ತಮಿಳ್ನಾಡು: ಪಳನಿಸ್ವಾಮಿ - ಪನ್ನೀರ್ ಸೆಲ್ವಂ ಕೈ ಜೋಡಿಸುತ್ತಿದ್ದಾರಯೇ ?
ಚೆನ್ನೈ,ಎ. 6: ಅಣ್ಣಾಡಿಎಂಕೆಯನ್ನು ಅದರ ಈಗಿನ ಪ್ರಧಾನ ಕಾರ್ಯದರ್ಶಿ ಶಶಿಕಲಾರ ಕುಟುಂಬ ಮತ್ತು ಮನ್ನಾರ್ಗುಡಿ ಗುಂಪನ್ನು ರಕ್ಷಿಸುವ ಕುರಿತು ತೆರೆಮರೆಯಲ್ಲಿ ಕಸರತ್ತು ಬಿರುಸಿನಿಂದ ಸಾಗುತ್ತಿದೆ. ಶಶಿಕಲಾ ಬಣದಿಂದ ಅಣ್ಣಾಡಿಎಂಕೆಯನ್ನು ರಕ್ಷಿಸುವ ನಿಟ್ಟಿನಲ್ಲಿ ಪನ್ನೀರ್ಸೆಲ್ವಂ , ಪಳನಿಸ್ವಾಮಿಗುಂಪುಗಳೊಳಗೆ ರಹಸ್ಯ ಮಾತುಕತೆ ಮುಂದುವರಿದಿದ್ದು ಪಳನಿಸ್ವಾಮಿ ಸಂಪುಟದ ಕೆಲವು ಹಿರಿಯ ಸಚಿವರು ಎರಡು ಗುಂಪುಗಳನ್ನು ಒಗ್ಗೂಡಿಸುವ ಹೊಣೆಯನ್ನು ವಹಿಸಿಕೊಂಡಿದ್ದಾರೆ. ಶಶಿಕಲಾರನ್ನು ದೂರವಿಟ್ಟು ಎರಡುವಿಭಾಗಳು ಒಗ್ಗೂಡಿ ಅಣ್ಣಾಡಿಎಂಕೆಯನ್ನು ರಕ್ಷಿಸಲು ಪಳನಿಸ್ವಾಮಿ ಸಂಪುಟದ ಕೆಲವು ಹಿರಿಯ ಸಚಿವರು ನಿರ್ಧರಿಸಿದ್ದಾರೆಎಂದು ಮೂಲಗಳು ತಿಳಿಸಿವೆ. ಎಐಡಿಎಂಕೆ ಪಕ್ಷ ಮತ್ತು ಸರಕಾರವನ್ನು ಈಗ ನೆಲೆಯಾಗಿರುವ ತ್ರಿಶಂಕು ಸ್ಥಿತಿಯಿಂದ ಪಾರುಗೊಳಿಸುವುದಕ್ಕೆ ಎರಡೂ ಗುಂಪುಗಳಲ್ಲಿ ಮಹತ್ವದ ಚಿಂತನೆ ನಡೆಯುತ್ತಿದೆ. ಆದರೆ ಇವುಯಾವುದೂ ಜೈಲಲ್ಲಿರುವ ಪಕ್ಷದ ಪ್ರಧಾನ ಕಾರ್ಯದರ್ಶಿ ಶಶಿಕಲಾ ಮತ್ತು ಉಪ ಪ್ರಧಾನ ಕಾರ್ಯದರ್ಶಿ ಆರ್.ಕೆ. ನಗರ ಉಪಚುನಾವಣೆಯ ಅಭ್ಯರ್ಥಿ ಟಿಟಿವಿ ದಿನಕರನ್ ಅರಿವಿಗೆ ಬಂದಿಲ್ಲ.
