ಅರಣ್ಯ ಸಂರಕ್ಷಣೆಗೆ ತೊಡಕಾಗುತ್ತಿರುವ ಸಾಮಾಜಿಕ ಜಾಲತಾಣಗಳು!

ಮೂಡುಬಿದಿರೆ,ಫೆ.13 : ಅರಣ್ಯ ಸಂರಕ್ಷಣೆಗೆಂದು ಇರುವ ಅರಣ್ಯ ಇಲಾಖೆಯ ಅಧಿಕಾರಿಗಳು ಅಥವಾ ಸಿಬ್ಬಂದಿಗಳು ಗಸ್ತು ತಿರುಗಾಡಿದರೆ ಅವರ ಹಿಂದಿನಿಂದಲೇ ಅವರ ಚಲನವಲನಗಳನ್ನು ವರದಿ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಯಬಿಡುವ ಆಧುನಿಕ ಖದೀಮರ ತಂಡ ಇತ್ತೀಚಿಗೆ ಸಕ್ರಿಯವಾಗಿ ಕಾರ್ಯಚರಿಸುತ್ತಿರುವ ಬಗ್ಗೆ ಮಾಹಿತಿ ಲಭ್ಯವಾಗಿದೆ. ಅಕ್ರಮ ಮರ ಸಾಗಾಟಕ್ಕಾಗಿ ಹಾಗೂ ಟಿಂಬರ್ ಮಾಫಿಯಾದ ಧಣಿಗಳ ಹಿತ ಕಾಯುವುದಕ್ಕೆಂದೇ ಹುಟ್ಟಿಕೊಂಡಿರುವ ಇಂತಹ ವಾಟ್ಸಾಪ್ ಗುಂಪುಗಳ ಸಹಾಯದಿಂದಲೇ ಅಧಿಕಾರಿಗಳು ಎಲ್ಲೆಲ್ಲಿದ್ದಾರೆಂಬ ಮಾಹಿತಿ ಅಕ್ರಮ ಮರ ಸಾಗಾಟಗಾರರಿಗೆ ತಲುಪುವಂತಾಗುತ್ತಿದ್ದು, ಅಕ್ರಮಗಳಿಗೆ ಬ್ರೇಕ್ ಹಾಕುವುದಕ್ಕೆ ಅಧಿಕಾರಿಗಳು ಸಾಕಷ್ಟು ಶ್ರಮ ಪಡಬೇಕಾದ ಅನಿವಾರ್ಯತೆ ಎದುರಾಗಿದೆ.

ಅರಣ್ಯ ಇಲಾಖೆಯ ಕುಂದಾಪುರ ಉಪವಿಭಾಗದ ಮೂಡುಬಿದಿರೆ ವಲಯದಲ್ಲಿ ಬರೊಬ್ಬರಿ 10 ಸಾವಿರ ಎಕರೆ ಅರಣ್ಯ ಪ್ರದೇಶವಿದ್ದು ಈ ಹಿಂದೆಯೇ ಸುಮಾರು 8 ಸಾವಿರ ಎಕರೆ ಅರಣ್ಯ ಪ್ರದೇಶ ವನ್ಯಜೀವಿ ವಿಭಾಗಕ್ಕೆ ಹಸ್ತಾಂತರವಾಗಿದೆ. ಕಾರ್ಕಳ, ಮುಲ್ಕಿ, ಮೂಡುಬಿದಿರೆ ಹೋಬಳಿಗಳಿಂದ ಸುತ್ತಲೂ ಆವೃತ್ತವಾಗಿರುವ ಈ ವ್ಯಾಪ್ತಿಯಲ್ಲಿ ಅರಣ್ಯ ಸಂರಕ್ಷಕರಾಗಿ ಇರುವುದು 10 ಮಂದಿ ಮಾತ್ರ. ಅಷ್ಟಕ್ಕೂ ಈ ಅರಣ್ಯ ಪ್ರದೇಶಗಳು 79 ಗ್ರಾಮಗಳಲ್ಲಿ ಹರಡಿಕೊಂಡಿವೆ.

