ಕರ್ನಾಟಕ ಬಜೆಟ್-2017: ಮಹಿಳಾ ವಿರೋಧಿಯಂತೂ ಅಲ್ಲ, ಮಹಿಳಾ ಪ್ರೋತ್ಸಾಹಿ ಬಜೆಟ್

ಮುಖ್ಯಮಂತ್ರಿಗಳು ಬಜೆಟ್ ಮಂಡಿಸುವ ಪೂರ್ವದಲ್ಲಿ ಹಲವು ಇಲಾಖಾ ಮುಖ್ಯಸ್ಥರು ಮತ್ತು ಹಲವು ಸಂಘಟನೆಗಳೊಂದಿಗೆ ಬಜೆಟ್  ಬಗ್ಗೆ  ಚರ್ಚಿಸಿದರು. ಆದರೆ, ಯಾವುದೆ ಮಹಿಳಾ ಸಂಘಟನೆ, ಪ್ರಗತಿಪರ ಮಹಿಳಾ ಮುಖಂಡರುಗಳ ಜೊತೆ ಚರ್ಚಿಸಲಿಲ್ಲ. ಮಹಿಳೆಯರ ತಲಸ್ಪರ್ಶಿ ಸಮಸ್ಯೆಗಳ ಒಳನೋಟಗಳಿಗಾಗಿ ಚರ್ಚೆಯಾಗಬೇಕಿತ್ತು. 

ಪುರುಷನ ಸಹಜೀವಿಯಾದ ಮಹಿಳೆ ಜನಸಂಖ್ಯೆಯ ಅರ್ಧದಷ್ಟಿರುವ ಮಹಿಳೆಯನ್ನು ಅವಳ ಶ್ರಮ, ಶಕ್ತಿ ಸಾಮರ್ಥ್ಯ, ಪ್ರತಿಭೆ ತನ್ನ ಮೊದಲ ಆದ್ಯತೆಯಾಗೆ ಪ್ರಪಂಚದ ಯಾವ ಪುರುಷರೂ ಸಮಾಜವೂ ನೋಡಿದ ಪರಿಗಣಿಸಿದ ದೃಷ್ಟಾಂತಗಳು ನಮ್ಮ ಮುಂದಿಲ್ಲ. ಸಿದ್ಧರಾಮಯ್ಯನವರು ಇದಕ್ಕೆ ಹೊರತಾಗಿಲ್ಲ. ಹೆಣ್ಣಿಗೆ ಯಾವಾಗಲೂ ೨ನೇ ಸ್ಥಾನ ಅಂತೆಯೇ ತಮ್ಮ ಬಜೆಟ್ ನಲ್ಲಿ ಮಹಿಳೆಯ ಮೂಲ ಸಮಸ್ಯೆಗಳಿಗೆ ಅವಳ ವ್ಯಕ್ತಿತ್ವ ವಿಕಸನಕ್ಕೆ ಪೂರಕವಾದ ಯಾವುದೆ ಹೊಸ ಯೋಜನೆಗಳು ಮೂಡಿ ಬಂದಿಲ್ಲ. ಪೂರ್ವದಲ್ಲಿದ್ದ ಯೋಜನೆಗಳನ್ನೆ ನವೀಕರಿಸಿದ್ದಾರೆ ಬೆಂಬಲಿಸಿದ್ದಾರೆ ಎನ್ನಬಹುದು.

ಸ್ತ್ರೀ ಶಕ್ತಿ ಸಂಘಗಳಿಗೆ ಬಡ್ಡಿರಹಿತ ಸಾಲ ನೀಡಿಕೆ, ಆಶಾಕಾರ್ಯಕರ್ತರಿಗೆ, ಅಂಗನವಾಡಿ ಕಾರ್ಯಕರ್ತರ ಮತ್ತು ಸಹಾಯಕಿಯರಿಗೆ ವೇತನ ಹೆಚ್ಚಳ, ಲೈಂಗಿಕ ದೌರ್ಜನ್ಯಕ್ಕೆ ಒಳಗಾದವರಿಗೆ ಪ್ರತ್ಯೇಕ ಚಿಕಿತ್ಸಾ ಘಟಕ, ವಿದ್ಯಾರ್ಥಿನಿಯರಿಗೆ ಚೂಡಿದಾರ್,ವಿದ್ಯಾರ್ಥಿನಿಯರ ಒಟ್ಟು ದಾಖಲಾತಿ ಪ್ರಮಾಣ ಹೆಚ್ಚಿಸಲು ಸರಕಾರಿ ಪಾಲಿಟೆಕ್ನಿಕ್ ಕಾಲೇಜುಗಳಲ್ಲಿ 23 ಮಹಿಳಾ ಹಾಸ್ಟೇಲ್  ನಿರ್ಮಾಣ,16,500 ಕಿರಿಯ ಮಹಿಳಾ ಸಹಾಯಕಿಯರಿಗೆ ತಾಯಿ ಮತ್ತು ಮಗುವಿನ ಅನುಸರಣಾ ವ್ಯವಸ್ಥೆಯಡಿ ಕಂಪ್ಯೂಟರ್ ಟ್ಯಾಬ್  ವಿತರಣೆ, ರಾಜ್ಯದ ಎಲ್ಲ ಜಿಲ್ಲೆಗಳಿಗೂ ಮಾತೃಪೂರ್ಣ ಯೋಜನೆ ವಿಸ್ತರಣೆ, ಸ್ತ್ರೀ ಶಕ್ತಿ ಒಕ್ಕೂಟಗಳ ಮೂಲಕ30 ಜಿಲ್ಲೆಗಳಲ್ಲಿ ಸವಿರುಚಿ ಸಂಚಾರಿ ಕ್ಯಾಂಟಿನ್  ಪ್ರಾರಂಭ ಮಾಡಲಾಗುದು ಎಂದು ಹೇಳಿದ್ದಾರೆ.

