ಕೈಗೆಟಕುವ ದರದಲ್ಲಿ ಎಲ್ಲರಿಗೂ ಜೆನರಿಕ್ ಔಷಧಿ: ಸಚಿವ ಪ್ರಮೋದ್

ಉಡುಪಿ, ಮಾ.13: ಎಲ್ಲರಿಗೂ ಕೈಗೆಟಕುವ ದರದಲ್ಲಿ ಅಂದರೆ ಮಾರುಕಟ್ಟೆ ಬೆಲೆಗಿಂತ ಶೇ.90ರಷ್ಟು ರಿಯಾಯತಿ ದರದಲ್ಲಿ ಎಲ್ಲಾ ರೀತಿಯ ಔಷಧಗಳು ಲಭ್ಯವಿರುವ ಜೆನರಿಕ್ ಔಷಧ ಮಳಿಗೆಯಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವ ಪ್ರಮೋದ್ ಮಧ್ವರಾಜ್ ಇಂದು ಅಜ್ಜರಕಾಡಿನಲ್ಲಿರುವ ಜಿಲ್ಲಾಸ್ಪತ್ರೆ ಆವರಣದಲ್ಲಿ ಉದ್ಘಾಟಿಸಿದರು.

ಬಳಿಕ ಕರೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಪ್ರಮೋದ್, ರಾಜ್ಯ ಸರಕಾರ ಎಚ್‌ಎಲ್‌ಎಲ್‌ಗೆ ರಾಜ್ಯದಲ್ಲಿ ಜೆನರಿಕ್ ಔಷಧಿ ಮಳಿಗೆಗಳನ್ನು ನಡೆಸುವ ಜವಾಬ್ದಾರಿಯನ್ನು ವಹಿಸಿದೆ. ಜೆನರಿಕ್ ಮಳಿಗೆಯಲ್ಲಿ ರೋಗಿಗಳಿಗೆ ಎಲ್ಲಾ ರೀತಿಯ ಔಷಧಗಳನ್ನು ಮಾರುಕಟ್ಟೆ ದರಕ್ಕಿಂತ ಶೇ.90ರ ರಿಯಾಯತಿ ದರದಲ್ಲಿ ಸರಬರಾಜು ಮಾಡಲಾಗುತಿದ್ದು, ಮಾರುಕಟ್ಟೆ ದರ ರೂ.100 ಇರುವ ಔಷಧಿಗಳು ಈ ಮಳಿಗೆಯಲ್ಲಿ ರೂ.10ಕ್ಕೆ ದೊರೆಯಲಿದೆ ಎಂದವರು ಹೇಳಿದರು.

ಉದಾಹರಣೆಗೆ ಕ್ಯಾಲ್ಸಿಯಂ ಮಾತ್ರೆಗಳಿಗೆ ಮಾರುಕಟ್ಟೆಯಲ್ಲಿ (ಮೆಡಿಕಲ್ ಸ್ಟೋರ್‌ಗಳಲ್ಲಿ) ರೂ.175 ಇದ್ದರೆ, ಇಲ್ಲಿ ಅದು ಕೇವಲ 9ರೂ.ಗೆ ದೊರೆಯಲಿದೆ. ಅದೇ ರೀತಿ ಡಯಾಬಿಟೀಸ್‌ನ ಮಾತ್ರೆ ಮೆಡಿಕಲ್‌ಗಳಲ್ಲಿ 95ಕ್ಕೆ ಲಭ್ಯವಿದ್ದರೆ, ಜೆನರಿಕ್ ಮಳಿಗೆಯಲ್ಲಿ 13 ರೂ.ಗೆ ದೊರೆಯಲಿದೆ. ರಕ್ತದೊತ್ತಡ (ಬಿಪಿ)ಕ್ಕೆ 64ರೂ. ಎಂಆರ್‌ಪಿ ಮಾತ್ರೆ 13ರೂ.ಗೆ ದೊರೆಯಲಿದೆ ಎಂದರು.

ಅಲ್ಲದೇ ರೋಗಿಗಳಿಗೆ ಬ್ರಾಂಡೆಡ್ ಕಂಪೆನಿಗಳ ಮಾತ್ರೆಗಳು ಬೇಕಿದ್ದರೂ ಇಲ್ಲಿ ಲಭ್ಯವಿದ್ದು, ಅವುಗಳನ್ನು ಶೇ.10ರ ರಿಯಾಯತಿ ದರದಲ್ಲಿ ನೀಡವಾಗುತ್ತದೆ. ಸರ್ಜಿಕಲ್ ಉಪಕರಣಗಳು ಶೇ.25ರ ರಿಯಾಯಿತಿ ದರದಲ್ಲಿ ಲಭ್ಯವಿರಲಿದೆ ಎಂದು ಪ್ರಮೋದ್ ನುಡಿದರು.

 ಮಧುಮೇಹ, ರಕ್ತದೊತ್ತಡದ ನಿಯಂತ್ರಣಕ್ಕಾಗಿ ಪ್ರತಿದಿನ ಗುಳಿಗೆ ನುಂಗುವವರು ಇಲ್ಲಿ ತಮ್ಮ ಔಷಧಿಯನ್ನು ಖರೀದಿಸಿದರೆ ಭಾರೀ ಉಳಿತಾಯ ಮಾಡಬಹುದು. ಜನಸಾಮಾನ್ಯರ ಆರೋಗ್ಯದ ದೃಷ್ಟಿಯಿಂದ ಸರಕಾರ ಆರಂಭಿಸಿದ ಈ ಮಳಿಗೆಯ ಪ್ರಯೋಜನವನ್ನು ಸಾರ್ವಜನಿಕರು ಪಡೆಯುವಂತೆ ಅವರು ಮನವಿ ಮಾಡಿದರು.

