ಕಣ್ಣುಳ್ಳವರು ಓದಬೇಕಾದ ಕೃತಿ

‘ಕಣ್ಣು ಮತ್ತು ನೋಟ’ ಡಾ. ಎಚ್. ಎಸ್. ಮೋಹನ್ ಅವರು ಬರೆದಿರುವ ಆರೋಗ್ಯ ಮಾಹಿತಿಯುಳ್ಳ ಕೃತಿ. ಬೆಳಕಿನ ಜಗತ್ತನ್ನೆಲ್ಲ ಅಳೆದು ನೋಡಬಲ್ಲ ಕಣ್ಣಿನ ಬಗ್ಗೆ ನಮಗಿರುವ ಅಂಧಕಾರವನ್ನು ತೊಲಗಿಸುವ ಕೆಲಸವನ್ನು ಈ ಪುಟ್ಟ ಕೃತಿ ಮಾಡುತ್ತದೆ. ಕಣ್ಣು ಎನ್ನುವುದು ಬೆಲೆಕಟ್ಟಲಾಗದ ನಮ್ಮ ದೇಹ ಭಾಗ. ಅದು ನಿರ್ವಹಿಸುವ ಕಾರ್ಯವೈಖರಿಯೇ ಒಂದು ಅಚ್ಚರಿ. ಇಂತಹ ಕಣ್ಣಿನ ಕುರಿತಂತೆ ನಾವು ವಹಿಸುವ ನಿರ್ಲಕ್ಷದ ಕಡೆಗೆ ಕೃತಿ ಗಮನ ಸೆಳೆಯುತ್ತದೆ. ಕಣ್ಣು ಕಳೆದುಕೊಂಡ ಬಳಿಕ ವೈದ್ಯರನ್ನು ಕಾಣುವ ಬದಲು, ಹೇಗೆ ಮುಂಜಾಗರೂಕತೆ ವಹಿಸುವ ಮೂಲಕ ನಮ್ಮ ಕಣ್ಣುಗಳನ್ನು ಗರಿಷ್ಠ ಮಟ್ಟದಲ್ಲಿ ಕಾಪಾಡಿಕೊಂಡು ಬರಬಹುದು ಎನ್ನುವುದನ್ನು ಲೇಖಕರು ತಿಳಿಸುತ್ತಾರೆ. ಈ ಪುಸ್ತಕದಲ್ಲಿ ಅವರು ಕಣ್ಣಿನ ವಿವಿಧ ಕಾಯಿಲೆಗಳು, ರೋಗಲಕ್ಷಣಗಳು ಮುಂದಾದ ವಿಚಾರಗಳ ಬಗ್ಗೆ ಪ್ರಸ್ತಾಪಿಸಿರುವುದೇ ಅಲ್ಲದೆ, ದೈನಂದಿನ ಜೀವನದಲ್ಲಿ ಜನಸಾಮಾನ್ಯರು ಕಣ್ಣಿನ ಬಗ್ಗೆ, ಹೊಂದಿರುವ ತಪ್ಪುಕಲ್ಪನೆಗಳು, ಮೂಢನಂಬಿಕೆಗಳು ಇತ್ಯಾದಿಗಳ ಕುರಿತಂತೆ, ಕಣ್ಣಿನ ಶಸ್ತ್ರಕ್ರಿಯೆಯ ಇತಿಹಾಸ, ಆಧುನಿಕ ಚಿಕಿತ್ಸಾ ವಿಧಾನಗಳು ಮುಂತಾದ ಉಪಯುಕ್ತ ವಿಷಯಗಳ ಬಗ್ಗೆ ವಿವರವಾಗಿ ಬರೆದಿದ್ದಾರೆ. ಕೃತಿಯ ಲೇಖಕ ಡಾ. ಎಚ್. ಎಸ್. ಮೋಹನ್ ಸ್ವತಃ ನೇತ್ರ ತಜ್ಞರಾಗಿರುವುದರಿಂದ ಬರಹಕ್ಕೆ ಅಧಿಕೃತತೆ ಬಂದಿದೆ. ಕಣ್ಣುಳ್ಳವರೆಲ್ಲರೂ ತಮ್ಮ ಜೊತೆಗೆ ಇಟ್ಟುಕೊಳ್ಳಬೇಕಾದ ಪುಟ್ಟ ಕೃತಿಯಿದು.
ನವಕರ್ನಾಟಕ ಪ್ರಕಾಶನ ಹೊರತಂದಿರುವ ಈ ಕೃತಿಯ ಪುಟಗಳು 112. ಮುಖಬೆಲೆ 90 ರೂಪಾಯಿ. ಆಸಕ್ತರು ಬೆಂಗಳೂರಿನ 22392461 ದೂರವಾಣಿಯನ್ನು ಸಂಪರ್ಕಿಸಬಹುದು