ನಾಲ್ಕನೆ ಸುತ್ತಿಗೆ ಜೊಕೊವಿಕ್, ಕೆರ್ಬರ್‌ಗೆ ಆಘಾತಕಾರಿ ಸೋಲು

ಇಂಡಿಯನ್ ವೇಲ್ಸ್, ಮಾ.15: ವಿಶ್ವದ ನಂ.2ನೆ ಆಟಗಾರ ನೊವಾಕ್ ಜೊಕೊವಿಕ್ ಎಟಿಪಿ ಇಂಡಿಯನ್ ವೇಲ್ಸ್ ಮಾಸ್ಟರ್ಸ್‌ ಟೂರ್ನಿಯಲ್ಲಿ ನಾಲ್ಕನೆ ಸುತ್ತು ತಲುಪಿದ್ದಾರೆ.

 ಇಲ್ಲಿ ಮಂಗಳವಾರ ನಡೆದ ಪುರುಷರ ಸಿಂಗಲ್ಸ್‌ನ ಮೂರನೆ ಸುತ್ತಿನ ಪಂದ್ಯದಲ್ಲಿ ಜೊಕೊವಿಕ್ ಅವರು ಜುಯಾನ್ ಮಾರ್ಟಿನ್ ಡೆಲ್ ಪೊಟ್ರೊರನ್ನು 7-5, 4-6, 6-1 ಸೆಟ್‌ಗಳ ಅಂತರದಿಂದ ಮಣಿಸಿದ್ದಾರೆ.

ಐದು ಬಾರಿ ಇಂಡಿಯನ್ ವೇಲ್ಸ್ ಪ್ರಶಸ್ತಿಯನ್ನು ಗೆದ್ದುಕೊಂಡಿರುವ ಜೊಕೊವಿಕ್ ಮುಂದಿನ ಸುತ್ತಿನಲ್ಲಿ ಆಸ್ಟ್ರೇಲಿಯದ ನಿಕ್ ಕಿರ್ಗಿಯೊಸ್‌ರನ್ನು ಎದುರಿಸಲಿದ್ದಾರೆ. ಕಿರ್ಗಿಯೊಸ್ ಮತ್ತೊಂದು ಸಿಂಗಲ್ಸ್ ಪಂದ್ಯದಲ್ಲಿ ಜರ್ಮನಿಯ ಅಲೆಕ್ಸಾಂಡರ್ ಝ್ವೆರೆವ್‌ರನ್ನು 6-3, 6-4 ನೇರ ಸೆಟ್‌ಗಳ ಅಂತರದಿಂದ ಮಣಿಸಿದ್ದರು.

ಇತ್ತೀಚೆಗಷ್ಟೇ ಅಕಾಪುಲ್ಕೊದಲ್ಲಿ ನಡೆದಿದ್ದ ಟೆನಿಸ್ ಟೂರ್ನಿಯಲ್ಲಿ 15ನೆ ಶ್ರೇಯಾಂಕದ ಕಿರ್ಗಿಯೊಸ್ ಅವರು ಕ್ವಾರ್ಟರ್‌ಫೈನಲ್‌ನಲ್ಲಿ ಜೊಕೊವಿಕ್‌ರನ್ನು ನೇರ ಸೆಟ್‌ಗಳಿಂದ ಮಣಿಸಿದ ಆಘಾತ ನೀಡಿದ್ದರು.

