ಹಿಂಸಾಚಾರ : ಬಿಜೆಪಿ ಸಂಸದನ ವಿರುದ್ಧ ಎರಡು ಪ್ರಕರಣ ದಾಖಲು
ಲಕ್ನೋ,ಎ.22: ಗುರುವಾರ ಉತ್ತರ ಪ್ರದೇಶದ ಸಹರಾನ್‌ಪುರದಲ್ಲಿ ಎರಡು ಸಮುದಾಯಗಳ ನಡುವಿನ ಘರ್ಷಣೆಗಳಿಗೆ ಸಂಬಂಧಿಸಿದಂತೆ ಬಿಜೆಪಿಯ ಲೋಕಸಭಾ ಸದಸ್ಯ ರಾಘವ ಲಖನಪಾಲ್ ಮತ್ತು ಇತರ 12 ಜನರ ವಿರುದ್ಧ ಎರಡು ಪ್ರಕರಣಗಳನ್ನು ಪೊಲೀಸರು ದಾಖಲಿಸಿಕೊಂಡಿದ್ದಾರೆ.
ಸಹರಾನ್‌ಪುರದಲ್ಲಿ ಈ ಹಿಂದೆ ಅಂಬೇಡ್ಕರ ಜಯಂತಿ ಮೆರವಣಿಗೆಗಳ ಸಂದರ್ಭದಲ್ಲಿ ಎರಡು ಸಮುದಾಯಗಳ ನಡುವೆ ಹಿಂಸಾಚಾರಗಳು ನಡೆದಿರುವ ಹಿನ್ನೆಲೆಯಲ್ಲಿ ಪ್ರದೇಶದಲ್ಲಿ ಹಲವಾರು ವರ್ಷಗಳಿಂದ ಮೆರವಣಿಗೆಗಳನ್ನು ನಿಷೇಧಿಸಲಾಗಿದೆ. ಗುರುವಾರ ಸಂಸದ ಲಖನಪಾಲ್‌ಗೆ ನಿಕಟವಾಗಿರುವ ಜನರ ಗುಂಪೊಂದು ಈ ವರ್ಷದ ಅಂಬೇಡ್ಕರ್ ಜಯಂತಿಯ ಅಂಗವಾಗಿ ಮೆರವಣಿಗೆ ಹೊರಡಿಸಬೇಕೆಂದು ಒತ್ತಾಯಿಸಿತ್ತು ಮತ್ತು ಇದು ಘರ್ಷಣೆಗಳಿಗೆ ನಾಂದಿ ಹಾಡಿತ್ತು. ಮೆರವಣಿಗೆಗೆ ಪೊಲೀಸರು ಅನುಮತಿ ನಿರಾಕರಿಸಿದ್ದರಿಂದ ಲಖನ್‌ಪಾಲ್ ತನ್ನ ಬೆಂಬಲಿಗರೊಂದಿಗೆ ಸಹರಾನ್‌ಪುರ ಪೊಲೀಸ್ ಮುಖ್ಯಸ್ಥ ಲವ ಕುಮಾರ್ ಅವರ ನಿವಾಸಕ್ಕೆ ಜಾಥಾದಲ್ಲಿ ತೆರಳಿದ್ದು, ಈ ಸಂದರ್ಭ ಗುಂಪು ಅಲ್ಲಿಯ ಸಿಸಿಟಿವಿ ಕ್ಯಾಮರಾಕ್ಕೆ ಹಾನಿಯನ್ನುಂಟು ಮಾಡಿತ್ತು.
ಲವ ಕುಮಾರ್ ನಿವಾಸದ ಮೇಲಿನ ದಾಳಿಯನ್ನು ದುರದೃಷ್ಟಕರ ಎಂದು ಹೇಳಿರುವ ದಿಲ್ಲಿಯ ಐಪಿಎಸ್ ಅಧಿಕಾರಿಗಳ ಸಂಘವು, ಇಂತಹ ಘಟನೆಗಳು ಅಧಿಕಾರಿಗಳ ನೈತಿಕ ಸ್ಥೈರ್ಯವನ್ನು ಉಡುಗಿಸುತ್ತವೆ, ಅವರ ಕುಟುಂಬಗಳನ್ನು ಭೀತಿಗೆ ತಳ್ಳುತ್ತವೆ. ಸರಕಾರವು ಪೊಲೀಸರ ಸ್ಥೈರ್ಯವನ್ನು ಎತ್ತಿ ಹಿಡಿಯುತ್ತದೆ ಎಂದು ಆಶಿಸುತ್ತೇವೆ ಎಂದಿದೆ.
