕ ಜಾನಪದ ಅಕಾಡಮಿ ವತಿಯಿಂದ ಬುಧವಾರ ನಡೆದ ರಾಜ್ಯಮಟ್ಟದ ಆದಿವಾಸಿ ಗಿರಿಜನೋತ್ಸವ ಕಾರ್ಯಕ್ರಮವನ್ನು ಡೋಲು ಬಡಿಯುವ ಮೂಲಕ ಉದ್ಘಾಟಿಸಿ ಅವರು ಮಾತನಾಡಿದರು.

ಕಂದಾಯ ಮತ್ತು ಅರಣ್ಯ ಭೂಮಿಯ ವ್ಯಾಜ್ಯ ನ್ಯಾಯಾಲಯದಲ್ಲಿದ್ದು, ಈಗಾಗಲೇ ಈ ಭೂಮಿಯ ಜಂಟಿ ಸರ್ವೇ ಕಾರ್ಯ ಮುಗಿದು ಸರಕಾರ ನ್ಯಾಯಾಲಯಕ್ಕೆ ಅಫಿದಾವಿತ್  ಸಲ್ಲಿಸಿದೆ. ಕಾನೂನಿಗೆ ತಿದ್ದುಪಡಿ ತಂದು ಈ ಭೂಮಿಯನ್ನು ಖಾತೆ ಹೊಂದಿರುವ ಗ್ರಾಪಂಗಳಿಗೆ ನಿವೇಶನಕ್ಕೆ ಒದಗಿಸಿಕೊಡಲು ಪ್ರಯತ್ನಿಸಲಾಗುವುದು ಎಂದು ಭರವಸೆ ನೀಡಿದರು.

ದೇಶದಲ್ಲಿ ಜಾನಪದ ಕಲೆ, ಸಂಸ್ಕೃತಿ, ನೃತ್ಯ ಇವುಗಳನ್ನು ಹಿಂದೆ ರಾಜಾಶ್ರಯ ಪೋಷಿಸಿಕೊಂಡು ಬಂದಿದೆ. ಇಂದಿನ ಪ್ರಜಾಪ್ರಭುತ್ವದಲ್ಲಿ ಇದನ್ನು ರಕ್ಷಣೆ ಮಾಡುವ ಕರ್ತವ್ಯ ಸರಕಾರದ್ದಾಗಿದೆ. ಸಿಂಧೂ ಪ್ರಾಂತ್ಯದಿಂದ ಪ್ರಾರಂಭವಾಗಿರುವ ಜಾನಪದ ಶೈಲಿಯ ಕಲೆ, ಸಂಸ್ಕೃತಿ, ಸಾಹಿತ್ಯ ಎಂಬ ಪರಂಪರೆ ಇಂದಿನ ಆಧುನಿಕ ಜಾನಪದ ಶೈಲಿಯವರೆಗೆ ತಲುಪಿದೆ ಎಂದು ಸಚಿವ ಡಾ. ಜಿ. ಪರಮೇಶ್ವರ್ ಹೇಳಿದರು.

