ಕ್ಯಾಪ್ಟನ್ ಕೊಹ್ಲಿ ‘ಡಬಲ್’ ಡಾನ್
ಹೈದರಾಬಾದ್ ಟೆಸ್ಟ್ನಲ್ಲಿ ದ್ವಿಶತಕ * ಬ್ರಾಡ್ಮನ್, ದ್ರಾವಿಡ್ ದಾಖಲೆ ಪತನ
ಹೈದರಾಬಾದ್, ಫೆ.10: ವಿಶ್ವ ಕ್ರಿಕೆಟ್ನಲ್ಲಿ ದಾಖಲೆ ಬರೆಯುತ್ತಿರುವ ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ಹೈದರಾಬಾದ್ನಲ್ಲಿ ನಡೆಯುತ್ತಿರುವ ಬಾಂಗ್ಲಾ ವಿರುದ್ಧದ ಏಕೈಕ ಟೆಸ್ಟ್ನಲ್ಲಿ ಇಂದು ದ್ವಿಶತಕ ದಾಖಲಿಸಿದ್ದಾರೆ.
ರಾಜೀವ್ ಗಾಂಧಿ ಇಂಟರ್ನ್ಯಾಶನಲ್ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಟೆಸ್ಟ್ನ ಎರಡನೆ ದಿನವಾಗಿರುವ ಶುಕ್ರವಾರ ಕೊಹ್ಲಿ ಸತತ ನಾಲ್ಕು ಟೆಸ್ಟ್ ಸರಣಿಗಳಲ್ಲಿ ದ್ವಿಶತಕದ ಸಾಧನೆಯೊಂದಿಗೆ ಕ್ರಿಕೆಟ್ ದಂತಕತೆ ಆಸ್ಟ್ರೇಲಿಯದ ಡಾನ್ ಬ್ರಾಡ್ಮನ್ ಮತ್ತು ಭಾರತದ ಮಹಾನ್ ಗೋಡೆ ಖ್ಯಾತಿಯ ರಾಹುಲ್ ದ್ರಾವಿಡ್ ದಾಖಲೆಯನ್ನು ಹಿಂದಿಕ್ಕಿದರು.
ಕೊಹ್ಲಿ ದ್ವಿಶತಕ, ವೃದ್ಧಿಮಾನ್ ಸಹಾ ಶತಕ, ಅಜಿಂಕ್ಯ ರಹಾನೆ ಮತ್ತು ರವೀಂದ್ರ ಜಡೇಜ ಅರ್ಧಶತಕಗಳ ನೆರವಿನಲ್ಲಿ ಭಾರತ ತಂಡ ಮೊದಲ ಇನಿಂಗ್ಸ್ನಲ್ಲಿ 166 ಓವರ್ಗಳಲ್ಲಿ 6 ವಿಕೆಟ್ ನಷ್ಟದಲ್ಲಿ 687 ರನ್ ಗಳಿಸಿ ಡಿಕ್ಲೇರ್ ಮಾಡಿಕೊಂಡಿದೆ.
ಬಾಂಗ್ಲಾ ತಂಡ ಮೊದಲ ಇನಿಂಗ್ಸ್ ಆರಂಭಿಸಿ ದಿನದಾಟದಂತ್ಯಕ್ಕೆ 14 ಓವರ್ಗಳಲ್ಲಿ 1 ವಿಕೆಟ್ ನಷ್ಟದಲ್ಲಿ 41 ರನ್ ಗಳಿಸಿದೆ. ಆರಂಭಿಕ ದಾಂಡಿಗ ತಮೀಮ್ ಇಕ್ಬಾಲ್ 24 ರನ್ ಮತ್ತು ಮೊಮಿನುಲ್ ಹಕ್ 1 ರನ್ ಗಳಿಸಿ ಔಟಾಗದೆ ಕ್ರೀಸ್ನಲ್ಲಿದ್ದಾರೆ.
ಸೌಮ್ಯ ಸರ್ಕಾರ್ 15 ರನ್ ಗಳಿಸಿ ಔಟಾಗಿದ್ದಾರೆ.
