ಕಲ್ಲಡ್ಕ ಮಿಥುನ್ ಸಹಿತ 8 ಮಂದಿಯ ಬಂಧನ

ಬಂಟ್ವಾಳ, ಫೆ.8: ವ್ಯಕ್ತಿಯೊಬ್ಬರಿಗೆ ಹಲ್ಲೆ ನಡೆಸಿ, ದರೋಡೆಗೈದ ಹಾಗೂ ಇತ್ತೀಚೆಗೆ ನೀರಪಾದೆಯಲ್ಲಿ ಜಾನುವಾರು ಸಾಗಾಟಗಾರರಿಗೆ ಮಾರಣಾಂತಿಕ ಹಲ್ಲೆಗೈದ ಪ್ರಕರಣದ 8 ಆರೋಪಿಗಳನ್ನು ಭಾರೀ ಕಾರ್ಯಾಚರಣೆ ನಡೆಸಿ ಬಂಟ್ವಾಳ ಪೊಲೀಸರು ಬಂಧಿಸಿದ್ದಾರೆ.

ಮಂಚಿ ಕಯ್ಯೂರು ನಿವಾಸಿಗಳಾದ ವಿಜೇತ್, ಅಭಿ ಯಾನೆ ಅಭಿಜಿತ್, ಕಲ್ಲಡ್ಕ ಆಸುಪಾಸು ನಿವಾಸಿಗಳಾದ ಮಿಥುನ್ ಕುಮಾರ್, ಅಮಿತ್, ಯತಿನ್, ಶರತ್ ಕುಮಾರ್, ವಿಟ್ಲ ಸಮೀಪದ ಕೇಪು ನಿವಾಸಿ ಅಭಿಷೇಕ್ ಹಾಗೂ ಪುಷ್ಪರಾಜ್ ಬಂಧಿತ ಆರೋಪಿಗಳಾಗಿದ್ದಾರೆ. ಶರತ್ ಕುಮಾರ್, ಅಮಿತ್, ಯತಿನ್ ಹಾಗೂ ಪುಷ್ಪರಾಜ್ ಇತ್ತೀಚೆಗೆ ನೀರಪಾದೆ ಎಂಬಲ್ಲಿ ದನ ಸಾಗಾಟಗಾರರ ಮೇಲೆ ಮಾರಣಾಂತಿಕ ಹಲ್ಲೆ ನಡೆಸಿದ ಪ್ರಕರಣದಲ್ಲಿ ಆರೋಪಿಗಳಾಗಿದ್ದಾರೆ.

ಮಿಥುನ್ ಕುಮಾರ್, ವಿಜೇತ್, ಅಭಿ ಯಾನೆ ಅಭಿಜಿತ್, ಅಭಿಷೇಕ್ ಮಂಚಿಯಲ್ಲಿ ಇತ್ತೀಚೆಗೆ ನಡೆದ ನಿಶಾ ಸೌಂಡ್ಸ್ ಮತ್ತು ಲೈಟಿಂಗ್ಸ್ ಮಾಲಕ ಹರೀಶ್ ಗೌಡ ಎಂಬವರಿಗೆ ಹಲ್ಲೆ ಹಾಗೂ ದರೋಡೆ ಪ್ರಕರಣದ ಆರೋಪಿಗಳಾಗಿದ್ದಾರೆ. ಬಂಧಿತ ಎಲ್ಲ ಆರೋಪಿಗಳನ್ನು ಮಂಗಳವಾರ ಸಂಜೆ ಬಂಟ್ವಾಳ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ನ್ಯಾಯಾಂಗ ಬಂಧನ ವಿಧಿಸಲಾಗಿದೆ.

