ಕದ್ರಿ ಉದ್ಯಾನವನ: ಫಲಪುಷ್ಪ ಪ್ರದರ್ಶನ ಉದ್ಘಾಟನೆ

ಮಂಗಳೂರು, ಜ. 26: ದ.ಕ.ಜಿಲ್ಲಾ ಪಂಚಾಯತ್ , ಜಿಲ್ಲಾಡಳಿತ, ತೋಟಗಾರಿಕೆ ಇಲಾಖೆ ಹಾಗೂ ಸಿರಿ ತೋಟಗಾರಿಕೆ ಸಂಘ ಇವುಗಳ ಸಹಯೋಗದಲ್ಲಿ ಕದ್ರಿ ಉದ್ಯಾನವನದಲ್ಲಿ ಜ.29ರವರೆಗೆ ಹಮ್ಮಿಕೊಳ್ಳಲಾದ ಲಪುಷ್ಪ ಪ್ರದರ್ಶನವನ್ನು ಜಿಲ್ಲಾ ಉಸ್ತುವಾರಿ ಸಚಿವ ಬಿ.ರಮಾನಾಥ ರೈ ಗುರುವಾರ ಉದ್ಘಾಟಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ಆರ್ಥಿಕವಾಗಿ ಲಾಭದಾಯಕವಾಗಿರುವ ತೋಟಗಾರಿಕೆಗೆ ಉತ್ತೇಜನ ನೀಡುವ ನಿಟ್ಟಿನಲ್ಲಿ ಹಾಗೂ ಈ ಬಗ್ಗೆ ಜಾಗೃತಿ ಮೂಡಿಸಲು ಪ್ರದರ್ಶನವನ್ನು ಏರ್ಪಡಿಸಲಾಗಿದೆ ಎಂದರು.

ಅರಣ್ಯ ಇಲಾಖೆಯಿಂದಲೂ ವಿವಿಧ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತಿದೆ. ಹೆಚ್ಚುತ್ತಿರುವ ತಾಪಮಾನದ ಹಿನ್ನೆಲೆಯಲ್ಲಿ ಅರಣ್ಯ ವನಗಳನ್ನು ಬೆಳೆಸುವುದು, ಫ್ರೀ ಪಾರ್ಕ್, ತೋಟಗಾರಿಕೆ ಸಸ್ಯಗಳ ಸಹಿತ ಔಷಧಿ ಸಸ್ಯ ಬೆಳೆಸಲು ಪ್ರೋತ್ಸಾಹ ನೀಡುವುದು ಮೊದಲಾದ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದೆ ಎಂದರು.

ವಿಧಾನ ಪರಿಷತ್ ಮುಖ್ಯ ಸಚೇತಕ ಐವನ್ ಡಿಸೋಜಾ, ಶಾಸಕರಾದ ಜೆ.ಆರ್.ಲೋಬೊ, ಮೊದಿನ್ ಬಾವ, ಮೇಯರ್ ಹರಿನಾಥ್, ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಡಾ.ಎಂ.ಆರ್.ರವಿ ಕಾರ್ಪೊರೇಟರ್‌ಗಳಾದ ಶಶಿಧರ ಹೆಗ್ಡೆ, ಕವಿತಾ ಸನಿಲ್, ತೋಟಗಾರಿಕಾ ಇಲಾಖೆಯ ಉಪನಿರ್ದೇಶಕ ಯೋಗೇಶ್ ಎಚ್.ಆರ್. ಮೊದಲಾದವರು ಉಪಸ್ಥಿತರಿದ್ದರು.

