ಆರ್ಟಿಇ ಅರ್ಜಿ ಸಲ್ಲಿಕೆಗೆ ಉಚಿತ ಆನ್ಲೈನ್ ಕೇಂದ್ರಗಳ ಆರಂಭ : ಇಂದಿನಿಂದ ಅರ್ಜಿ ಸಲ್ಲಿಕೆಗೆ ಚಾಲನೆ
ಬೆಂಗಳೂರು, ಫೆ.28: ಕಡ್ಡಾಯ ಶಿಕ್ಷಣ ಕಾಯ್ದೆಯಡಿ ಬಡ ಮಕ್ಕಳಿಗೆ ಖಾಸಗಿ ಶಾಲೆಗಳಲ್ಲಿ ಉಚಿತ ಪ್ರವೇಶ ಪಡೆಯಲು ಅನುಕೂಲವಾಗುವಂತೆ ಆರ್ಟಿಇ ವಿದ್ಯಾರ್ಥಿಗಳು ಮತ್ತು ಪೋಷಕರ ಸಂಘದಿಂದ ಬೆಂಗಳೂರು ನಗರ, ಮಂಗಳೂರು ಹಾಗೂ ಮೈಸೂರು ನಗರದಲ್ಲಿ ಉಚಿತ ಆನ್ಲೈನ್ ಕೇಂದ್ರಗಳನ್ನು ಆರಂಭಿಸಿದೆ.
ನಗರದ ಪ್ರೆಸ್ಕ್ಲಬ್ನಲ್ಲಿ ಆಯೋಜಿಸಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸಂಘದ ಪ್ರಧಾನ ಕಾರ್ಯದರ್ಶಿ ಬಿ.ಎನ್.ಯೋಗಾನಂದ, ಉಚಿತ ಮತ್ತು ಕಡ್ಡಾಯ ಶಿಕ್ಷಣ ಕಾಯ್ದೆಯಡಿ 2016-17ನೆ ಸಾಲಿಗೆ ಅಲ್ಪಸಂಖ್ಯಾತರ ಶಾಲೆಗಳನ್ನು ಹೊರತುಪಡಿಸಿ ಅನುದಾನ ರಹಿತ ಖಾಸಗಿ ಶಾಲೆಗಳಲ್ಲಿ ಶೇ. 25ರಷ್ಟು ಸೀಟುಗಳ ಭರ್ತಿಗೆ ಮಾ. 1 ರಿಂದ 31ರ ವರೆಗೆ ದಾಖಲಾತಿ ಪ್ರಕ್ರಿಯೆ ನಡೆಯುತ್ತಿದೆ. ಈ ಹಿನ್ನೆಲೆಯಲ್ಲಿ ಆನ್ಲೈನ್ ಮೂಲಕ ಅರ್ಜಿ ಸಲ್ಲಿಸಲು ಬಡ ಕುಟುಂಬದ ಪೋಷಕರಿಗೆ ಅನುಕೂಲ ಮಾಡಿಕೊಡುವ ಉದ್ದೇಶದಿಂದ ಉಚಿತ ಕೇಂದ್ರಗಳನ್ನು ಆರಂಭಿಸಲಾಗಿದೆ ಎಂದು ಹೇಳಿದರು.
ಉಚಿತ ಶಿಕ್ಷಣ ಹಕ್ಕಿನಡಿಯಲ್ಲಿ ಕೂಲಿ ಕಾರ್ಮಿಕ, ಅನಾಥ, ಬೀದಿಬದಿ ವ್ಯಾಪಾರಿಗಳ, ಆಟೋ ಡ್ರೈವರ್ಗಳು ಹಾಗೂ ಆರ್ಥಿಕವಾಗಿ, ಶೈಕ್ಷಣಿಕವಾಗಿ ಹಿಂದುಳಿದಿರುವ ಕುಟುಂಬಗಳ ಪೋಷಕರಿಗೆ ಅರ್ಜಿ ಸಲ್ಲಿಕೆ ಮಾಡುವುದು ಕಷ್ಟಕರವಾಗಿದೆ. ಇದನ್ನು ಗಮನದಲ್ಲಿಟ್ಟುಕೊಂಡು ಪೋಷಕರಿಗೆ ನೆರವಾಗುವುದು ಸಂಘದ ಮುಖ್ಯ ಉದ್ದೇಶವಾಗಿದೆ. ನಗರದಲ್ಲಿ ಸ್ಥಾಪಿಸುತ್ತಿರುವ ಎಲ್ಲ ಆನ್ಲೈನ್ ಕೇಂದ್ರಗಳು ಬೆಳಿಗ್ಗೆ 10 ರಿಂದ ಸಂಜೆ 4.30ರ ವರೆಗೆ ಕಾರ್ಯನಿರ್ವಹಿಸಲಿದೆ. ಅಲ್ಲದೆ, ಆನ್ಲೈನ್ ಅರ್ಜಿ ಸಲ್ಲಿಕೆಯಲ್ಲಿ ಅನುಮಾನ, ಗೊಂದಲಗಳಿದ್ದರೆ ಸಹಾಯವಾಣಿ
