ಶಿವಮೊಗ್ಗದ ಮಹಿಳೆಗೆ ವಂಚಿಸಿದ್ದ ಬೆಂಗಳೂರಿನ ಇಬ್ಬರು ಜ್ಯೋತಿಷಿಗಳ ಸೆರೆ

ಶಿವಮೊಗ್ಗ, ಜ. 31: ಕಳೆದ ಸರಿಸುಮಾರು ಎರಡು ವರ್ಷಗಳ ಹಿಂದೆ ಕೌಟುಂಬಿಕ ಸಮಸ್ಯೆ ಪರಿಹಾರ ಮಾಡುವುದಾಗಿ ಹೇಳಿ, ಶಿವಮೊಗ್ಗದ ಮಹಿಳೆಯೋರ್ವರಿಂದ ನಗನಾಣ್ಯ ಪಡೆದು ವಂಚಿಸಿ ತಲೆಮರೆಸಿಕೊಂಡಿದ್ದ ಬೆಂಗಳೂರಿನ ಜ್ಯೋತಿಷ್ಯ ಕೇಂದ್ರವೊಂದರ ಇಬ್ಬರು ಆರೋಪಿಗಳನ್ನು ವಿನೋಬಾನಗರ ಠಾಣೆ ಪೊಲೀಸರು ಬಂಧಿಸುವಲ್ಲಿ ಸಫಲರಾಗಿದ್ದಾರೆ.

ಬೆಂಗಳೂರಿನ ಬಸವೇಶ್ವರ ನಗರದ ಮಾತ್ರಪ್ಪ ಸಿಂಧೆ (40) ಹಾಗೂ ತುಕರಾಂ ಸಿಂಧೆ (28) ಬಂಧಿತ ಆರೋಪಿಗಳೆಂದು ಗುರುತಿಸಲಾಗಿದೆ.

ಆರೋಪಿಗಳಿಂದ 1 ಬಂಗಾರದ ಸರ ಹಾಗೂ 40 ಸಾವಿರ ರೂ. ನಗದನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ. ಇಬ್ಬರ ವಿರುದ್ಧ ವಂಚನೆ ಸೇರಿದಂತೆ ಐಪಿಸಿಯ ವಿವಿಧ ಕಲಂಗಳಡಿ ಪ್ರಕರಣ ದಾಖಲಿಸಿಕೊಂಡು ನ್ಯಾಯಾಂಗ ವಶಕ್ಕೆ ಒಪ್ಪಿಸಿದ್ದಾರೆ. ಈ ಸಂಬಂಧ ವಿನೋಬಾನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಸಬ್ ಇನ್‌ಸ್ಪೆಕ್ಟರ್ ರಾಘವೇಂದ್ರ ಕೌಂಡಿನ್ಯ ಮತ್ತವರ ಸಿಬ್ಬಂದಿ ರವಿನಾಯ್ಕೆ, ಅಶೋಕ್ ನೇತೃತ್ವದ ಪೊಲೀಸ್ ತಂಡವು ಬೆಂಗಳೂರಿನಲ್ಲಿ ಆರೋಪಿಗಳನ್ನು ಪತ್ತೆ ಹಚ್ಚಿ ಬಂಧಿಸುವಲ್ಲಿ ಯಶಸ್ವಿಯಾಗಿದೆ.

ಪ್ರಕರಣದ ಹಿನ್ನೆಲೆ:

ವಿನೋಬಾನಗರ ಬಡಾವಣೆಯ ನಿವಾಸಿ ಶೋಭಾ ಎಂಬವರೇ ವಂಚನೆಗೊಳಗಾದವರೆಂದು ಗುರುತಿಸಲಾಗಿದೆ.

2013-14 ನೆ ಸಾಲಿನಲ್ಲಿ ಈ ವಂಚನೆ ನಡೆದಿತ್ತು. ಪತ್ರಿಕೆಯೊಂದರಲ್ಲಿ ಜ್ಯೋತಿಷ್ಯದ ಜಾಹೀರಾತು, ಮೊಬೈಲ್ ಸಂಖ್ಯೆ ಪ್ರಕಟವಾಗಿತ್ತು. ಕೌಟುಂಬಿಕ ಸಮಸ್ಯೆ ಪರಿಹರಿಸಿ ಕೊಡುವುದಾಗಿ ಹೇಳಲಾಗಿತ್ತು. ಇದನ್ನು ಗಮನಿಸಿದ ಶೋಭಾ ಅವರು ಮೊಬೈಲ್ ನಂಬರ್‌ಗೆ ಕರೆ ಮಾಡಿ ತಮಗಿರುವ ಕೌಟುಂಬಿಕ ಸಮಸ್ಯೆಗಳ ಬಗ್ಗೆ ಹೇಳಿಕೊಂಡಿದ್ದರು.