ರಾಣಿ ಅಬ್ಬಕ್ಕ ಹೂವಿನ ಪ್ರತಿಮೆ
 

ಫಲಪುಷ್ಪ ಪ್ರದರ್ಶನದಲ್ಲಿ ಹೂವುಗಳಿಂದ ರಚನೆಗೊಂಡ ವೀರ ಮಹಿಳೆ ರಾಣಿ ಅಬ್ಬಕ್ಕ ಹಾಗೂ ಕುದುರೆ ಸೇರಿ ಸುಮಾರು 10 ಅಡಿ ಎತ್ತರದ ಪ್ರತಿಮೆಯು ವಿಶೇಷ ಆಕರ್ಷಣೆಯಾಗಿದೆ. ಹಣ್ಣು, ತರಕಾರಿಗಳ ಕೆತ್ತನೆ,  ಕಲ್ಲಂಗಡಿ, ಸೌತೆ ಕಾಯಿ, ಅನನಾಸು, ಬದನೆಕಾಯಿ, ದ್ರಾಕ್ಷಿ ಹಣ್ಣು ಸಹಿತ ಹಲವು ತರಕಾರಿ, ಹಣ್ಣುಗಳನ್ನು ಬಳಸಿ ಕೆಲವು ಮಾದರಿಗಳ ರಚನೆಯು ಸಾರ್ವಜನಿಕರನ್ನು ಅಕರ್ಷಿಸಿದವು. ಅನನಾಸು ಹಾಗೂ ಅದರ ಎಲೆಗಳಿಂದ ತಯಾರಿಸಲ್ಪಟ್ಟ ಡ್ರಾಗನ್‌ನ ಮಾದರಿ, ಬದನೆ ಕಾಯಿಗಳನ್ನು ಬಳಸಿ ತಯಾರಿಸಿದ ಪೆಂಗ್ವಿನ್ ಪಕ್ಷಿಯ ಮಾದರಿ, ಮೂಲಂಗಿ, ಕ್ಯಾರೆಟ್‌ಗಳಿಂದ ತಯಾರಿಸಿದ ನವಿಲಿನ ಮಾದರಿಗಳು ವೀಕ್ಷಕರ ಗಮನ ಸೆಳೆದವು. ಕಾಲೇಜುವೊಂದರಲ್ಲಿ ಅಸಿಸ್ಟಂಟ್ ಪ್ರೊಸೆಫೆರ್ ಆಗಿರುವ ಶೈಲೇಶ್ ಅವರು ಈ ಮಾದರಿಗಳನ್ನು ತಯಾರಿಸಿದ್ದಾರೆ.

ಐಸಿಎಆರ್ ಕೃಷಿ ವಿಜ್ಞಾನ ಕೇಂದ್ರದಿಂದ ಕೃಷಿ ಸಂಬಂಧಿ ಮಾಹಿತಿ ನೀಡುವ ಮಳಿಗೆ ಪ್ರದರ್ಶನದಲ್ಲಿದೆ. ಐಸಿಎಆರ್ ಕೃಷಿ ವಿಜ್ಞಾನ ಕೇಂದ್ರ ಮಂಗಳೂರು ಇದರ ತೋಟಗಾರಿಕೆ ವಿಜ್ಞಾನಿ ಪಾಟೀಲ ರವೀಂದ್ರ ಸಂಗಣಗೌಡ ಅವರು ನೀಬೋರ್ಡೊ ದ್ರಾವಣ ತಯಾರಿಕೆ, ಅಡಿಕೆ ತಳಿ, ಮಣ್ಣು ಪರೀಕ್ಷೆ, ಕೋಳಿ, ಹಂದಿ, ದನ ಸಾಕಣೆ, ಸಸ್ಯ ಸಂರಕ್ಷಣೆ ಹಾಗೂ ಸಸ್ಯಗಳಿಗೆ ತಗಲುವ ಹಳದಿ ನಂಜುರೋಗ ಮತ್ತು ಅವುಗಳನ್ನು ಹತೋಟಿಗೆ ತರುವ ಕ್ರಮಗಳ ಬಗ್ಗೆ ಕೃಷಿಕರಿಗೆ ಮಾಹಿತಿ ನೀಡುವುದಾಗಿ ತಿಳಿಸಿದ್ದಾರೆ.