ಮಂಚಿ ದೇವಸ್ಥಾನದ ಜಾತ್ರೋತ್ಸವಕ್ಕೆ ಪ್ರತೀ ವರ್ಷ ಲೈಟಿಂಗ್ಸ್ ಮಾಡುತ್ತಿದ್ದ ಹರೀಶ್ ಗೌಡ ಈ ಬಾರಿ ತನಗೆ ಲೈಟಿಂಗ್ಸ್ ಗುತ್ತಿಗೆ ನೀಡದಿರುವುದರ ಬಗ್ಗೆ ದೇವಸ್ಥಾನದ ಆಡಳಿತ ಮಂಡಳಿಯ ಸದಸ್ಯರಲ್ಲಿ ವಿಚಾರಿಸಿದ್ದರು ಎನ್ನಲಾಗಿದೆ. ಈ ಬಾರಿ ಮಂಚಿಯ ವಿಜೇತ್ (ಹಲ್ಲೆ ಪ್ರಕರಣ ಆರೋಪಿ) ಎಂಬಾತನಿಗೆ ಲೈಟಿಂಗ್ಸ್ ಗುತ್ತಿಗೆ ನೀಡಲಾಗಿದೆ ಎಂದು ಅವರು ತಿಳಿಸಿದ್ದರು.

ಬಳಿಕ ಹರೀಶ್ ಗೌಡ ವಿಜೇತ್‌ಗೆ ಕರೆ ಮಾಡಿ ವಿಚಾರಿಸಿದ ಕಾರಣಕ್ಕೆ ವಿಜೇತ್, ಮಿಥುನ್, ಅಭಿ ಯಾನೆ ಅಭಿಜಿತ್ ಸಹಿತ ಹತ್ತಕ್ಕೂ ಹೆಚ್ಚು ಮಂದಿಯಿದ್ದ ತಂಡ ಸಜಿಪ ಮೂಡಾ ಗ್ರಾಮದ ಗುರು ಮಂದಿರದ ಬಳಿ ತನಗೆ ಮಾರಣಾಂತಿಕ ಹಲ್ಲೆ ನಡೆಸಿ, 38,000 ರೂ. ದರೋಡೆ ನಡೆಸಿ ಪರಾರಿಯಾಗಿದ್ದಾರೆ ಎಂದು ದೂರಲಾಗಿದೆ. ಆ ಬಳಿಕವೂ ತಾನು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಗ ಕರೆ ಮಾಡಿ ಪೊಲೀಸರಿಗೆ ದೂರು ನೀಡದಂತೆ ಕೊಲೆ ಬೆದರಿಕೆ ಹಾಕಿದ್ದಾರೆ ಎಂದು ಹರೀಶ್ ಗೌಡ ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.

ಆರೋಪಿಗಳ ವಿರುದ್ಧ ಬಂಟ್ವಾಳ ನಗರ ಠಾಣೆಯಲ್ಲಿ ಐಪಿಸಿ ಕಲಂ 143, 147, 148, 504, 506, 507, 323, 324, 307, 397 ಅಡಿ ಪ್ರಕರಣ ದಾಖಲಾಗಿದೆ. ಮಿಥುನ್ ಕುಮಾರ್ 2015ರ ಟಿಪ್ಪು ಜಯಂತಿ ಸಂದರ್ಭದಲ್ಲಿ ನಾವೂರು ಹರೀಶ್ ಪೂಜಾರಿ ಕೊಲೆ, ಬ್ರಹ್ಮರಕೊಟ್ಲು ಬದ್ರುದ್ದೀನ್ ಕೊಲೆ ಪ್ರಕರಣ ಸಹಿತ ಬಂಟ್ವಾಳ ವೃತ್ತ ವ್ಯಾಪ್ತಿಯಲ್ಲಿ ನಡೆದ ವಿವಿಧ ಕೊಲೆ ಯತ್ನ, ಕೊಲೆ ಬೆದರಿಕೆ, ಹಲ್ಲೆ, ದರೋಡೆ ಸಹಿತ ಹಲವಾರು ಪ್ರಕರಣದ ಆರೋಪಿಯಾಗಿದ್ದಾನೆ ಎಂದು ತಿಳಿದು ಬಂದಿದೆ.

