ಮೇ1 ರಿಂದ 5 ನಗರಗಳಲ್ಲಿ ಪ್ರತಿದಿನವೂ ಇಂಧನ ಬೆಲೆಯಲ್ಲಿ ಬದಲಾವಣೆ ?

ಹೊಸದಿಲ್ಲಿ, ಎ.12: ಪೆಟ್ರೋಲ್ ಹಾಗೂ ಡೀಸೆಲ್ ದರಗಳನ್ನು ಮೇ 1ರಿಂದ ಅಂತಾರಾಷ್ಟ್ರೀಯ ಮಾರುಕಟ್ಟೆಗಳ ತೈಲ ದರಗಳಿಗೆ ಅನುಗುಣವಾಗಿ ಪ್ರತಿ ದಿನವೂ ಪರಿಷ್ಕರಿಸಲು ಸರಕಾರಿ ಸ್ವಾಮ್ಯದ ತೈಲ ಸಂಸ್ಥೆಗಳು ನಿರ್ಧರಿಸಿವೆ.

ದೇಶದಲ್ಲಿ ಶೇ.95ಕ್ಕೂ ಅಧಿಕ ಅಂದರೆ ಸುಮಾರು 58 ಸಾವಿರ ಪೆಟ್ರೋಲ್ ಬಂಕ್‌ಗಳನ್ನು ಹೊಂದಿರುವ ಸರಕಾರಿ ಸ್ವಾಮ್ಯದ ತೈಲ ಮಾರಾಟ ಸಂಸ್ಥೆಗಳಾದ ಇಂಡಿಯನ್ ಆಯಿಲ್ (ಐಓಸಿ), ಭಾರತ್ ಪೆಟ್ರೋಲಿಯಂ ಕಾರ್ಪೊರೇಶನ್ ಲಿ.(ಎಚ್‌ಪಿಸಿಎಲ್), ಮೇ 1ರಿಂದ ಐದು ಆಯ್ದ ನಗರಗಳಲ್ಲಿ ದೈನಂದಿನ ದರ ಪರಿಷ್ಕರಣೆಯ ಪೈಲಟ್ ಕಾರ್ಯಕ್ರಮವನ್ನು ಜಾರಿಗೊಳಿಸಲಿದೆ ಹಾಗೂ ಕ್ರಮೇಣ ಅದನ್ನು ದೇಶಾದ್ಯಂತ ವಿಸ್ತರಿಸಲಿವೆ.

ಕೇಂದ್ರ ಪೆಟ್ರೋಲಿಯಂ ಸಚಿವ ಧರ್ಮೇಂದ್ರ ಪ್ರಧಾನ್ ಹೊಸದಿಲ್ಲಿಯಲ್ಲಿ ಬುಧವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸುತ್ತಾ,'' ಮಾರುಕಟ್ಟೆಯಲ್ಲಿ ಹಸ್ತಕ್ಷೇಪ ನಡೆಸದೆ ಇರುವ ನೀತಿಗೆ ಸರಕಾರ ಬದ್ಧವಾಗಿದೆೆ'' ಎಂದರು.

ರಾಜಕೀಯದಿಂದ ಹಿಡಿದು ಅರ್ಥಿಕ ರಾಜತಾಂತ್ರಿಕತೆಯ ತನಕ, ಮಾರುಕಟ್ಟೆಯ ವಿವಿಧ ಚಲನಶೀಲತೆಯನ್ನು ಆಧರಿಸಿ ತೈಲ ದರ ನಿಗದಿಪಡಿಸಲು ಅವಕಾಶ ನೀಡಲಾಗುವುದು ಎಂದವರು ತಿಳಿಸಿದರು. ''ಆದಾಗ್ಯೂ, ತೈಲ ದರಗಳ ದೈನಂದಿನ ಪರಿಷ್ಕರಿಸುವ ತನ್ನ ನಿರ್ಧಾರವವನ್ನು ಸರಕಾರವು ತೈಲ ಕಂಪೆನಿಗಳ ಮೇಲೆ ಬಲವಂತವಾಗಿ ಹೇರುವುದಿಲ್ಲ. ಎಂದು ಸ್ಪಷ್ಟಪಡಿಸಿದ ಅವರು, ಪೆಟ್ರೋಲಿಯಂ ಉತ್ಪನ್ನಗಳ ದೈನಂದಿನ ದರ ಬದಲಾವಣೆಯ ಪದ್ಧತಿಯನ್ನು ಜಾರಿಗೊಳಿಸಬೇಕೆಂಬುದು ತಜ್ಞರ ಶಿಫಾರಸಾಗಿದೆ. ಇದರ ಸರಕಾರದ ಯಾವುದೇ ಪಾತ್ರವಿಲ್ಲ'' ಎಂದರು.