ಕಳೆದ ವರ್ಷ ರಿಯೋ ಡಿಜನೈರೊದಲ್ಲಿ ನಡೆದ ಒಲಿಂಪಿಕ್ಸ್‌ನ ಮೊದಲಸುತ್ತಿನಲ್ಲಿ ಜೊಕೊವಿಕ್‌ಗೆ ಶಾಕ್ ನೀಡಿದ್ದ ಡೆಲ್ ಪೊಟ್ರೊ ಇಂದು ನೇರ ಸೆಟ್‌ಗಳಿಂದ ಶರಣಾಗಿದ್ದಾರೆ. ಮೊದಲ ಸೆಟ್‌ನ್ನು 7-5 ರಿಂದ ಗೆದ್ದುಕೊಂಡ ಜೊಕೊವಿಕ್ 2ನೆ ಸೆಟ್‌ನ್ನು 4-6 ರಿಂದ ಸೋತಿದ್ದರು. ಆದರೆ, ಮೂರನೆ ಸೆಟ್‌ನಲ್ಲಿ ತಿರುಗೇಟು ನೀಡಿದ ಜೊಕೊವಿಕ್ 6-1 ರಿಂದ ಜಯ ಸಾಧಿಸಿದರು.

ಇದೇ ವೇಳೆ, ಜಪಾನ್‌ನ ಕೀ ನಿಶಿಕೊರಿ ಲಕ್ಸುಂಬರ್ಗ್‌ನ ಗಿಲ್ಲೆಸ್ ಮುಲ್ಲರ್‌ರನ್ನು 6-2, 6-2 ನೇರ ಸೆಟ್‌ಗಳಿಂದ ಮಣಿಸುವ ಮೂಲಕ ನಾಲ್ಕನೆ ಸುತ್ತಿಗೆ ತಲುಪಿದ್ದಾರೆ.

ನಿಶಿಕೊರಿ ಮುಂದಿನ ಸುತ್ತಿನಲ್ಲಿ ಶ್ರೇಯಾಂಕರಹಿತ ಅಮೆರಿಕದ ಡೊನಾಲ್ಡ್ ಯಂಗ್‌ರನ್ನು ಎದುರಿಸಲಿದ್ದಾರೆ. ಯಂಗ್ 14ನೆ ಶ್ರೇಯಾಂಕದ ಲುಕಾಸ್ ಪೌಲೀ ಅವರನ್ನು 6-4, 1-6, 6-3 ಸೆಟ್‌ಗಳ ಅಂತರದಿಂದ ಮಣಿಸಿದ್ದರು.

 ಅಮೆರಿಕದ ಜಾಕ್ ಸಾಕ್ ಬಲ್ಗೇರಿಯದ ಗ್ರಿಗೊರ್ ಡಿಮಿಟ್ರೊವ್‌ರನ್ನು 3-6, 6-3, 7-6(9/7) ಸೆಟ್‌ಗಳ ಅಂತರದಿಂದ ಮಣಿಸಿದರು. ಈವರ್ಷ ಆಕ್ಲೆಂಡ್ ಹಾಗೂ ಡೆಲ್ರೆ ಬೀಚ್ ಓಪನ್ ಪ್ರಶಸ್ತಿಯನ್ನು ಜಯಿಸಿರುವ ಸಾಕ್ ಮುಂದಿನ ಸುತ್ತಿನಲ್ಲಿ ಟ್ಯುನಿಶಿಯದ ಮಲೆಕ್ ಜಾಝಿರಿ ಅವರನ್ನು ಎದುರಿಸಲಿದ್ದಾರೆ. ಜಾಝಿರಿ 19ರ ಹರೆಯದ ಅಮೆರಿಕದ ಟೇಲರ್ ಫ್ರಿಟ್ಜ್‌ರನ್ನು 6-4, 3-6, 6-3 ಸೆಟ್‌ಗಳಿಂದ ಸೋಲಿಸಿದ್ದರು.

ಕೆರ್ಬರ್‌ಗೆ ವೆಸ್ನಿನಾ ಆಘಾತ : ಜರ್ಮನಿಯ ಆ್ಯಂಜೆಲಿಕ್ ಕೆರ್ಬರ್ ಇಂಡಿಯನ್ ವೇಲ್ಸ್‌ನ ನಾಲ್ಕನೆ ಸುತ್ತಿನ ಪಂದ್ಯದಲ್ಲಿ ಎಲೆನಾ ವೆಸ್ನಿನಾ ವಿರುದ್ಧ ಸೋತು ಕೂಟದಿಂದ ಹೊರ ನಡೆದಿದ್ದಾರೆ.