ಜಿಲ್ಲೆಯ ವೈದ್ಯರು ಖಾಸಗಿ ಲಾಬಿಗೆ ಮಣಿಯದೆ ತಮ್ಮಲ್ಲಿಗೆ ಬರುವ ರೋಗಿಗಳಿಗೆ ಜೆನರಿಕ್ ಔಷಧಿಗಳನ್ನೇ ಶಿಪಾರಸ್ಸು ಮಾಡುವಂತೆ ತಿಳಿಸಿದ ಸಚಿವರು, ಜೆನರಿಕ್ ಮಳಿಗೆಗಳಲ್ಲಿ ಲ್ಯವಿರುವ ಔಷಧಗಳು ಮತ್ತು ದರಗಳನ್ನು ಸಾರ್ವಜನಿಕರಿಗೆ ಪ್ರದರ್ಶಿಸುವಂತೆ ಹಾಗೂ ಯಾವುದೇ ಕಾರಣಕ್ಕೂ ಔಷಧಗಳ ಕೊರತೆಯಾಗದಂತೆ ನೋಡಿಕೊಳ್ಳುವಂತೆ ಅವರು ಸೂಚನೆಗಳನ್ನು ನೀಡಿದರು.

ಇನ್ನು ಮುಂದೆ ಜಿಲ್ಲಾಸ್ಪತ್ರೆಯ ವೈದ್ಯರು ಯಾವುದೇ ಕಾರಣಕ್ಕೂ ರೋಗಿಗಳಿಗೆ ಹೊರಗಿನಿಂದ ಔಷಧ ತರಲು ಚೀಟಿ ನೀಡದಂತೆ ಸಚಿವರು ಕಟ್ಟುನಿಟ್ಟಿನ ಸೂಚನೆ ನೀಡಿದರು. ಹೊರಗಿನಿಂದಲೂ ವೈದ್ಯರು ಬರೆದು ಕೊಡುವ ಚೀಟಿಗಳಿಗೆ ಇಲ್ಲಿ ಔಷಧಿಗಳನ್ನು ನೀಡಲಾಗುತ್ತದೆ. ಸದ್ಯಕ್ಕೆ ಮಳಿಗೆ ಬೆಳಗ್ಗೆ 8ರಿಂದ ರಾತ್ರಿ 9ಗಂಟೆಯವರೆಗೆ ಕಾರ್ಯಾಚರಿಸುತ್ತದೆ. ಮುಂದೆ ದಿನದ 24 ಗಂಟೆಯೂ ತೆರೆದಿರುತ್ತದೆ ಎಂದು ಅವರು ಹೇಳಿದರು.

ಇ-ಆಸ್ಪತ್ರೆ:

ಇದರೊಂದಿಗೆ ಸಚಿವರು ಜಿಲ್ಲಾಸ್ಪತ್ರೆಯಲ್ಲಿ ಇ-ಆಸ್ಪತ್ರೆ ಸೌಲಭ್ಯವನ್ನು ಉದ್ಘಾಟಿಸಿದರು. ಇನ್ನು ಮುಂದೆ ಇಲ್ಲಿ ಚಿಕಿತ್ಸೆಗೆ ಬರುವ ರೋಗಿಗಳು ತಮ್ಮ ಆಧಾರ್ ಕಾರ್ಡ್, ಪಡಿತರ ಚೀಟಿ ಹಾಗೂ ಮೊಬೈಲ್ ನಂ.ಗಳನ್ನು ನೀಡಿ ಹೆಸರು ನೊಂದಾಯಿಸಿಕೊಂಡಾಗ ಅವರಿಗೆ ಯುನಿಕ್ ನಂ. ಒಂದನ್ನು ನೀಡಲಾಗುತ್ತದೆ. ಅದರಿಂದ ಆ ರೋಗಿಯ ಆರೋಗ್ಯ ಸಂಪೂರ್ಣ ಮಾಹಿತಿ ಇದರಲ್ಲಿ ಲಭ್ಯವಾಗಲಿದೆ.

ಮುಂದೆ ಇವುದೇ ಇ-ಆಸ್ಪತ್ರೆ ಸೌಲಭ್ಯವಿರುವ ಯಾವುದೇ ಸರಕಾರಿ ಆಸ್ಪತ್ರೆಗಳಿಗೆ ತೆರಳಿದಾಗ ತಮ್ಮ ಮೊಬೈಲ್ ನಂ.ನ್ನು ನೀಡಿದಾಗ, ಆತನ ಹಿಂದಿನ ವೈದ್ಯಕೀಯ ಚಿಕಿತ್ಸೆ ಮಾಹಿತಿ ಅಲ್ಲೂ ಲಭ್ಯವಾಗಿ ರೋಗಿಯ ಚಿಕಿತ್ಸೆ ಸುಲಭವಾಗಲಿದೆ. ಇ-ಆಸ್ಪತ್ರೆ ಸೌಲಭ್ಯ ಪಡೆದ ಮೊದಲ ಜಿಲ್ಲಾಸ್ಪತ್ರೆ ಉಡುಪಿ ಯಾಗಿದೆ ಎಂದು ಪ್ರಮೋದ್ ತಿಳಿಸಿದರು.