ವಿಜೇತ್ ಹಾಗೂ ಅಭಿ ಯಾನೆ ಅಭಿಜಿತ್ ಸಜಿಪ ಮಲೈಬೆಟ್ಟು ಮುಹಮ್ಮದ್ ನಾಸೀರ್ ಕೊಲೆ, ಮುಹಮ್ಮದ್ ಮುಸ್ತಫಾ ಕೊಲೆ ಯತ್ನ ಸಹಿತ ಬಂಟ್ವಾಳ ವೃತ್ತ ವ್ಯಾಪ್ತಿಯಲ್ಲಿ ವಿವಿಧ ಗಂಭೀರ ಅಪರಾಧ ಪ್ರಕರಣದ ಆರೋಪಿಯಾಗಿದ್ದಾರೆ. ಸಜಿಪ ನಾಸೀರ್ ಕೊಲೆ ಪ್ರಕರಣದ ಬಳಿಕ ಅಭಿ ಯಾನೆ ಅಭಿಜಿತ್ ತಲೆ ಮರೆಸಿಕೊಂಡಿದ್ದ ಎನ್ನಲಾಗಿದೆ. ಹರೀಶ್ ಗೌಡ ಕೊಲೆ ಯತ್ನ ಪ್ರಕರಣದ ಮುನ್ನಾ ದಿನ ಕಾಣಿಸಿಕೊಂಡಿದ್ದ ಎಂದು ತಿಳಿದು ಬಂದಿದೆ.

ನಾಸೀರ್ ಕೊಲೆ ಪ್ರಕರಣದಲ್ಲಿ ವಿಜೇತ್ ಜಾಮೀನಿಂದ ಬಿಡುಗಡೆಗೊಂಡಿದ್ದನಾದರೂ, ನಾಸೀರ್ ಕುಟುಂಬ ಆರೋಪಿಗಳಿಗೆ ಜಿಲ್ಲಾ ನ್ಯಾಯಾಲಯ ತಿಂಗಳ ಒಳಗೆ ಜಾಮೀನು ನೀಡಿರುವುದನ್ನು ಪ್ರಶ್ನಿಸಿ ಹೈಕೋರ್ಟ್ ಮೆಟ್ಟಿಲೇರಿತ್ತು. ಹೈಕೋರ್ಟ್ ಈತನ ಸಹಿತ ಮೂವರ ಜಾಮೀನನ್ನು ರದ್ದುಪಡಿಸಿದೆ. ಇನ್ನುಳಿದ ಇಬ್ಬರನ್ನು ಬಂಧನವಾಗಬೇಕಿದೆ. 

ಬಂಟ್ವಾಳ ವೃತ್ತ ವ್ಯಾಪ್ತಿಯಲ್ಲಿ ಕೆಲವು ವರ್ಷಗಳಿಂದ ನಡೆದ ಕೊಲೆ, ಕೊಲೆ ಯತ್ನದಂತಹ ಗಂಭೀರ ಅಪರಾಧ ಪ್ರಕರಣಗಳಲ್ಲಿ ಪದೇ ಪದೇ ಭಾಗಿಯಾದ ಆರೋಪಿಗಳು ಪ್ರಭಾವಿ ರಾಜಕಾರಣಿಗಳ ಹಾಗೂ ಸಂಘಪರಿವಾರದ ಮುಖಂಡರ ಪ್ರಭಾವ ಬಳಸಿ ಬಂಧನದಿಂದ ತಪ್ಪಿಸಿಕೊಳ್ಳುತ್ತಿದ್ದರು ಎಂದು ದೂರಲಾಗಿದೆ. ಒಂದು ವೇಳೆ ಬಂಧನವಾದರೂ ಸಣ್ಣ ಪುಟ್ಟ ಪ್ರಕರಣ ದಾಖಲಿಸಿ ಒಂದೆರಡು ವಾರದಲ್ಲಿ ನ್ಯಾಯಾಲಯದಿಂದ ಜಾಮೀನು ಪಡೆದು ಹೊರಬಂದು ರಾಜಾರೋಷವಾಗಿ ತಿರುಗಾಡುತ್ತಿದ್ದರು ಎಂಬ ವ್ಯಾಪಕ ಆರೋಪ-ಆಕ್ರೋಶಗಳು ಸಾರ್ವಜನಿಕರಿಂದ ಕೇಳಿ ಬರುತ್ತಿದ್ದವು.

