ಮುಂಬೈ ಆಸ್ಪತ್ರೆಗೆ ‘ಭಾರವಾದ’ ಈಜಿಪ್ಟ್ ಮಹಿಳೆ

ಮುಂಬೈ,ಎ.25 : ವಿಶ್ವದ ಅತ್ಯಂತ ಭಾರವಾದ ಮಹಿಳೆ ಈಜಿಪ್ಟ್ ದೇಶದ ಇಮಾನ್ ಅಹ್ಮದ್ (36) ಎಂಬವಳಿಗೆ ನಗರದ ಆಸ್ಪತ್ರೆಯೊಂದರಲ್ಲಿ ಚಿಕಿತ್ಸೆ ನೀಡುತ್ತಿರುವ ವೈದ್ಯರ ಪ್ರಕಾರ ಆಕೆ ಶಸ್ತ್ರಕ್ರಿಯೆಯ ಬಳಿಕ ಬಹಳಷ್ಟು ತೂಕ ಕಳೆದುಕೊಂಡಿದ್ದರೆ, ಇದೀಗ ಆಕೆಯ ಸಹೋದರಿ ಶೈಮಾ ಸಲೀಂ ಆಸ್ಪತ್ರ್ರೆಯ ಸರ್ಜನ್ ಮುಫ್ಫಝಲ್ ಲಕ್ಡವಾಲ ಹಾಗೂ ಆಸ್ಪತ್ರೆಯನ್ನು ‘ಸುಳ್ಳುಗಾರರು’ ಎಂದು ಜರಿದಿದ್ದು ಅವರು ಇಮಾನ್ ಳ ಮೆದುಳಿನ ಕಾರ್ಯಚಟುವಟಿಕೆಗಳನ್ನು ನಿಲ್ಲಿಸಲು ಆಕೆಗೆ ಭಾರೀ ಔಷಧಿಗಳನ್ನು ನೀಡಿದ್ದಾರೆಂದು ಆರೋಪಿಸಿದ್ದಾರೆ.

ಈಜಿಪ್ಟ್ ನಲ್ಲಿ ಯಾವುದೇ ಆಸ್ಪತ್ರೆ ಉಚಿತ ವೈದ್ಯಕೀಯ ಸೌಲಭ್ಯಗಳನ್ನು ಒದಗಿಸುವುದಿಲ್ಲವಾದುದರಿಂದ ಇಮಾನ್ ಳನ್ನು ಆಸ್ಪತ್ರೆಯಿಂದ ಬಿಡುಗಡೆಗೊಳಿಸುವುದನ್ನು ವಿಳಂಬಗೊಳಿಸಲು ಕುಟುಂಬ ಹೂಡಿದ ತಂತ್ರ ಇದಾಗಿದೆ ಎಂದು ಆಸ್ಪತ್ರೆ ಹೇಳುತ್ತಿದೆ.

ಮುಂಬೈಯ ಸೈಫೀ ಆಸ್ಪತ್ರೆಯ ಪ್ರಕಾರ ಆಸ್ಪತ್ರೆಯು ಇಮಾನ್ ಳ ಪ್ರಯಾಣ, ಚಿಕಿತ್ಸೆ ಹಾಗೂ ಶಸ್ತ್ರಕ್ರಿಯೆಗೆ ರೂ 2 ಕೋಟಿಗಿಂತಲೂ ಅಧಿಕ ವೆಚ್ಚ ಮಾಡಿದ್ದು ಈ ಕಾರ್ಯಕ್ಕೆ ವಿಶ್ವದ ವಿವಿಧೆಡೆಗಳಿಂದ ದೇಣಿಗೆ ಸಂಗ್ರಹಿಸಲಾಗಿದೆ.

ಇಮಾನ್ ಆಸ್ಪತ್ರೆಯ ತನ್ನ ಕೋಣೆಯಲ್ಲಿ ಟಿವಿ ವೀಕ್ಷಿಸುತ್ತಿರುವ ಫೋಟೋವೊಂದನ್ನು ಆಸ್ಪತ್ರೆಯ ವೈದ್ಯರು ಸೋಮವಾರ ಶೇರ್ ಮಾಡಿದ್ದರೆ ಇದೀಗ ಶೈಮಾಳ ಹೇಳಿಕೆ ಎಲ್ಲರಿಗೆ ಆಘಾತ ನೀಡಿದೆ.

