ವಿದ್ಯುತ್ ಬಿಲ್ ಪಾವತಿಸದ ಮುಲ್ಕಿ ಸಬ್ ರಿಜಿಸ್ಟ್ರಾರ್ ಕಚೇರಿ : ಫ್ಯೂಸ್ ಕಿತ್ತ ಮೆಸ್ಕಾಂ

ಮುಲ್ಕಿ, ಜ.30: ಇಲ್ಲಿನ ಸಬ್ ರಿಜಿಸ್ಟ್ರಾರ್ ಕಚೇರಿಯ ಬಿಲ್ ಕಟ್ಟಿಲ್ಲ ಎಂದು ಮೆಸ್ಕಾಂ ಇಲಾಖೆ ವಿದ್ಯುತ್‌ನ ಫ್ಯೂಸ್ ಕೊಂಡು ಹೋಗಿದ್ದು, ದೂರದ ಊರುಗಳಿಂದ ಕೆಲಸಕಾರ್ಯಗಳ ನಿಮಿತ್ತ ಸಬ್‌ರಿಜಿಸ್ಟ್ರಾರ್ ಕಚೇರಿಗೆ ಬೆಳಗ್ಗೆ ಬಂದಿದ್ದ ಜನರು ಮಧ್ಯಾಹ್ನದ ವರೆಗೂ ಪರದಾಡಿದ ಘಟನೆ ಸೋಮವಾರ ನಡೆದಿದೆ.

ವಿದ್ಯುತ್ ಬಿಲ್ಲು ಬಾಕಿಯಿರಿಸಿದ ಕಾರಣ ಮೆಸ್ಕಾಂ ಇಲಾಖೆಯವರು ವಿದ್ಯುತ್ ನಿಲುಗಡೆಗೊಳಿಸಿದ್ದರಿಂದ ಜನರಿಗೆ ಸಮಸ್ಯೆಯಾಗಿದೆ. ಕಚೇರಿಯಲ್ಲಿರುವ ಜನರೇಟರ್ ಕೂಡಾ ಹಾಳಾಗಿದ್ದು, ಬೆಳಗ್ಗಿನಿಂದ ಮಧ್ಯಾಹ್ನದವರೆಗೆ ದೂರದ ಉರುಗಳಿಂದ ನೊಂದಾವಣೆಗೆ ಬಂದ ಹೆಚ್ಚಿನ ಜನರು ಸಮಸ್ಯೆಯಿಂದ ಕಂಗಲಾಗುವಂತಾಯಿತು.

 ಬಳಿಕ ಸಬ್ ರಿಜಿಸ್ಟ್ರಾರ್ ಅವರು ವಿದ್ಯುತ್ ಬಿಲ್ಲು ಪಾವತಿ ಮಾಡಿದ ಬಳಿಕ ಮಧ್ಯಾಹ್ನದ ಅವಧಿಯಲ್ಲಿ ವಿದ್ಯುತ್ ಮರು ಸಂಪರ್ಕ ಕಲ್ಪಿಸಲಾಗಿದೆ. ಜನರೇಟರ್ ಹಾಳಾಗಿದ್ದರೂ ದುರಸ್ತಿ ಮಾಡದಿರುವುದರಿಂದ ಹಾಗೂ ವಿದ್ಯುತ್ ಬಿಲ್ಲು ಕಟ್ಟದಿರುವುದರಿಂದ ಸಮಸ್ಯೆಯಾಗಿರುವ ಬಗ್ಗೆ ಜನರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಮುಲ್ಕಿ ಸಬ್ ರಿಜಿಸ್ಟ್ರಾರ್ ಕಚೇರಿಗೆ ಪ್ರತಿ ತಿಂಗಳು ಸುಮಾರು 8 ರಿಂದ 10000 ರೂ ವರೆಗೆ ವಿದ್ಯುತ್ ಬಿಲ್ಲು ಬರುತ್ತಿದ್ದು ಕಚೇರಿಯು ನವಂಬರ್ 2016ರ ವರೆಗೆ 44,000 ರೂ. ವಿದ್ಯುತ್ ಬಿಲ್ಲನ್ನು ಬಾಕಿಯಿರಿಸಿತ್ತು. ಈ ಬಗ್ಗೆ ಮೆಸ್ಕಾಂ ಇಲಾಖೆ ನೋಟಿಸನ್ನೂ ನೀಡಿತ್ತು.

ಬಳಿಕ ನವಂಬರ್ ನಲ್ಲಿ 30,000 ರೂ. ಕಟ್ಟಿ 14,000 ಸಾ.ರೂ ಬಾಕಿಯಿರಿಸಿತ್ತು. ಅಲ್ಲದೆ, ಡಿಸೆಂಬರ್ ತಿಂಗಳಿನ ಬಿಲ್ಲು 9000 ಸೇರಿದಂತೆ ಒಟ್ಟು 23, 000 ಸಾವಿರ ರೂ. ಬಾಕಿಯಿದ್ದು , ಬಿಲ್ಲು ಕಟ್ಟದ ಕಾರಣ ಡಿಸೆಂಬರ್ ತಿಂಗಳಿನ ಅಂತ್ಯದಲ್ಲಿ ವಿದ್ಯುತ್ ನಿಲುಗಡೆಗೊಳಿಸಲಾಗಿತ್ತು.