ಪೆಟ್ರೋಲ್ ಹಾಗೂ ಡೀಸೆಲ್ ದರಗಳ ದೈನಂದಿನ ಪರಿಷ್ಕರಣೆಯ ಪೈಲಟ್ ಕಾರ್ಯಕ್ರಮವು ಮೊದಲಿಗೆ ಪುದುಚ್ಚೇರಿ, ಆಂಧ್ರಪ್ರದೇಶದ ವಿಶಾಖಪಟ್ಟಣ, ರಾಜಸ್ಥಾನದ ಉದಯಪುರ, ಜಾರ್ಖಂಡ್‌ನ ಜಮಶ್ಯೆಡ್‌ಪುರ ಹಾಗೂ ಚಂಡೀಗಢಗಳಲ್ಲಿ ಜಾರಿಗೆ ಬರಲಿದೆ.

ಪ್ರಸ್ತುತ ತೈಲ ಮಾರಾಟ ಸಂಸ್ಥೆಗಳು ಸರಾಸರಿ ಅಂತಾರಾಷ್ಟ್ರೀಯ ತೈಲ ದರವನ್ನು ಆಧರಿಸಿ ಪ್ರತಿ ತಿಂಗಳ 1ನೇ ಹಾಗೂ 16ನೇ ತಾರೀಖುಗಳಲ್ಲಿ ಪೆಟ್ರೋಲ್ ದರವನ್ನು ಪರಿಷ್ಕರಿಸುತ್ತವೆ.''ತೈಲ ದರಗಳಲ್ಲಿ ದಿನಂಪ್ರತಿ ಬದಲಾವಣೆಗಳನ್ನು ಮಾಡುವುದು ತಾಂತ್ರಿಕವಾಗಿ ಸಾಧ್ಯವಿದೆ. ಆದರೆ ಅದಕ್ಕೂ ಮೊದಲು ಅದನ್ನು ಪೈಲಟ್ ಯೋಜನೆಯ ರೂಪದಲ್ಲಿ ಜಾರಿಗೊಳಿಸಬೇಕಿದೆ. ಆಗ ಅದರ ಪರಿಣಾಮಗಳನ್ನು ಅಧ್ಯಯನ ನಡೆಸಬಹುದಾಗಿದೆ. ಆನಂತರ ಈ ವ್ಯವಸ್ಥೆಯನ್ನು ದೇಶದ ಇತರ ಭಾಗಗಳಿಗೂ ವಿಸ್ತರಿಸಬಹುದಾಗಿದೆ '' ಎಂದು ಧರ್ಮೇಂದ್ರ ಪ್ರಧಾನ್ ತಿಳಿಸಿದರು.

ಪೆಟ್ರೋಲ್ ದರಗಳನ್ನು ಕೇಂದ್ರ ಸರಕಾರದ ನಿಯಂತ್ರಣದಿಂದ ಜೂನ್ 2010ರಲ್ಲಿ ಮುಕ್ತಗೊಳಿಸಲಾಗಿದ್ದರೆ, 2014ರ ಅಕ್ಟೋಬರ್‌ನಲ್ಲಿ ಡೀಸೆಲ್ ದರಗಳನ್ನು ಅನಿಯಮಿತಗೊಳಿಸಲಾಗಿತ್ತು.

ಪೆಟ್ರೋಲ್ ದರ ಡೀಸೆಲ್ ದರಗಳನ್ನು ಎಪ್ರಿಲ್ 1ರಂದು ಕೊನೆಯ ಬಾರಿಗೆ ಪರಿಷ್ಕರಿಸಲಾಗಿದ್ದು, ಕ್ರಮವಾಗಿ ಲೀಟರ್‌ಗೆ 3.77 ರೂ. ಹಾಗೂ ಡೀಸೆಲ್ ದರವನ್ನು 2.91 ರೂ. ಇಳಿಕೆ ಮಾಡಲಾಗಿತ್ತು.