ಮೂಜಿಮಲೆ, ಹುರಾಬೆ, ಕೇರ, ಪಣಂಬೇರಿ ಒಟ್ಟು ಮೂರು ಮೀಸಲು ಅರಣ್ಯ ಪ್ರದೇಶಗಳು ಈ ವಲಯದಲ್ಲಿದ್ದು, ಎಲ್ಲಾ ಗ್ರಾಮಗಳಲ್ಲೂ ಸಾಕಷ್ಟು ಡಾಂಬಾರು ರಸ್ತೆಯ ವ್ಯವಸ್ಥೆ ಇದೆ. ಅಕ್ರಮ ಮರ ಸಾಗಾಟಕ್ಕೆ ಹೇಳಿ ಮಾಡಿಸಿದಂತಹ ವ್ಯವಸ್ಥೆಗಳಿವೆ. ಆದರೂ ಅರಣ್ಯ ಅಧಿಕಾರಿಗಳು ತಮ್ಮ ಜವಾಬ್ದಾರಿಯನ್ನು ಚೆನ್ನಾಗಿಯೇ ನಿಭಾಯಿಸುತ್ತಿದ್ದಾರೆ. ಆದರೆ 79 ಗ್ರಾಮಗಳಿಗೆ ಇರುವ 10 ಗಾರ್ಡ್‌ಗಳ ಸಂಖ್ಯೆಯನ್ನು ಗಮನಿಸಿದರೆ ಒಬ್ಬೊಬ್ಬರಿಗೂ ಸುಮಾರು 8 ಗ್ರಾಮಗಳ ಹೊಣೆ ಇದೆ. ಕಂದಾಯ ಇಲಾಖೆಯಲ್ಲಿ ಗ್ರಾಮಕ್ಕೊಬ್ಬರಂತೆ ಅಧಿಕಾರಿಗಳು ಆ ಇಲಾಖೆಯಿಂದ ಇರುತ್ತಾರೆ. ಹಗಲಿರುಳು ಸಂರಕ್ಷಣೆಯ ಹೊಣೆಹೊತ್ತುಕೊಳ್ಳಬೇಕಾದ ಅರಣ್ಯ ಇಲಾಖೆಯಲ್ಲಿ ಸಿಬ್ಬಂದಿಗಳ ಕೊರತೆ ಎದ್ದು ಕಾಣುತ್ತಿದೆ.

ಇಷ್ಟೊಂದು ದೊಡ್ಡ ವ್ಯಾಪ್ತಿಯಲ್ಲಿ ಮೀಸಲು ಅರಣ್ಯಗಳು ಸೇರಿದಂತೆ ಅರಣ್ಯ ಪ್ರದೇಶವಿರುವುದರಿಂದ ಅರಣ್ಯ ಚೆಕ್ ಪೋಸ್ಟ್‌ಗಳ ಅಗತ್ಯ ಇಲ್ಲಿ ಕಂಡುಬರುತ್ತದೆ. ಒಂದೊಮ್ಮೆ ಚೆಕ್‌ಪೋಸ್ಟ್‌ಗಳ ನಿರ್ಮಾಣವಾದಲ್ಲಿ ಅಲ್ಲಿ ನಿರಂತರ ಸಿಬ್ಬಂದಿಗಳ ಇರುವಿಕೆಯಿಂದ ಅಕ್ರಮ ಮರ ಸಾಗಾಟಗಳಿಗೆ ಸುಲಭವಾಗಿ ಬ್ರೇಕ್ ಹಾಕಬಹುದಾಗಿದೆ.

ಸರಕಾರವು ಅಕೇಶಿಯಾದ ಎರಡು ಪ್ರಭೇದಗಳು ಹಾಗೂ ಕೆಲವು ಹಣ್ಣುಗಳಿಗೆ ಸಂಬಂಧಿಸಿದ ಮರಗಳ ಕಡಿದು ಸಾಗಾಟ ಮಾಡುವುದಕ್ಕೆ ಅನುಮತಿಯ ವಿನಾಯಿತಿ ನೀಡಿದ ಮೇಲೆ ಅರಣ್ಯ ಇಲಾಖೆಯ ಕೋರಿಕೆಯ ಮೇರೆಗೆ ಮಾವಿನ ಮರಕ್ಕಿದ್ದ ವಿನಾಯಿತಿಯನ್ನು ವಾಪಾಸು ಪಡೆದುಕೊಂಡಿತ್ತು. ಮುಂದಿನ ದಿನಗಳಲ್ಲಿ ಕೇರಳ ರಾಜ್ಯದ ಮಾದರಿಯಲ್ಲಿ ಹಲಸು, ಹೆಬ್ಬಲಸು ಹಾಗೂ ಮಾವುಗಳಂತಹ ಬೆಲೆಬಾಳುವ ಮರಗಳ ಸಾಗಾಟಕ್ಕೆ ಅನುಮತಿ ಪಡೆಯುವುದರಿಂದ ವಿನಾಯಿತಿ ಸಿಗುವ ನಿರೀಕ್ಷೆಯಿದೆ.

ಮೂಡುಬಿದಿರೆ ವಲಯದಲ್ಲಿ 2015-16ನೇ ವರ್ಷದಲ್ಲಿ ಅಕ್ರಮ ಮರಸಾಗಾಟದ 79 ಪ್ರಕರಣಗಳು ದಾಖಲಾಗಿದ್ದು, 2016-17ರ ಸಾಲಿನಲ್ಲಿ ಇದುವರೆಗೆ 63 ಪ್ರಕರಣಗಳನ್ನು ಅರಣ್ಯ ಅಧಿಕಾರಿಗಳು ದಾಖಲಿಸಿಕೊಂಡಿದ್ದಾರೆ.

ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಅರಣ್ಯ ಸಂರಕ್ಷಣೆ ಬಗೆಗೆ ಹಾಗೂ ಅವುಗಳ ಅಕ್ರಮ ಬಳಕೆಗಿರುವ ಕಾನೂನು, ಕಾಯ್ದೆಗಳ ಬಗ್ಗೆ ವ್ಯಾಪಕ ಜಾಗೃತಿ ಇದ್ದು, ನಮ್ಮ ವ್ಯಾಪ್ತಿಯಲ್ಲಿ ಮೀಸಲು ಅರಣ್ಯಗಳು ಹಾಗೂ ಇತರ ಅರಣ್ಯಗಳಿಂದ ಅಕ್ರಮ ಮರ ಕಡಿಯುವ ಅಥವಾ ಸಾಗಾಟ ಮಾಡುವ ಪ್ರಕರಣಗಳು ನಡೆಯುವುದಿಲ್ಲ. ಅಧಿಕಾರಿಗಳು ಹಾಗೂ ಸಿಬ್ಬಂದಿಗಳು ಹಗಲು ರಾತ್ರಿಗಳಲ್ಲಿ ನಿರಂತರ ಅರಣ್ಯ ಸಂರಕ್ಷಣೆಯಲ್ಲಿ ತೊಡಗಿದ್ದಾರೆ.

-ದಿನೇಶ್ ಜಿ.ಡಿ., ವಲಯ ಅರಣ್ಯ ಸಂರಕ್ಷಣಾಧಿಕಾರಿ

ಮೂಡುಬಿದಿರೆ ವಲಯದಲ್ಲಿದ್ದ ಚೆಕ್‌ಪೋಸ್ಟ್‌ಗಳನ್ನು ಈ ಹಿಂದೆ ತೆರವುಗೊಳಿಸಿದ್ದು, ಈ ಬಗ್ಗೆ ಅರಣ್ಯ ಇಲಾಖೆಯಲ್ಲಿ ವಿಚಾರಿಸಿದಾಗ ಚೆಕ್‌ಪೋಸ್ಟ್ ಬೇಕೇನಿಸುವಷ್ಟು ಅಕ್ರಮಗಳು ಅಥವಾ ಕೇಸು ದಾಖಲಾತಿ ಆಗುತ್ತಿಲ್ಲ ಎಂಬ ಕಾರಣ ನೀಡಿ ತೆರವುಗೊಳಿಸಲಾಗಿದೆ ಎಂಬ ಮಾಹಿತಿ ಬಂದಿದೆ. ಸುಮಾರು 3ರಿಂದ ನಾಲ್ಕು ಕಡೆಗಳಲ್ಲಿ ಮತ್ತೆ ಚೆಕ್‌ಪೋಸ್ಟ್‌ಗಳನ್ನು ಸ್ಥಾಪಿಸಿ 24 ಗಂಟೆಗಳ ಕಾಲ ನಿರಂತರ ಸಿಬ್ಬಂದಿಗಳಿಂದ ತಪಾಸಣೆ ನಡೆಸುವುದು ಅನಿವಾರ್ಯವಾಗಿದೆ. ವ್ಯಾಪಕವಾಗಿ ಈ ಪ್ರದೇಶಗಳಿಂದ ಮರಗಳ್ಳತನ ನಡೆಯುತ್ತಿದ್ದು, ಅರಣ್ಯ ಇಲಾಖೆಯ ಕೆಲ ಸಿಬ್ಬಂದಿಗಳೇ ಇದರಲ್ಲಿ ಭಾಗಿಯಾಗುತ್ತಿದ್ದಾರೆ.

-ಸುದತ್ತ ಜೈನ್, ಹೋರಾಟಗಾರ, ಕಾರ್ಮಿಕ ಮುಖಂಡ

(ಉಪವಾಸ ಸತ್ಯಾಗ್ರಹ ನಡೆಸಿ ಚೆಕ್‌ಪೋಸ್ಟ್ ಆಗಬೇಕೆಂದು ಜಿಲ್ಲಾಧಿಕಾರಿಗಳಿಗೆ ಮನವಿ ಸಲ್ಲಿಸಿದವರು.)