ಮಲೇರಿಯಾ ನಿಯಂತ್ರಣಕ್ಕೆ ವಿಶೇಷ ಕಾರ್ಯಕ್ರಮ

ಮಂಗಳೂರು, ಫೆ.8: ಮಲೇರಿಯಾ ರೋಗವು ಸಮಾಜದ ಜನರನ್ನು ಕಾಡುತ್ತಿರುವ ಪ್ರಮುಖ ಸಾಂಕ್ರಾಮಿಕ ರೋಗವಾಗಿದೆ. ಇದು ‘ಪ್ಲಾಸ್ಮೋಡಿಯಂ’ ಎಂಬ ಪರಾವಲಂಬಿ ಸೂಕ್ಷ್ಮಾಣುವಿನಿಂದ ಉಂಟಾಗುತ್ತದೆ. ಸೋಂಕಿತ ಹೆಣ್ಣು ಅನಾಫೆಲೀಸ್ ಸೊಳ್ಳೆಗಳು ಒಬ್ಬರಿಂದ ಇನ್ನೊಬ್ಬರಿಗೆ ಹರಡುತ್ತವೆ. ಈ ರೋಗಾಣು ತನ್ನ ಜೀವಿತದ ಕೆಲಭಾಗವನ್ನು ಮನುಷ್ಯರಲ್ಲೂ ಕಳೆಯುತ್ತದೆ. ಚಳಿಜ್ವರ ಬಂದ ತಕ್ಷಣ ವೈದ್ಯರಲ್ಲಿ ಅಗತ್ಯವಾಗಿ ಪರೀಕ್ಷಿಸಬೇಕು ಎಂದು ಡಾ. ರೊನಾಲ್ಡ್ ಫೆರ್ನಾಂಡಿಸ್ ಹೇಳಿದರು.

ಬುಧವಾರ ನಗರದ ಪ್ರೆಸ್‌ಕ್ಲಬ್‌ನಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಮಲೇರಿಯಾ ರೋಗಾಣುಗಳನ್ನು ಹೊಂದಿರುವ ವ್ಯಕ್ತಿಯನ್ನು ಹೆಣ್ಣು ಅನಾಫೆಲಿಸ್ ಸೊಳ್ಳೆ ಕಚ್ಚಿದಾಗ ರೋಗಾಣುಗಳು ಸೊಳ್ಳೆಯ ದೇಹವನ್ನು ಪ್ರವೇಶಿಸಿ 10 ರಿಂದ 14 ದಿನಗಳವರೆಗೆ ಅಭಿವೃದ್ಧಿ ಹೊಂದಿ ರೋಗವನ್ನು ಹರಡುವ ಸ್ಥಿತಿಗೆ ಬಂದು ಆರೋಗ್ಯವಂತ ಮನುಷ್ಯನನ್ನು ಈ ಸೊಳ್ಳೆ ಕಚ್ಚಿದಾಗ ಮನುಷ್ಯನಲ್ಲಿ ಮಲೇರಿಯಾ ರೋಗದ ಲಕ್ಷಣಗಳು ಕಾಣಿಸಲು ಪ್ರಾರಂಭಿಸುತ್ತದೆ ಎಂದು ಹೇಳಿದರು.

ರೋಗ ಲಕ್ಷಣಗಳು: ಚಳಿಯ ಹಂತದಲ್ಲಿ ಚಳಿಯ ಜೊತೆಯಲ್ಲಿ ನಡುಕ ಹಾಗೂ ತಲೆನೋವು ಇರುತ್ತದೆ. ಇದು ಸುಮಾರು 15 ನಿಮಿಷದಿಂದ 1 ಗಂಟೆಯ ಸಮಯ ಇರಬಹುದು. ಬಿಸಿಯ ಹಂತದಲ್ಲಿ ಜ್ವರ ತೀವ್ರವಾಗಿ ಹರಡುತ್ತದೆ. ವಿಪರೀತ ತಲೆನೋವು, ವಾಕರಿಕೆ, ವಾಂತಿಯಾಗುವಂತೆ ಅನಿಸುತ್ತದೆ. ವಿಪರೀತ ವಾಯಾರಿಕೆ ಅನಿಸುತ್ತದೆ. ಈ ಹಂತದಲ್ಲಿ 2 ರಿಂದ 6 ಗಂಟೆಗಳ ಕಾಲ ಇರುತ್ತದೆ. ಬೆವರುವಿಕೆಯ ಹಂತದಲ್ಲಿ ಜ್ವರ ಕಡಿಮೆಯಾಗುತ್ತದೆ. ದೇಹವಿಡೀ ವಿಪರೀತ ಬೆವರುತ್ತದೆ. ಸಾಮಾನ್ಯವಾಗಿ ರೋಗಿಗೆ ಗಾಢ ನಿದ್ರೆ ಬರುತ್ತದೆ. ಎಚ್ಚರವಾದಾಗ ಬಳಲಿ ಸುಸ್ತಾದ ಅನುಭವ ಆಗುತ್ತದೆ. ಈ ಹಂತವು 2ರಿಂದ 4 ಗಂಟೆಗಳ ಕಾಲ ಇರುತ್ತದೆ. ಇಂತಹ ಲಕ್ಷಣಗಳನ್ನು ಕಾಣಬಹುದಾಗಿದೆ ಎಂದು ಮಾಹಿತಿ ನೀಡಿದರು.