ರಶ್ಯದ 14ನೆ ಶ್ರೇಯಾಂಕದ ಆಟಗಾರ್ತಿ ವೆಸ್ನಿನಾ ಮಂಗಳವಾರ ನಡೆದ ಮಹಿಳೆಯರ ಸಿಂಗಲ್ಸ್ ಪಂದ್ಯದಲ್ಲಿ ದ್ವಿತೀಯ ಶ್ರೇಯಾಂಕದ ಕೆರ್ಬರ್‌ರನ್ನು 6-3, 6-3 ನೇರ ಸೆಟ್‌ಗಳಿಂದ ಮಣಿಸಿ ಕ್ವಾರ್ಟರ್ ಫೈನಲ್‌ಗೆ ಲಗ್ಗೆ ಇಟ್ಟಿದ್ದಾರೆ. ವೆಸ್ನಿನಾ ವೃತ್ತಿಜೀವನದಲ್ಲಿ ಇದೇ ಮೊದಲ ಬಾರಿ ಅಗ್ರ-3 ಆಟಗಾರ್ತಿಯನ್ನು ಮಣಿಸಿದ್ದಾರೆ.

ಡಬ್ಲುಟಿಎ ರ್ಯಾಂಕಿಂಗ್‌ನಲ್ಲಿ ವಿಶ್ವದ ನಂ.1 ಸ್ಥಾನಕ್ಕೇರಲು ಸಜ್ಜಾಗಿರುವ ಕೆರ್ಬರ್‌ಗೆ ಈ ಸೋಲು ಆಘಾತ ತಂದಿದೆ. ಕೆರ್ಬರ್ ಇಂದಿನ ಪಂದ್ಯದಲ್ಲಿ ಸೋತ ಹೊರತಾಗಿಯೂ ನಂ.1 ಆಟಗಾರ್ತಿ ಸೆರೆನಾ ವಿಲಿಯಮ್ಸ್ ಗಾಯದ ಸಮಸ್ಯೆಯಿಂದ ಟೂರ್ನಿಯಿಂದ ಹಿಂದೆ ಸರಿದ ಕಾರಣ ಸೋಮವಾರ ಬಿಡುಗಡೆಯಾಗಲಿರುವ ರ್ಯಾಂಕಿಂಗ್‌ನಲ್ಲಿ ಅಗ್ರ ಸ್ಥಾನಕ್ಕೇರಲಿದ್ದಾರೆ.

ಕಳೆದ ವರ್ಷ ಆಸ್ಟ್ರೇಲಿಯನ್ ಹಾಗೂ ಅಮೆರಿಕನ್ ಓಪನ್ ಪ್ರಶಸ್ತಿ ಜಯಿಸಿದ್ದ ಕೆರ್ಬರ್ ಮೂರನೆ ಸುತ್ತಿನ ಪಂದ್ಯದಲ್ಲಿ 62ನೆ ರ್ಯಾಂಕಿನ ಪೌಲಿನ್ ಪಾರ್ಮೆಂಟಿಯೆರ್ ವಿರುದ್ಧ ಪ್ರಯಾಸಕಾರಿ ಗೆಲುವು ಸಾಧಿಸಿದ್ದರು. ವೆಸ್ನಿನಾ ವಿರುದ್ಧ ಹಿಂದಿನ ಲಯ ಕಂಡುಕೊಳ್ಳಲು ವಿಫಲರಾಗಿದ್ದರು.