ಶಾಸಕ ಬಿ.ಬಿ.ನಿಂಗಯ್ಯ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿ, ಜನಪದ ಕಲೆ ಟಿ.ವಿಗಳಲ್ಲಿ ನೋಡುವಂತಹ ಪರಿಸ್ಥಿತಿ ಸೃಷ್ಟಿಯಾಗಿದೆ. ಬ್ರಿಟಿಷರು ಭಾರತ ಬಿಟ್ಟು ಹೋದರೂ ಅವರ ಇಂಗ್ಲಿಷ್ ವ್ಯಾಮೋಹ ಮುಂದುವರಿಸಿಕೊಂಡು ಬಂದಿದ್ದೇವೆ. ಕೊಡಗು, ಮಂಗಳೂರು ಸೇರಿದಂತೆ ನಮ್ಮ ಮಲೆನಾಡು ಭಾಗದಲ್ಲಿ ಆದಿವಾಸಿಗಳು ತಮ್ಮತನವನ್ನು ಬಿಟ್ಟುಕೊಟ್ಟಿಲ್ಲ. ಅದೇ ರೀತಿಯಲ್ಲಿ ನಮ್ಮ ಸಂಸ್ಕೃತಿ ನಮ್ಮ ಕಲೆ ಬಿಟ್ಟುಕೆ ೂಡಬಾರದು ಎಂದ ಅವರು, ಆದಿವಾಸಿ ಜನಾಂಗಗಳಲ್ಲಿ ಅತೀ ಬಡವರಿದ್ದು, ಇವರಿಗೆ ವಾಸದ ಮನೆಯನ್ನು ಕಟ್ಟಿಕೊಡಲು ಡ್ರೀಮ್ಡ್ ಫಾರೆಸ್ಟ್ ಹೆಸರಿನಲ್ಲಿ ಅರಣ್ಯ ಇಲಾಖೆ ಸಮಸ್ಯೆ ಉಂಟು ಮಾಡುತ್ತಿದೆ. ಇದು ಇಡೀ ರಾಜ್ಯದ ಸಮಸ್ಯೆಯಾಗಿದೆ. ಇದನ್ನು ತೊಡೆದು ಹಾಕಲು ಕಾನೂನು ತಂದು ಗ್ರಾಪಂಗಳಿಗೆ ಮನೆ ನೀಡಲು ಅನುವು ಮಾಡಿಕೊಡಬೇಕು. ಆದಿವಾಸಿಗಳಿಗೆ ತಮ್ಮ ಜಮೀನುಗಳನ್ನು ಸರ್ವೇ ಮಾಡಿ ಉಳಿಸಿಕೊಡಬೇಕು.

ಅಲ್ಲದೆ ಎಸ್ಸಿ, ಎಸ್ಟಿಗಳಿಗೆ ಫಾರಂ 53ರಲ್ಲಿ ಮತ್ತೆ ಅರ್ಜಿ ಸಲ್ಲಿಸಲು ಅನುವು ಮಾಡಿಕೊಡುವುದರ ಜೊತೆಗೆ ಮಲೆನಾಡಿನ ಜ್ವಲಂತ ಸಮಸ್ಯೆಗಳನ್ನು ಶೀಘ್ರವಾಗಿ ಬಗೆಹರಿಸಬೇಕೆಂದು ಗೃಹ ಸಚಿವರಿಗೆ ಮನವಿ ಮಾಡಿದರು. ಎಂಎಲ್ಸಿಗಳಾದ ಡಾ. ಮೋಟಮ್ಮ, ಎಂ.ಕೆ.ಪ್ರಾಣೇಶ್ ಮಾತನಾಡಿದರು. ರಾಜ್ಯದ 30 ಜಿಲ್ಲೆಗಳಿಂದ ಆಗಮಿಸಿದ್ದ 42 ಕಲಾ ತಂಡಗಳು ಸಂಜೆ ತಮ್ಮ ಜಾನಪದ ಪ್ರದರ್ಶನ ನೀಡಿ ಸಾರ್ವಜನಿಕರ ಮನರಂಜಿಸಿದವು. ಕಾರ್ಯಕ್ರಮಕ್ಕೂ ಮುನ್ನ ಬಂದಿದ್ದ ಕಲಾ ತಂಡಗಳು ಪಟ್ಟಣದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ನಡೆಸಿದವು. ಕಾರ್ಯಕ್ರಮದಲ್ಲಿ ಕರ್ನಾಟಕ ಜಾನಪದ ಅಕಾಡಮಿ ಅಧ್ಯಕ್ಷ ಪಿಚ್ಚಳ್ಳಿ ಶ್ರೀನಿವಾಸ್, ಜಿಪಂ ಅಧ್ಯಕ್ಷೆ ಶೈತ್ರಶ್ರೀ, ಉಪಾಧ್ಯಕ್ಷ ರಾಮಸ್ವಾಮಿ, ಸದಸ್ಯರಾದ ಅಮಿತಾ ಮುತ್ತಪ್ಪ, ಸುಧಾ ಯೋಗೇಶ್, ಪ್ರಭಾಕರ್, ಶಾಮಣ್ಣ, ಮಹೇಶ್ ಒಡೆಯರ್, ತಾಪಂ. ಅಧ್ಯಕ್ಷ ಕೆ.ಸಿ.ರತನ್, ಸದಸ್ಯೆ ವೇದಾ ಲಕ್ಷ್ಮಣ್, ಜೆಡಿಎಸ್ ಜಿಲ್ಲಾಧ್ಯಕ್ಷ ರಂಜನ್ ಅಜೀತ್ ಕುಮಾರ್, ಕಾಂಗ್ರೆಸ್ ಜಿಲ್ಲಾಧ್ಯಕ್ಷ ವಿಜಯಕುಮಾರ್ ಮತ್ತಿತರರಿದ್ದರು.