(ಸಂಖ್ಯೆ:70224 22495) ಸಂಖ್ಯೆಯನ್ನು ಸಂಪರ್ಕಿಸಬಹುದಾಗಿದೆ ಎಂದು ತಿಳಿಸಿದರು. ಅರ್ಜಿ ಸಲ್ಲಿಸುವ ಪೋಷಕರು ಆನ್ಲೈನ್ ಕೇಂದ್ರಕ್ಕೆ ಬರುವ ಮುನ್ನ ಮಗುವಿನ ಆಧಾರ್ ಕಾರ್ಡ್, ಪೋಷಕರ ಆಧಾರ್ ಕಾರ್ಡ್, ಪೋಷಕರ ಜಾತಿ ಮತ್ತು ಆದಾಯ ಪ್ರಮಾಣ ಪತ್ರ, ಮಗುವಿನ ಜನನ ಪ್ರಮಾಣ ಪತ್ರವನ್ನು ಕಡ್ಡಾಯವಾಗಿ ತರಬೇಕು. ಜೊತೆಗೆ, ಆಧಾರ್ ಕಾರ್ಡ್ನಲ್ಲಿ ನಮೂದಿಸಿರುವ ದೂರವಾಣಿ ಸಂಖ್ಯೆಯಲ್ಲಿ ಬಳಸುತ್ತಿರುವ ಮೊಬೈಲ್ ಕಡ್ಡಾಯವಾಗಿ ತರಬೇಕು ಎಂದರು. ಇದೇ ವೇಳೆ ಆರ್ಟಿಇ ಕಾಯ್ದೆ ಮತ್ತು ಶಿಕ್ಷಣ ಸಂಸ್ಥೆಗಳ ವ್ಯಾಪಾರೀಕರಣ ನೀತಿ ಕುರಿತು ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲು ಹಸಿರು ವೇದಿಕೆ ತಂಡದಿಂದ ‘ಫಸ್ಟ್ ರ್ಯಾಂಕ್’ ಎಂಬ ಬೀದಿ ನಾಟಕ ಪ್ರದರ್ಶ ಏರ್ಪಡಿಸಲಾಗಿದೆ ಎಂದು ಹೇಳಿದರು.
ಮಾ. 1 ರಂದು ಬೆಳಿಗ್ಗೆ ರಾಜಾಜಿನಗರದ ವಿಧಾನಸಭಾ ಕ್ಷೇತ್ರದ ಪ್ರಕಾಶ್ ನಗರ ಹೊಸ ಬಿಬಿಎಂಪಿ ವಾರ್ಡ್ನಲ್ಲಿ ಆರ್ಟಿಇ ಅರ್ಜಿ ಸಲ್ಲಿಕೆಗೆ ಮೇಯರ್ ಎಂ. ಪದ್ಮಾವತಿ ಚಾಲನೆ ನೀಡಲಿದ್ದಾರೆ.
ನಗರದ ಯಲಹಂಕ (9060906143), ಬ್ಯಾಟರಾಯನಪುರ (988600456), ಸರ್ವಜ್ಞನಗರ (95906 66827), ಮಹಾಲಕ್ಷ್ಮಿಬಡಾವಣೆ (70224 22496), ಪುಲಿಕೇಶಿನಗರ (81054888803), ಮಲ್ಲೇಶ್ವರಂ (80500 29593), ಹೆಬ್ಬಾಳ (988677701), ರಾಜರಾಜೇಶ್ವರಿ (97921 93821), ಕೆಆರ್ ಪುರಂ (99865 37786), ಸಿ.ವಿ.ರಾಮನ್ನಗರ (99162 16221), ಶಿವಾಜಿನಗರ (87921 39901), ಯಶವಂತಪುರ (8147422007), ಗಾಂಧಿನಗರ ಮತ್ತು ರಾಜಾಜಿನಗರ (8105959338), ಶಾಂತಿನಗರ (7411908594), ಬಿಟಿಎಂ ಬಡಾವಣೆ (8880044989).
ಮಹದೇವಪುರ (080- 41231188), ಬಸವನಗುಡಿ (9620210000), ವಿಜಯನಗರ (9060088675), ಚಾಮರಾಜಪೇಟೆ (9632548808), ಗೋಂದರಾಜನಗರ (9845038189), ಚಿಕ್ಕಪೇಟೆ (9916497142), ಪದ್ಮನಾಭನಗರ (9731488555), ಬೊಮ್ಮನಹಳ್ಳಿ (9591324231), ಬೆಂಗಳೂರು - ದಕ್ಷಿಣ (080-41693900), ಆನೇಕಲ್ (9845755602), ಜಯನಗರ (9164855786) ವಿಧಾನಸಭಾ ಕ್ಷೇತ್ರ ವ್ಯಾಪ್ತಿ ಸೇರಿದಂತೆ ಮೈಸೂರು, ಮಂಡ್ಯ, ದಕ್ಷಿಣ ಕನ್ನಡ ಜಿಲ್ಲೆಗಳಲ್ಲಿ ಆನ್ಲೈನ್ ಕೇಂದ್ರಗಳನ್ನು ಆರಂಭಿಸುತ್ತಿರುವುದಾಗಿ ಅವರು ತಿಳಿಸಿದರು.