 ಆ ಸಂದರ್ಭದಲ್ಲಿ ಸಬ್ ರಿಜಿಸ್ಟ್ರಾರ್ ರವರು ವಿದ್ಯುತ್ ಬಿಲ್ಲು ಕಟ್ಟುವುದಾಗಿ ತಿಳಿಸಿರುವುದರಿಂದ ಮಾನವೀಯ ನೆಲೆಯಲ್ಲಿ ವಿದ್ಯುತ್ ಸಂಪರ್ಕ ನೀಡಲಾಗಿತ್ತು. ಡಿಸೆಂಬರ್ ಅಂತ್ಯದ ಬಳಿಕ ಜನವರಿ 30ರ ವರೆಗೆ ಬಾಕಿಯುಳಿದ 23, 000 ರೂ. ಕಟ್ಟದ ಹಿನ್ನೆಲೆಯಲ್ಲಿ ಸೋಮವಾರ ವಿದ್ಯುತ್ ಸಂಪರ್ಕ ಸ್ಥಗಿತಗೊಳಿಸಿ ಕಚೇರಿಯ ಫ್ಯೂಸ್ ಕೊಂಡು ಹೋಗಲಾಗಿತ್ತು.
   
 ಲಕ್ಷಗಟ್ಟಲೆ ಆದಾಯವಿರುವ ಮುಲ್ಕಿ ಸಬ್‌ರಿಜಿಸ್ಟ್ರಾರ್ ಕಚೇರಿಗೆ ಸರಕಾರದಿಂದ ಮಂಜೂರಾಗಿರುವ ಸುಮಾರು 2.5 ಲಕ್ಷ ರೂ. ವೆಚ್ಚದ ಜನರೇಟರ್‌ನಲ್ಲಿ ಪೆಟ್ರೋಲ್ ಮುಗಿದಿದ್ದ ಕಾರಣ ಸೋಮವಾರ ಜನರೇಟರ್ ಚಲಾವಣೆಗೊಳ್ಳದೆ, ಪರ್ಯಾಯ ವ್ಯವಸ್ಥೆ ಇಲ್ಲದೆ ಜನರು ಪರದಾಡುವಂತಾಯಿತು.

ಈ ಸಂಬಂಧ ಸ್ಥಳದಲ್ಲಿದ್ದ ಕಿನ್ನಿಗೋಳಿಯ ಜೋಸೆಫ್ ಕ್ವಾಡ್ರಸ್ ಪತ್ರಿಕೆಯೊಂದಿಗೆ ಮಾತನಾಡಿ, ಇಂದು ಬೆಳಗ್ಗೆ ರಿಜಿಸ್ಟ್ರೇಶನ್‌ಗೆ ಬಂದಿದ್ದೆವು. ನಾವು ಬರುವ ವೇಳೆ ಇಲ್ಲಿ ವಿದ್ಯುತ್ ಇರಲಿಲ್ಲ. ಜನರೇಟರ್‌ ಕೂಡಾ ಕೆಲಸ ಮಾಡದ ಕಾರಣ ತುಂಬಾ ತೊಂದರೆ ಅನುಭವಿಸಬೇಕಾಯಿತು. ಅಲ್ಲದೆ, ಇಲ್ಲಿ ಶೌಚಾಲಯವಿಲ್ಲ, ಕುಡಿಯುವ ನೀರಿನ ವ್ಯವಸ್ಥೆಯಿಲ್ಲ. ಕನಿಷ್ಠಪಕ್ಷ ಹೊರಗಡೆ ಕುಳಿತುಕೊಳ್ಳುವ ವ್ತವಸ್ಥೆಯೂ ಇಲ್ಲ. ಕೇವಲ ನೋಂದಣಿಗೆ ಹಣ ಸಂಗ್ರಹಿಸಲಾಗುತ್ತಿದೆ ವಿನಃ ಕನಿಷ್ಠ ಮೂಲಭೂತ ಸೌಲಭ್ಯಗಳೂ ಇಲ್ಲಿ ಇಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
   

  ಕಚೇರಿಯಲ್ಲಿ ವಿದ್ಯುತ್ ಬಿಲ್ಲು ಕಟ್ಟಲು ಈಗ ಕೆ-12 ಮೂಲಕ ಆನ್ ವ್ಯವಸ್ಥೆ ಮಾಡಿದ್ದು ಇಲಾಖೆಯಿಂದ ಅನುದಾನ ಬಂದಲ್ಲಿ ಮಾತ್ರ ವಿದ್ಯುತ್ ಬಿಲ್ಲು ಕಟ್ಟಲು ಸಾಧ್ಯ. ನೇರವಾಗಿ ಪಾವತಿ ವ್ಯವಸ್ಥೆಯಿಲ್ಲ. ಅನುದಾನ ಬರುವಾಗ ವಿಳಂಬವಾಗಿರುವುದರಿಂದ ವಿದ್ಯುತ್ ಬಿಲ್ಲು ಪಾವತಿಸುವಲ್ಲಿ ಸಮಸ್ಯೆಯಾಗಿತ್ತು. ಜನರೇಟರ್ ಹಾಳಾಗಿರುವುದು ಗಮನಕ್ಕೆ ಬಂದಿರಲಿಲ್ಲ. ಬೆಳಗ್ಗೆ ವಿದ್ಯುತ್ ಬಿಲ್ಲು ಪಾವತಿಸಲಾಗಿತ್ತು. ಮಧ್ಯಾಹ್ನದ ಒಳಗೆ ಮೆಸ್ಕಾಂ ಇಲಾಖೆ ವಿದ್ಯುತ್ ಸಂಪರ್ಕ ನೀಡಿದ್ದು, ಸಮಸ್ಯೆ ಬಗೆಹರಿದಿದೆ. ಮುಂದೆ ಈ ರೀತಿಯಾಗದಂತೆ ನೋಡಿಕೊಳ್ಳುತ್ತೇವೆ.
  
-ಗೋಪಾಲಕೃಷ್ಣ ಸಬ್ ರಿಜಿಸ್ಟಾರ್ ಮುಲ್ಕಿ