15ರಂದು ಏಕಕಾಲದಲ್ಲಿ 104 ಉಪಗ್ರಹ ಉಡಾವಣೆ

 ಹೊಸದಿಲ್ಲಿ, ಫೆ.12: ಫೆ.15ರಂದು ಏಕಕಾಲದಲ್ಲಿ 104 ಉಪಗ್ರಹಗಳನ್ನು ಉಡಾವಣೆ ಗೊಳಿಸುವ ಮೂಲಕ ವಿಶ್ವದಾಖಲೆಯನ್ನು ನಿರ್ಮಿಸಲು ಸಜ್ಜಾಗಿರುವ ಇಸ್ರೋದ ಶುಕ್ರಯಾನ ಮತ್ತು ಮಂಗಳಯಾನ-2ರ ಕನಸಿಗೆ ಕೇಂದ್ರ ಸರಕಾರವು ತನ್ನ 2017-18ನೆ ಸಾಲಿನ ಮುಂಗಡಪತ್ರದಲ್ಲಿ ಬೆಂಬಲ ವ್ಯಕ್ತಪಡಿಸಿದೆ.

 ಮಂಗಳಯಾನ-2ನ್ನು 2021-22ರಲ್ಲಿ ನಡೆಸಲು ಇಸ್ರೋ ರೂಪುರೇಷೆಯನ್ನು ಹಾಕಿಕೊಂಡಿದೆ. ಈಗಿನ ಯೋಜನೆಯಂತೆ ಅದು ಅಂಗಾರಕನ ಮೇಲ್ಮೈ ಮೇಲೆ ರೋಬೊಟ್‌ನ್ನು ಇಳಿಸುವ ಉದ್ದೇಶ ಹೊಂದಿದೆ. 2013ರಲ್ಲಿ ಕೈಗೊಳ್ಳಲಾಗಿದ್ದ ಮಂಗಳಯಾನ-1 ಸಂಪೂರ್ಣವಾಗಿ ಭಾರತೀಯ ಅಭಿಯಾನವಾಗಿದ್ದರೆ ಮಂಗಳಯಾನ-2ರಲ್ಲಿ ಇಸ್ರೋ ಜೊತೆ ಕೈ ಜೋಡಿಸಲು ಫ್ರೆಂಚ್ ಸ್ಪೇಸ್ ಏಜನ್ಸಿಯು ಉತ್ಸುಕತೆ ತೋರಿಸಿದೆ.
ಸೌರವ್ಯವಸ್ಥೆಯಲ್ಲಿ ಎರಡನೆ ಗ್ರಹವಾಗಿರುವ ಶುಕ್ರಗ್ರಹಕ್ಕೆ ಇಸ್ರೋ ಯಾನವು ಅದರ ಮಂಗಳಯಾನ-1ರಂತೆ ಶುಕ್ರಗ್ರಹದ ಕಕ್ಷೆಯಲ್ಲಿ ಉಪಗ್ರಹವನ್ನು ಸ್ಥಿತಗೊಳಿಸಿ ಅಧ್ಯಯನ ಕೈಗೊಳ್ಳಬಹುದು. ಈ ತಿಂಗಳು ಭಾರತಕ್ಕೆ ಭೇಟಿ ನೀಡಿದ್ದ ನಾಸಾದ ಜೆಟ್ ಪ್ರೊಪಲ್ಶನ್ ಲ್ಯಾಬೋರೇಟರಿಯ ನಿರ್ದೇಶಕ ಮೈಕೇಲ್ ಎಂ.ವಾಟ್ಕಿನ್ಸ್ ಅವರು, ಶುಕ್ರಗ್ರಹಕ್ಕೆ ಯಾನವು ಅತ್ಯಂತ ಮಹತ್ವದ್ದಾಗಿದ್ದು, ಭಾರತದ ಚೊಚ್ಚಲ ಶುಕ್ರಯಾನದಲ್ಲಿ ಪಾಲುದಾರನಾಗಲು ನಾಸಾ ಖಂಡಿತವಾಗಿಯೂ ಬಯಸಲಿದೆ ಎಂದು ಹೇಳಿದ್ದರು.
ಈ ಅಭಿಯಾನಕ್ಕಾಗಿ ಇಲೆಕ್ಟ್ರಿಕಲ್ ಪ್ರೊಪಲ್ಶನ್ ಬಳಕೆಯ ಕುರಿತಂತೆ ಜಂಟಿ ಅಧ್ಯಯನವನ್ನು ಪ್ರಯತ್ನಿಸಲು ನಾಸಾ ಮತ್ತು ಇಸ್ರೋ ಈಗಾಗಲೇ ಮಾತುಕತೆಗಳನ್ನು ಆರಂಭಿಸಿವೆ.
ವಿಶ್ವದಾಖಲೆಗೆ ಸಜ್ಜು: ಫೆ.15ರಂದು ಬೆಳಗ್ಗೆ ತನ್ನ ಹೆಮ್ಮೆಯ ಪಿಎಸ್‌ಎಲ್‌ವಿ ಬಾಹ್ಯಾಕಾಶ ನೌಕೆಯ ಮೂಲಕ ಒಂದಲ್ಲ, ಎರಡಲ್ಲ, ಮೂರಲ್ಲ.... ಬರೋಬ್ಬರಿ 104 ಉಪಗ್ರಹಗಳನ್ನು ಬಾಹ್ಯಾಕಾಶಕ್ಕೆ ಉಡಾಯಿಸಲು ಇಸ್ರೋ ಸಜ್ಜಾಗಿದೆ. ಎಲ್ಲವೂ ಎಣಿಸಿದಂತೆ ನಡೆದರೆ ಇಸ್ರೋ ಉಪಗ್ರಹ ಉಡಾವಣೆಯಲ್ಲಿ ಹೊಸದೊಂದು ವಿಶ್ವದಾಖಲೆಯನ್ನು ಬರೆಯಲಿದೆ. ಯಾವುದೇ ದೇಶವು ಒಂದೇ ಬಾಹ್ಯಾಕಾಶ ಯಾನದಲ್ಲಿ ಉಪಗ್ರಹಗಳ ಸೆಂಚುರಿ ಸಾಧಿಸಲು ಈವರೆಗೆ ಪ್ರಯತ್ನಿಸಿದ್ದಿಲ್ಲ. ಈವರೆಗಿನ ವಿಶ್ವದಾಖಲೆ ರಷ್ಯಾದ ಹೆಸರಿನಲ್ಲಿದೆ. 2014ರಲ್ಲಿ ಅದು ಸುಧಾರಿತ ಖಂಡಾಂತರ ಪ್ರಕ್ಷೇಪಕ ಕ್ಷಿಪಣಿಯ ಮೂಲಕ ಒಂದೇ ಹೊಡೆತಕ್ಕೆ 37 ಉಪಗ್ರಹಗಳನ್ನು ಬಾಹ್ಯಾಕಾಶಕ್ಕೆ ರವಾನಿಸಿತ್ತು.