ಇನ್ನೊಂದು ಸರಣಿ, ಇನ್ನೊಂದು ದ್ವಿಶತಕ: ವಿರಾಟ್ ಕೊಹ್ಲಿಗೆ ದ್ವಿಶತಕ ದಾಖಲಿಸುವುದು ನೀರು ಕುಡಿದಷ್ಟೇ ಸಲೀಸು. ಅವರು ಕಳೆದ ನಾಲ್ಕು ಸರಣಿಗಳಲ್ಲಿ ದಿಶತಕ ದಾಖಲಿಸಿದ್ದಾರೆ. ನಾಲ್ಕು ಸರಣಿಗಳಲ್ಲಿ ಸತತ ನಾಲ್ಕು ದ್ವಿಶತಕ ದಾಖಲಿಸಿದ ವಿಶ್ವದ ಮೊದಲ ದಾಂಡಿಗ ಎಂಬ ದಾಖಲೆ ಬರೆದಿರುವ ವಿರಾಟ್ ಕೊಹ್ಲಿ ಅವರು ಮೊದಲ ದಿನದಾಟದಂತ್ಯಕ್ಕೆ ಔಟಾಗದೆ 111 ರನ್ ಗಳಿಸಿದ್ದರು. ಔಟಾಗದೆ 45 ರನ್ ಗಳಿಸಿದ್ದ ಅಜಿಂಕ್ಯ ರಹಾನೆ ಜೊತೆ ಬ್ಯಾಟಿಂಗ್ ಮುಂದುವರಿಸಿದ ಕೊಹ್ಲಿ ಬಾಂಗ್ಲಾದ ಆಟಗಾರರಿಗೆ ತನ್ನ ವಿರಾಟ್ ಬ್ಯಾಟಿಂಗ್ ಸ್ವರೂಪವನ್ನು ತೋರಿಸಿದರು.
ಊಟದ ವಿರಾಮದ ಬಳಿಕ ಕೊಹ್ಲಿ ದ್ವಿಶತಕ ಪೂರ್ಣಗೊಳಿಸಿದರು. ಅಷ್ಟು ಹೊತ್ತಿಗೆ ಅಜಿಂಕ್ಯ ರಹಾನೆ ಶತಕ ವಂಚಿತರಾಗಿ ಪೆವಿಲಿಯನ್ ಸೇರಿದ್ದರು. ರಹಾನೆ 113.3ನೆ ಓವರ್ನಲ್ಲಿ ತೈಜುಲ್ ಇಸ್ಲಾಂ ಎಸೆತದಲ್ಲಿ ಮೆಹೆದಿ ಹಸನ್ ಮಿರಾಝ್ಗೆ ಕ್ಯಾಚ್ ನೀಡುವುದರೊಂದಿಗೆ 33ನೆ ಟೆಸ್ಟ್ನಲ್ಲಿ 9ನೆ ಶತಕ ದಾಖಲಿಸುವ ಅವಕಾಶವನ್ನು ಕೈಚೆಲ್ಲಿದರು. 73 ಎಸೆತಗಳಲ್ಲಿ 8 ಬೌಂಡರಿಗಳ ಸಹಾಯದಿಂದ 10ನೆ ಅರ್ಧಶತಕ ಪೂರ್ಣಗೊಳಿಸಿದ್ದ ರಹಾನೆ ಅವರು ಪೂಜಾರ ಅವರಂತೆ ಶತಕದಂಚಿನಲ್ಲಿ ಎಡವಿದರು. ಪೂಜಾರ ಮೊದಲ ದಿನ 83 ರನ್ ಗಳಿಸಿ ಔಟಾಗಿದ್ದರು. ರಹಾನೆ 82 ರನ್(133ಎ, 11ಬೌ) ಗಳಿಸಿ ಔಟಾದರು.
ಔಟಾಗುವ ಮೊದಲು ರಹಾನೆ ಅವರು ಕೊಹ್ಲಿ ಅವರೊಂದಿಗೆ ನಾಲ್ಕನೆ ವಿಕೆಟ್ಗೆ 222 ರನ್ಗಳ ಜೊತೆಯಾಟ ನೀಡಿದರು.
