ಭಾರತಕ್ಕೆ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಕಾಯಂ ಸದಸ್ಯತ್ವ : ಸುಷ್ಮಾ ಸ್ವರಾಜ್ ವಿಶ್ವಾಸ

ಹೊಸದಿಲ್ಲಿ, ಎ.6: ಭಾರತಕ್ಕೆ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಸದಸ್ಯತ್ವ ದೊರಕಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿರುವ ವಿದೇಶ ವ್ಯವಹಾರ ಸಚಿವೆ ಸುಷ್ಮಾ ಸ್ವರಾಜ್, ನೂತನ ಸದಸ್ಯರು ‘ವಿಟೋ’ ಸೇರಿದಂತೆ ಎಲ್ಲಾ ಅಧಿಕಾರವನ್ನೂ ಹೊಂದಲಿದ್ದಾರೆ ಎಂಬ ನಿರೀಕ್ಷೆಯಿದೆ ಎಂದಿದ್ದಾರೆ.

 ರಾಜ್ಯಸಭೆಯಲ್ಲಿ ಪ್ರಶ್ನೋತ್ತರ ಅವಧಿಯಲ್ಲಿ ಮಾತನಾಡಿದ ಸುಷ್ಮಾ, ಭದ್ರತಾ ಮಂಡಳಿಯ ಸದಸ್ಯತ್ವ ಪಡೆಯಲು ಭಾರತಕ್ಕೆ ಎಲ್ಲಾ ಅರ್ಹತೆಗಳಿವೆ . ನಾಲ್ಕು ಕಾಯಂ ಸದಸ್ಯ ರಾಷ್ಟ್ರಗಳಾದ ಅಮೆರಿಕ, ಬ್ರಿಟನ್, ಫ್ರಾನ್ಸ್ ಮತ್ತು ರಷ್ಯಾ ಭಾರತಕ್ಕೆ ಬೆಂಬಲ ಸೂಚಿಸಿದೆ. ಐದನೇ ರಾಷ್ಟ್ರವಾದ ಚೀನಾ ಕೂಡಾ ‘ಬಹಿರಂಗವಾಗಿ ವಿರೋಧಿಸಿಲ್ಲ’ ಎಂದರು.

     ಇವತ್ತಲ್ಲ ನಾಳೆ ಭಾರತವು ಭದ್ರತಾ ಮಂಡಳಿಯ ಕಾಯಂ ಸದಸ್ಯತ್ವ ಪಡೆಯಲಿದೆ ಎಂಬ ವಿಶ್ವಾಸವಿದೆ. ವಿಟೋ ಅಧಿಕಾರ ಸೇರಿದಂತೆ ಹೊಸ ಮತ್ತು ಹಳೆಯ ಸದಸ್ಯರು ಏಕರೀತಿಯ ಅಧಿಕಾರ ಹೊಂದಲಿದ್ದಾರೆ ಎಂಬ ವಿಶ್ವಾಸವಿದೆ. ಕಾಯಂ ಸದಸ್ಯರಲ್ಲಿ ಪ್ರಥಮ ದರ್ಜೆ ಮತ್ತು ದ್ವಿತೀಯ ದರ್ಜೆ ಎಂಬ ತಾರತಮ್ಯ ಇರಲಾರದು ಎಂದವರು ವಿಶ್ವಾಸ ವ್ಯಕ್ತಪಡಿಸಿದರು.

ಭದ್ರತಾ ಮಂಡಳಿಯ ವಿಸ್ತರಣೆ ಜೊತೆಗೆ ಅದರ ಸುಧಾರಣೆಯೂ ಆಗಬೇಕು ಎಂಬುದು ನಮ್ಮ ಆಶಯವಾಗಿದೆ ಎಂದವರು ಹೇಳಿದರು.