ಸುಳ್ಯ ನಗರ ಪಂಚಾಯತ್ ಸಾಮಾನ್ಯ ಸಭೆ: ಅನುದಾನ ಹಂಚಿಕೆಯಲ್ಲಿ ತಾರತಮ್ಯ

ಸುಳ್ಯ, ಮಾ.2: ಎಸ್.ಎಫ್.ಸಿಯಲ್ಲಿ ಬಿಡುಗಡೆಯಾದ ಹಣವನ್ನು ಹಂಚಿಕೆ ಮಾಡುವಾಗ ತಾರತಮ್ಯ ಮಾಡದೇ ಪ್ರತಿವಾರ್ಡಿಗೆ ಸಮಾನವಾಗಿ ವಿತರಣೆ ಮಾಡಬೇಕು. 30 ಶೇ ಅನುದಾನವನ್ನು ಅಧ್ಯಕ್ಷರ ವಾರ್ಡಿನಲ್ಲಿ ಅಭಿವೃದ್ದಿ ಕಾಮಗಾರಿಗಳಿಗೆ ಮೀಸಲಿಡಬೇಕು ಎಂದು ಎಂದು ಸರ್ವಪಕ್ಷ ಸದಸ್ಯರು ಆಗ್ರಹಿಸಿದರು.

ಎಸ್‌ಎಫ್‌ಸಿ 2017-18 ನೇ ಸಾಲಿನ 14ನೇ ಹಣಕಾಸಿನಲ್ಲಿ ಒಂದು ಕೋಟಿ ಬಿಡುಗಡೆಯಾಗಿದೆ. ಅದರಲ್ಲಿ ಹಲವು ವಾರ್ಡ್‌ಗಳಿಗೆ ಹಂಚಿಕೆ ಮಾಡಲಾಗಿದೆ. ಉಳಿದ 60 ಲಕ್ಷ ಅನುದಾನವನ್ನು ಎಲ್ಲಾ ವಾರ್ಡ್‌ಗಳಿಗೆ ಹಂಚಿಕೆ ಮಾಡಬೇಕು.  ಪ್ರತಿ 18 ವಾರ್ಡಿಗೆ ಅನುದಾನ ಹಂಚಿಕೆ ಮಾಡಬೇಕು. ಅಧ್ಯಕ್ಷರ ವಾರ್ಡಿಗೆ 30% ಅನುದಾನ ಮೀಸಲಿಡಬೇಕು ಎಂದು ಎಂದು ಸದಸ್ಯರಾದ ಗೋಕುಲ್‌ದಾಸ್, ರಮಾನಂದ ರೈ, ಶಿವಕುಮಾರ್ ಕಂದಡ್ಕ, ಕೆ.ಎಸ್. ಉಮ್ಮರ್ ಅವರು ಆಗ್ರಹಿಸಿದರು.

ಇದಕ್ಕೆ ಪ್ರಕಾಶ್ ಹೆಗ್ಡೆ ಅವರು ವಿರೋಧ ವ್ಯಕ್ತಪಡಿಸಿದರು. ಅಧ್ಯಕ್ಷರ ವಾರ್ಡಿಗೂ ಸಮಾನವಾಗಿ ಸದಸ್ಯರ ಅನುದಾನವೇ ಇರಲಿ ಎಂದರು. ಇದಕ್ಕೆ ಉಳಿದ ಸದಸ್ಯರೆಲ್ಲರೂ ವಿರೋಧಿಸಿದರು. ಬಳಿಕ ಪ್ರತಿ ವಾರ್ಡಿಗೆ ತಲಾ 5 ಲಕ್ಷ ಅನುದಾನವನ್ನು ಹಂಚಿಕೆ ಮಾಡಲು ತೀಮಾಸಲಾಯಿತು.