‘ನಿಮಗೆ ನಾನಾ ರೀತಿಯ ಸಮಸ್ಯೆಗಳಿದ್ದು, ಇದನ್ನು ಪರಿಹರಿಸಲು ಹೋಮ-ಪೂಜೆ ನಡೆಸಬೇಕಾಗುತ್ತದೆ. ಇಂತಿಷ್ಟು ನಗದು, ಬಂಗಾರ ನೀಡಿದರೆ ಸಮಸ್ಯೆ ಪರಿಹರಿಸಿಕೊಡುವುದಾಗಿ’ ಮುಖ್ಯ ಆರೋಪಿ ಮಾತ್ರಪ್ಪ ಸಿಂಧೆ ತಿಳಿಸಿದ್ದ. ಇವರ ಮಾತನ್ನು ನಂಬಿದ ಮಹಿಳೆಯು ಆರೋಪಿ ಸೂಚಿಸಿದ್ದ ಬ್ಯಾಂಕ್ ಅಕೌಂಟ್‌ಗೆ ಸರಿಸುಮಾರು 40 ಸಾವಿರ ರೂ. ಹಾಕಿದ್ದರು. ಜೊತೆಗೆ ಆತನ ಸಹಚರ ತುಕರಾಂ ಸಿಂಧೆಯನ್ನು ಶಿವಮೊಗ್ಗಕ್ಕೆ ಕಳುಹಿಸಿ ಶೋಭಾ ಅವರಿಂದ ಚಿನ್ನದ ಸರವನ್ನು ಪಡೆದುಕೊಂಡಿದ್ದರು.

ಇದರ ಹೊರತಾಗಿಯೂ ಶೋಭಾ ಅವರ ಕೌಟುಂಬಿಕ ಸಮಸ್ಯೆಗಳು ಪರಿಹಾರವಾಗಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಜ್ಯೋತಿಷಿಗಳನ್ನು ಸಂಪರ್ಕಿಸಲು ಶೋಭಾ ಅವರು ಯತ್ನಿಸಿದ್ದು, ಅವರು ಸಂಪರ್ಕಕ್ಕೆ ಸಿಕ್ಕಿರಲಿಲ್ಲ. ತಾವು ವಂಚನೆಗೊಳಗಾಗಿರುವುದನ್ನರಿತ ಅವರು ವಿನೋಬಾನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು.

ಹೆಸರು ಬದಲಾಯಿಸಿಕೊಂಡಿದ್ದರು:

ಮತ್ತೊಂದೆಡೆ ಇಬ್ಬರು ಆರೋಪಿಗಳು ತಮ್ಮ ಹೆಸರು ಬದಲಾಯಿಸಿಕೊಂಡು ಬೆಂಗಳೂರಿನ ಬಸವೇಶ್ವರ ನಗರದಲ್ಲಿ ಜ್ಯೋತಿಷ್ಯ ಕೇಂದ್ರವೊಂದನ್ನು ನಡೆಸುತ್ತಿದ್ದರು. ಯುವ-ದಕ್ಷ ಪೊಲೀಸ್ ಅಧಿಕಾರಿ ಸಬ್ ಇನ್‌ಸ್ಪೆಕ್ಟರ್ ರಾಘವೇಂದ್ರ ಕೌಂಡಿನ್ಯಅವರು ಎರಡು ವರ್ಷಗಳ ಹಿಂದಿನ ಪ್ರಕರಣಕ್ಕೆ ಮರು ಜೀವ ನೀಡಿ, ಬೆಂಗಳೂರಿನಲ್ಲಿದ್ದ ಆರೋಪಿಗಳನ್ನು ಹುಡುಕಿ ತರುವಲ್ಲಿ ಯಶಸ್ವಿಯಾಗಿದ್ದಾರೆ. 

ವಂಚಕರ ಬಗ್ಗೆ ಎಚ್ಚರವಿರಲಿ...!
 ‘ಕೆಲವರು ಜ್ಯೋತಿಷ್ಯ ಹೇಳುವುದಾಗಿ ಹಾಗೂ ಧಾರ್ಮಿಕ ವಿಧಿವಿಧಾನಗಳ ಮೂಲಕ ವೈಯಕ್ತಿಕ, ಕೌಟುಂಬಿಕ ಸಮಸ್ಯೆಗಳನ್ನು ಪರಿಹರಿಸುವುದಾಗಿ ಪತ್ರಿಕೆ, ಟಿ.ವಿ. ಹಾಗೂ ಇತರ ಮಾಧ್ಯಮಗಳ ಮೂಲಕ ಜಾಹೀರಾತು ನೀಡುತ್ತಾರೆ. ತದನಂತರ ನಗನಾಣ್ಯ ಪಡೆದು ವಂಚಿಸುತ್ತಾರೆ. ಇಂತಹ ವಂಚಕ ಜ್ಯೋತಿಷಿಗಳ ಬಗ್ಗೆ ನಾಗರಿಕರು ಎಚ್ಚರಿಕೆಯಿಂದಿರಬೇಕು. ಯಾವುದೇ ಕಾರಣಕ್ಕೂ ಅವರ ಮಾತು ನಂಬಿ ನಗನಾಣ್ಯ ನೀಡುವುದು, ಅವರು ಹೇಳಿದ ಪರ ಸ್ಥಳಗಳಿಗೆ ತೆರಳಬಾರದು. ಒಂದು ವೇಳೆ ಇವರ ಬಲೆಗೆ ಬಿದ್ದರೆ ವಂಚನೆಗೊಳಗಾಗುವುದು ನಿಶ್ಚಿತವಾಗಿದೆ’ ಎಂದು ಹೆಸರು ಬಹಿರಂಗಪಡಿಸಲಿಚ್ಛಿಸದ ಪೊಲೀಸ್ ಅಧಿಕಾರಿಯೋರ್ವರು ನಾಗರಿಕರಿಗೆ ಕಿವಿಮಾತು ಹೇಳಿದ್ದಾರೆ.