ಗೋಜಾಗೃತಿ ಭಾರತದ ಐಸಿಸ್: ಸುರ್ಜಿತ್ ಭಲ್ಲಾ

ಹೊಸದಿಲ್ಲಿ: ರಾಜಸ್ಥಾನದ ಅಲ್ವಾರ್ ಜಿಲ್ಲೆಯಲ್ಲಿ ಕಳೆದ ವಾರ ಹೈನುಗಾರಿಕೆಗೆ ಹಸು ಸಾಗಿಸುತ್ತಿದ್ದ ರೈತನ ಮೇಲೆ ಗೋರಕ್ಷಕರು ದಾಳಿ ನಡೆಸಿರುವುದು ಐಸಿಸ್ ಪ್ರತಿಪಾದಿಸುವ ಮತಾಂಧತೆಗಿಂತ ಭಿನ್ನವೇನೂ ಅಲ್ಲ ಎಂದು ಖ್ಯಾತ ಅರ್ಥಶಾಸ್ತ್ರಜ್ಞ ಸುರ್ಜಿತ್ ಭಲ್ಲಾ ಹೇಳಿದ್ದಾರೆ.

ಎನ್‌ಡಿಟಿವಿ ಡಯಲಾಗ್ಸ್ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, "ಇಂಥ ಅವಿವೇಕತನದ ಕೃತ್ಯದ ಪರವಾಗಿ ಯಾರೂ ಇರಲಾರರು. ಗೋಹತ್ಯೆ ಜಾಗೃತಿ ಎನ್ನುವುದು ಭಾರತದ ಐಸಿಸ್ ಆಗಿದೆ. ಯಾವ ವ್ಯಕ್ತಿ ಕೂಡಾ ಹಸುವಿನ ಹೆಸರಿನಲ್ಲಿ ಅದನ್ನು ಸಮರ್ಥಿಸಿಕೊಳ್ಳಲಾಗದು. ಇದು ಭಯಾನಕ" ಎಂದು ಹೇಳಿದರು.

ಭಾರತದಲ್ಲಿ ಬಡತನ ವಿರುದ್ಧದ ಹೋರಾಟ ಎಂಬ ಚರ್ಚೆಯ ವೇಳೆ ಅವರು ಈ ಅಭಿಪ್ರಾಯ ವ್ಯಕ್ತಪಡಿಸಿದರು. ಅಕ್ರಮ ಕಸಾಯಿಖಾನೆಗಳ ವಿರುದ್ಧ ಕೈಗೊಂಡ ದಾಳಿಯಿಂದ ಅಲ್ಪಸಂಖ್ಯಾತ ಸಮುದಾತದ ಮೇಲೆ ಉತ್ತರ ಪ್ರದೇಶದಲ್ಲಿ ಉಂಟಾಗಬಹುದಾದ ಆರ್ಥಿಕ ಪರಿಣಾಮಗಳ ಬಗ್ಗೆ ಅವರು ಮಾತನಡಿದರು. ಮತ್ತೊಬ್ಬ ಖ್ಯಾತ ಅರ್ಥಶಾಸ್ತ್ರಜ್ಞ ಅಭಿಜಿತ್ ಬ್ಯಾನರ್ಜಿ ಮಾತನಾಡಿ, "ಅಕ್ರಮ ಕಸಾಯಿಖಾನೆಗಳ ಮೇಲೆ ಸರ್ಕಾರ ನಡೆಸಿದ ದಾಳಿ ಯರ್ರಾಬಿರ್ರಿ. ಅದು ಜನರ ಜೀವನದ ಹಕ್ಕನ್ನು ದಿಢೀರನೇ ಕಸಿದುಕೊಂಡಂತೆ. ನನಗೆ ಬಡತನವಿರಲಿ ಅಥವಾ ಇಲ್ಲದಿರಲಿ ಅದನ್ನು ವಿರೋಧಿಸುತ್ತೇನೆ" ಎಂದು ಸ್ಪಷ್ಟಪಡಿಸಿದರು.

