ಜೂನ್ 30ರೊಳಗೆ ಪಡಿತರ ಅಂಗಡಿಗಳನ್ನು ಆಧಾರ್ ಬೆಂಬಲಿತವಾಗಿಸಲು ಸರಕಾರ ಸಿದ್ಧ
ಹೊಸದಿಲ್ಲಿ, ಫೆ.10: ಸಾರ್ವಜನಿಕ ಹಂಚಿಕೆ ವ್ಯವಸ್ಥೆಯಡಿ ಇರುವ ದೇಶದ ಎಲ್ಲಾ ಪಡಿತರ ಅಂಗಡಿಗಳನ್ನು ಈ ವರ್ಷದ ಜೂನ್ 30ರ ಒಳಗೆ ಆಧಾರ್ ಬೆಂಬಲಿತವಾಗಿಸಲು ಸರಕಾರ ಸಿದ್ದ ಎಂದು ಮಾಹಿತಿ ಮತ್ತು ತಂತ್ರಜ್ಞಾನ ಇಲಾಖೆಯ ಸಚಿವ ರವಿಶಂಕರ್ ಪ್ರಸಾದ್ ತಿಳಿಸಿದ್ದಾರೆ.
ಜೂನ್ 30ರ ಒಳಗೆ ಎಲ್ಲಾ ಪಡಿತರ ಅಂಗಡಿಗಳಿಗೆ ಆಧಾರ್ ಬೆಂಬಲ ನೀಡುವ ನಿಟ್ಟಿನಲ್ಲಿ ಆಹಾರ ಮತ್ತು ಗ್ರಾಹಕ ವ್ಯವಹಾರ ಖಾತೆಯ ಸಚಿವಾಲಯದೊಂದಿಗೆ ಚರ್ಚೆ ನಡೆಸಲಾಗಿದೆ ಎಂದವರು ಸುದ್ದಿಗಾರರಿಗೆ ತಿಳಿಸಿದರು.
ಗುಜರಾತ್, ಆಂಧ್ರಪ್ರದೇಶ ಮತ್ತು ರಾಜಸ್ತಾನದ ಪಡಿತರ ಅಂಗಡಿಗಳಲ್ಲಿ ಈಗಾಗಲೇ ಈ ವ್ಯವಸ್ಥೆ ಅಳವಡಿಸಲಾಗಿದೆ. ಗುಜರಾತ್ನಲ್ಲಿ ಪಡಿತರ ಅಂಗಡಿಗಳಲ್ಲಿ ಹೆಬ್ಬೆಟ್ಟು ಒತ್ತುವ ಮೂಲಕ ಪಾವತಿ ವ್ಯವಸ್ಥೆ ಮಾಡಲಾಗಿದ್ದು ಇದನ್ನು ಆಧಾರ್ಗೆ ಜೋಡಿಸಲಾಗಿದೆ. ಜೂನ್ 30ರ ಒಳಗೆ ದೇಶದ ಎಲ್ಲಾ ನಾಗರಿಕರನ್ನೂ ಆಧಾರ್ ವ್ಯವಸ್ಥೆಯಡಿ ತರಲು ಸರಕಾರ ನಿರ್ಧರಿಸಿದೆ ಎಂದ ಅವರು, ಆದರೆ ಈ ಬಗ್ಗೆ ಜನರನ್ನು ಬಲವಂತ ಪಡಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದರು. ‘ಡಿಜಿಟಲ್ ವ್ಯಾಲೆಟ್’ ಬಗ್ಗೆ ಸರಕಾರ ಕರಡು ಪ್ರತಿಯೊಂದನ್ನು ಸಿದ್ದಪಡಿಸಿದ್ದು ಸಾರ್ವಜನಿಕರ ಅಭಿಪ್ರಾಯ ಪಡೆಯುವ ಉದ್ದೇಶದಿಂದ ಅದನ್ನು ಸಾರ್ವಜನಿಕ ಪ್ರದೇಶಗಳಲ್ಲಿ ಅಳವಡಿಸಲಾಗುತ್ತದೆ. ಗ್ರಾಹಕರ ಹಿತಾಸಕ್ತಿ ಮತ್ತು ಸೈಬರ್ ಭದ್ರತೆಯನ್ನು ಗಮನದಲ್ಲಿಟ್ಟುಕೊಂಡು ನಾವು ಕಾಯ್ದೆಯನ್ನು ರೂಪಿಸಲಿದ್ದೇವೆ ಎಂದು ಸಚಿವರು ತಿಳಿಸಿದ್ದಾರೆ.