ದೇವರಾಜು ಅರಸು ಅಭಿವೃದ್ಧಿ ನಿಗಮದಿಂದ ಹಿಂದುಳಿದ ವರ್ಗಗಳ ವಿಧವೆಯರು ಆರ್ಥಿಕ ಚಟುವಟಿಕೆಗಳನ್ನು ಕೈಗೊಳ್ಳಲು 10 ಸಾವಿರ ರೂ. ಸಹಾಯಧನ, 4% ಬಡ್ಡಿದರದಲ್ಲಿ 30ಸಾವಿರ ಸಾಲವನ್ನೊಳಗೊಂಡ ಆರ್ಥಿಕ ನೆರವು, ಬೆಂಗಳೂರು ಹಾಗುಮಹಾನಗರ ಪಾಲಿಕೆ ವ್ಯಾಪ್ತಿ ಗಳಲ್ಲಿ ದುಡಿಯುವ ಮಹಿಳೆಯರಿಗಾಗಿ 2 ಕೋಟಿ ರೂ. ವೆಚ್ಚದಲ್ಲಿ 10 ಮಹಿಳಾ ವಸತಿ ನಿಲಯಗಳ ಪ್ರಾರಂಭ, ಮಹಿಳಾ ಅಥ್ಲೆಟ್ ಗಳಿಗಾಗಿ ಪ್ರತ್ಯೇಕ ಸುಸಜ್ಜಿತ ಕ್ರೀಡಾ ನಿಲಯಗಳ ಸೌಲಭ್ಯ, ಮಹಿಳಾ ಉದ್ಯಮಿಗಳಿಗೆ 4%ರ ದರದಲ್ಲಿ ನೀಡುತ್ತಿರುವ ಸಾಲದ ಮಿತಿ 50ಲಕ್ಷದಿಂದ 2 ಕೋಟಿಗೆ ಏರಿಕೆ ಮತ್ತು ಪ್ರತ್ಯೇಕ business incubator ಸ್ಥಾಪನೆ ಹೀಗೆ ಹತ್ತುಹಲವು ಯೋಜನೆಗಳನ್ನು ಘೋಷಿದ್ದಾರೆ.

ಸಮಾಜವಾದದ ಹಿನ್ನಲೆಯ ಸಾಮಾಜಿಕ ನ್ಯಾಯದ ಪರಿಕಲ್ಪನೆಯ ಮುಖ್ಯಮಂತ್ರಿಗಳು ಅಧಿಕಾರ ವಹಿಸಿಕೊಂಡ ಆರಂಭದಲ್ಲೆ ಘೋಷಿಸಿದ ಅನ್ನಭಾಗ್ಯ ಯೋಜನೆ ನಿಜಕ್ಕೂ ಶ್ಲಾಘನೀಯ. ಬೆಳಗಾದೊಡನೆ ಏನು ಮಾಡುವುದು ಎಂದು ತಲೆ ಮೇಲೆ ಕೈಹೊತ್ತು ಕುಳಿತುಕೊಳ್ಳತ್ತಿದ್ದ ಎಷ್ಟೋ ಬಡಮಹಿಳೆಯರ ತಲೆಭಾರವನ್ನು ಕಡಿಮೆ ಮಾಡಿದೆ.