ಉಪಚುನಾವಣೆಯ ಶಶಿಕಲಾ ಬಣದ ಅಭ್ಯರ್ಥಿ ಟಿಟಿವಿ ದಿನಕರನ್ರ ಚುನಾವಣಾ ಪ್ರಚಾರದಲ್ಲಿ ಕೆಲವು ಸಚಿವರು ಭಾಗಿಯಾಗಿಲ್ಲ. ಇವರು ನಿರಂತರ ತಪ್ಪಿಸಿಕೊಳ್ಳುತ್ತಿದ್ದಾರೆ. ತೆರೆಮರೆಯಲ್ಲಿ ನಡೆಯುತ್ತಿರುವ ಚಟುವಟಿಕೆಗಳ ಕುರಿತ ಶಂಕೆಯನ್ನು ಇದು ಇನ್ನಷ್ಟು ಬಲಪಡಿಸುತ್ತಿದೆ. ಈಗಾಗಲೇ ತಮ್ಮ ಖಾತೆಗಳಲ್ಲಿ ದಿನಕರನ್ ಹಸ್ತಕ್ಷೇಪ ನಡೆಸುತ್ತಿರುವ ಬಗ್ಗೆ ಕೆಲವು ಸಚಿವರು ಮುಖ್ಯಮಂತ್ರಿ ಪಳನಿಸ್ವಾಮಿಯವರಲ್ಲಿ ದೂರಿತ್ತಿದ್ದಾರೆ. ಎಐಡಿಎಂಕೆಯಲ್ಲಿ ಹೆಚ್ಚಿನವರಿಗೆ ದಿನಕರನ್ ಬಗ್ಗೆ ಅಸಮಾಧಾನವಿದೆ.
ಶಶಿಕಲಾರ ಪತಿನಟರಾಜನ್ ಹಾಗೂ ಅವರ ಕುಟುಂಬಸದಸ್ಯರ ಮನ್ನಾರ್ಗುಡಿ ಗುಂಪು ಸರಕಾರ ಮತ್ತು ಪಕ್ಷದಲ್ಲಿ ಬಲಗೊಳುತ್ತಿದೆ ಎಂಬ ಅಪಸ್ವರ ಪಳನಿಸ್ವಾಮಿ,ಪನ್ನೀರ್ ಸೆಲ್ವಂರ ಗುಂಪುಗಳು ಒಗ್ಗೂಡುವುದಕ್ಕೆ ಒಂದು ಕಾರಣವೆನ್ನಲಾಗುತ್ತಿದ್ದು, ಈ ಸಲದ ಆರ್ಕೆನಗರ ಉಪಚುನಾವಣೆಯಲ್ಲಿ ದಿನಕರನ್ ಗೆದ್ದರೆ ಮುಖ್ಯಮಂತ್ರಿ ಪಳನಿ ಸ್ವಾಮಿಯ ಸ್ಥಾನ ಕಳಕೊಳ್ಳುವ ಹೆದರಿಕೆ ಅವರನ್ನು ಕಾಡುತ್ತಿದೆ. ಪಕ್ಷದ ಹಿರಿಯ ನಾಯಕರಿಗೂ ದಿನಕರನ್ ಬೆದರಿಕೆಯಾಗುವ ಸಾಧ್ಯತೆಯಿದೆ ಎನ್ನಲಾಗಿದೆ.
ಇವನ್ನೆಲ್ಲ ಗಮನದಲ್ಲಿಟ್ಟು ಕಳೆದ ಒಂದು ತಿಂಗಳಿನಿಂದ ಪಳನಿಸ್ವಾಮಿ- ಪನ್ನೀರ್ ಸೆಲ್ವಂ ಬಣಗಳನ್ನು ಹತ್ತಿರಕ್ಕೆ ತರುವ ಕುರಿತು ಚರ್ಚೆಗಳು ಮುಂದುವರಿದಿದೆ. ಪಳನಿಸ್ವಾಮಿ ಬಣದ ಸಚಿವರು, ಪನ್ನೀರ್ಸೆಲ್ವಂ ಬಣದ ಶಾಸಕರು ಪರಸ್ಪರ ಸಂಪರ್ಕಿಸುತ್ತಿದ್ದಾರೆ. ಇದೇ ವೇಳೆ" ಮುಖ್ಯಮಂತ್ರಿ ಪಳನಿಸ್ವಾಮಿಯನ್ನು ನಾವು ವಿರೋಧಿಸುವುದಿಲ್ಲ" ಎಂದು ಆರ್ಕೆ ನಗರ ಚುನಾವಣಾ ಸಮಿತಿ ಸದಸ್ಯ ಶಕ್ತಿವೇಲ್ ಮುರುಗನ್ ಬಹಿರಂಗಪಡಿಸಿದ್ದಾರೆ. ಜೊತೆಗೆ ಪ್ರಧಾನಕಾರ್ಯದರ್ಶಿ ಶಶಿಕಲಾರ ವಿರುದ್ಧ ಆರ್ಕೆನಗರದ ಮತದಾರರ ಆಕ್ರೋಶ ಕೂಡಾ ಪಕ್ಷದ ಹಿರಿಯ ನಾಯಕರನ್ನು ಮರುಚಿಂತನೆ ನಡೆಸುವಂತೆ ಪ್ರೇರೇಪಿಸುತ್ತಿದೆ ಎಂದು ತಿಳಿದುಬಂದಿದೆ.