ಇಮಾನ್ 240ರಿಂದ 260 ಕೆಜಿ ತನಕ ತೂಕ ಕಳೆದುಕೊಂಡಿದ್ದಾಳೆಂದು ಆಸ್ಪತ್ರೆಯ ವೈದ್ಯರು ಹೇಳಿದ್ದರೆ ಶೈಮಾ ಇದನ್ನೂ ನಿರಾಕರಿಸಿದ್ದಾರೆ.

‘‘ಆಕೆ ಬಹಳಷ್ಟು ಅಸೌಖ್ಯದಿಂದಿದ್ದಾಳೆ. 10 ದಿನಗಳ ಹಿಂದೆ ಆಕೆಗೆ ತ್ರೊಂಬೋಸಿಸ್ ಆಗಿತ್ತು. ಹೀಗಾಗುತ್ತಿರುವುದು ಇದು ಎರಡನೇ ಬಾರಿ’’ ಎಂದು ವೀಡಿಯೋವೊಂದರಲ್ಲಿ ಶೈಮಾ ಹೇಳುತ್ತಿರುವುದು ದಾಖಲಾಗಿದೆ. ಇಮಾನ್ ಗೆ ಟ್ಯೂಬ್ ಮುಖಾಂತರ ಆಹಾರ ನೀಡಲಾಗುತ್ತಿರುವುದರಿಂದ ಆಕೆಗೆ ಮಾತನಾಡಲು ಅಥವಾ ಉಸಿರಾಟ ನಡೆಸಲು ಕಷ್ಟವಾಗುತ್ತಿದೆಯೆಂದೂ ಆಕೆ ಆರೋಪಿಸಿದ್ದಾರೆ. ‘‘ಆಸ್ಪತ್ರೆಯಲ್ಲಿ ಶೈಮಾಳಂಥವರಿಗೆ ಚಿಕಿತ್ಸೆ ನೀಡಲು ಸೂಕ್ತ ವ್ಯವಸ್ಥೆಯಿಲ್ಲ. ಇಲ್ಲಿನ ಮಂದಿ ಕೇವಲ ಪ್ರಚಾರ ಪ್ರಿಯರಾಗಿದ್ದಾರೆ,’’ ಎಂದೂ ಶೈಮಾ ದೂರಿದ್ದಾರೆ.

ಆಸ್ಪತ್ರೆಯ ಸರ್ಜನ್ ಡಾ ಮುಫ್ಫಝಲ್ ಲಕ್ಡವಾಲ ಮಾತ್ರ ಶೈಮಾಳ ಎಲ್ಲಾ ಆರೋಪಗಳನ್ನು ನಿರಾಕರಿಸುತ್ತಾರೆ. ‘‘ನಾವು ಆಕೆಗಾಗಿ ಭಾರೀ ಶ್ರಮ ಪಟ್ಟಿರುವಾಗ ಈಗ ಆಕೆಯ ಕುಟುಂಬದ ಆರೋಪಗಳು ನಮ್ಮ ಪ್ರಾಮಾಣಿಕತೆಯನ್ನೇ ಪ್ರಶ್ನಿಸುತ್ತಿದೆ’’ ಎಂದು ಅವರು ಖೇದ ವ್ಯಕ್ತಪಡಿಸುತ್ತಾರೆ.

ಆದರೆ ಇಂತಹ ಆರೋಪಗಳಿಂದ ನಾವು ನಮ್ಮಲ್ಲಿರುವ ರೋಗಿಗೆ ಚಿಕಿತ್ಸೆ ನೀಡುವುದನ್ನು ತಡೆಯುವುದಿಲ್ಲ, ನಾವು ಚಿಕಿತ್ಸೆ ಮುಂದುವರಿಸುತ್ತೇವೆ,’’ ಎಂದು ಆಸ್ಪತ್ರೆಯ ಸಿಇಒ ಹುಝೈಬಾ ಶೆಹಾಬಿ ಹೇಳುತ್ತಾರೆ.