‘ಗಿರಿಜನ ಸಂಸದರಿದ್ದರೂ ಗಿರಿಜನರ ಪರವಾಗಿ ಮಾತನಾಡುತ್ತಿಲ್ಲ’
 ಮೂಡಿಗೆರೆ: ದೇಶದಲ್ಲಿರುವ 10 ಕೋಟಿಗೂ ಅಧಿಕ ಆದಿವಾಸಿಗಳು ಶತಮಾನದ ವಂಚಿತರು. ಲೋಕಸಭೆೆಯಲ್ಲಿ 60 ಮಂದಿ ಗಿರಿಜನ ಸಂಸದರಿದ್ದರೂ ಆದಿವಾಸಿ ಗಿರಿಜನರ ಪರವಾಗಿ ಇಂದಿಗೂ ಅವರೂ ಮಾತನಾಡದಿರುವುದು ದುರಂತವೇ ಸರಿ ಎಂದು ನಿವೃತ್ತ ಪ್ರಾಂಶುಪಾಲ ಎಚ್.ಎಂ.ರುದ್ರಸ್ವಾಮಿ ಅಸಮಾಧಾನ ವ್ಯಕ್ತಪಡಿಸಿದರು.

ಮೂಡಿಗೆರೆ ಪಟ್ಟಣದ ಅಡ್ಯಂತಾಯ ರಂಗಮಂದಿರದ ಆವರಣದಲ್ಲಿ ಕರ್ನಾಟಕ ಜಾನಪದ ಅಕಾಡಮಿ ಬುಧವಾರ ಹಮ್ಮಿಕೊಂಡಿದ್ದ ರಾಜ್ಯ ಮಟ್ಟದ ಗಿರಿಜನೋತ್ಸವ ಕಾರ್ಯಕ್ರಮದಲ್ಲಿ ಆದಿವಾಸಿ ಗಿರಿಜನರ ಸಂಸ್ಕೃತಿ ಮತ್ತು ಸಾಮಾಜಿಕ ಅಸ್ಮಿತೆ ಎಂಬ ವಿಚಾರ ಸಂಕಿರಣದಲ್ಲಿ ಅವರು ಮಾತನಾಡಿದರು. ಆದಿವಾಸಿಗಳು ಶತಮಾನದಿಂದಲೂ ಅರಣ್ಯದೊಳಗೆ ಸರಕಾರದ ಯಾವುದೇ ಸವಲತ್ತುಗಳನ್ನು ಪಡೆಯದೇ ಜೀವನ ನಡೆಸಿ ಅರಣ್ಯ ರಕ್ಷಣೆಗೆ ಹಾಗೂ ಜಲ, ಮೂಲ ರಕ್ಷಣೆಗೆ ಕಾರಣರಾಗಿದ್ದಾರೆ. ಆದಿವಾಸಿಗಳು ಬ್ರಿಟಿಷರ ವಿರುದ್ಧ ಸೆಣಸಾಡಿ ಬದುಕಿದವರಾಗಿದ್ದಾರೆ.