ಬಿಜೆಪಿ ಕಾರ್ಯಕರ್ತರು ದಾಳಿ ನಡೆಸಿದಾಗ ನನ್ನ ಮಕ್ಕಳು ಮತ್ತು ಕೆಲವು ಅತಿಥಿಗಳು ಮನೆಯಲ್ಲಿದ್ದರು. ಅವರು ಸಹಜವಾಗಿಯೇ ಗಾಬರಿಗೊಂಡಿದ್ದರು ಎಂದು ಲವ ಕುಮಾರ್ ಸುದ್ದಿಗಾರರಿಗೆ ತಿಳಿಸಿದರು. ಶುಕ್ರವಾರ ಜಿಲ್ಲೆ ಶಾಂತಿಯುತವಾಗಿದ್ದರೂ,ಪರಿಸ್ಥಿತಿ ಬೂದಿ ಮುಚ್ಚಿದ ಕೆಂಡದಂತಿದೆ.
ಲಖನ್‌ಪಾಲ್ ಅಂಬೇಡ್ಕರ್ ಜಯಂತಿಯ ಮೆರವಣಿಗೆಗೆ ಅನುಮತಿ ಕೋರಿದಾಗ ಜಿಲ್ಲಾಡಳಿತ ನಿರಾಕರಿಸಿತ್ತು. ಆದರೆ ಇದನ್ನು ಲೆಕ್ಕಿಸದೆ ಅವರು ಮೆರವಣಿಗೆಯನ್ನು ನಡೆಸಿದ್ದರು. ಮೊದಲ ಕಲ್ಲು ತೂರಾಟ ನಡೆಸಿದ್ದು ಯಾರು ಎನ್ನುವುದು ಯಾರಿಗೂ ತಿಳಿದಿಲ್ಲವಾದರೂ ಉಭಯ ಸಮುದಾಯಗಳು ಆರೋಪ-ಪ್ರತ್ಯಾರೋಪಗಳಲ್ಲಿ ತೊಡಗಿದ್ದು, ಶೀಘ್ರವೇ ಉಭಯ ಸಮುದಾಯಗಳ ನಡುವೆ ಕಲ್ಲು ತೂರಾಟ ಆರಂಭಗೊಂಡಿತ್ತು.
ಗೋಲಿಬಾರ್ ಕೂಡ ನಡೆದಿತ್ತು ಎಂದು ಕೆಲವರು ಹೇಳುತ್ತಿದ್ದರೂ, ಮೀರತ್ ಐಜಿ ಆನಂದ ಕುಮಾರ ಅವರು, ಅಂತಹ ಸುದ್ದಿ ಈವರೆಗೆ ತನ್ನ ಕಿವಿಗೆ ಬಿದ್ದಿಲ್ಲ. ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಜರುಗಿಸುವುದಾಗಿ ತಾನು ಭರವಸೆ ನೀಡುತ್ತೇನೆ ಎಂದು ಹೇಳಿದರು.
ಅಂಬೇಡ್ಕರ್ ಜಯಂತಿಯ ಅಂಗವಾಗಿ ಶಾಂತಿಯುತವಾಗಿ ಮೆರವಣಿಗೆ ನಡೆಯುತ್ತಿದ್ದಾಗ ಗುಂಪೊಂದು ದಾಳಿ ನಡೆಸಿತ್ತು. ಸಂಸದರೂ ಘಟನೆಯಲ್ಲಿ ಗಾಯಗೊಂಡಿದ್ದಾರೆ ಎಂದು ಲಖನಪಾಲ್ ಅವರ ವಕ್ತಾರರು ಸುದ್ದಿಸಂಸ್ಥೆಗೆ ತಿಳಿಸಿದರು. ಹಿಂಸಾಚಾರದಲ್ಲಿ ಸುಮಾರು 300 ಜನರು ಭಾಗಿಯಾಗಿದ್ದು, ಅವರನ್ನು ಗುರುತಿಸಲು ಪ್ರಯತ್ನಗಳು ನಡೆಯುತ್ತಿವೆ ಎಂದು ಪೊಲೀಸರು ತಿಳಿಸಿದರು.
