ಕದ್ರಿ ಪಾರ್ಕ್ ರಸ್ತೆಯಲ್ಲಿ ಕಲಾವಿದರ ಕುಂಚ ವೈಭವ!

ಮಂಗಳೂರು, ಎ. 15: ಕದ್ರಿ ಪಾರ್ಕ್ ರಸ್ತೆಯ ಇಕ್ಕೆಲಗಳಲ್ಲಿ ನಗರದ ಕಲಾವಿದರ ಕುಂಚ ಕಲಾವೈಭವ ತೆರೆದುಕೊಂಡಿದೆ. ಕುಡ್ಲ ಕಲಾ ಮೇಳದ ಹೆಸರಿನಲ್ಲಿ ನಡೆಯುತ್ತಿರುವ ಎರಡು ದಿನಗಳ ಕಲಾ ಪ್ರದರ್ಶನದಲ್ಲಿ 150ಕ್ಕೂ ಅಧಿಕ ಮಳಿಗೆಗಳಲ್ಲಿ ಕಲಾವಿದರು ತಮ್ಮ ಕುಂಚ ಪ್ರತಿಭೆಯನ್ನು ಪ್ರದರ್ಶಿಸಿಸುತ್ತಿದ್ದಾರೆ.

ಕರಾವಳಿ ಚಿತ್ರಕಲಾ ಚಾವಡಿ ಮತ್ತು ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಸಹಯೋಗದಲ್ಲಿ ನಡೆಯುತ್ತಿರುವ ಈ ‘ಕುಡ್ಲ ಕಲಾ ಮೇಳ’ದಲ್ಲಿ ಚಿತ್ರಕಲೆಯ ವಿಭಿನ್ನ ಮಾದರಿಗಳೊಂದಿಗೆ ಇಲ್ಲಿ ಪ್ರತಿಷ್ಠಾಪನಾ ಕಲೆಗಳನ್ನೂ ಕಲಾರಸಿಕರು ವೀಕ್ಷಿಸಬಹುದಾಗಿದೆ. ಸುಮಾರು 200ಕ್ಕೂ ಕಲಾವಿದರ ಸಮಾಗಮದ ಜತೆಯಲ್ಲಿ ಇಲ್ಲಿ ಸುಮಾರು 6000ಕ್ಕೂ ಅಧಿಕ ಭಿನ್ನ ವಿಭಿನ್ನ ಚಿತ್ರಗಳು ಪ್ರದರ್ಶಿಸಲ್ಪಡುತ್ತಿವೆ.

ಜಲವರ್ಣ, ತೈಲವರ್ಣ, ಅಕ್ರೆಲಿಕ್, ಕ್ರೆಯಾನ್ಸ್, ಬಣ್ಣದ ಪೆನ್ಸಿಲ್, ಚಾರ್ಕೊಲ್ ಮೊದಲಾದ ಮಾಧ್ಯಮಗಳಲ್ಲಿ ಕಲಾವಿದರು, ಕಲಾ ವಿದ್ಯಾರ್ಥಿಗಳು ರಚಿಸಿರುವ ಚಿತ್ರಕಲೆಗಳು ಇಲ್ಲಿವೆ.

ಏನಿದು ಪ್ರತಿಷ್ಠಾಪನಾ ಕಲೆ

ಪ್ರಕೃತಿಯಲ್ಲಿರುವ ವಸ್ತುವಿಗೆ ಕಲಾವಿದ ಕಲಾತ್ಮಕ ಸ್ಪರ್ಶವನ್ನು ನೀಡುವ ಕಲಾ ಪ್ರಕಾರವೇ ಪ್ರತಿಷ್ಠಾಪನಾ ಕಲೆ ಎನ್ನುತ್ತಾರೆ ಖ್ಯಾತ ಕಲಾವಿದ, ಪರಿಸರ ಪ್ರೇಮಿ ಹಾಗೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತೀಯ ಬುಡಕಟ್ಟು ಜನಾಂಗದವರ ಕಲೆಯನ್ನು ಪ್ರಚಾರ ಪಡಿಸಿರುವ ದಿನೇಶ್ ಹೊಳ್ಳ.