ಆರೆ, ಅರಣ್ಯ ಭೂಮಿಗೆ ಸಾಂವಿಧಾನಿಕ ಕಾಯ್ದೆ ಬಂದಾಗ ಅರಣ್ಯ ಉಳಿಸಿ ಬೆಳೆಸಿದ ಗಿರಿಜನರನ್ನೇ ಅರಣ್ಯದಿಂದ ಹೊರಹಾ ಕಲಾಗಿದೆ. ಗಿರಿಜನರು ಅರಣ್ಯದೊಳಗೆ ಬೆಳೆಸಿದ ಕಲೆ, ಸಂಸ್ಕೃತಿ, ಸಾಹಿತ್ಯ ಪರಂಪರೆ ಬಹುದೊಡ್ಡದಾಗಿದೆ ಎಂದು ನುಡಿದರು.
 ದೇಶದ ಆಳ್ವಿಕೆ ವಿಚಾರಕ್ಕೆ ಬಂದಾಗ ಗಿರಿಜನರು ಶತಮಾನದ ತುಳಿತಕ್ಕೊಳಗಾಗಿದ್ದಾರೆ. ಅವರನ್ನು ಸಮಾಜದ ಮುಖ್ಯವಾಹಿನಿಯಿಂದ ಬಹಳ ದೂರವೇ ಇಡಲಾಗುತ್ತಿದೆ. ಅವರ ಸಾಹಿತ್ಯ, ಕಲೆ, ಸಂಸ್ಕೃತಿಯನ್ನು ಕನಿಷ್ಠ ಮಟ್ಟಕ್ಕೆ ಜೀವಂತಿಕೆ ಇಲ್ಲದಂತೆ ದೂರ ಇಡಲಾಗಿದೆ ಎಂದು ಆತಂಕ ವ್ಯಕ್ತಪಡಿಸಿದರು.

ವಿಚಾರ ಸಂಕಿರಣದ ಅಧ್ಯಕ್ಷತೆ ವಹಿಸಿದ್ದ ಜಾನಪದ ಅಕಾಡಮಿ ಅಧ್ಯಕ್ಷ ಪಿಚ್ಚಳ್ಳಿ ಶ್ರೀನಿವಾಸ್ ಮಾತನಾಡಿ, ಆದಿವಾಸಿಗಳ ಜೀವನ ಶೈಲಿಯೇ ನಾಡಿನಲ್ಲಿ ಇಂದು ಪ್ರಶ್ನಾರ್ಥಕ ಎಂಬಂತಾಗಿ ಹೋಗುತ್ತಿದೆ. ಈ ಬಗ್ಗೆ ಚರ್ಚಿಸಲು ವಿಚಾರ ಸಂಕಿರಣವನ್ನು ಏರ್ಪಡಿಸಲಾಗಿದೆ. ಆದಿವಾಸಿ ಗಿರಿಜನರಿಗೆ ಇದರಿಂದ ಪ್ರಯೋಜನವಾಗಬೇಕು. ರಾಜ್ಯದ 30 ಜಿಲ್ಲೆಗಳಿಂದಲೂ ಕಲಾ ತಂಡಗಳನ್ನು ಕರೆಸಲಾಗಿದೆ. ಗಿರಿಜನರ ಕಲೆ, ಸಂಸ್ಕೃತಿ, ಸಾಹಿತ್ಯವನ್ನು ಎತ್ತಿ ಹಿಡಿಯುವ ಪ್ರಯತ್ನ ಇದಾಗಿದೆ ಎಂದು ತಿಳಿಸಿದರು. ವಿಚಾರ ಸಂಕಿರಣವನ್ನು ತಾಪಂ ಸದಸ್ಯ ರಂಜನ್ ಅಜೀತ್ ಕುಮಾರ್ ಉದ್ಘಾಟಿಸಿದರು.
 ವೇದಿಕೆಯಲ್ಲಿ ಲಕ್ಷ್ಮೀಪತಿ ಕೋಲಾರ, ಕ್ಷೀರಸಾಗರ್, ಅಕಾಡಮಿ ಸದಸ್ಯ ಗಣೇಶ್ ಕೊರಗ, ಸಿದ್ರಾಮ ಶಿಂಧೆೆ, ರತ್ನಮ್ಮ ಮತ್ತಿತರರಿದ್ದರು.