ಅಂಧರ ಏಷ್ಯನ್ ಚೆಸ್: ಅಗ್ರಸ್ಥಾನಕ್ಕೆ ಎಜಾಝ್, ಕಿಶನ್

ಉಡುಪಿ, ಮಾ.25: ಅಂಧರ ರಾಷ್ಟ್ರೀಯ 'ಎ'ಚೆಸ್ ಚಾಂಪಿಯನ್ ಕರ್ನಾಟಕದ ಕಿಶನ್ ಗಂಗುಲಿ ಹಾಗೂ ಅತ್ಯಧಿಕ ಫಿಡೆ ಶ್ರೇಯಾಂಕಿತ ಆಟಗಾರ ರಾದ ಬಾಂಗ್ಲಾದೇಶದ ಹುಸೈನ್ ಎಜಾಝ್ ಅವರು ಅಂಧರ ಐಬಿಸಿಎ ಏಷ್ಯನ್ ಚೆಸ್ ಚಾಂಪಿಯನ್‌ಷಿಪ್‌ನ ಮೂರನೇ ಸುತ್ತಿನ ಪಂದ್ಯಗಳ ಕೊನೆಗೆ ಅಗ್ರಸ್ಥಾನವನ್ನು ಹಂಚಿಕೊಂಡಿದ್ದಾರೆ.

ಅಂತಾರಾಷ್ಟ್ರೀಯ ಬ್ರೈಲಿ ಚೆಸ್ ಅಸೋಸಿಯೇಷನ್ ವತಿಯಿಂದ ಮಣಿಪಾಲ ವಿವಿ ಆಶ್ರಯದಲ್ಲಿ ಮಣಿಪಾಲ ಕೆಎಂಸಿಯ ಡಾ.ಟಿಎಂಎ ಪೈ ಹಾಲ್‌ನಲ್ಲಿ ನಡೆದಿರುವ ಟೂರ್ನಿಯ ನಾಲ್ಕನೇ ದಿನದಾಟದಲ್ಲಿ ಇಬ್ಬರೂ ತಮ್ಮ ಎದುರಾಳಿಗಳ ವಿರುದ್ಧ ಪರಸ್ಪರ ವೈರುದ್ಧದ ಜಯ ದಾಖಲಿಸುವ ಮೂಲಕ ಅಜೇಯರಾಗುಳಿದರು.

ಅಗ್ರಸೀಡ್ ಆಟಗಾರ ಎಜಾಝ್ ಅವರು ತನ್ನ ಎದುರಾಳಿ ಭಾರತದ ಯುಧ್‌ಜೀತ್ ಡೇ ವಿರುದ್ಧ ಜಯಗಳಿಸಲು ತನ್ನೆಲ್ಲಾ ಅನುಭವವನ್ನು ಧಾರೆ ಎರೆಯಬೇಕಾಯಿತು. ಟಾಪ್‌ಬೋರ್ಡ್‌ನಲ್ಲಿ ಬಿಳಿಕಾಯಿಗಳೊಂದಿಗೆ ಆಡಿದ ಎಜಾಝ್, ಕಿಂಗ್ಸ್ ಇಂಡಿಯನ್ ಆಕ್ರಮಣದೊಂದಿಗೆ ಸೆಣಸಿದರು. 21ನೇ ನಡೆಯವರೆಗೂ ಇಬ್ಬರೂ ಸಮಬಲದ ಆಟ ಪ್ರದರ್ಶಿಸಿದರು.

ಆದರೆ 40ನೇ ಪಾನ್ ನಡೆಯಲ್ಲಿ ದೊರೆತ ಅಲ್ಪ ಮೇಲುಗೈಯನ್ನು ತನ್ನ ಪರವಾಗಿ ಬಳಸಿಕೊಂಡ ಎಜಾಝ್, ಪಂದ್ಯದ ದಿಕ್ಕನ್ನೇ ಬದಲಿಸಿ 62ನೇ ನಡೆಯಲ್ಲಿ ಯುಧ್‌ಜೀತ್‌ರನ್ನು ಪರಾಭವಗೊಳಿಸುವಲ್ಲಿ ಯಶಸ್ವಿಯಾಗಿ ಒಂದು ಪೂರ್ಣ ಅಂಕ ಸಂಪಾದಿಸಿದರು.

ಎರಡನೇ ಬೋರ್ಡಿನಲ್ಲಿ ಕಿಶನ ಗಂಗುಲಿ ಅವರು ಭಾರತದ ಅಶ್ವಿನ್ ಕೆ. ಮಕ್ವಾನ್‌ರನ್ನು ಬಿಳಿಕಾಯಿಯೊಂದಿಗೆ ಆಡಿ ಸುಲಭವಾಗಿ ಮಣಿಸಿದರು. ಗುಜರಾತ್‌ನ ಅಶ್ವಿನ್ 7ನೇ ನಡೆಯಲ್ಲಿ ನಡೆಸಿದ ತಪ್ಪು ನಡೆ ಅವರಿಗೆ ಮುಳು ವಾಯಿತು. ಕಿಶನ್ ಈ ಪಂದ್ಯವನ್ನು 23ನೇ ನಡೆಯಲ್ಲಿ ಗೆದ್ದುಕೊಂಡರು.

ಭಾರತದ ಆರ್ಯನ್ ಬಿ.ಜೋಷಿ ಅವರು ಮೂರು ಪಂದ್ಯಗಳ ಕೊನೆಗೆ 2.5 ಅಂಕಗಳನ್ನು ಗಳಿಸುವ ಮೂಲಕ ಎರಡನೇ ಸ್ಥಾನದಲ್ಲಿದ್ದಾರೆ. ಅವರು ಇಂದು ಸುಮಂತ್ ಮಿಲಿಂದ್ (1.5)ರನ್ನು ಪರಾಭವಗೊಳಿಸಿದರು. ಕೃಷ್ಣ ಉಡುಪ (2) ಮತ್ತು ಸ್ವಪ್ನೀಲ್ ಶಾ (1.5) ನಡುವಿನ ಪಂದ್ಯ ಸಮಬಲದಲ್ಲಿ ಮುಕ್ತಾಯಗೊಂಡಿತು. ಉಳಿದಂತೆ ವೈಶಾಲಿ ನರೇಂದ್ರ ಸಾಲ್ವಾಕರ್ (2) ಅವರು ಶಿರಿಶ್ ಪಾಟೀಲ್ (1)ರನ್ನು ಸೋಲಿಸಿದರೆ, ಸೌಂದರ್ಯ ಕುಮಾರ್ ಪ್ರದಾನ್ (2) ಅವರು ಮಾರಿಮುತ್ತು ಕೆ. (1) ಅವರನ್ನು ಸೋಲಿಸಿದರು.