ಕೆರ್ಬರ್‌ಗೆ ಸೋಲುಣಿಸಿರುವ ವೆಸ್ನಿನಾ ಮುಂದಿನ ಸುತ್ತಿನಲ್ಲಿ ಏಳು ಬಾರಿ ಗ್ರಾನ್‌ಸ್ಲಾಮ್ ಪ್ರಶಸ್ತಿ ವಿಜೇತೆ ವೀನಸ್ ವಿಲಿಯಮ್ಸ್‌ರನ್ನು ಎದುರಿಸಲಿದ್ದಾರೆ. ವಿಲಿಯಮ್ಸ್ ಚೀನಾದ ಪೆಂಗ್ ಶುಐರನ್ನು 3-6, 6-1, 6-3 ಸೆಟ್‌ಗಳ ಅಂತರದಿಂದ ಸೋಲಿಸಿದ್ದಾರೆ.

3ನೆ ಶ್ರೇಯಾಂಕದ ಝೆಕ್ ಗಣರಾಜ್ಯದ ಕ್ಯಾರೊಲಿನಾ ಪ್ಲಿಸ್ಕೋವಾ ಎದುರಾಳಿ ಆಟಗಾರ್ತಿ ಸ್ವಿಸ್‌ನ ಟಿಮಿಯಾ ಗಾಯಾಳು ನಿವೃತ್ತಿಯಾದ ಕಾರಣ ಕ್ವಾರ್ಟರ್ ಫೈನಲ್‌ಗೆ ತಲುಪಿದರು. ಕ್ವಾರ್ಟರ್‌ಫೈನಲ್‌ನಲ್ಲಿ ಏಳನೆ ಶ್ರೇಯಾಂಕದ ಫ್ರೆಂಚ್ ಓಪನ್ ಚಾಂಪಿಯನ್ ಗಾರ್ಬೈನ್ ಮುಗುರುಝರನ್ನು ಎದುರಿಸಲಿದ್ದಾರೆ. ಮತ್ತೊಂದು ಪಂದ್ಯದಲ್ಲಿ ಮುಗುರುಝ ಉಕ್ರೇನ್‌ನ ಎಲಿನಾ ಸ್ವಿಟೊಲಿನಾರನ್ನು 7-6(7/5), 1-6, 6-0 ಸೆಟ್‌ಗಳ ಅಂತರದಿಂದ ಸೋಲಿಸಿದರು.

ಸಾನಿಯಾ-ಸ್ಟೆಕೋವಾ ಜೋಡಿಗೆ ಸೋಲು

ಇಂಡಿಯನ್ ವೇಲ್ಸ್, ಮಾ.15: ಭಾರತದ ಸಾನಿಯಾ ಮಿರ್ಝಾ ಹಾಗೂ ಅವರ ಡಬಲ್ಸ್ ಜೊತೆಗಾರ್ತಿ ಬಾರ್ಬೊರ ಸ್ಟೆಕೋವಾ ಇಂಡಿಯನ್ಸ್ ವೇಲ್ಸ್ ಟೂರ್ನಿಯ ಕ್ವಾರ್ಟರ್ ಫೈನಲ್‌ನಲ್ಲಿ ಮುಗ್ಗರಿಸಿದ್ದಾರೆ.

ಇಂಡೋ-ಝೆಕ್ ಜೋಡಿ ಮಂಗಳವಾರ ಇಲ್ಲಿ ನಡೆದ ಮಹಿಳೆಯರ ಡಬಲ್ಸ್‌ನ ಪ್ರಿ-ಕ್ವಾರ್ಟರ್‌ಫೈನಲ್‌ನಲ್ಲಿ ಸ್ವಿಸ್‌ನ ಮಾರ್ಟಿನಾ ಹಿಂಗಿಸ್ ಹಾಗೂ ತೈವಾನ್‌ನ ಯಂಗ್-ಜಾನ್ ಚಾನ್ ವಿರುದ್ಧ 4-6, 4-6 ಸೆಟ್‌ಗಳ ಅಂತರದಿಂದ ಶರಣಾದರು.