ಬಡತನ ನಿರ್ಮೂಲನೆ ಬಗ್ಗೆ ಮಾತನಾಡಿದ ಡಾ.ಭಲ್ಲಾ, ಈ ವಿಚಾರದಲ್ಲಿ ಭಾರತದ ಸಾಧನೆ ವಿಶ್ವದಲ್ಲೇ ಉತ್ತಮವಾಗಿದ್ದು, ಆದರೆ ಬಡತನ ಮಟ್ಟವನ್ನು ಸಮರ್ಪಕವಾಗಿ ಅಳೆಯುವ ಕೆಲಸ ಆಗಿಲ್ಲ ಎಂದು ಪ್ರತಿಪಾದಿಸಿದರು.

2011-12ರಲ್ಲಿ ಭಾರತದ ಬಡತನ ಪ್ರಮಾಣ ಶೇಕಡ 12ರಷ್ಟಿತ್ತು. ಆದರೆ ಅದೇ ಮಾನದಂಡದ ಪ್ರಕಾರ ಚೀನಾದಲ್ಲಿ ಬಡತನ ಶೇಕಡ 9ರಷ್ಟಿತ್ತು. ಚೀನಾ ನಮಗಿಂತ ಉತ್ತಮ ಸ್ಥಿತಿಯಲ್ಲಿದ್ದರೂ, ಭಾರತದ ಸಾಧನೆ ಕಳಪೆಯೇನಲ್ಲ ಎಂದು ಸ್ಪಷ್ಟಪಡಿಸಿದರು. ಇದರ ಮಾಪನದಲ್ಲಿ ಲೋಪವಾಗಿದೆ ಎಂದು ಹೇಳಿದರು.

ಬಡತನ ಉದ್ಯಮದ ಬಗ್ಗೆ ಕೇಳಿದ ಪ್ರಶ್ನೆಗೆ ಬ್ಯಾನರ್ಜಿ, "ನಾವು ಕಾರ್ಪೊರೇಟ್ ಕಂಪನಿಗಳಿಗೆ ನೀಡುವ ರಿಯಾಯ್ತಿಗಳಿಂದಾಗಿ ಬ್ಯಾಂಕಿಂಗ್ ವಲಯ ದಿವಾಳಿಯಾಬಹುದು. ಅದನ್ನು ತಪ್ಪಿಸಬೇಕು. ನಮ್ಮ ಜಿಡಿಪಿಯ ಶೇಕಡ 14 ಪಾಲು ಕೈಗಾರಿಕೆಗಳಿಗೆ ನೆರವಿನ ರೂಪದಲ್ಲಿ ಹೀತ್ತದೆ. ಅದು ಬಡವರು ಹಿಂದೆಂದೂ ಪಡೆಯದಷ್ಟು ದೊಡ್ಡ ಪಾಲು ಎಂದು ವಿವರಿಸಿದರು.

ಅಸಮಾನತೆಯನ್ನೂ ಬಡತನ ನಿರ್ಮೂಲನೆ ರೂಪದಲ್ಲಿ ಪರಿಣಿಸಬೇಕೇ ಎಂಬ ಪ್ರಶ್ನೆಗೆ ಬ್ರಿಟಿಷ್ ಸಂಸದ ಮೇಗಂಧ್ ದೇಸಾಯಿ, "ನಾನು ಅಸಮಾನತೆ ಬಗ್ಗೆ ಹೇಳುವುದಿಲ್ಲ. ನನ್ನ ಆದ್ಯತೆ ಬಡತನ ನಿರ್ಮೂಲನೆ. ಮುಖೇಶ್ ಅಂಬಾನಿ ಬಳಿ ಎಷ್ಟು ಹಣ ಇದೆ ಎನ್ನುವುದು ಮುಖ್ಯವಲ್ಲ. ಬಡವರ ಬಗ್ಗೆಯಷ್ಟೇ ನನಗೆ ಕಾಳಜಿ. ಬಡವರಿಗೆ ಉತ್ತಮ ಶಿಕ್ಷಣ, ಆರೋಗ್ಯ, ಮನೆ, ವಿದ್ಯುತ್ ಸಿಗಬೇಕು. ಅಸಮಾನತೆ ಬಗ್ಗೆ ಗಮನ ಹರಿಸಿದರೆ, ತುರ್ತು ಸಮಸ್ಯೆಯಾದ ಬಡತನಕ್ಕೆ ಗಮನ ಕಡಿಮೆಯಾಗುತ್ತದೆ" ಎಂದರು.