ಮೀನುಗಾರಿಕಾ ಇಲಾಖೆಯ ಮಳಿಗೆಯಲ್ಲಿ ವಿವಿಧ ಬಗೆಯ ಸಮುದ್ರ ಮೀನುಗಳನ್ನು ಪ್ರದರ್ಶನಕ್ಕಿಡಲಾಗಿತ್ತು. ಅಲ್ಲದೆ, ಟ್ರಾಲರ್, ಡೀಪ್ ಫಿಶಿಂಗ್, ಪರ್ಸಿನ್ ಬೋಟ್‌ಗಳ ಮಾದರಿಗಳು ಪ್ರದರ್ಶಿಸಲಾಗಿತ್ತು. ಲೈಫ್ ಜಾಕೆಟ್, ಸಮುದ್ರದಲ್ಲಿ ಬಲೆಗಳಿಗೆ ಅಳವಡಿಸುವ ಫ್ಲೋಟ್‌ಗಳು, ಬಲೆ, ಇತರ ಮೀನುಗಾರಿಕಾ ಸಲಕರಣೆಗಳು ಪ್ರದರ್ಶನದಲ್ಲಿಡಲಾಗಿದೆ.

ತಾರಸಿ ತೋಟ ಹಾಗೂ ತರಕಾರಿ ಕೈತೋಟ ಪ್ರಾತ್ಯಕ್ಷಿಕೆಗಳ ಮಳಿಗೆಯಲ್ಲಿ ವಿವಿಧ ತರಕಾರಿ ಗಿಡಗಳನ್ನು ಪ್ರದರ್ಶನದಲ್ಲಿವೆ. ಟೊಮ್ಯಾಟೊ, ಬದನೆ ಕಾಯಿ, ಬೀಟ್‌ರೂಟ್, ಕೊತ್ತರಿ ಸೊಪ್ಪು, ನೆಲ ಬಸಳೆ, ಉದ್ದ ಮೆಣಸಿನ ಗಿಡಗಳು ಪ್ರದರ್ಶನದಲ್ಲಿಡಲಾಗಿದೆ.

ಗೊಂಡೆ, ಮೆರಿಗೋಲ್ಡ್, ಜೆರೇನಿಯಂ, ಡೇಲ್ಯ, ಜೀನ್ಯ, ಫಿಲೋಸಿಯಾ, ಕೋಕ್ಸ್‌ಕೊಂಬ್, ಕಾಸ್‌ಮೋಸ್, ಹಾಲಿಯಾಕ್, ಸೂರ್ಯಕಾಂತಿ ಸೇರಿದಂತೆ ವಿವಿಧ ಜಾತಿಯ ಹೂವಿನ ಗಿಡಗಳನ್ನು ಪ್ರದರ್ಶನದಲ್ಲಿ ಇಡಲಾಗಿದೆ.

ಇದಲ್ಲದೆ, ವಿವಿಧ ನರ್ಸರಿದಾರರು, ಬೀಜ ಮಾರಾಟಗಾರರು, ವಿವಿಧ ಗೊಬ್ಬರಗಳ ಮಾರಾಟಗಾರರು, ಯಂತ್ರಗಳ ಮಾರಾಟ ಮಳಿಗೆಗಳಿದ್ದು, ಸಾರ್ವಜನಿಕರಿಗೆ ಖರೀದಿಸಲು ಹಾಗೂ ವೀಕ್ಷಿಸಲು ಅವಕಾಶ ಕಲ್ಪಿಸಲಾಗಿದೆ. ಸಾವಯವ ಉತ್ಪನ್ನಗಳು, ತೋಟಗಾರಿಕೆ ಉತ್ಪನ್ನಗಳು, ವೌಲ್ಯವರ್ಧಿತ ಉತ್ಪನ್ನಗಳನ್ನು ತಯಾರಿಸುವ ಹಾಗೂ ಉದ್ದಿಮೆದಾರರಿಂದ ಉತ್ಪನ್ನಗಳ ಪ್ರದರ್ಶನ ಮತ್ತು ಮಾರಾಟಕ್ಕೆ ವ್ಯವಸ್ಥೆ ಕಲ್ಪಿಸಲಾಗಿದೆ.