ಕೊಹ್ಲಿ ದ್ವಿಶತಕದ ವೈಭವ: ವಿರಾಟ್ ಕೊಹ್ಲಿ ಅವರು 123.1ನೆ ಓವರ್ನಲ್ಲಿ ತೈಜುಲ್ ಇಸ್ಲಾಂ ಎಸೆತದಲ್ಲಿ ಚೆಂಡನ್ನು ಬೌಂಡರಿ ಗೆರೆ ದಾಟಿಸುವ ಮೂಲಕ ದ್ವಿಶತಕ ಪೂರ್ಣಗೊಳಿಸಿದರು.239 ಎಸೆತಗಳಲ್ಲಿ 24 ಬೌಂಡರಿಗಳ ಸಹಾಯದಿಂದ ಕೊಹ್ಲಿ ದ್ವಿಶತಕ ಪೂರ್ಣಗೊಳಿಸಿದರು.
ಕೊಹ್ಲಿ ದ್ವಿಶತಕ ಗಳಿಸಿದ ಬಳಿಕ ಕ್ರೀಸ್ನಲ್ಲಿ ಹೆಚ್ಚು ಹೊತ್ತು ನಿಲ್ಲಲಿಲ್ಲ. 125.1ನೆ ಓವರ್ನಲ್ಲಿ ಕೊಹ್ಲಿ ಅವರನ್ನು ತೈಜುಲ್ ಇಸ್ಲಾಂ ಎಲ್ಬಿಡಬ್ಲು ಬಲೆಗೆ ಬೀಳಿಸಿದರು.ಕೊಹ್ಲಿ 54ನೆ ಟೆಸ್ಟ್ನಲ್ಲಿ 204 ರನ್ (246ಎ, 24ಬೌ) ಗಳಿಸಿದರು.
ರವಿಚಂದ್ರನ್ ಅಶ್ವಿನ್ 34 ರನ್ ಗಳಿಸಿ ನಿರ್ಗಮಿಸಿದರು.
ಅಶ್ವಿನ್ ಮತ್ತು ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ವೃದ್ಧಿಮಾನ್ ಸಹಾ ಅವರು 6ನೆ ವಿಕೆಟ್ಗೆ 74 ರನ್ಗಳ ಜೊತೆಯಾಟ ನೀಡಿದರು.
ಸಹಾ ಶತಕ: ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ವೃದ್ದಿಮಾನ್ ಸಹಾ ಅವರು 21ನೆ ಟೆಸ್ಟ್ನಲ್ಲಿ 2ನೆ ಶತಕ ದಾಖಲಿಸಿದರು. 153 ಎಸೆತಗಳಲ್ಲಿ 7 ಬೌಂಡರಿ ಮತ್ತು 2 ಸಿಕ್ಸರ್ ನೆರವಿನಲ್ಲಿ ಸಹಾ ಶತಕ ಪೂರ್ಣಗೊಳಿಸಿದರು 7ನೆ ವಿಕೆಟ್ಗೆ ಸಹಾ ಮತ್ತು ಜಡೇಜ ಮುರಿಯದ ಜೊತೆಯಾಟದಲ್ಲಿ 118 ರನ್ ಸೇರಿಸಿದರು. ಭಾರತ 166 ಓವರ್ಗಳಲ್ಲಿ 6 ವಿಕೆಟ್ ನಷ್ಟದಲ್ಲಿ 687 ರನ್ ಗಳಿಸಿದ್ದಾಗ ನಾಯಕ ವಿರಾಟ್ ಕೊಹ್ಲಿ ಇನಿಂಗ್ಸ್ ಡಿಕ್ಲೇರ್ ಮಾಡುವ ನಿರ್ಧಾರ ಕೈಗೊಂಡರು.
ಸಹಾ 106 ರನ್ (155ಎ, 7ಬೌ, 2ಸಿ) ಮತ್ತು ರವೀಂದ್ರ ಜಡೇಜ ಔಟಾಗದೆ 60 ರನ್ (78ಎ, 4ಬೌ,2ಸಿ) ಗಳಿಸಿದರು.