ಬಹುಮುಖ್ಯವಾಗಿ ಮುಖ್ಯಮಂತ್ರಿಗಳು ಮಾಡಬೇಕಾಗಿದ್ದುದು ಮಧ್ಯಪಾನ ನಿಷೇಧ. ಬಹುಪಾಲು ಬಡಕುಟುಂಬದ ಹೆಣ್ಣುಮಕ್ಕಳು ಗಂಡಂದಿರ ಕುಡಿತದ ವ್ಯಸನದಿಂದ ಜರ್ಜರಿತರಾಗಿದ್ದಾರೆ, ಗಂಡಸರು ಕುಡಿತಕ್ಕೆ ತಾವು ದುಡಿದ ಹಣವನ್ನಲ್ಲದೆ ಹೆಂಡತಿ ದುಡಿದ ಹಣವನ್ನು ಕಿತ್ತು ಕೊಳ್ಳುತ್ತಾರೆ. ಇದರಿಂದ ಪ್ರತಿನಿತ್ಯ ಮನೆಯಲ್ಲಿ ಜಗಳ ಹೊಡೆದಾಟ, ಹಿಂಸೆ. ಓದುವುದನ್ನು ಬಿಟ್ಟು ಹೆದರಿಕೆಯಿಂದ ಇದನ್ನು ನೋಡುತ್ತಾ ಕುಳಿತುಕೊಳ್ಳುವ ಮಕ್ಕಳು.

ಗ್ರಾಮಗಳಲ್ಲಿ ಸರಕಾರಿ ಶಾಲೆಗಳಿವೆ.  ಅವುಗಳಲ್ಲಿ 1ನೇ ತರಗತಿಯಿಂದ ಇಂಗ್ಲೀಷ್ ಕಲಿಕೆ ಇದ್ದರೂ, ಶಿಕ್ಷಕರು, ಪಾಲಕರ ನಿರಾಸಕ್ತಿಯಿಂದಾಗಿ ಮಕ್ಕಳು 4ನೇ ತರಗತಿ ದಾಟಿದರೂ ಇಂಗ್ಲೀಷಿನ ಪದಗಳನ್ನು ಓದಲು ಮಕ್ಕಳಿಗೆ ಬರುವುದಿಲ್ಲ. ಇದರ ಬಗ್ಗೆ ಹೆಚ್ಚಿನ ಗಮನ ಹರಿಸಬಹುದಿತ್ತು.

ಹೆಣ್ಣು ಭ್ರೂಣಹತ್ಯೆ ಎಗ್ಗಿಲ್ಲದೆ ನಡೆಯುತ್ತಿದೆ. ಬಡಹೆಣ್ಣುಮಕ್ಕಳ ಅಪೌಷ್ಟಿಕತೆ ಬಗ್ಗೆ ಇನ್ನು ವಿಸ್ತೃತ ಯೋಜನೆ ರೂಪಿಸಬಹುದಿತ್ತು. 18 ವರ್ಷದೊಳಗಿನ ಬಾಲಕಿಯರು ತಾಯಿಯಾಗುವ ಸಂದರ್ಭವಿದೆ. ಈ ಸಂದರ್ಭದಲ್ಲಿ ತಾಯಿ ಮಗು ಸಾವಿಗೀಡಾಗುವ ಸಂಭವವಿದೆ.  ಈ ಬಗ್ಗೆ ಮತ್ತು ದೌರ್ಜನ್ಯ ಅತ್ಯಾಚಾರದಂತಹ ಸಮಸ್ಯೆಗಳ ಕಾರಣ. ಮತ್ತು ತಡೆಗಾಗಿ ಸಮಿತಿ ಅಥವಾ ಆಯೋಗವನ್ನು ರಚಿಸಬಹುದಿತ್ತು.

ಮಹಿಳಾ ಕೃಷಿ ಕಾರ್ಮಿಕರು ಮತ್ತು ವಿವಿಧೆಡೆ ದುಡಿಯುತ್ತಿರುವ ಮಹಿಳೆಯರಿಗೆ ಯಾವುದೇ ಯೋಜನೆಗಳಿಲ್ಲ, ಅಂಗನವಾಡಿ ಮತ್ತು ಆಶಾ ಕಾರ್ಯಕರ್ತೆಯರ ವೇತನ ಹೆಚ್ಚಳ ಮಾಡಿದರು. ಆದರೆ ಬಿಸಿಯೂಟ ಕಾರ್ಯಕರ್ತೆಯರಿಗೆ? ಇನ್ನು ಹೆಣ್ಣುಮಕ್ಕಳ ಕಳ್ಳಸಾಗಣಿಕೆ,ವೇಶ್ಯಾವಾಟಿಕೆ, ಬಾಲ್ಯವಿವಾಹ, ಅನಕ್ಷರತೆ ಪರಿಣಾಮಕಾರಿ ಯೋಜನೆಗಳನ್ನು ರೂಪಿಸಬಹುದಿತ್ತು. ಒಟ್ಟಾರೆ ಈ ಬಾರಿಯ ಬಜೆಟ್ ಮಹಿಳಾ ವಿರೋಧಿಯಂತೂ ಅಲ್ಲ, ಮಹಿಳಾ ಪ್ರೋತ್ಸಾಹಿ ಬಜೆಟ್ ಎನ್ನಬಹುದು.

- ಸರೋಜಾ ರಾಘವೇಂದ್ರ, ಉಪನ್ಯಾಸಕಿ ಸಾಗರ