ರಾಜ್ಯದಲ್ಲಿ ಪ್ಲಾಸ್ಮೋಡಿಯಂ ವೈವ್ಯಾಕ್ಸ್(ಪಿವಿ), ಪ್ಲಾಸ್ಮೋಡಿಯಂ ಫಾಲ್ಸಿಫಾರಂ(ಪಿಎಫ್) ಮಲೇರಿಯಾ ಪ್ರಬೇಧಗಳು ಸದ್ಯಕ್ಕೆ ಕಂಡು ಬರುತ್ತಿವೆ. ಫಾಲಿಫಾರಂ ಮಲೇರಿಯಾ ಅತ್ಯಂತ ಅಪಾಯಕಾರಿ. ಸರಿಯಾದ ಕಾಲದಲ್ಲಿ ಅಗತ್ಯ ಚಿಕಿತ್ಸೆ ನೀಡದಿದ್ದರೆ ರೋಗಿ ಸಾಯಲೂಬಹುದು ಎಂದು ತಿಳಿಸಿದರು.

ಯಾವುದೇ ಜ್ವರ ಮಲೇರಿಯಾ ಇರಬಹುದು. ಎಲ್ಲ ಜ್ವರವಿರುವ ವ್ಯಕ್ತಿಗಳಿಂದ ರಕ್ತ ಲೇಪನವನ್ನು ಸಂಗ್ರಹಿಸಬೇಕು. ರಕ್ತ ಲೇಪನ ಪರೀಕ್ಷೆಯಿಂದ ದೃಢಪಟ್ಟ ಮಲೇರಿಯಾ ಪ್ರಕರಣಗಳಿಗೆ ತೀವ್ರ ಚಿಕಿತ್ಸೆಯನ್ನು ಕೊಡಬೇಕು. ಸಂಗ್ರಹಿಸಿದ 24 ಗಂಟೆಗಳ ಒಳಗೆ ಪರೀಕ್ಷಾ ಫಲಿತಾಂಶ ಸಿಗುವ ಸಂಭವ ಇಲ್ಲದ ಕಡೆಗಳಲ್ಲಿ ತ್ವರಿತ ರೋಗ ಪತ್ತೆ ವಿಧಾನದ ಕಿಟ್ಟುಗಳನ್ನು ಆ ಗ್ರಾಮದಲ್ಲಿರುವ ಆಶಾ ಕಾರ್ಯಕರ್ತೆಯರು ಬಳಸಬಹುದಾಗಿದೆ ಎಂದು ತಿಳಿಸಿದರು.

ಮಲೇರಿಯಾ ಪ್ರಕರಣಗಳಲ್ಲಿ ಸಂಶಯಾಸ್ಪದ ಮಲೇರಿಯಾ ಪ್ರಕರಣ, ಖಚಿತ ಮಲೇರಿಯಾ ಪ್ರಕರಣ, ತೀವ್ರತರವಾದ ಮಲೇರಿಯಾ ಪ್ರಕರಣಗಳೆಂದು ವಿಂಗಡಿಸಬಹುದಾಗಿದೆ. ಅದರಲ್ಲೂ ತೀವ್ರತರ ಮಲೇರಿಯಾದ ಲಕ್ಷಣಗಳನ್ನು ಹೊಂದಿರುವ ಹಾಗೂ ರಕ್ತಲೇಪನ (ಆರ್‌ಡಿಟಿ) ಪರೀಕ್ಷೆಯಿಂದ ಪಿಎಫ್ ಮಲೇರಿಯಾ ಎಂದು ದೃಢಪಟ್ಟ ರೋಗಿ ಮರಣ ಹೊಂದಿದರೆ ಮಾತ್ರ ಅದನ್ನು ಮಲೇರಿಯಾ ಮರಣವೆಂದು ಪರಿಗಣಿಸಬೇಕು ಎಂದು ತಿಳಿಸಿದರು.

ನಿಯಂತ್ರಣ ಕ್ರಮಗಳು: ಸೊಳ್ಳೆ ಉತ್ಪತ್ತಿಯಾಗುವ ತಾಣಗಳನ್ನು ಗುರುತಿಸಿ ನಿಯಂತ್ರಿಸಬೇಕು. ಘನ ತ್ಯಾಜ್ಯ ಸಮರ್ಪಕ ವಿಲೇವಾರಿ ಮಾಡಬೇಕು. ನೀರು ಸಂಗ್ರಹಣ ಟ್ಯಾಂಕ್‌ಗಳಿಗೆ ಭದ್ರವಾದ ಮುಚ್ಚಳ ಅಳವಡಿಸಬೇಕು. ರಾತ್ರಿ ಸೊಳ್ಳೆ ಪರದೆ ಉಪಯೋಗಿಸಬೇಕು. ಕಿಟಕಿಗಳಿಗೆ ಜಾಲಸರಿ ಅಳವಡಿಸಬೇಕು. ಮನೆಯ ಪರಿಸರದಲ್ಲಿ ತುಳಸಿ, ಕಹಿಬೇವಿನ ಸಸಿಗಳನ್ನು ಬೆಳಸಬೇಕು. ಬಾವಿ, ಟ್ಯಾಂಕರ್‌ಗಳಲ್ಲಿ ಗಪ್ಪಿ, ಗಂಬ್ಯೂಷಿಯಾ ಮೀನುಗಳನ್ನು ಸಾಕುವಂತಹ ಕ್ರಮಗಳನ್ನು ಕೈಗೊಳ್ಳಬೇಕು. ಇದರಿಂದ ಮಲೇರಿಯಾ ಹರಡದಂತೆ ತಡೆಗಟ್ಟಬಹುದಾಗಿದೆ ಎಂದು ಮಾಹಿತಿ ನೀಡಿದರು.

ಸುದ್ದಿಗೋಷ್ಠಿಯಲ್ಲಿ ಅರುಣ್‌ಕುಮಾರ್, ಡಾ. ರಾಜೇಶ್, ಮಂಜುಳಾ ಉಪಸ್ಥಿತರಿದ್ದರು.