ಬಾಂಗ್ಲಾ ತಂಡದ ತೈಜುಲ್ ಇಸ್ಲಾಂ 156ಕ್ಕೆ 3, ಮೆಹೆದಿ ಹಸನ್ ಮಿರಾಝ್ 165ಕ್ಕೆ 2 ಮತ್ತು ತಾಸ್ಕಿನ್ ಅಹ್ಮದ್ 127ಕ್ಕೆ 1 ವಿಕೆಟ್ ಪಡೆದರು.
ಸ್ಕೋರ್ ಪಟ್ಟಿ
ಭಾರತ ಮೊದಲ ಇನಿಂಗ್ಸ್ 166 ಓವರ್ಗಳಲ್ಲಿ 687/6 ಡಿಕ್ಲೇರ್
ಕೆ.ಎಲ್.ರಾಹುಲ್ ಬಿ ಅಹ್ಮದ್ 02
ಮುರಳಿ ವಿಜಯ್ ಬಿ ತೈಜುಲ್ ಇಸ್ಲಾಂ108
ಚೇತೇಶ್ವರ ಪೂಜಾರಸಿ ರಹೀಮ್ ಬಿ ಮಿರಾಝ್ 83
ವಿರಾಟ್ ಕೊಹ್ಲಿ ಎಲ್ಬಿಡಬ್ಲು ಬಿ ತೈಜುಲ್204
ಅಜಿಂಕ್ಯ ರಹಾನೆ ಸಿ ಮಹೆದಿ ಬಿ ಮಿರಾಝ್82
ವೃದ್ಧಿಮಾನ್ ಸಹಾ ಔಟಾಗದೆ106
ಆರ್.ಅಶ್ವಿನ್ ಸಿ ಸರ್ಕಾರ್ ಬಿ ಮಿರಾಝ್34
ಆರ್.ಜಡೇಜ ಔಟಾಗದೆ60
ಇತರೆ08
ವಿಕೆಟ್ ಪತನ: 1-2, 2-180, 3-234,4-456, 5-495, 6-569
ಬೌಲಿಂಗ್ ವಿವರ
ತಾಸ್ಕಿನ್ ಅಹ್ಮದ್ 25-2-127-1
ಕಮ್ರುಲ್ ಇಸ್ಲಾಂ 19-1-100-0
ಸೌಮ್ಯ ಸರ್ಕಾರ್01-0-004-0
ಮೆಹಾದಿ ಹಸನ್ ಮಿರಾಝ್42-0-165-2
ಶಾಕಿಬ್ ಅಲ್ ಹಸನ್24-4-104-0
ತೈಜುಲ್ ಇಸ್ಲಾಂ47-6-156-3
ಶಬ್ಬಿರ್ ರಹ್ಮಾನ್ 03-0-010-0
ಮಹ್ಮುದುಲ್ಲಾ05-0-016-0
ಬಾಂಗ್ಲಾದೇಶ ಮೊದಲ ಇನಿಂಗ್ಸ್ 14 ಓವರ್ಗಳಲ್ಲಿ 41/1
ತಮೀಮ್ ಇಕ್ಬಾಲ್ ಔಟಾಗದೆ24
ಸೌಮ್ಯ ಸರ್ಕಾರ್ ಸಿ ಸಹಾ ಬಿ ಯಾದವ್15
ಮೊಮಿನುಲ್ ಹಕ್ ಔಟಾಗದೆ01
ಇತರೆ01
ವಿಕೆಟ್ ಪತನ: 1-38
ಬೌಲಿಂಗ್ ವಿವರ
ಬಿ.ಕುಮಾರ್05-2-07-0
ಇಶಾಂತ್ ಶರ್ಮ05-0-30-0
ಆರ್.ಅಶ್ವಿನ್02-1-01-0
ಭಾರತ-ಬಾಂಗ್ಲಾದೇಶ ಏಕೈಕ ಟೆಸ್ಟ್ ಅಂಕಿ-ಅಂಶ
04: ಸತತ ನಾಲ್ಕು ಸರಣಿಗಳಲ್ಲಿ ವಿರಾಟ್ ಕೊಹ್ಲಿ ದ್ವಿಶತಕ ಸಿಡಿಸಿದ್ದಾರೆ. ಸತತ ನಾಲ್ಕು ದ್ವಿಶತಕ ಬಾರಿಸಿದ ಕೊಹ್ಲಿ ಸತತ ಮೂರು ಸರಣಿಯಲ್ಲಿ ದ್ವಿಶತಕ ಬಾರಿಸಿ ದಾಖಲೆ ನಿರ್ಮಿಸಿದ್ದ ಕ್ರಿಕೆಟ್ ದಂತಕತೆಗಳಾದ ಡಾನ್ ಬ್ರಾಡ್ಮನ್ ಹಾಗೂ ರಾಹುಲ್ ದ್ರಾವಿಡ್ ದಾಖಲೆಯನ್ನು ಮುರಿದಿದ್ದಾರೆ.