ಫೆ.15ರಂದು ಪಿಎಸ್‌ಎಲ್‌ವಿ ತನ್ನ ಉದರದಲ್ಲಿ 104 ಉಪಗ್ರಹಗಳನ್ನು ಇರಿಸಿಕೊಂಡು ನಭಕ್ಕೆ ಚಿಮ್ಮಲಿದೆ. ಈ ಪೈಕಿ ಮೂರು ಭಾರತದ ಉಪಗ್ರಹಗಳಾಗಿದ್ದರೆ, 101 ಸಣ್ಣ ಗಾತ್ರದ ವಿದೇಶಿ ಉಪಗ್ರಹಗಳಾಗಿವೆ. ಭಾರತದ ಕಾರ್ಟೊಸ್ಯಾಟ್-2,500 ಕಿ.ಮೀ. ಎತ್ತರದಲ್ಲಿ ಕಕ್ಷೆಯನ್ನು ಸೇರುವ ಮೊದಲ ಉಪಗ್ರಹವಾಗಿದ್ದರೆ, ಇತರ ಎರಡು ಭಾರತೀಯ ಉಪಗ್ರಹಗಳು ತಲಾ 10 ಕೆ.ಜಿ.ಗೂ ಕಡಿಮೆ ತೂಗುತ್ತಿದ್ದು,ಇಸ್ರೋ ನ್ಯಾನೊ ಉಪಗ್ರಹಗಳ ವರ್ಗಕ್ಕೆ ನಾಂದಿ ಹಾಡಲಿವೆ. ಇಸ್ರೇಲ್, ಕಝಕಸ್ತಾನ್, ನೆದರ್‌ಲ್ಯಾಂಡ್ಸ್, ಸಿಟ್ಜರ್‌ಲ್ಯಾಂಡ್ ಮತ್ತು ಯುಎಇಗಳ ತಲಾ ಒಂದು ಉಪಗ್ರಹಗಳ ಜೊತೆಗೆ ಅಮೆರಿಕದ 96 ಉಪಗ್ರಹಗಳೂ ಬಾಹ್ಯಾಕಾಶವನ್ನು ಪ್ರವೇಶಿಸಲಿವೆ.