ಒಳಚರಂಡಿಯ ಘನತ್ಯಾಜ್ಯ ವಸ್ತುಗಳನ್ನು ಹಳೆಗೇಟಿನಲ್ಲಿ ತಂದು ಹಾಕುತ್ತಿದ್ದಾರೆ. ಇಲ್ಲಿ 300 ಅಧಿಕ ಕುಟುಂಬಗಳು ವಾಸಿಸುತ್ತಿದ್ದಾರೆ ಎಂದು ಸದಸ್ಯ ಗೋಕುಲ್‌ದಾಸ್ ಹೇಳಿದರು. ಇದಕ್ಕೆ ಧ್ವನಿಗೂಡಿಸಿದ ಪ್ರಕಾಶ್ ಹೆಗ್ಡೆ ಘನತ್ಯಾಜ್ಯದ ನೀರನ್ನು ಮಾತ್ರ ಹಾಕಿ. ನೇರವಾಗಿ ತಂದು ಹಾಕುವುದು ಬೇಡ. ಘನತ್ಯಾಜ್ಯದ ನೀರಿನ ವಾಸನೆಯಿಂದ ನೂರಾರು ಕುಟುಂಬಗಳಿಗೆ ವಾಸಿಸಲು ಆಗುತ್ತಿಲ್ಲ ಘನತ್ಯಾಜ್ಯ ವಸ್ತುಗಳನ್ನು ಇಲ್ಲಿಗೆ ತಂದು ಹಾಕುವುದನ್ನು ನಿಲ್ಲಿಸದಿದ್ದರೆ ಪ್ರತಿಭಟನೆಯ ಎಚ್ಚರಿಕೆ ನೀಡಿದರು.

ಒಳಚರಂಡಿ ಸಂಪರ್ಕದ ತೆರಿಗೆಯನ್ನು ಸರಿಯಾಗಿ ಸಂಗ್ರಹಿಸಿ. ಬಳಿಕ ವ್ಯವಸ್ಥೆಯನ್ನು ಸರಿಪಡಿಸಿ ಎಂದು ಸದಸ್ಯ ರಮಾನಂದ ರೈ ಹೇಳಿದರು. ಯಾರು ಕೂಡ ಸರಿಯಾಗಿ ಸಹಕಾರ ಕೊಡದಿದ್ದರೆ ಸರಕಾರದ ಯೋಜನೆಯನ್ನು ಹೇಗೆ ಕಾರ್ಯರೂಪಕ್ಕೆ ತರುವುದು ಎಂದು ಇಂಜಿನಿಯರ್ ಪ್ರಶ್ನಿಸಿದರು.

ಸುಳ್ಯದ ಮುಖ್ಯರಸ್ತೆಯ ಚರಂಡಿಗೆ ಹಾಸಿರುವ ಸಿಮೆಂಟಿನ ಸ್ಲಾಬ್‌ಗಳು ತುಂಡಾಗಿ ಬಿದ್ದಿದೆ. ಇದರಲ್ಲಿ ಹಲವಾರು ಜನ ಬಿದ್ದು ಗಾಯ ಮಾಡಿಕೊಂಡು ಆಸ್ಪತ್ರೆ ಸೇರಿದ್ದಾರೆ. ಇದನ್ನು ಕೂಡಲೇ ಸರಿಪಡಿಸಬೇಕು ಎಂದು ಪ್ರಕಾಶ್ ಹೆಗ್ಡೆ ಆಗ್ರಹಿಸಿದ ಅವರು, ನಗರ ಪಂಚಾಯತ್‌ನ ವಾರ್ಡ್‌ಗಳನ್ನು ನಗದು ರಹಿತವಾಗಿ ಮಾಡಬೇಕು. ಸರಕಾರ ಯೋಜನೆಯನ್ನು ಜನರಿಗೆ ತಿಳಿಸುವ ಕಾರ್ಯ ಮಾಡಬೇಕು ಎಂದು ತಿಳಿಸಿದರು.

ಮುಖ್ಯ ರಸ್ತೆಯ ಗೋಡೆಗಳಲ್ಲಿ, ಸೇತುವೆ ಕಂಬಗಳಲ್ಲಿ ವಿವಿಧ ಕಾರ್ಯಕ್ರಮಗಳು, ರಾಜಕೀಯ ಪಕ್ಷಗಳ ಪೋಸ್ಟರ್‌ಗಳು, ಪ್ಲೇಕ್ಸ್‌ಗಳನ್ನು ಹಾಕಲಾಗುತ್ತಿದೆ. ಇದನ್ನು ಹಾಕುವವರ ವಿರುದ್ದ ಕಠಿಣ ಕ್ರಮ ಜರುಗಿಸಿ ತೆಗಿಸಬೇಕು ಎಂದು ಪ್ರಕಾಶ್ ಹೆಗ್ಡೆ ಆಗ್ರಹಿಸಿದರು. ಮಧ್ಯ ಪ್ರವೇಶಿಸಿದ ಕೆ.ಎಸ್.ಉಮ್ಮರ್ ನಗರದಲ್ಲಿ ಪ್ಲೆಕ್ಸ್, ಪೋಸ್ಟರ್‌ಗಳನ್ನು ಅಂಟಿಸಲು ನಗರ ಪಂಚಾಯತ್‌ನ ಅನುಮತಿ ಇಲ್ಲ. ನಗರ ಪಂಚಾಯತ್ ಒಂದು ಪಕ್ಷಕ್ಕೆ ಒಂದು ನ್ಯಾಯ, ಇನ್ನೊಂದು ಪಕ್ಷಕ್ಕೆ ಮತ್ತೊಂದು ನ್ಯಾಯ ಮಾಡುತ್ತಿದೆ. ಎಲ್ಲರಿಗೂ ಒಂದೇ ರೀತಿಯ ಕಾನೂನು ಜಾರಿಗೆ ಬರಲಿ ಇದಕ್ಕೆ ನಮ್ಮ ಸಹಕಾರ ಇದೆ ಎಂದು ತಿಳಿಸಿದರು.