02: ನಾಯಕನಾಗಿ ಗರಿಷ್ಠ ದ್ವಿಶತಕ(4) ಬಾರಿಸಿದ ವಿಶ್ವದ ಎರಡನೆ ಆಟಗಾರ ಕೊಹ್ಲಿ. ವಿಂಡೀಸ್ ಬ್ಯಾಟಿಂಗ್ ಲೆಜಂಡ್ ಬ್ರಿಯಾನ್ ಲಾರಾ ನಾಯಕನಾಗಿ 5 ದ್ವಿಶತಕ ಬಾರಿಸಿ ಮೊದಲ ಸ್ಥಾನದಲ್ಲಿದ್ದಾರೆ. ಬ್ರಾಡ್ಮನ್, ಮೈಕಲ್ ಕ್ಲಾರ್ಕ್ ಹಾಗೂ ಗ್ರೇಮ್ ಸ್ಮಿತ್ ನಾಯಕನಾಗಿ ನಾಲ್ಕು ಬಾರಿ ದ್ವಿಶತಕ ಬಾರಿಸಿದ್ದಾರೆ.
03: ಕೊಹ್ಲಿ ಹೊರತುಪಡಿಸಿ ಭಾರತದ ನಾಲ್ವರು ಬ್ಯಾಟ್ಸ್ಮನ್ಗಳು ದ್ವಿಶತಕ ಬಾರಿಸಿದ್ದಾರೆ. ವೀರೇಂದ್ರ ಸೆಹ್ವಾಗ್ ಹಾಗೂ ಸಚಿನ್ ತೆಂಡುಲ್ಕರ್ ತಲಾ ಆರು ದ್ವಿಶತಕ ಬಾರಿಸಿದ್ದಾರೆ. ದ್ರಾವಿಡ್ ಐದು ಬಾರಿ ಹಾಗೂ ಸುನೀಲ್ ಗವಾಸ್ಕರ್ ನಾಲ್ಕು ಬಾರಿ ಈ ಸಾಧನೆ ಮಾಡಿದ್ದಾರೆ.
01: ಭಾರತ ಸತತ 3 ಇನಿಂಗ್ಸ್ಗಳಲ್ಲಿ 600ಕ್ಕೂ ಅಧಿಕ ರನ್ ಗಳಿಸಿದ ಮೊದಲ ತಂಡವಾಗಿದೆ. ಭಾರತ ತಂಡ ಇಂಗ್ಲೆಂಡ್ ವಿರುದ್ಧದ ಕಳೆದೆರಡು ಟೆಸ್ಟ್ ಪಂದ್ಯಗಳಲ್ಲಿ 631(ಮುಂಬೈ) ಹಾಗೂ 759 ರನ್(ಚೆನ್ನೈ)ಕಲೆ ಹಾಕಿದೆ.
03: ಕೊಹ್ಲಿ ಸಹಿತ ವಿಶ್ವದ ಮೂವರು ನಾಯಕರು ಬಾಂಗ್ಲಾದೇಶ ವಿರುದ್ಧ ದ್ವಿಶತಕ ಬಾರಿಸಿದ್ದಾರೆ. 2004ರಲ್ಲಿ ನ್ಯೂಝಿಲೆಂಡ್ನ ಸ್ಟೀಫನ್ ಫ್ಲೆಮಿಂಗ್ ಹಾಗೂ 2008ರಲ್ಲಿ ದಕ್ಷಿಣ ಆಫ್ರಿಕದ ಗ್ರೇಮ್ ಸ್ಮಿತ್ (232) ಚಿತ್ತಗಾಂಗ್ನಲ್ಲಿ ದ್ವಿಶತಕ ಬಾರಿಸಿದ್ದರು. ಕೊಹ್ಲಿ ಬಾಂಗ್ಲಾ ವಿರುದ್ಧ ದ್ವಿಶತಕ ಬಾರಿಸಿದ ಎರಡನೆ ಬ್ಯಾಟ್ಸ್ಮನ್. 2004ರಲ್ಲಿ ಸಚಿನ್ ತೆಂಡುಲ್ಕರ್ ಅಜೇಯ 248 ರನ್ ಗಳಿಸಿದ್ದರು.