ಕಲ್ಲು, ಮರ ಸೇರಿದಂತೆ ಪ್ರಕೃತಿದತ್ತವಾದ ವಸ್ತುಗಳಲ್ಲಿ ತಮ್ಮ ಕಲಾ ಪ್ರತಿಭೆಯನ್ನು ಈ ಪ್ರತಿಷ್ಠಾಪನಾ ಕಲೆಯ ಮೂಲಕ ಕಲಾವಿದರು ಪ್ರದರ್ಶಿಸುತ್ತಾರೆ. ಈ ಪ್ರತಿಷ್ಠಾಪನಾ ಕಲೆಯ ಪ್ರಮುಖ ಸಂಕೇತವಾಗಿ ಕರಾವಳಿ ಚಿತ್ರಕಲಾ ಚಾವಡಿಯಿಂದ ರಚಿಸಲಾಗಿರುವ ಬೃಹತ್ ಗೀಜಗನ ಗೂಡು ಕಲಾ ಮೇಳದಲ್ಲಿ ಗಮನ ಸೆಳೆಯುತ್ತಿದೆ.

ಜಿಲ್ಲೆಯಲ್ಲಿ ಭತ್ತದ ಕೃಷಿ ಮರೆಯಾಗುತ್ತಿರುವ ಈ ಸಂದರ್ಭದಲ್ಲಿ ಗೀಜನ ಹಕ್ಕಿಯ ಗೂಡು ಹೆಣೆಯುವ ಕಲಾನೈಪುಣ್ಯವನ್ನು ಕಲಾವಿದರು ಬೈಹುಲ್ಲಿನ ಮೂಲಕ ತೋರ್ಪಡಿಸಿದ್ದಾರೆ. ಈಗಾಗಲೇ ಈ ಗೀಜನ ಗೂಡು ನಗರದ ಮಾಲ್‌ಗಳಲ್ಲಿ ಪ್ರದರ್ಶಿಸಲ್ಪಟ್ಟಿದ್ದು, ಇದೀಗ ಕುಡ್ಲ ಕಲಾ ಮೇಳದಲ್ಲಿಯೂ ಆಕರ್ಷಣೆಯ ಕಲಾಕೃತಿಯಾಗಿದೆ.

ಇದಲ್ಲದೆ ಪ್ರದರ್ಶನದಲ್ಲಿ ವ್ಯಂಗ್ಯಚಿತ್ರ ಪ್ರದರ್ಶನ ಗೋಪಾಡ್ಕರ್ ಅವರ ಸ್ವರೂಪ ಅಧ್ಯಯನ ಕೇಂದ್ರದ ಮಕ್ಕಳಿಂದ ವರ್ಣ ಸ್ವರೂಪ ಕಲಾಪ್ರಕಾರಗಳೂ ಪ್ರದರ್ಶನಗೊಳ್ಳಲಿವೆ.

‘ಕುಡ್ಲ ಕಲಾಮೇಳ’ಕ್ಕೆ ಶನಿವಾರ ಮಂಗಳೂರು ದಕ್ಷಿಣ ಕ್ಷೇತ್ರದ ಶಾಸಕ ಜೆ.ಆರ್.ಲೋಬೊ ಚಾಲನೆ ನೀಡಿದರು.

ನೂರಾರು ಕಲಾವಿದರನ್ನು ಒಂದೆಡೆ ಸೇರಿಸುವ ಮೂಲಕ ಅವರ ಪ್ರತಿಭೆ ಅನಾವರಣಕ್ಕೊಂದು ಅವಕಾಶ ಕಲ್ಪಿಸಲಾಗಿದೆ. ಸಂಘಟಕರ ಈ ನಿಟ್ಟಿನ ಪ್ರಯತ್ನ ಅಭಿನಂದನಾರ್ಹ ಎಂದವರು ಮೆಚ್ಚುಗೆ ವ್ಯಕ್ತಪಡಿಸಿದರು.

ಯುಪಿಸಿಎಲ್‌ನ ಜಂಟಿ ಅಧ್ಯಕ್ಷ ಕಿಶೋರ್ ಆಳ್ವ, ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಹಿರಿಯ ಚಿತ್ರ ಕಲಾವಿದ ಪಿ.ಎಸ್.ಪುಣಿಚಿತ್ತಾಯ, ಕರಾವಳಿ ಚಿತ್ರಕಲಾ ಚಾವಡಿಯ ಅಧ್ಯಕ್ಷ ಕೋಟಿಪ್ರಸಾದ್ ಆಳ್ವ, ಕಾರ್ಪೋರೇಟರ್ ರೂಪಾ ಡಿ ಬಂಗೇರ, ಮೂಡಾ ಅಧ್ಯಕ್ಷ ಸುರೇಶ್ ಬಳ್ಳಾಲ್, ಡಾ.ರಾಜೇಶ್ ಮಳಿ ಉಪಸ್ಥಿತರಿದ್ದರು.

