ಉಜಿರೆ: ಅಟೋ ರಿಕ್ಷಾ ಮತ್ತು ಖಾಸಗಿ ಮಿನಿ ಬಸ್ ಢಿಕ್ಕಿ; ಮಹಿಳೆ ಸಾವು

ಬೆಳ್ತಂಗಡಿ, ಫೆ.28: ಉಜಿರೆಯಲ್ಲಿ ಅಟೋರಿಕ್ಷಾ ಮತ್ತು ಖಾಸಗಿ ಮಿನಿ ಬಸ್ ನಡುವೆ ಸಂಭವಿಸಿದ ಅಪಘಾತದಲ್ಲಿ ಮಹಿಳೆಯೋರ್ವಳು ಮೃತಪಟ್ಟ ಘಟನೆ ಮಂಗಳವಾರ ಸಂಭವಿಸಿದೆ.

ಮೃತ ಮಹಿಳೆ ಉಜಿರೆ ಗ್ರಾಮದ ಮಾಚಾರು ಕೇಶವ ನಾಯ್ಕ ಎಂಬವರ ಪತ್ನಿ ಅಶ್ವಿನಿ(22) ಎಂಬರಾಗಿದ್ದಾರೆ. ಈಕೆ ಲಾಯಿಲದ ಸೈಟ್ ಮೇರೀಸ್ ಆಂಗ್ಲಮಾಧ್ಯಮ ಶಾಲೆಯಲ್ಲಿ ಶಿಕ್ಷಕಿಯಾಗಿ ಕಾರ್ಯನಿರ್ವಹಿಸುತ್ತಿದ್ದು ಶಾಲೆ ಬಿಟ್ಟು ಮನೆಗೆ ಹೋಗಲು ರಿಕ್ಷಾದಲ್ಲಿ ತೆರಳುತ್ತಿದ್ದವೇಳೆ ಅಪಘಾತ ಸಂಭವಿಸಿದೆ.

ಜಿರೆಯ ಪೆಟ್ರೋಲ್ ಪಂಪ್ ಬಳಿ ಎದುರಿನಿಂದ ವೇಗವಾಗಿ ಬಂದ ಮಿನಿ ಬಸ್ ಆಟೋರಿಕ್ಷಾಗೆ ಡಿಕ್ಕಿಹೊಡೆದಿದೆ.

ಹೊಡೆತದ ತೀವ್ರತೆಗೆ ರಿಕ್ಷಾ ಮಗುಚಿ ಬಿದ್ದಿದ್ದು ರಿಕ್ಷಾದಲ್ಲಿದ್ದವರು ಗಂಭೀರವಾಗಿ ಗಾಯಗೊಂಡಿದ್ದಾರೆ. ಕೂಡಲೇ ಗಾಯಾಳುಗಳನ್ನು ಸಮೀಪದ ಬೆನಕ ಆಸ್ಪತ್ರೆಗೆ ಕೊಂಡೊಯ್ದಿದ್ದಾರೆ ಆದರೆ ಆ ವೇಳೆಗೆ ಅಶ್ವಿನಿ ಮೃತಪಟ್ಟಿದ್ದರು.

 ರಿಕ್ಷಾ ಚಾಲಕ ಅಬೂಬಕ್ಕರ್(64) ಸುಮಯ್ಯ (23) ಹಾಗೂ ಒಂದುವರ್ಷ ಪ್ರಾಯದ ಮಗು ಶಹಾನಾ ಗಾಯಗೊಂಡು ಉಜಿರೆಯ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.