ಕುರುಂಜಿಗುಡ್ಡೆ ಸೇರಿದಂತೆ ಹಲವು ವಾರ್ಡಿಗಳಲ್ಲಿ ಕಳೆದ ಹಲವು ದಿನಗಳಿಂದ ಕುಡಿಯುವ ನೀರಿನ ಸರಬರಾಜು ಆಗುತ್ತಿಲ್ಲ. 9 ವಾರ್ಡ್‌ಗಳಿಗೆ ವಾಟರ್‌ಮ್ಯಾನ್‌ಗಳು ಇಲ್ಲ. ಇದ್ದರೂ ಯಾರು ಕೂಡ ವಾರ್ಡಿಗೆ ಬೇಟಿ ನೀಡುವುದಿಲ್ಲ ಎಂದು ಗೋಪಾಲ ನಡುಬೈಲು ಮತ್ತು ಗಿರೀಶ್ ಕಲ್ಲುಗದ್ದೆ ಹೇಳಿದರು.

ನಗರದಲ್ಲಿ ಹಲವು ಕಡೆ ಕೊರೆದ ಬೋರ್‌ವೆಲ್‌ಗಳಲ್ಲಿ ನೀರು ಇದ್ದರೂ ಮೋಟಾರ್ ಅಳವಡಿಸದೇ ಪ್ರಯೋಜನ ಇಲ್ಲದ್ದಂತಾಗಿದೆ. ಕುಡಿಯುವ ನೀರಿನ ಅಭಾವ ಇರುವ ಸಂದರ್ಭ ಇದರ ಉಪಯೋಗ ಪಡಿಸಿಕೊಳ್ಳಬೇಕು ಎಂದು ಸದಸ್ಯ ನಜೀರ್ ಸಲಹೆ ನೀಡಿದರು.

ಖಾಸಾಗಿ ಶಿಕ್ಷಣ ಸಂಸ್ಥೆ ಮತ್ತು ಸಂಘಸಂಸ್ಥೆಗಳಿಗೆ ಸೇವಾ ತೆರಿಗೆಯನ್ನು ಹೆಚ್ಚಿಸಬೇಕು. ಆದರೆ ಇದರಿಂದ ಯಾರಿಗೂ ತೊಂದರೆ ಆಗಬಾರದು ಬೇರೆ ತಾಲೂಕುಗಳಲ್ಲಿ ಇರುವ ತೆರಿಗೆಯನ್ನು ನೋಡಿ ಇಲ್ಲಿ ಕೂಡ ಸೇವಾ ತಿಗೆಯನ್ನು ಪರಿಷ್ಕರಿಸಬೇಕು ಎಂದು ಗೋಕುಲ್‌ದಾಸ್ ಹೇಳಿದರು.

ಸಭೆಯ ಅಧ್ಯಕ್ಷತೆಯನ್ನು ಅಧ್ಯಕ್ಷೆ ಶೀಲಾವತಿ ಮಾಧವ ಗೌಡ ವಹಿಸಿದ್ದರು. ಸಭೆಯಲ್ಲಿ ಉಪಾಧ್ಯಕ್ಷೆ ಮೋಹಿನಿ ನಾಗರಾಜ್, ಸ್ಥಾಯಿ ಸಮಿತಿ ಅಧ್ಯಕ್ಷೆ ಹರಿಣಾಕ್ಷಿ ನಾರಾಯಣ, ಮುಖ್ಯಾಧಿಕಾರಿ ಚಂದ್ರಕುಮಾರ್ ಉಪಸ್ಥಿತರಿದ್ದರು.