ಚಾವಡಿಯ ಕಾರ್ಯದರ್ಶಿ ಪ್ರೊ.ಅನಂತ ಪದ್ಮನಾಭ ರಾವ್ ಪ್ರಾಸ್ತಾವಿಕವಾಗಿ ಮಾತನಾಡಿ ಸ್ವಾಗತಿಸಿದರು.

ಜಿಲ್ಲಾಧಿಕಾರಿ ಕಟ್ಟಡ ಸ್ಥಳಾಂತರಗೊಂಡರೆ ಚಿತ್ರಕಲಾ ಚಾವಡಿ ಆರಂಭ!

ಮಂಗಳೂರಿನಲ್ಲಿ ಕಲೆಯ ಅಭಿರುಚಿ ಉಳ್ಳವರು ಸಾಕಷ್ಟು ಪ್ರಮಾಣದಲ್ಲಿದ್ದಾರೆ. ಈಗಿನ ಜಿಲ್ಲಾಧಿಕಾರಿ ಕಚೇರಿ ಕಟ್ಟಡ ಪಡೀಲ್‌ಗ್ ಸ್ಥಳಾಂತರಗೊಂಡ ಬಳಿಕ ಹಳೆಯ ಜಿಲ್ಲಾಧಿಕಾರಿ ಕಟ್ಟಡದಲ್ಲಿ ಚಿತ್ರಕಲಾ ಚಾವಡಿ ಆರಂಭಿಸಲು ಚಿಂತನೆ ನಡೆಸಲಾಗಿದೆ. ಕಲಾವಿದರಿಗೆ ಒಂದು ನೆಲೆ ಕಲ್ಪಿಸಬೇಕಾದ್ದು ಅತಿ ಅವಶ್ಯ. ಇಲ್ಲಿನ ಪ್ರವಾಸೋದ್ಯಮ ಅಭಿವೃದ್ಧಿ ದೃಷ್ಠಿಯಿಂದಲೂ ಇಂತಹ ಕಾರ್ಯಗಳು ಆಗಬೇಕಿದೆ. ಗಾಳಿಪಟ ಉತ್ಸವದಂತೆ ಮುಂದೆ ಕಲಾ ಉತ್ಸವ ಇನ್ನಷ್ಟು ಪ್ರಚಾರ ಪಡೆಯುವತ್ತ ಹೆಚ್ಚಿನ ಆದ್ಯತೆ ನೀಡಲಾಗುವುದು ಎಂದು ಶಾಸಕ ಜೆ.ಆರ್. ಲೋಬೊ ಹೇಳಿದರು.

ಪಡೀಲ್‌ನಲ್ಲಿ ನೂತನ ಜಿಲ್ಲಾಧಿಕಾರಿ ಕಚೇರಿ ಹಿನ್ನೆಲೆಯಲ್ಲಿ ಮರಗಳನ್ನು ಕಡಿಯಲಾಗುತ್ತದೆ, ಇದಕ್ಕೆ ಅವಕಾಶ ಕಲ್ಪಿಸಬಾರದು ಎಂದು ಕೆಲವು ಪರಿಸರ ಪ್ರೇಮಿಗಳು ಕೋರ್ಟ್ ಮೆಟ್ಟಿಲೇರಿದ್ದು, ತಮ್ಮ ಕೇಸನ್ನು ಹಿಂಪಡೆದರೆ ಈಗಿನ ಜಿಲ್ಲಾಧಿಕಾರಿ ಕಚೇರಿ ಕಟ್ಟಡವನ್ನು ಅನ್ಯ ಕಾರ್ಯಗಳಿಗೆ ಬಳಸಿಕೊಳ್ಳಲು ಸಾಧ್ಯವಾಗುತ್ತದೆ. ಚಿತ್ರಕಲಾ ಚಾವಡಿಯ ರಚನೆಯೂ ಆಗಲಿದೆ. ಕಟ್ಟಡಕ್ಕೆ ಮರಗಳನ್ನು ಕಡಿದರೆ ಅಷ್ಟೇ ಪ್ರಮಾಣದ ಗಿಡಗಳನ್ನು ನೆಟ್ಟು ಪೋಷಿಸಬಹುದು. ಅಭಿವೃದ್ಧಿಯ ದೃಷ್ಟಿಯಿಂದ ಕೆಲವೊಂದು ಬದಲಾವಣೆಗಳೂ ಆಗಲೇಬೇಕಿದೆ ಎಂದವರು ಹೇಳಿದರು.