1,168: ವಿರಾಟ್ ಕೊಹ್ಲಿ ಸ್ವದೇಶಿ ಋತುವಿನಲ್ಲಿ 15 ಇನಿಂಗ್ಸ್ಗಳಲ್ಲಿ ಗರಿಷ್ಠ ಸ್ಕೋರ್ ದಾಖಲಿಸಿ (1,168)ವೀರೇಂದ್ರ ಸೆಹ್ವಾಗ್ ದಾಖಲೆಯನ್ನು ಮುರಿದರು. ಸೆಹ್ವಾಗ್ 2004-05ರಲ್ಲಿ 17 ಇನಿಂಗ್ಸ್ಗಳಲ್ಲಿ 1105 ರನ್ ಗಳಿಸಿದ್ದಾರೆ.
03: ಸತತ ಮೂರು ಟೆಸ್ಟ್ಗಳಲ್ಲಿ ಭಾರತದ ಕನಿಷ್ಠ ಒಬ್ಬ ಆಟಗಾರ 200ಕ್ಕೂ ಅಧಿಕ ರನ್ ಗಳಿಸಿದ್ದಾನೆ. ಇಂಗ್ಲೆಂಡ್ನ ವಿರುದ್ಧ ಮುಂಬೈನಲ್ಲಿ ಕೊಹ್ಲಿ 235 ರನ್ ಗಳಿಸಿದರೆ, ಕನ್ನಡಿಗ ಕರುಣ್ ನಾಯರ್ ಚೆನ್ನೈನಲ್ಲಿ ಔಟಾಗದೆ 303 ರನ್ ಗಳಿಸಿದ್ದರು. ಚೆನ್ನೈ ಟೆಸ್ಟ್ನಲ್ಲಿ ಕೊಹ್ಲಿ 204 ರನ್ ಗಳಿಸಿದ್ದರು.
03: ಕೊಹ್ಲಿ ಹಾಗೂ ಅಜಿಂಕ್ಯ ರಹಾನೆ ಮೂರನೆ ಬಾರಿ ದ್ವಿಶತಕದ ಜೊತೆಯಾಟ ನಡೆಸಿದರು. 2003ರಲ್ಲಿ ಒಟ್ಟಿಗೆ ಆಡಲು ಆರಂಭಿಸಿದ ಈ ಜೋಡಿ ನಾಲ್ಕನೆ ವಿಕೆಟ್ಗೆ 200ಕ್ಕೂ ಅಧಿಕ ರನ್ ಸೇರಿಸಿತ್ತು. ಕೊಹ್ಲಿ-ರಹಾನೆ 4ನೆ ವಿಕೆಟ್ಗೆ ಗರಿಷ್ಠ ಜೊತೆಯಾಟ ನಡೆಸಿ ಸಚಿನ್ ತೆಂಡುಲ್ಕರ್ ಹಾಗೂ ಸೌರವ್ ಗಂಗುಲಿ ದಾಖಲೆಯನ್ನು ಸರಿಗಟ್ಟಿದರು.
06: ಬಾಂಗ್ಲಾ ವಿರುದ್ಧ ಟೆಸ್ಟ್ ಇನಿಂಗ್ಸ್ಗಳಲ್ಲಿ ಆರು ಆಟಗಾರರು 50 ಹಾಗೂ ಅದಕ್ಕಿಂತ ಹೆಚ್ಚು ರನ್ ಗಳಿಸಿದ್ದಾರೆ. 2009ರ ಬಳಿಕ ಭಾರತ ಮೊದಲ ಬಾರಿ ಈ ಸಾಧನೆ ಮಾಡಿದೆ.
