ಪೆಟ್ರೋಲ್, ಡೀಸೆಲ್ ಸೆಸ್: ಜೇಬಿಗೆ ಕತ್ತರಿ ಬಿದ್ದದ್ದು ಎಷ್ಟು ಗೊತ್ತೇ?

ಹೊಸದಿಲ್ಲಿ, ಮಾ.16: ಪೆಟ್ರೋಲ್ ಹಾಗೂ ಹೈಸ್ಪೀಡ್ ಡೀಸೆಲ್ ಮೇಲೆ ಅಧಿಕ ಮೊತ್ತದ ಎಕ್ಸೈಸ್ ಸುಂಕವನ್ನು ಕೇಂದ್ರ ಸರಕಾರ ವಿಧಿಸುತ್ತಿದ್ದು, ಇದರಿಂದಾಗಿ ಕೇಂದ್ರದ ಪರೋಕ್ಷ ತೆರಿಗೆ ಆದಾಯದಲ್ಲಿ ಈ ಸೆಸ್ ಪಾಲು 2015-16ರಲ್ಲಿ ಶೇಕಡ 34ರಷ್ಟಿದ್ದುದು ಇದೀಗ ಶೇಕಡ 40ಕ್ಕೆ ಹೆಚ್ಚಿದೆ.

ಕಂಟ್ರೋಲರ್ ಮತ್ತು ಆಡಿಟರ್ ಜನರಲ್ ಈ ಬಗ್ಗೆ ಅಧ್ಯಯನ ನಡೆಸಿದ್ದು, ಕೇಂದ್ರದ ಅಬಬಕಾರಿ ಸುಂಕ ಶೇಕಡ 70ರಷ್ಟು ಹೆಚ್ಚಿದ್ದು, 2013-14ರಲ್ಲಿ 1.69 ಕೋಟಿ ರೂಪಾಯಿ ಇದ್ದ ಆದಾಯ 2015-16ರಲ್ಲಿ 2.87 ಕೋಟಿಗೆ ಏರಿದೆ. ಈ ಪೈಕಿ ಬಹುತೇಕ ಪಾಲು ಪೆಟ್ರೋಲ್, ಡೀಸೆಲ್, ಸಿಗರೇಟ್ ಹಾಗೂ ಗುಟ್ಕಾದಿಂದ ಬಂದಿದೆ ಎಂದು ಹೇಳಲಾಗಿದೆ.

2013-14ರಲ್ಲಿ ಪೆಟ್ರೋಲಿಯಂ ಉತ್ಪನ್ನಗಳಿಂದ ಬಂದ ಸುಂಕ ಒಟ್ಟು ಸಂಗ್ರಹದ ಶೇಕಡ 52ರಷ್ಟಿತ್ತು. 2015-16ರಲ್ಲಿ ಈ ಪ್ರಮಾಣವನ್ನು ಸರಕಾರ ಗಣನೀಯವಾಗಿ ಹೆಚ್ಚಿಸಿದೆ. ಪೆಟ್ರೋಲ್ ಹಾಗೂ ಡೀಸೆಲ್ ಮೇಲಿನ ಸುಂಕ ಲೀಟರ್‌ಗೆ ಕ್ರಮವಾಗಿ 1.2 ರೂಪಾಯಿ ಹಾಗೂ 1.46 ರೂಪಾಯಿ ಇದ್ದುದು ಇದೀಗ ಅನುಕ್ರಮವಾಗಿ 8.95 ರೂಪಾಯಿ ಹಾಗೂ 7.96ರೂಪಾಯಿ ಹೆಚ್ಚಿದೆ.

ಪೆಟ್ರೋಲಿಯಂ ಉತ್ಪನ್ನಗಳ ಆದಾಯಯ 2013-14ರಲ್ಲಿ 88 ಸಾವಿರ ಕೋಟಿ ಇತ್ತು. ಮರುವರ್ಷ ಇದು 1.99 ಲಕ್ಷ ಕೋಟಿಗೆ ಹೆಚ್ಚಿದೆ. ತಂಬಾಕು ಉತ್ಪನ್ನಗಳ ಮೇಲೆ ವಿಧಿಸುವ ತೆರಿಗೆಯಿಂದ ಸುಮಾರು 21 ಸಾವಿರ ಕೋಟಿ ಆದಾಯ ಬರುತ್ತಿದೆ.

ಉಪಖಂಡದ ಇತರ ದೇಶಗಳಾದ ಪಾಕಿಸ್ತಾನ ಹಾಗೂ ಶ್ರೀಲಂಕಾವನ್ನು ಹೋಲಿಸಿದರೆ, ಈ ಪ್ರಮಾಣ ಪಾಕಿಸ್ತಾನ ಹಾಗೂ ಶ್ರೀಲಂಕಾಗಿಂತ ಅಧಿಕ.