ದುಬೈ ಓಪನ್: ಬೋಪಣ್ಣ ಜೋಡಿ ಸೆಮಿಫೈನಲ್ಗೆ
ದುಬೈ,ಮಾ.2: ದುಬೈ ಡ್ಯೂಟಿ ಫ್ರೀ ಟೆನಿಸ್ ಚಾಂಪಿಯನ್ಶಿಪ್ನಲ್ಲಿ ಭಾರತದ ರೋಹನ್ ಬೋಪಣ್ಣ ಅವರು ಮಾರ್ಸಿನ್ ಮ್ಯಾಟ್ಕೋವ್ಸಿಕಿ ಅವರೊಂದಿಗೆ ಡಬಲ್ಸ್ ವಿಭಾಗದಲ್ಲಿ ಸೆಮಿ ಫೈನಲ್ಗೆ ತಲುಪಿದ್ದಾರೆ.
ಇಲ್ಲಿ ಬುಧವಾರ ನಡೆದ ಕ್ವಾರ್ಟರ್ ಫೈನಲ್ನಲ್ಲಿ ಶ್ರೇಯಾಂಕರಹಿತ ಇಂಡೋ-ಪೊಲೆಂಡ್ ಜೋಡಿ ರೊಮಾನಿಯದ ಫ್ಲಾರಿನ್ ಮೆರ್ಗಿಯ ಹಾಗೂ ಸರ್ಬಿಯದ ವಿಕ್ಟರ್ ಟ್ರೊಸ್ಕಿ ಅವರನ್ನು 6-3, 6-4 ಸೆಟ್ಗಳ ಅಂತರದಿಂದ ಮಣಿಸಿದರು.
ವರ್ಷಾರಂಭದಲ್ಲಿ ನಡೆದ ಚೆನ್ನೈ ಓಪನ್ನಲ್ಲಿ ಸಹ ಆಟಗಾರ ಜೀವನ್ರೊಂದಿಗೆ ಪ್ರಶಸ್ತಿ ಜಯಿಸಿರುವ ಬೋಪಣ್ಣ ಇದೀಗ ಎರಡನೆ ಬಾರಿ ಶ್ರೇಷ್ಠ ಪ್ರದರ್ಶನ ನೀಡಿದ್ದಾರೆ.
ಟೂರ್ನಿಯ ಮೊದಲ ಸುತ್ತಿನ ಪಂದ್ಯದಲ್ಲಿ ಬೋಪಣ್ಣ ಹಾಗೂ ಮಾಟ್ಕೊವ್ಸಿಕಿ ದ್ವಿತೀಯ ಶ್ರೇಯಾಂಕದ ಇಯಾನ್ ಡೊಡಿಗ್ ಹಾಗೂ ಮಾರ್ಸೆಲ್ ಗ್ರಾನೊಲ್ಲರ್ಸ್ರನ್ನು 5-7, 6-3, 11-9 ಸೆಟ್ಗಳ ಅಂತರದಿಂದ ಸೋಲಿಸಿದ್ದರು.
ಫೆಡರರ್ಗೆ ಶಾಕ್: ಆಸ್ಟ್ರೇಲಿಯನ್ ಓಪನ್ ಚಾಂಪಿಯನ್ ರೋಜರ್ ಫೆಡರರ್ ಪುರುಷರ ಸಿಂಗಲ್ಸ್ನ ಪ್ರಿ-ಕ್ವಾರ್ಟರ್ ಫೈನಲ್ನಲ್ಲಿ ರಶ್ಯದ ಕ್ವಾಲಿಫೈಯರ್ ಎವ್ಗಿನಿ ಡಾನ್ಸ್ಕಾಯ್ ವಿರುದ್ಧ ಮೂರು ಸೆಟ್ಗಳ ಅಂತರದಿಂದ ಆಘಾತಕಾರಿ ಸೋಲುಂಡಿದ್ದಾರೆ.
ಬುಧವಾರ ಇಲ್ಲಿ ನಡೆದ ಅಂತಿಮ-16ರ ಸುತ್ತಿನ ಪಂದ್ಯದಲ್ಲಿ ಜನವರಿಯಲ್ಲಿ ಮೆಲ್ಬೋರ್ನ್ನಲ್ಲಿ 18ನೆ ಗ್ರಾನ್ಸ್ಲಾಮ್ ಪ್ರಶಸ್ತಿ ವಿಜೇತ ಫೆಡರರ್ ಅವರು 3-6, 7-6(9/7), 7-6(7/5) ಸೆಟ್ಗಳ ಅಂತರದಿಂದ ರಶ್ಯ ಆಟಗಾರನಿಗೆ ಶರಣಾದರು. ರಶ್ಯ ಆಟಗಾರ ಮುಂದಿನ ಸುತ್ತಿನಲ್ಲಿ ಫ್ರಾನ್ಸ್ನ ಲುಕಾಸ್ ಪೌಲ್ಲಿ ಅವರನ್ನು ಎದುರಿಸಲಿದ್ದಾರೆ.