ಜಿಲ್ಲಾ ಎಸ್ಪಿ ಭೂಷಣ್ ಗುಲಾಬ್‌ರಾವ್ ಬೊರಸೆ ಮಾರ್ಗದರ್ಶನದಲ್ಲಿ ಹೆಚ್ಚುವರಿ ಎಸ್ಪಿ ಸಿ.ಬಿ.ವೇದಮೂರ್ತಿ, ಬಂಟ್ವಾಳ ಉಪ ವಿಭಾಗದ ಡಿವೈಎಸ್ಪಿ ಡಾ. ರವೀಶ್ ಸಿ.ಆರ್., ವೃತ್ತ ನಿರೀಕ್ಷಕ ಬಿ.ಕೆ.ಮಂಜಯ್ಯ, ನಗರ ಠಾಣೆ ಎಸ್ಸೈ ನಂದಕುಮಾರ್, ಗ್ರಾಮಾಂತರ ಠಾಣೆ ಎಸ್ಸೈ ಎ.ಕೆ.ರಕ್ಷಿತ್ ಗೌಡ, ವಿಟ್ಲ ಠಾಣೆ ಎಸ್ಸೈ ನಾಗರಾಜ್ ನೇತೃತ್ವದಲ್ಲಿ ಮಂಗಳವಾರ ಭಾರೀ ಕಾರ್ಯಾಚರಣೆ ನಡೆಸಿದ ಪೊಲೀಸರು ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಈ ಎಲ್ಲ ಪ್ರಕರಣಗಳ ಇನ್ನೂ ಕೆಲವು ಆರೋಪಿಗಳು ತಲೆ ಮರೆಸಿಕೊಂಡಿದ್ದು ಅವರ ಬಂಧನಕ್ಕೆ ಪೊಲೀಸರು ಕಾರ್ಯಾಚರಣೆ ನಡೆಸುತ್ತಿದ್ದಾರೆ ಎಂದು ತಿಳಿದು ಬಂದಿದೆ.

ಗೂಂಡಾ ಕಾಯ್ದೆಗೆ ಆಗ್ರಹ

ಮಂಗಳವಾರ ಬಂಟ್ವಾಳ ಪೊಲೀಸರಿಂದ ಬಂಧಿತರಾದ ಆರೋಪಿಗಳು ಕೊಲೆ, ಕೊಲೆ ಯತ್ನದಂತಹ ಗಂಭೀರ ಅಪರಾಧ ಕೃತ್ಯಗಳನ್ನು ಪದೇ ಪದೇ ಎಸಗುತ್ತಿದ್ದರು. ಕಲ್ಲಡ್ಕದಲ್ಲಿ ದ.ಕ. ಜಿಲ್ಲಾ ಉಸ್ತುವಾರಿ ಸಚಿವ ಬಿ.ರಮಾನಾಥ ರೈಯವರಿದ್ದ ವೇದಿಕೆಗೆ ಕಲ್ಲು ತೂರಾಟ ನಡೆಸಿ ದೊಂಬಿ ನಡೆಸಿದ್ದ ಆರೋಪಿಗಳೂ ಆಗಿದ್ದಾರೆ.

ಅಮಾಯಕರಾದ ನಾವೂರು ಹರೀಶ್ ಪೂಜಾರಿ, ಸಜಿಪ ಮುಹಮ್ಮದ್ ನಾಸಿರ್ ಕೊಲೆ ಸಹಿತ ವಿವಿಧ ಕೊಲೆ, ಕೊಲೆ ಯತ್ನದಂತಹ ಗಂಭೀರ ಅಪರಾಧಗಳಲ್ಲಿ ಭಾಗಿಯಾದ ಈ ಎಲ್ಲ ಆರೋಪಿಗಳ ವಿರುದ್ಧ ರಾಜ್ಯ ಸರಕಾರ ಗೂಂಡಾ ಕಾಯ್ದೆ ಹಾಕಿ ಜಿಲ್ಲೆಯಿಂದ ಗಡಿಪಾರು ಮಾಡಬೇಕೆಂಬ ಆಗ್ರಹ ಈ ಹಿಂದಿನಿಂದಲೂ ಸಾರ್ವಜನಿಕರಿಂದ ಕೇಳಿ ಬರುತ್ತಿದ್ದೆ. ಇನ್ನಾದರೂ ಸರಕಾರ ಗೂಡಾ ಕಾಯ್ದೆ ಪ್ರಯೋಗಿಸಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ.