ಆಸೀಸ್ ವಿರುದ್ಧ ಲಂಕೆಗೆ ರೋಚಕ ಜಯ

ವಿಕ್ಟೋರಿಯಾ, ಫೆ.19: ಇಲ್ಲಿ ನಡೆದ ಎರಡನೆ ಟ್ವೆಂಟಿ-20 ಪಂದ್ಯದಲ್ಲಿ ಆಸ್ಟ್ರೇಲಿಯ ವಿರುದ್ಧ ಶ್ರೀಲಂಕಾ 2 ವಿಕೆಟ್‌ಗಳ ಜಯ ಗಳಿಸಿದ್ದು, 3 ಪಂದ್ಯಗಳ ಸರಣಿಯಲ್ಲಿ 2-0 ಗೆಲುವಿನೊಂದಿಗೆ ಸರಣಿ ವಶಪಡಿಸಿಕೊಂಡಿದೆ.
ಸೌತ್ ಗೀಲಾಂಗ್‌ನ ಸೈಮಂಡ್ಸ್ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಗೆಲುವಿಗೆ 174 ರನ್‌ಗಳ ಸವಾಲನ್ನು ಪಡೆದ ಶ್ರೀಲಂಕಾ ನಿಗದಿತ 20 ಓವರ್‌ಗಳಲ್ಲಿ 8 ವಿಕೆಟ್ ನಷ್ಟದಲ್ಲಿ 176 ರನ್ ಗಳಿಸಿತು.
ಕೊನೆಯ ಎರಡು ಓವರ್‌ಗಳಲ್ಲಿ ಲಂಕೆ ಗೆಲುವಿಗೆ 36 ರನ್ ಗಳಿಸಬೇಕಿತ್ತು. 19ನೆ ಓವರ್‌ನಲ್ಲಿ ಅಸೆಲಾ ಗುಣರತ್ನೆ ಹೆನ್ರಿಕ್ ಅವರ 6 ಎಸೆತಗಳಲ್ಲಿ 3 ಸಿಕ್ಸರ್ ಮತ್ತು 1 ಬೌಂಡರಿ ಇರುವ 22 ರನ್ ಕಬಳಿಸಿದರು.
     ಅಂತಿಮ ಓವರ್‌ನಲ್ಲಿ 14 ರನ್ ಗಳಿಸಬೇಕಿದ್ದ ಲಂಕಾ 20ನೆ ಓವರ್‌ನ ಮೊದಲ ಎಸೆತದಲ್ಲಿ ಕುಲಸೇಕರ(12) ವಿಕೆಟ್ ಕಳೆದುಕೊಂಡಿತು. ಆ್ಯಂಡ್ರೊ ಟೇ ಅವರು ಕುಲಸೇಕರ್‌ಗೆ ಪೆವಿಲಿಯನ್ ಹಾದಿ ತೋರಿಸಿ ಲಂಕಾವನ್ನು ಸಂಕಷ್ಟಕ್ಕೆ ಸಿಲುಕಿಸಿದರು. ಬಳಿಕ ಲಸಿತ್ ಮಾಲಿಂಗ ಕ್ರೀಸ್‌ಗೆ ಆಗಮಿಸಿ ಗುಣರತ್ನೆಗೆ ಬೆಂಬಲ ನೀಡಿದರು. ಗುಣರತ್ನೆ 2ನೆ ಎಸೆತದಲ್ಲಿ ಬೌಂಡರಿ, ಮೂರನೆ ಎಸೆತದಲ್ಲಿ ಸಿಕ್ಸರ್, ನಾಲ್ಕನೆ ಎಸೆತದಲ್ಲಿ 1ರನ್ ಗಳಿಸಿದರು. 5ನೆ ಎಸೆತದಲ್ಲಿ ಮಾಲಿಂಗ 1 ರನ್ ಗಳಿಸಿ ಗೆಲುವಿನ ರನ್ ಪೂರ್ಣಗೊಳಿಸುವ ಅವಕಾಶವನ್ನು ಗುಣರತ್ನೆಗೆ ಬಿಟ್ಟುಕೊಟ್ಟರು. ಕೊನೆಯ ಎಸೆತದಲ್ಲಿ ಗೆಲುವಿಗೆ 2 ರನ್ ಬೇಕಿತ್ತು. ಗುಣರತ್ನೆ ಬೌಂಡರಿ ಬಾರಿಸುವ ಮೂಲಕ ಲಂಕೆಗೆ ಸತತ ಎರಡನೆ ಗೆಲುವು ತಂದು ಕೊಟ್ಟರು. ಇದರೊಂದಿಗೆ ಲಂಕೆ ಸರಣಿಯಲ್ಲಿ ಇನ್ನೂ ಒಂದು ಪಂದ್ಯ ಆಡಲು ಬಾಕಿ ಇರುವಾಗಲೇ ಸರಣಿಯನ್ನು 2-0 ಅಂತರದಲ್ಲಿ ವಶಪಡಿಸಿಕೊಂಡಿದೆ.
82 ನಿಮಿಷಗಳ ಬ್ಯಾಟಿಂಗ್‌ನಲ್ಲಿ 46 ಎಸೆತಗಳಲ್ಲಿ 6 ಬೌಂಡರಿ ಮತ್ತು 5 ಸಿಕ್ಸರ್ ಒಳಗೊಂಡ 84 ರನ್ ಗಳಿಸಿದ ಗುಣರತ್ನೆ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.
ಕೆಪುಗೆಡೆರ (32), ಡಿಕ್‌ವೆಲ್ಲಾ(14), ಮುನಾವೀರಾ (10) , ಕುಲಸೇಕರ(12) ಎರಡಂಕೆಯ ಸ್ಕೋರ್ ದಾಖಲಿಸಿದರು.
ಇದಕ್ಕೂ ಮೊದಲು ಆಸ್ಟ್ರೇಲಿಯ 20 ಓವರ್‌ಗಳಲ್ಲಿ 173 ರನ್‌ಗಳಿಗೆ ಆಲೌಟಾಗಿತ್ತು.
 ಕಿಂಗೆರ್(43), ಆ್ಯರನ್ ಫಿಂಚ್(12), ಡಂಕ್ (32) ಮತ್ತು ಹೆನ್ರಿಕ್ (ಔಟಾಗದೆ 56) ಎರಡಂಕೆಯ ಸ್ಕೋರ್ ದಾಖಲಿಸಿದರು. ಲಂಕೆಯ ಕುಲಸೇಕರ 31ಕ್ಕೆ 4, ಮಾಲಿಂಗ ಮತ್ತು ಬಂಡಾರ ತಲಾ 2 ವಿಕೆಟ್, ಗುಣರತ್ನೆ ಮತ್ತು ಪ್ರಸನ್ನ ತಲಾ 1 ವಿಕೆಟ್ ಪಡೆದರು.